Ia au i te Bibilia

Te mau tombola: o vai mau tei tano?

“MAI TE peu te hinaaro nei oe e tano, a rave ïa i te titeti.” “E piti tano rahi no te hoo o te hoê titeti.” “Aita ïa tombola faahiahia ˈˈe!” Te maraa noa ra te anaanataeraa o te taviriraa. I mua i teie mau huru piiraa, te paheru nei te mau taata, te mau vahine e te mau tamarii o te ao taatoa i to ratou pute ahu aore ra ta ratou pute moni. No te faufaaraa o te taime e tavirihia ˈi te tombola, ua tae roa i te faataime-rii-hia te mau oroa faaipoiporaa. Te tiaihia ra, ma te anaanatae rahi te tano matamua.

I muri iho, ua faaitehia mai te numera tano. No te feia tano, e oaoa faito ore ïa. I roto i te hoê taime poto noa, ua riro mai teie nei mau taata e feia mirioni. Ua parau ma te faateitei rii te hoê taata o tei tano na e: “E tapao te reira no te manuïaraa o to ˈu oraraa.” Te na ô nei râ te tahi atu ra e: “Auê hoi te faahiahia i te iteraa e aita e fifi faahou no te pae moni!” No te rahiraa râ, o tei ore i tano, to oraraa noa iho â e e au ra aita hoê aˈe ohipa taa ê i tupu.

E oe, ua topa anei oe i roto i te faatianianiraa o te mau tombola? Nafea ïa te tombola i te haafifi ia oe iho e to oe oraraa no mua nei? I te tombola, o vai mau tei tano?

Te eˈa o te moni?

Te faatupu nei te mau tombola i roto i te mafatu o te feia i hoo mai i te titeti te hinaaro ia monihia. Te faaara mai nei râ te Bibilia ia tatou e “o te nounou moni hoi te tumu o te mau ino atoa nei, ua taa ê roa hoi te tahi pae i te parau nei, (...) e ua patiatia pupu roa ia ratou iho i te oto e rave rahi”. Eita te feia e hoo mai nei i te mau titeti tombola e ore e fifihia. — Timoteo 1, 6:9, 10.

E riro oioi noa mai te feia pere ei mau tîtî. I te toparaa te iˈoa ‘tombola’ no te maˈi e naeahia ra i teie nei feia, te faataa ra te taote John Watt, raatira no te fare maˈi no te feia tutoo no Homewood de Guelph, i Canada, e e nehenehe ‘e riro mai hoê taata pere rahi i roto i te mau tombola mai te hoê taata inu ava’, no te aperaa ïa i te oraraa mau.

“Ia tano anaˈe te hoê taata”, e itehia mai te mau fifi apî. Te haamanaˈo ra o Erika o tei tano hau atu i te hoê mirioni dala marite i te tombola e: “Ua tiaturi au e eita vau e ite faahou â i te fifi, no te toea o to ˈu nei oraraa.” I teie mahana, i muri mai e piti faataaraa, e na roto i te titau-roa-raa e aufau ta ˈna tute, te parau nei oia ma te peapea ê: “Ahiri vau i ite, ua tumutu ïa vau i taua titeti ra.” Ua parau te hoê taata e te tanoraa i te hoê tino moni rahi, ‘e haamataraa ïa no te hoê oraraa ahoaho, te maˈi, te mataˈu e tae noa ˈtu te riri uˈana’. Teie te tahi atu â mau hiˈoraa: “I te aramoinaraa te oaoaraa rahi no te tanoraa, e mau hopoia teimaha ïa tei itehia mai.” “Aita vau e tiaturi faahou nei i te taata. O ta ˈu ïa i noaa mai na roto i to ˈu tanoraa i te tombola.” E mea pinepine, te feia haapao i te mau tombola i te faaue atu i te feia i tano i te moni rahi ia rave i te hoê taata paruru e te hoê taata haapao moni no te paruru i ta ratou “moni, e ia ratou iho”. No te reira, e nehenehe te feia i tano e pau atu.

