Te vai nei te tauturu maitai roa ˈˈe!

NO TE kerisetiano, te maitiraa i te huru utuuturaa i te taata maˈi tei tae i to ˈna hopea e ehia maororaa, e faatupu mai te reira i te mau uiraa hohonu mau. Ei hiˈoraa:

E tuea anei i te mau Papai te faaitiraa i te rave i te mau ravea atoa no te paruru i te ora? E mai te peu e au i te ture morare ia vaiihohia te taata ia pohe noa, ma te ore e utuutu uˈana ia ˈna no te haamaoro roa ˈtu i to ˈna ora, eaha ïa te tia ia parauhia no nia i te hoê ravea papu e te opua-mau-hia no te faaore i te mauiui o te taata maˈi na roto i te haapohe-vave-raa ia ˈna aore ra te faaoreraa i to ˈna ora?

I teie nei mahana e teie tau atoa, e mau uiraa faufaa mau teie. Aita râ tatou e erehia nei i te tauturu no te pahonoraa ˈtu i te reira.

Ma te tano ua parau te hoê taata papai faauruahia e: “O te Atua to matou haapuraa e to matou etaeta, e tauturu fatata ia roohia e te ati ra.” (Salamo 46:1) E parau mau atoa ïa ia tuatapapa anaˈe tatou i teie tumu parau. O te Atua ra o Iehova te pu no te tauturu paari e te ite roa ˈˈe. Ua hiˈopoa oia i te oraraa o te mau tausani mirioni taata. Ua ite oia—hau atu i te mau taote, te feia ture no nia i te toroa aore ra te mau haava—i te mea maitai aˈe. No reira e hiˈo ïa tatou i te tauturu ta ˈna e horoa mai.—Salamo 25:4, 5; Hebera 4:16.

Te hiˈoraa tano no nia i te ora

E mea maitai ia taa tatou e e ere te parururaa i te ora noa ˈtu te rahi o te moni e pau, e haapiiraa noa a te feia aravihi i te pae rapaauraa. E hotu natura te reira o te haapiiraa a teie nei ao no teie tau. No te aha ïa? Ahiri e o teie nei oraraa noa e aita ˈtu, e nehenehe ïa e manaˈohia e e tia ia paruruhia to tatou nei ora noa ˈtu te huru tupuraa e te rahi o te mau haamauˈaraa. Ua roohia râ teie huru haapiiraa a teie nei ao i te hoê tupuraa ahohaho mau i te pae utuuturaa aravihi—oia hoi, te mau taata vai mata pouri noa e na te mau matini ratou e tapea “ora” noa e rave rahi matahiti.

I te tahi aˈe pae, te vai ra te feia e tiaturi nei i te pohe-ore-raa te nephe taata. Ia au i ta ratou haapiiraa, ua riro teie oraraa ei ratere na nia i te eˈa e tapae atu ai i te vahi maitai aˈe. Ua faaite mai o Platon, te hoê o te mau taata tei faatupu i teie nei haapiiraa, i ta ˈna tiaturiraa:

“Te pohe o te huru ohipa-ore-roa-raa ïa e te ite-ore-roa-raa, aore ra, mai ta te taata e parau ra, e tauiraa ïa e e ratere te nephe mai teie nei ao e tae atu ai i te tahi atu ao. . . . Mai te peu e e tere te pohe no te haere i te tahi atu vahi, . . . eaha ˈtu ïa, E to ˈu mau hoa e mau haava, te mea hau aˈe i te reira?”

Te taata tera aˈe ta ˈna tiaturiraa e faariro oia i te pohe ei hoa no ˈna, te tia ia farii-popou-hia e peneiaˈe ia haavitivitihia. Te haapii nei râ te Bibilia, e, na Iehova e mea moˈa ïa te ora. “Tei ia oe hoi te tumu o te ora,” ta te taata papai salamo faauruahia i papai. (Salamo 36:9) E farii anei te hoê kerisetiano mau e turu atu i teie ravea te faaoreraa i te ora?

Te manaˈo ra vetahi pae e te faahiti ra te mau Papai i teie tumu parau i to te Arii Saula, tei pepe ino mau, taparuraa ˈtu i te taata hopoi mauhaa e haapohe ia ˈna. Ua faariro ratou i te reira ei faatiaraa i te faaore i te ora, te hoê ohipa opua-mau-hia no te haapohe vave i te taata o te fatata i te pohe. Ua faˈi te hoê ati Amaleka e ua farii o ˈna i te aniraa a Saula e taparahi ia ˈna. Ua faarirohia râ anei teie ohipa a te ati Amaleka ei mea maitai oia hoi te faaoreraa i to Saula mauiui? Aita roa ˈtu. Ua faaue ihora Davida ta Iehova i faatahinu, ia taparahihia teie ati Amaleka no te toto ta ˈna i haamanii. (Samuela 1, 31:3, 4; Samuela 2, 1:2-16) Aita roa ˈtu ïa teie aamu Bibilia e faatia ra i te kerisetiano ia faaore i te ora o te taata.a

Teie anei râ te auraa, e tia i te hoê kerisetiano ia rave i te mau utuuturaa aravihi roa no te faaroroa i te ora o te taata e pohe ra? E mea maitai anei ia haamarirau i te poheraa? Te haapii nei te mau Papai e ere te pohe i te hoa no te taata, e enemi râ. (Korinetia 1, 15:26) Hau atu, te pohe e ere ïa i te mauiui e ere atoa te oaoaraa i te pae varua, ua faaauhia râ i te taoto. (Ioba 3:11, 13; Koheleta 9:5, 10; Ioane 11:11-14; Ohipa 7:60) Ua taaihia te tiaturiraa no nia i te ora o tei pohe i nia i to te Atua ra puai no te faatia-faahou-raa ia ratou na roto i te arai o Iesu Mesia. (Ioane 6:39, 40) Ua papu ïa ia tatou e ua horoa te Atua i teie ite no te tauturu ia tatou: Eita e hiaaihia te pohe, e ere atoa râ i te mea titauhia ia tutava onoono noa no te faaroroaraa ˈtu i te poheraa.

