Te mau hautiraa moni—No te aha e mea matau-roa-hia?

No te aha te mau taata e hauti ai i te moni? “Mea anaanatae, mea arearea,” ta te hoê vahine auvaha parau no te hoê taiete hautiraa moni, i faaite. Peneiaˈe paha; tera râ, mea papu maitai e te umeraa rahi, o te tano moni ïa. Mea varavara roa te mau taata o te ore e faaohipa i te tahi moni hau. E te tǎpǔ nei te mau hautiraa moni e e roaa mai e rave rahi moni. I roto i te ao papu ore o teie mau mahana, te maraa noa ˈtura te moni hoo, te topa nei te matete o te moni, aita e tiaturiraa i te pae o te ohipa, te manaˈo nei te tahi tau milioni taata e te reira anaˈe te ravea e te tanoraa i te hautiraa moni, no ratou ïa moni-rahi-hia ratou.

Ia amuihia ˈtu i te ravea umeraa manaˈo, e ere te mau hautiraa moni i te mea ohipa rahi e mea ohie hoi ia hauti. E rave rahi huru hautiraa e vai nei, mai te loto, te mau numera, e te mau hautiraa i reira outou e paraˈu ai i te papie o te faaite mai i te mau numera i hunahia, tera râ e piti tuhaa taa ê o teie mau hautiraa atoa. Te tuhaa matamua, e apî mai te feia hauti ia tuea anaˈe te mau numera i nia i ta ratou titeti e te mau numera i tapaohia e te feia faanaho. Te piti, tei taa ê i te tahi mau parau faaîraa, aore roa e titauhia i te aravihi e te ite taa ê no te tano mai. Te tanoraa aore ra te pauraa, e ohipa noa no te manuïaraa.

E hauti atoa te mau taata i te mau hautiraa moni no te mea mea ohie i te hoo mai i te mau titeti. E nehenehe te rahiraa o te mau Marite e hoo atu i te reira i te fare toa o to ratou vahi. I roto i te tahi mau fenua, mai te peu e aita e fare hautiraa moni i pihai iho mai, e nehenehe te feia hauti e afai atu i ta ratou mau parie i te fare rata, na roto i te niuniu paraparau, te telex, aore ra te fax.

Eaha te ohipa apî no nia i te mau hautiraa moni?

E ohipa apî anei te mau hautiraa moni? Eita roa ˈtu. I te mau oroa i Roma tahito ra, ua opere na emepera e piti o Néron e o Auguste i te mau tîtî e te mau tuhaa fenua ei moni aufauraa i te re. Te hoê ô o te mau re, ua aufauhia ïa i te matahiti 1530 e te hoê fare hautiraa moni i Florence, i Italia. I te mau senekele i muri iho, ua uˈana te mau hautiraa moni i Europa. Ua tupu maitai te mau hautiraa moni i te omuaraa i te fenua Marite atoa, ma te afai mai i te moni tei tauturu ia Jamestown, te Nuu a te fenua, e te mau paturaa rarahi o te mau fare haapiiraa tuatoru tuiroo, mai ia Harvard, ia Dartmouth, Yale, e ia Columbia.

I te senekele 19 râ, ua farerei te mau ohipa i te mau haafifiraa. Ua riri ihora te feia patoi i te mau pǔpǔ hautiraa moni e ua ani ratou e ia faanahohia te mau taviriraa. Ua î te mau hautiraa moni i te mau petaraa, te ino, e ua ô atoa mai te taparahiraa taata. Ua ohi mai te feia fatu taa ê o te mau hautiraa moni i te mau tino moni rarahi. Ei faahopearaa, ua opanihia te mau hautiraa moni i te mau Etats-Unis, i Farani, e i Beretane.

Te hopea anei o te aamu? E ere roa ˈtu. Ua tamau noa te mau hautiraa moni i te tupu maitai i roto i te tahi mau fenua—i Italia, ei hiˈoraa, e i Auteraria. Ua faatupu o Carlos III, arii no Paniora, i te hautiraa moni i te matahiti 1763; ua haamanahia to ˈna tauiraa apî e te ture i te matahiti 1812. Ua pee atoa te tahi fenua i muri aˈe i te tahi, i te hautiraa moni. I te matahiti 1933, ua faaore o Farani i ta ˈna opaniraa e ua haamau oia i te Loterie nationale (Hautiraa moni o te fenua). I te mau matahiti 30 atoa, ua haamau o Irelane i ta ˈna Irish Hospitals’ Sweepstake tuiroo. Ua haamata te Takarakuji a te fenua Tapone i te matahiti 1945. Ua faatia te fenua Beretane i te mau tataˈuraa no te tohu i te mau re i nia i te mau tueraa popo e te mau taviriraa i titauhia, i te tupuraa mau râ, e mau hautiraa moni te reira noa ˈtu e aita e iˈoa. E i te matahiti 1964, ua hoˈi faahou te mau Fenua Marite i roto i taua mau ohipa ra.

