Te mau moto—Mea atâta anei?

Na te papai vea a te A ara mai na! i Tapone

Te tere mǎrû noa ra o Susumu na nia i to ˈna pereoo piti huira a tâpû taue mai ai te hoê pereoo i mua ia ˈna. Te ohipa o ta ˈna i ite i muri iho, o te tapoˈi ïa o te hoê fare i te taime a pee ai oia i nia. Ua topa oia i nia i to ˈna upoo e to ˈna tapono. Te faaite ra te hoê afâ i ropu i to ˈna taupoo paari i te puai o te ûraa. Ua ora mai oia i teie ati purumu, teie râ, ua fati to ˈna avae e ua tioi mai te hoê U ra te huru.

E ere te ati o Susumu i te mea varavara. Te faahiti ra te vea The Globe and Mail no Kanada e i roto i te hoê matahiti, e 166 000 feia Marite o tei tapeahia i te fare maˈi no te mea ua û ratou e te moto. “I rotopu ia ratou, e 4 700 o tei pohe. E e rave rahi o tei riro mai ei huma no to ratou oraraa taatoa.” Te na ô râ teie vea e, i Kanada, ua tataipitihia te numera o te mau ati moto i roto i te area e hoê ahuru matahiti. E i Tapone, e 2575 taata faahoro moto o tei pohe i te matahiti 1989. I rotopu ia ratou, taa ê atu i te feia faahoro moto nainai, hau atu i te 70%, e mau taurearea anaˈe ïa i rotopu i te 16 e te 24 matahiti.

E ia faaau-anaˈe-hia teie mau numera e te mau tabula no nia i te mau ati pereoo uira? Te faaite ra te mau taiete paruru e i roto i te tahi mau fenua, i nia i te hoê â atearaa e terehia, e iva taime hau aˈe te rahiraa taata faahoro moto tei pohe i te rahiraa feia faahoro pereoo uira. Eaha te tumu o teie faito feia pohe hau aˈe? Te horoa ra te vea Consumer Reports e toru tumu: (1) Mea fifi aˈe ia ite atu i te hoê moto i te hoê pereoo uira. (2) Mea iti roa aore ra aita roa ˈtu e parururaa to te taata faahoro moto. (3) Mea haavarevare roa te huru tereraa o te hoê moto—ia hee oia, mea pinepine oia i te huri roa. Eita ïa e maerehia ia manaˈo te taata e mea atâta roa te mau moto. Aita râ vetahi e farii ra i teie manaˈo. Te parau nei ratou e te vai ra te mau paeau hoona ia faahoro i te hoê moto. Eaha to outou manaˈo?

Parau mau, mea fifi ia itea mai i te hoê faurao mama aˈe i te moto. Ua riro te mâuˈa ore o te mori ei tuhaa faahiahia roa. Te na ô ra te vea Consumer Reports e, e te hoê moto faito au noa, e nehenehe outou e tere e 25 e tae atu i te 30 kilometera e te hoê noa litera mori. Hau atu, e piti noa huira to ˈna. Teie te tahi atu mau vahi anaanatae: mea ohie ia faahoro, aita e fifi no te ite i te hoê vahi tapearaa, e mea mama aˈe oia i te hoê pereoo uira. Teie râ, mea au aˈe na te feia e maraa hoi ia ratou ia faahoro i te hoê pereoo uira moni rahi, i te moto. No te aha?

Te umeraa matamua

Te farii nei te pae rahi o te feia mea au na ratou te moto e te umeraa matamua o te mau moto, o te navenave ïa e noaa mai ia faahoro anaˈe ratou. “Peneiaˈe no to ratou maniania,” o ta te hoê taata mea au na ˈna te moto e parau ra. Te haruru o te hoê moto Beretane, te maniania puai o te hoê moto Tapone piti tere, aore ra te ooro o te hoê matini ohuraa puai e maha tere—ua riro te reira mai te upaupa nehenehe i te tariˈa o te feia mea au roa na ratou te mau moto.

Area no te tahi atu feia faahoro moto ra, mea au na ratou te tiamâraa e te mana e noaa mai. Te na ô ra te tahi e: ‘Mea navenave roa ia fafa i teie matini i raro aˈe ia oe, ia ite e e pahono o ˈna i ta oe mau faaueraa atoa aore ra ta oe aratairaa, ia piˈo i roto i te mau tipuuraa purumu e ia ite e e afai oia ia oe i ta oe vahi tapaeraa ma te peapea ore.’ Te faaara atoa râ paha teie anoiraa o te haruru, te tere puai, e te tiamâraa i to oe anaanatae. Te vai ra râ te hoê vahi atâta. E nehenehe oe e riro ei tîtî no teie navenave.

