Te anaanatae rahi i te hautiraa moni—Ua parare na te ao atoa nei
“Te mea noa e hinaarohia e outou, te hoê dala marite ïa e te hoê moemoeâ.” Te moemoeâ ia roaa mai te tano rahi e 45 milioni dala marite i te hautiraa moni no New York. E nehenehe e tano na roto i te hoê noa dala. E rave rahi mirioni feia moemoeâ tei haere mai. Na roto i te tiai-maite-raa no te hoo mai i ta ratou mau titeti, e tauaparau ratou no nia i te mau poti matini e te mau pereue hamanihia e e huruhuru animala e te mau hotera taa ê—te mau ohipa ta ratou e hinaaro ra e hoo mai ia tano noa ˈtu ratou i te re rahi. I te hoê noa vahi, i roto i te oire, ua haru ratou i te mau titeti i nia i te faito e 28 000 i te minuti. I roto i na mahana hopea e toru na mua ˈˈe i te taviriraa, ua hoo ratou e 37,4 milioni titeti.
I te fenua Tapone, mea tere maitai te mau ohipa i roto i na fare hautiraa moni e 10 000 i fariihia, i reira te mau taata e haapue ai no te hoo i te mau titeti no te Hopea Matahiti oia hoi te Takarakuji Jumbo (Hautiraa moni). I roto i te hoê fare hautiraa no Tokyo i reira te mau titeti o na tano matamua e pae i hoohia ˈi i te mau matahiti na mua ˈtu, ia au i te parau e atutu ra, fatata e 300 taata tei tiai aˈena e ia mahiti te fare hautiraa. Ua tiai noa na te hoê vahine apî, tei tiaturi e e noaa te tano i te feia e tia oioi, mai te hora 1:00 i te aahiata. Te tano rahi i hinaarohia i te matahiti i mairi aˈenei: te hoê tino moni 100 milioni yen (e 714 285 dala marite), aitâ taua faito i naeahia aˈenei.
I roto i te hoê oire pu no Afirika Tooa o te râ, ta te feia e noho ra i reira e pii ra te Fare Haapiiraa Lotto, e î noa oia i te mau taime atoa i te feia o tei haere mai e hoo i te mau titeti e e aimǎrô i nia i te mau numera e mahiti mai. Ua hoo-atoa-hia te mau tabula roroa o te mau numera i tano na mua ˈtu na te feia e tiaturi ra e ite i te mau tapao no te mau numera amui no a muri aˈe. No te feia e tiaturi ra i te hoê ite paieti rahi, te faaite atea ra te mau peropheta o te loto, ia aufauhia ratou, i te mau numera no te parie.
E mau huru tupuraa taa ê anei? E ere roa ˈtu. Ua parare te anaanatae rahi i te hautiraa moni. Te faaitoito ra oia i te mau fenua rarahi atoa. Te î roa ra i roto i te mau fenua ona e te mau fenua veve. Te ume ra oia i te feia apî e te feia paari, noa ˈtu eaha to ratou huru i te pae faanavairaa faufaa, totiale, e haapiiraa.
E, e mau ohipa rahi te mau hautiraa moni, e mea tere maitai te mau ohipa. I te Fenua Marite noa, ua ohi mai te mau hautiraa moni a te Hau 18,5 miria dala marite i te matahiti 1989. E 27 matahiti noa na mua ˈtu, aore roa ïa e numera. I teie nei râ, ua tae te mau hautiraa moni i nia i te piti o te huru rahi roa ˈˈe o te mau hautiraa moni i te Fenua Marite, e te rahi noa ˈtura te ohipa i nia i te 17,5 % i te mau matahiti atoa, hoê â oioiraa e te ohipa hamaniraa i te mau matini aravihi.
Te taatoaraa o te mau hooraa i te mau titeti hautiraa moni na te ao nei i te matahiti 1988, ia au i te tabula hopea a te vea ra Gaming and Wagering Business, (Te matete o te hautiraa moni e te mau parie), ua naeahia ïa e 56,38 miria dala marite, te hoê faito rahi roa. Ua tuea ïa te reira i te ahuru dala marite no te mau taata atoa, te mau vahine, e te mau tamarii i roto i te ao nei! E te reira, no te hoê noa ïa matahiti!
Ma te papu maitai, mea tere roa te mau hautiraa moni, e rave rahi râ feia teie e patoi nei i te reira. E tuatapapa na tumu parau e piti i mua nei i te tuiroo o te mau hautiraa moni o te maraa noa ˈtura e te aimârôraa ta ratou e faatupu ra. Ia hiˈopoa outou i te mau tupuraa, e nehenehe outou e faaoti e e tano anei te mau hautiraa moni no outou aore ra eita. Mea maitai anei ia hauti? E tano ohie anei tatou? E pau anei hau atu i te moni?