Te papai mai nei te feia taio

Te paraparauraa Mauruuru no te numera ra “Te paraparauraa: Nafea ia ape i te mauiui.” (8 no tiunu 1991) Ua tae mai oia i te taime iho e hinaaro ai au. Ua peapea vau e te hoê tamahine o ta ˈu hoi i manaˈo e e hoa oia no ˈu e o tei faaino ia ˈu i muri mai i to ˈu tua. Ua tauturu mau â ta outou mau tumu parau ia ˈu ia taa e ia faaruru i te fifi.

M. P., Fenua marite

Te peu faahinaaro Te tae tamau mai nei ta ˈu mau vea A ara mai na! Teie râ, i roto i ta outou tumu parau “Te uiui nei te mau taurearea . . . Eaha te inoraa ia faahinaaro?” (8 no me 1991) te manaˈo nei au e mea etaeta roa outou. Aita hoi e ino ia ani atu taua tamaroa ra ia Sarah ia haere mai e parahi i pihai iho ia ˈna. Auê hoi e, eaha te ino ia ata noa ˈtu i te hoê tamaroa aore ra i te hoê tamahine? E tia anei ïa ia tapiri i to ˈna niho mai te mea ra e te parau atura tatou e: ‘Eiaha e tapiri mai!’

W. T., Fenua marite

No nia i te tamahine ra o Sarah, mea papu maitai e ua haapeapeahia mai oia i te mau mahana atoa. Te taa ra ïa ia tatou e ua haumani oia. No nia i te ataraa ˈtu, te parauhia ra e “e ere i te mea ino ia here i te taata.” Teie râ, te vai ra te hoê taa-ê-raa rahi i rotopu i te ata auhoa e te “mata ataata faahaama” e faahitihia ra i roto i te tumu parau.—Te feia nenei.

Te aupururaa i te feia ruhiruhia Te haapao nei au i to ˈu metua tane, e maˈi ino roa to ˈna. Aita to ˈu mau taeae e mau tuahine e tauturu maira ia ˈu, hau atu râ, te parau nei ratou: ‘Mea puai oe; e nehenehe oe e haapao ia ˈna’ aore ra: ‘Mea maitai aˈe ahiri e ua afai atu oe ia ˈna i te fare ruau e rave rahi matahiti na mua ˈtu.’ Ua haamata hoi au i te amuamu no nia i to ˈu oraraa, no te mea ua manaˈonaˈo vau i te mea e aita vau i manuïa i te faaipoipo e i te fanau i te tamarii. Ua haamata atoa hoi au i te farerei i te mau fifi i te pae no te feruriraa. Teie râ, ua afai mai te mau tumu parau no nia i te tumu parau ra “Te faatura ra anei outou i te feia ruhiruhia?” (8 no mati 1991) i te tamǎrûraa e ua horoa atoa mai i te puai no te faaoromai.

S. B., Fenua marite

Te mau ati Iuda e te mau kerisetiano Te hinaaro nei au e faaite atu i to ˈu mauruuru no te mau tumu parau no nia i te mau ati Iuda e te mau kerisetiano. (8 no tiunu 1991) Ei tavini kerisetiano, e tia ia ˈu ia farii e aita vau e taa maitai ra nafea ia paraparau no nia i teie tumu parau e te mau ati Iuda. Ua faaite mai te tumu parau e aita tatou e ani atura ia ratou ia faarue i ta ratou faufaa ati Iuda teie râ ia tuatapapa i te parau no Iesu e te mau parau tohu a te Mesia ia au i te maramarama o te parau mau, eiaha râ na roto i te mau peu tutuu faahuru-ê-hia e te mau haapiiraa hape.

J. L., Fenua marite

E nehenehe e manaˈohia ia au i te tumu parau e hoê â inoraa te mau ohipa taparahi taata a te amuiraa faaroo kerisetiano i ta te mau ati Iuda. E ere anei na te mau ati Iuda i patiti i te Tamaiti a te Atua i nia i te pou?

N. L., Helemani

Ua riro mau â te taparahiraahia o Iesu Mesia, te Tamaiti a te Atua, ei ohipa taparahi taata ino roa ˈˈe i roto i te aamu o te taata nei. Teie râ, aita e haapapuraa e ua faautua te Atua i te mau huaai tataitahi a te feia i rave i taua hara ra. Area ra, “e ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Noa ˈtu e eita hoê anaˈe nunaa o te faahapahia e te Atua, e tia i te amuiraa faaroo kerisetiano ia pahono no ta ˈna utua toto, te hamani-ino-raa, e te haavî i te pae faaroo.—Te feia nenei.

Te parururaa ia ˈna iho Ia taiohia te tumu parau “Te parururaa ia ˈna iho—E nafea ïa te hoê kerisetiano?” (8 no tiurai 1991), e nehenehe e manaˈohia e e faaitoito te mau ravea parururaa i te ineineraa no te taputô e no te aro. E ere hoi mai te reira. Te faaitoito nei te rahiraa o te mau ravea parururaa i te haavîraa i te tino, te faatitiaifaroraa ia ˈna iho, e te hoê manaˈo faatura i nia i te hoê faito teitei roa ˈˈe ia faaauhia i te tahi atu mau ohipa taaro.

T. M., Helemani

Peneiaˈe paha e nehenehe e parau e e faufaahia te feia taaro i te mau ravea parururaa. Teie râ, e haapii teie mau ravea nafea ia haapepe i te tahi atu taata, e eita te reira e tuea e te mau faaueraa tumu a te Bibilia e itehia ra i roto i te Isaia 2:4 e te Mataio 26:52.—Te feia nenei.