Mea atâta iho â râ no te mau taurearea. “E mehameha oe ia ite oe i te hoê faatipuuraa etaeta,” o ta te hoê melo tahito no te hoê pǔpǔ feia faahoro moto e parau ra, “tera râ, ia manuïa oe i te tere puai i roto i teie tipuuraa purumu ma te ore e hee, e horuhoru roa oe i te navenave e noaa mai. Mea au roa na ˈu na mua ˈˈe e imi i te mau tipuuraa etaeta roa ˈˈe ma te tere puai roa ˈtu â.” Te na ô ra o Yoshio, ua maamaa-roa-hia oia i te mau moto na mua ˈˈe, e: “E matau na vau i te faahoro i te moto, noa ˈtu te uâ aore ra te mahana, no te mea e faanavenave te reira ia ˈu. Mai te hoê raau taero ïa no ˈu.” Te na ô ra o Susumu, tei faahitihia i te omuaraa ra, e: “E ere vau i te mea tâua roa ahiri e e pohe anei au aore ra eita—e tia ia ˈu ia faahoro i ta ˈu moto.” No reira, aitâ te tima e tatarahia ˈtura i nia i to ˈna avae fati, ua faahoro faahou oia i te moto. Te farii ra oia e: “Ua maamaa-roa-hia vau.”

‘E tia anei ia ˈu ia faahoro i te hoê moto?’

No reira, a faito i teie mau manaˈo no te navenave e te paruru-maitai-raa ia opua anaˈe outou e faahoro i te hoê moto. E mai te peu e e kerisetiano outou o te haafaufaa ra i te hoê haava manaˈo mâ e o te faatura ra i te Bibilia, e tia ia outou ia hiˈopoa i te tahi mau irava.

Ei hiˈoraa, te faahiti ra te Maseli 6:16, 17 e hitu mea faufau i mua i te aro o Iehova. Teie te tahi, “te rima i manii ai te toto hara ore ra.” Te haapapu ra te hoê ture i horoahia i te nunaa no Iseraela tahito i te manaˈo o Iehova no nia i te haamaniiraa i te toto hapa ore. Te na ô ra te ture e: “Ua mataro râ taua puaatoro ra i te tui i mutaaihora, e ua faaitehia to ˈna ra fatu, e aore oia i tapea ia ˈna ra, e ua pohe te taata ia ˈna, e tane, e aore ra, e vahine; e tuihia taua puaa ra i te ofai, e e taparahi-atoa-hia te fatu.” (Exodo 21:29) Oia hoi te auraa, e tia ia tatou ia amo i te hopoia no te mau taoˈa o ta tatou e fatu ra.

No reira mai te peu e te opua ra outou e hoo mai i te hoê moto, nafea ïa outou ia haapao i te reira e eaha te moto o ta outou e maiti? Te hoê anei o te mau moto aravihi e te atâta atoa, o tei hamanihia no te tere puai e o tei haapohe pinepine i te taata i roto i te mau ati purumu? Mai te peu e e, e tiamâ anei outou i te utua toto ahiri e e û atu outou? Noa ˈtu e eita outou e haapepe ia vetahi ê, eaha ïa no to outou iho ora? Te faaite ra anei outou e te faatura ra outou i te ô o te ora mai te peu e e tere puai outou i te mau vahi atâta ia noaa mai te navenave?

E tano atoa teie faaueraa no nia i te hiˈopoaraa i to outou moto mai te peu e te vai ra ta outou aore ra e hoo mai outou i te tahi. E nehenehe to outou moto e riro mai te hoê ‘puaatoro maamaa’ mai te peu e eita outou e hiˈopoa tamau i te ravea tapearaa. Oia atoa, i te mau taime atoa outou e haere ai na nia i te moto, e tia ia outou ia hiˈopoa faahou i te fifi e te matini. A ara atoa ia ore outou ia faahuehue ia vetahi ê na roto i te tere-puai-raa e te maniania.

Parau mau, mai te peu e mea au roa na outou te moto, peneiaˈe mea au atoa na outou te maniania o te matini, teie râ, eita te mau taata atoa e au i te reira. Inaha, ua tae roa vetahi mau taata mea au ore roa na ratou teie maniania o tei riri roa. Te faatia ra te vea Nara Shimbun e ua taora ˈtu te hoê taata tei hae roa i Tapone, i te hoê tâpû raau i nia i te hoê taata e haere ra na nia i to ˈna moto. Ua pohe teie taurearea e 16 matahiti tei roto o ˈna i te hoê pǔpǔ feia faahoro moto. Te faaite ra te vea Asahi Shimbun e ua huti te tahi atu taata i te hoê taura na ropu i te hoê purumu tere-pinepine-hia e te feia faahoro moto. Ua mau te arapoa o te hoê taurearea faahoro moto i roto i teie taura, e ua tarîhia o ˈna e ua pohe roa oia. E i to te vea aniraa i to ˈna mau taata taio ia faaite i to ratou manaˈo no nia i te maniania o te mau moto, ua turu vetahi feia taio i te feia o tei rave i teie mau ohipa i nia i te feia faahoro moto.

