Te maˈi tie niho, e roohia anei oe?

E ROOHIA te rahiraa taata na te ao nei i tera maˈi. Eita e ite-oioi-hia te mau tapao, e mea atâta roa râ te maˈi tie niho. Ia au i te tahi vea, o teie te maˈi i roto i te vaha e “haafifi mau i te ea o te taata.” Te faaite-atoa-hia ra e “e mauiui, e hepohepo, e paruparu vetahi mero o te tino e e taui te oraraa o te taata e pǔpǔ taata” no tera maˈi. E nehenehe teie tumu parau e tauturu atu ia haapao maitai ia ore oe e roohia i te maˈi tie niho.

Ta te maˈi tie niho e faatupu

E rave rau tuhaa o te maˈi tie niho. I te tuhaa matamua, e uteute roa te tie niho e e tahe atoa mai paha te toto ia purumuhia te niho, ia tatarahia te toetoea maa aore ra mai tera noa. I muri aˈe i te tahi hiˈopoaraa, ia itehia e te tahe ra te toto na roto mai, e tapao tera e e ua haamata to oe tie i te ino.

I roto i te tahi atu tuhaa o te maˈi tie niho, e fifihia te tapea ra i te mau niho mai te ivi e te iri o te tie, e haamata hoi te reira i te ino. E ite-noa-hia te mau tapao ia rahi roa tera maˈi. E oruoru hoi te reira, e topa e e area te mau niho, e hauˈa ino te vaha, e moe rii noa te iri o te tie i roto i te mau area o te mau niho. Ia hiˈohia e au e mea roa aˈe te niho e e tahe noa mai te toto.

Te tumu e te faahopearaa o te maˈi tie niho

E roohia te taata i teie maˈi no te mau tumu e rave rau. I te rahiraa o te taime, no te tahi tapoi ino huˈa roa e piri tamau i nia i te mau niho te tumu. Ia ore te reira e tatarahia, e oru te tie. E ia vaiiho-noa-hia te reira, e area te tupu i rotopu i te tie e te niho e e ô tera ino i roto. I tera taime, e tuinohia te ivi e te iri o te tie. E nehenehe tera tapoi ino i roto e i rapae e paari a riro atu ai mai te tahi mea uouo tei au i te huˈa puˈa. E î roa te reira i te mea iino e e ere i te mea ohie ia tatara i te reira, e mea paari hoi e e piri atoa i nia i te mau niho. I reira, e ino roa ˈtu â te tie.

E roo-atoa-hia te tahi taata i te maˈi tie niho ia ore oia e tamâ maitai i roto i to ˈna vaha, ia amu oia i te raau e tuino i te parururaa o te tino, ia ô te tirotiro i roto i to ˈna tino, ia hepohepo oia, e maˈi omaha tihota anaˈe to ˈna, ia inu hua oia i te ava, ia puhipuhi i te avaava e no te vahine ia taui to ˈna huru a hapû ai.

E mauiui oe aore ra e topa to oe mau niho no teie maˈi. E mea fifi atoa paha ia auau e ia aminamina i te maa. Peneiaˈe, e taiâ oe i te paraparau aore ra i te haere i mua i te taata. Ua faaite te mau hiˈopoaraa e mea maitai anaˈe te roto o te vaha o te tahi taata, e nehenehe to ˈna ea e maitai atoa.

Hiˈopoaraa e rapaauraa i te maˈi tie niho

E nafea ia ite e ua roohia oe i te maˈi tie niho? Ua ite paha oe i te mau tapao i faahitihia i roto i teie tumu parau. Mai te peu e tera iho â, a farerei i te taote niho ia hiˈopoa oia i to oe tie.

E nehenehe anei e rapaau i tera maˈi? E, ia rave-oioi-hia râ. Mai te peu e ua rahi roa, e mea faufaa ia haa oioi na mua ˈˈe te maˈi e tuino ai i te ivi e te iri e haaati ra i te mau niho. E faaohipa te mau taote niho i te mau matini taa ê no te tatara i te tapoi ino e te mea uouo tei au i te huˈa puˈa i mau i nia i to oe mau niho, i roto e i rapae i te tie.

E mea fifi anei no oe ia farerei i te taote niho? Te vai ra te tahi ravea ohie ia ore oe e roohia i teie maˈi ino mau. A tamau i te tamâ maitai i roto i to oe vaha.