Te mau aˈoraa tumu kerisetiano

Eaha te mau aˈoraa tumu ta te kerisetiano e faaohipa ia tae anaˈe tei herehia e ana i to ˈna hopea?

A tahi, ia farii tatou e mea taa ê te mau tupuraa taitahi ia tae te taata maˈi i to ˈna hopea, e ati taa ê mau, e aita e ture e tano i te taatoaraa. Hau atu, ia tupu anaˈe te reira, e tia i te kerisetiano ia ara ma te hiˈopoa maitai i te mau ture o te fenua iho. (Mataio 22:21) A haamanaˈo atoa, aita te hoê kerisetiano tei î i te aroha mau te nehenehe e faaitoito i te utuuturaa haapao ore.

Ia itehia ma te feaa ore e e maˈi pohe (mea maramarama roa te tupuraa e aita e ravea faahou) e tia ia anihia ma te hamani maitai ia faaorehia te utuuturaa aravihi no te faaroroa i te ora. I roto i teie huru tupuraa, aita e tumu tabibilia no te ani onoono i te rapaauraa aravihi o te haamarirau noa i te poheraa e piri roa maira.

Mea pinepine e mau tupuraa fifi roa te reira e e ô atoa mai te mau faaotiraa ahoaho mau. Nafea tatou e ite ai, ei hiˈoraa, e aita e ravea faahou? Aore e taata e papu roa i te reira, e tia ïa ia feruri-maitai-hia ma te farii i te mau aˈoraa paari. Te faaite ra te hoê parau rapaauraa faaararaa a te mau taote e:

“Mai te peu e aita e tuea ra te manaˈo no nia i te huru o te maˈi aore ra te ohipa e tupu i muri iho aore ra toopiti atoa ra, e tia ia faahaere-noa-hia te utuuturaa no te tapea ora noa e tae noa ˈtu i te taime e tuea maitai ai te mau manaˈo. Tera râ, ia hau atu i te maoro te onoono-noa-raa te ite-papu-roa-raa e haafifi ïa te reira i te taote no te maiti i te huru rapaauraa e au i roto i te mau tupuraa tei manaˈohia e aita e ravea faahou. Te faahitiraa varavara roa no nia i te taata hoê â huru maˈi o tei ora mai, e ere ïa te tumu ravai roa no te tamau i te rapaauraa uˈana. Eiaha teie numera iti e haafaufaa rahi roa i te ohipa e tupu mai paha i muri iho e na te reira hoi e aratai i te huru rapaauraa e ravehia.”

I roto i teie tupuraa ahoaho mau, e hinaaro iho â te kerisetiano, taata maˈi aore ra fetii, i te tauturu a te taote. Te faahope ra teie parau rapaauraa e: “Noa ˈtu eaha te huru tupuraa, e ere roa ˈtu i te mea au, te horoa faarahi i te mau haapapuraa i te pae rapaauraa e te mau faaotiraa a faarue atu ai i te taata maˈi ma te ore e horoa i te aratairaa e au no te maiti i te huru haerea oia hoi te ohiparaa aore ra te ohipa-ore-raa.”

E nehenehe atoa te mau matahiapo kerisetiano, ei mau tavini paari, e riro i te mea faufaa rahi. Parau mau, o te taata maˈi e to ˈna iho fetii te tia ia rave i te mau faaotiraa aifaito maitai i roto i teie tupuraa peapea mau.

I te pae hopea a feruri maite i teie mau manaˈo. E hinaaro iho â te kerisetiano ia vai ora noa ia nehenehe oia e tavini i te Atua. Ua papu râ ia tatou, e i roto i teie nei amuiraa o te mau mea, e aita e ravea e pohe iho â tatou; teie te auraa e taata maˈi tatou pauroa e ua fatata i te pohe. Mea na roto noa i te toto taraehara a Iesu Mesia e noaa ai ia tatou te tiaturiraa e tauihia teie huru tupuraa.—Ephesia 1:7.

Ia pohe anaˈe tei herehia e tatou, noa ˈtu te rahi o te mauiui, aita tatou i vaiihohia ma te mauiui rahi e te oto “mai te tahi pae aore o ratou tiairaa ra.” (Tesalonia 1, 4:13) Teie râ, e noaa mai te tamahanahanaraa i te mea ua rave tatou i te mea e au no te taata maˈi herehia e tatou e te ravea utuuturaa ta tatou i rave o te tauturu maitai roa ˈˈe ïa. E parau tohu oaoa râ ta tatou no ô mai i Tei faaora ia tatou i teie mau fifi atoa ia ‘haamou-anaˈe-hia taua enemi hopea ra o te pohe.’—Korinetia 1, 15:26.

Oia mau, i te pae hopea roa te tauturu maitai roa ˈˈe no te feia e fatata ra i te pohe no ô mai ïa i te Atua tei horoa i te ora no na taata matamua e o tei fafau i te tia-faahou-raa no te feia e tiaturi Ia ˈna e i ta ˈna Tamaiti, o Iesu Mesia.—Ioane 3:16; 5:28, 29.

[Nota i raro i te api]

[Hohoˈa i te api 28]

Te turu ra anei te poheraa o Saula i te ravea e faaore i te ora?