Parau mau, te faahapa ra te Bibilia i teie mau ohipa hamani ino. I te tahi atu râ pae, eita e tia i te feia faahoro moto ia faahuehue atu ia vetahi ê na roto i te tereraa na roto i te mau vahi faaearaa na nia i te mau moto aita i tamauhia i nia iho te taoˈa tupohe i te maniania, mai ta vetahi mau pǔpǔ feia faahoro moto e rave ra. Inaha, te hinaaro nei tatou e pee maite i te ture ta Iesu Mesia i horoa i ta ˈna mau pǐpǐ: “E aroha ˈtu oe i to taata-tupu, mai to aroha ia oe iho na.”—Mataio 22:39.

Te hoê feruriraa paari

Te auraa anei e eita e tia ia outou ia faahoro i te hoê moto? Eita, teie râ, mea titauhia te feruriraa paari. No e rave rahi mau taata, e ravea mama, te ohie, e te au roa te moto no te tere haere. I roto râ i te tahi mau fenua, te faaohipa nei te taata i te mau moto ei ravea faaanaanataeraa manaˈo. E nehenehe te reira e riro ei ohipa au mau, a haapao maitai râ. Eiaha e vaiiho i te horuhoru o te tere vitiviti e te puai ia haapouri i to outou ara-maite-raa.

Ua taui vetahi o tei ora na no to ratou anaˈe ra moto. I teie nei, ua haamau ratou i to ratou oraraa no te faaoaoa i te Atua. Ei hiˈoraa, e matau na o Yoshio i mutaa ihora i te faahoro i te mau moto matini puai. I teie mahana, te na ô ra oia e: “Ia faahoro puai au, te faaoaoa noa ra vau ia ˈu iho. I teie nei, te oaoa nei au i te horoa ˈtu na vetahi ê na roto i te ohiparaa ei tavini kerisetiano.” I te mea e ua ite oia e eita o ˈna e nehenehe e haavî ia ˈna iho ia faahoro anaˈe oia i te hoê moto, aita o Yoshio i faaapî i ta ˈna parau faatia no te faahoro i te moto.

Te haamanaˈo ra te hoê melo tahito no te hoê pǔpǔ feia faahoro moto i Hokkaido, i Tapone e: “E matau na vau i te faahoro i te moto no te faaiteite ia ˈu. Ua topa roa vau i roto i te raau taero na roto i te mau amuimuiraa iino e te mau melo faahoro moto.” Ua haamata ˈtura oia i te feruri i nia i te oraraa no a muri aˈe. Ua hiˈopoa haere oia i roto i te mau pǔpǔ faaroo e i te pae hopea, ua itea mai ia ˈna i te parau mau na roto i te haapiiraa i te Bibilia e te mau Ite no Iehova.

E o Susumu? No ˈna ra, e ere faahou ïa te moto i te ohipa faufaa roa ˈˈe o to ˈna oraraa. Te tavini nei o Susumu, e tae noa ˈtu na feia faahoro moto toopiti i faahitihia ˈtu nei, ei tavini kerisetiano ma te taime taatoa. Ua taui te hoê o ratou i to ˈna moto puai no te hoê pereoo iti e piti huira e te faaohipa ra oia i te reira no te poro i te parau mau ia vetahi ê.

Oia mau, e nehenehe te moto e riro ei faurao maitai roa, teie râ, e tia ia faaohipa i te reira i te mau taime atoa ma te haapao maitai e ma te faatura ia vetahi ê.

[Tumu parau tarenihia i te api 12]

HAAMANAˈORAA NO TE PARURU-MAITAI-RAA O TE FEIA FAAHORO MOTO

▪ A ara i ta outou faahororaa: E titau te taviriraa, te haapuairaa, e te tapearaa i te aravihi e te ohipa-maitai-raa o te tino.

▪ Eiaha e haere i ropu i te eˈa: Mea rahi roa te mau huˈahuˈa e te mau taheraa hinu pereoo.

▪ A omono i te ahu e tano: A tuu i te taupoo paari. E paruru atoa te mau rimarima, te pereue, e te tiaa teitei ia outou.

▪ A tuama i ta outou mori ia faahoro outou: Mai te peu e e faatiahia e te mau ture purumu i roto i to outou fenua, a pata atoa i to outou mori i te ao. E itehia mai ïa outou e te tahi atu feia faahoro.

▪ A tamau i te tapiri purapura i nia i to outou taupoo paari: E itehia mai ïa outou i te po.

▪ A ara i to outou tere: Eiaha e manaˈo e e vaiiho te feia faahoro pereoo uira ia outou ia haere.

▪ Eiaha e faahoro i te moto mai te peu e ua inu outou i te ava aore ra ua rave outou i te raau taero

▪ A maiti i te hoê moto e mau ia outou ia faahoro