I muri aˈe, i te mau matahiti 70, e faataui e piti tupuraa i te faaohiparaa i te hautiraa moni. A tahi, o te faaôraa ïa i te mau matini roro uira ia faatuatihia i te mau taoˈa e afai i te mau poroi aore ra te mau aniraa, i te mau tuhaa o te mau fare hooraa. I teie nei, e nehenehe e faanaho e rave rahi mau hautiraa tamau i reira te feia hauti e nehenehe ai e maiti i ta ratou iho mau numera. Aita ˈtura e faufaa faahou ia tiai tau hebedoma aore ra tau avaˈe no te ite e ua tano anei ratou; e nehenehe te feia hauti e ite i te reira tau mahana noa te maoro, tau hora aore ra tau minuti noa.

Te piti o te tupuraa, o te faaôraa ïa i te loto, te hoê hautiraa i reira aita e ravea no te manuïa. I te hautiraa loto, mai te peu e aita te tano rahi i mahiti mai, e tuu-faahou-hia oia i roto i te mau hautiraa e tupu a muri aˈe. Ei faahopearaa, e nehenehe te tano o te moni e naeahia tau milioni dala marite. Na roto i te loto, ua maraa te mau hooraa, e ua rahi maitai te mau ohipa, ua rahi roa.

Te mea e faaanaanatae ra i te feia faanaho

No te aha te mau faatereraa e faaitoito ai i te mau hautiraa moni? No te mea tera te eˈa ohie no te faaô mai i te moni ma te ore e haamaraa i te mau tute. Na te mau matini opereraa moni e te taviriraa “roulette”, e faahoˈi e 95 % o ta ratou i ona mai, e 50 % noa ïa ta te hautiraa moni e faahaere faahou. Ei hiˈoraa, i te Fenua Marite i te matahiti 1988, no te hoê dala marite i hautihia, ua aufauhia e 48 tota marite no te mau re e 15 tota marite no te faahaereraa i mua, no te mau hooraa, e no te piha faatereraa. Te toea e 37 tota marite, ua faaohipahia ïa no te faarahi i te faufaa a te hau, te pae o te haapiiraa, te oraora-maitai-raa, e te tauturu i te feia paari. I roto i te fenua atoa, ua naeahia e 7,2 miria dala marite.

Aita râ te mau faatereraa e faatupu ra i te mau hautiraa ia roaa noa mai te moni. Ahiri e eita ratou e faaô atu i roto i te mau ohipa, e nehenehe ta ratou moni e pau. E nehenehe ta ratou huiraatira e hauti i roto i te tahi atu mau vahi. No reira, ia faatupu anaˈe te hoê fenua aore ra te hoê Hau i te hautiraa moni e umehia te mau fenua tapiri ia rave i te hoê â ohipa. Ua ite-maitai-hia taua maraa-tamau-raa i te Fenua Marite. I te matahiti 1964, te vai noa ra hoê hautiraa moni a te Hau; i te matahiti 1989, te vai ra ïa 30.

Te mau moemoeâ o te onaraa

Parau mau, e rave rahi mau taata teie e tamata nei ia roaa mai te hoê tuhaa o te dala i pau. No reira, eaha te ohipa ta te feia faanaho e rave no te turai i te huiraatira ia haamâuˈa i te moni i te mau hautiraa moni? Na roto i te mau poroi faatianiani! Te aniraa i te tauturu i te feia aravihi no te faaturoriraa i te manaˈo!

E onoono anei te mau poroi faatianiani no te faaite e e tauturu te hoê tuhaa (noa ˈtu e mea iti aˈe) o te moni i te mau faufaa i te pae o te haapiiraa aore ra e horoa anei i te mau rapaauraa na te feia paari? Eita roa ˈtu! Mea varavara te reira i te faahitihia. Teie râ, e haapapu te mau poroi faatianiani i nia i te ohipa anaanatae e e roaa mai e rave rahi milioni dala marite. Teie te tahi mau hiˈoraa:

◻ “E nehenehe te huru oraraa o te taata Ona e te Tuiroo e riro ei oraraa no outou i teie iho â taime . . . Ia hauti outou i te LOTO 6/49 i Kanada, te tano rahi e rave rahi milioni dala marite.”

◻ “TE HAUTIRAA MONI I FLORIDE . . . Ia onahia outou i roto i te hautiraa moni rahi roa ˈˈe a Marite.”

◻ “Te Moni i hamanihia i Helemani—A TAPEA MAITE I TE TANO e ia ona-milioni-hia outou a poipoi aˈe.”

Faatianianiraa fifi mau? Mea papu maitai! Mea pinepine e hope te mau tutavaraa no te faaiti i te poroi faatianiani ia ore anaˈe te mau titeti e hoohia. I te tupuraa mau, e faaohipa mai te feia faanaho i te mau hautiraa puai atu â e te taatoaraa o te mau hautiraa i amuihia anaanatae roa, parauhia marketing, no te ume mai i te feia hauti apî e no te tapea mai i te manaˈo o te feia hauti tahito. E tia ia pûpû tamau te feia faanaho i te tahi ohipa o te manaˈohia e mea apî. Teie ta te taata faatere a te hautiraa moni no Oregon, o James Davey, e faataa ra: “Te vai ra ta matou mau tumu parau no te mau hautiraa moni, e rave matou i te mau tataˈuraa. I te oroa Noela, e rave matou i te hautiraa moni “Holiday Cash.” Na roto i te ravea a te Lucky Stars, e hauti matou i nia i te mau tapao fetia a te mau taata. Ua ite matou e ia horo anaˈe outou e piti aore ra e toru, e maha aore ra e pae hautiraa hoê â taime, e hoo rahi atu â outou i te mau titeti.”

Teie râ, te umeraa rahi roa ˈˈe, o te hoê tano rarahi mau ïa. I te hautiraa loto, ia maraa anaˈe te moni re, mai tei maraa i te faito 115 milioni dala marite i te matahiti 1989 i Pennsylvanie, e riro oia ei parau apî rahi. E horo mai te mau taata no te hoo i te mau titeti i roto i te mea ta te hoê taata papai i pii te hoê “hinaaro popore tei atuatuhia e te mau hautiraa moni.” I roto i taua hinaaro uˈana, te feia atoa o tei ore i matau i te hautiraa moni, e hauti atoa ratou i ta ratou moni.

[Tumu parau tarenihia i te api 6]

Te anaanatae rahi i te hautiraa moni e te haapaoraa

“Ua haapii mai te Ekalesia katolika ia ˈu i te hautiraa moni. Aita roa ˈtu te bingo e te tombola i taa ê atu i te mau hautiraa moni. Ahiri te Ekalesia katolika i faaite i te hiˈoraa ma te faaore i te mau hautiraa moni atoa, e feruri ïa vau i te manaˈo o te haapaeraa i te hautiraa moni. Mai te peu e e taata nounou vau, no te mea ïa e ua riro mau â ei oroa moˈa i roto i te Ekalesia.”—Na te hoê taata taio i te vea ra U.S. Catholic.

“I muri aˈe i te oroa pureraa no te sabati, te piti o te oroa e haapao-rahi-hia i roto i te mau fare pure katolika, o te mau hautiraa bingo tahebedoma ïa, ia au i te hoê tuatapaparaa a te mau paroita katolika a te Fare haapiiraa tuatoru Notre Dame.” E rave rahi râ perepitero e parau ra e te rahiraa o te feia e haere ra i te mau hautiraa bingo, aita ïa ratou e haere ra i te fare pure.—The Sunday Star-Ledger, New Jersey, U.S.A.

“Ua afai mai o Pancras peata i te tano i Madrid” te upoo parau ïa i roto i te vea paniora tahebedoma ra ABC, te hoê neneiraa i roto i te mau fenua atoa. Ua na ô faahou te tumu parau e: “‘Na Pancras peata’ ta na feia rave ohipa e piti a te fare hautiraa moni i tamau noa i te parau . . . i to raua hooraa i te mau anairaa numera o te 21515, te faufaa o te ‘gordo’ [te tano rahi], e 250 milioni [pesetas (moni paniora), aore ra i teie mahana, e 2 500 000 dala marite], tei operehia i Madrid. Ua faaite [na rave ohipa] e ua pure raua i te peata, no ˈna te hohoˈa i roto i ta ratou fare hautiraa e ua tuu atu raua i te hoê pupa raau faanoanoa maa i pihai iho, ia roaa mai te tano no te hoo i te Noela ‘gordo.’”

“Ma te tamata i te imi ia faataa i ta raua tano, ua turaihia na feia tano paari ia tiaturi e na te Atua e na te oraraa i faataahia, i maiti e, ia tano raua i te moni. . . . ‘Te hinaaro nei matou e tiaturi e ua taaihia te tano e te tano ore i te tahi ohipa, e ere ra i te mea tupu noa mai,’ ta te Taote Jack A. Kapchan, te hoê orometua i te pae o te feruriraa i te Fare haapiiraa tuatoru no Miami, i parau. ‘O vai atu â te nehenehe e taaihia ˈtu, maori râ o te Atua?’”—The New York Times.

Eaha ta te Bibilia e parau ra no nia i te tano? I te Iseraela taiva, ua parau o Iehova e: “O outou râ tei faarue ia Iehova, e tei haamoe i to ˈu ra mouˈa moˈa e ua faanahonaho i te amuraa na Gada; e ua faaî i te tusia inu na Meni.”—Isaia 65:11.

Ehia i rotopu i na feia tano e faaea ra no te feruri e ua haamauhia ta ratou tano i nia i te tano ore o te mau milioni feia i pau? Te faaite ra anei te hautiraa moni i te ‘aroha i te taata-tupu’ na roto i te tahi atu huru? Mea tia anei aore ra no roto anei i te Bibilia te manaˈo e e faaô atu te Fatu Arii mana hope o te ao nei, ia ˈna, i roto i teie mau peu miimii mai te hautiraa moni?—Mataio 22:39.