Te mea faufaa roa ˈˈe

Te parau nei vetahi mau upoo faatere haapaoraa e aita e inoraa ia hoo mai i te hoê titeti tombola, mai te peu e mea faatiahia e te ture. Teie râ, eiaha e e mea faatiahia râ e mea tia iho â ïa. Ei hiˈoraa, ahiri e faatiamâhia e te hau o to oe fenua te taiataraa, mea maitai anei te reira? Aita ïa, ia au i te Bibilia (Korinetia 1, 6:9, 10). No te taata e hinaaro nei ia fariihia mai oia e te Atua e haapao ïa o ˈna na mua ˈˈe i te mau faaueraa a ta ˈna Parau. Mai te reira atoa to oe manaˈo. I teie nei, e parau ra anei ta te mau Papai i nia i te mau tombola.

Parau mau, aita te Bibilia e faahiti nei i te parau tombola. I te mea ra, na roto mai i te tombola e tupu mai te here i te moni, ua niuhia ïa te reira i nia i te nounou. Aita hoi te nounou e faahotu mai nei i te mau hotu maitatai. Te aˈo mai nei te Bibilia ia tatou eiaha e faatupu i teie nei manaˈo i roto i to tatou mafatu (Ioane 1, 2:15, 16). Te taio nei tatou: ‘Te nounou taoˈa, eiaha roa ia faahitihia i roto ia outou.’ — Ephesia 5:3.

Ua haamau-atoa-hia te anaanataeraa i te mau tombola i nia i te popore. Aita anei te taata i hoo mai i te titeti e imi ra i to ˈna iho maitai na roto i te raveraa mai i te moni i pau ia vetahi pae ra? Te faaitoito nei te Bibilia i te kerisetiano “eiaha roa ei taata e imi i to ˈna anaˈe iho maitai, e imi râ te taata atoa i te maitai o vetahi ê atoa”. No reira e mea maitai anei ia oaoa e ia faufaahia tatou na roto i te fifi a to tatou taata tupu? — Korinetia 1, 10:24; Maseli 17:5.

E herepata atoa te tombola no te feia veve, no te mea te huti maite noa ra oia i te moni e hinaarohia ra e taua taata ra tae noa ˈtu to ˈna utuafare fetii. E nehenehe ia parauhia e mea papu ore roa te manuïaraa. Ua parau vetahi feia e haapao i te mau tombola e mea papu aˈe te hoê taata i te naeahia i te patiri i te tano atu i te tano matamua. Ia au i te hoê piha maimiraa aravihi e nehenehe te hoê taata e naeahia i te patiri hoê taime i nia i te mirioni. E no reira, e nehenehe paha oe e tano i te numera maitai hoê noa ïa taime i nia e rave rahi mirioni.

Te vai nei â te hoê tumu ia vai ara tatou. Te tiaturi nei te feia hauti i nia i te manuïaraa eiaha ra i nia i te aravihi, i nia râ i te manaˈo noa e tera te numera tano eiaha râ i nia i te feruri-maite-raa. No te reira e rave rahi i rotopu ia ratou te tiaturi nei ïa i te mau peu tahutahu. E aratai te reira ia ratou i hea? Te parau nei te Bibilia no te feia i “faanahonaho i te amuraa na Gada [te atua no te manuïaraa]” e ua faariro oia i ta ratou ohipa ei haamoriraa idolo. No reira mai te peu e mea iti roa to ratou manuïaraa no te noaaraa i te tano matamua, e riro mau â ta ratou ohipa i te aratai ia ratou i te haamoriraa idolo, o te faaere hoi ia ratou i te haamaitai a Iehova. — Isaia 65:11-14.

Te tano hau atu i te faufaa

Te aˈo mai nei te Bibilia ia tatou “e mea maitai i te horoa ˈtu i te rave mai”. Eita mau â te anaanataeraa i te tombola e faaitoito i te horoa-taatoa-raa ia ˈna iho ma te mafatu tae, te huru maitai mau â te au ia itehia mai. — Ohipa 20:35.

E noaa mau â ia tatou te oaoa mai te peu eita tatou e haamau atu i to tatou tiaturiraa i nia i te “taoˈa rahi itea ore, ei te Atua ora râ o tei horoa hua mai i te mau mea atoa nei ei raveraa na tatou”. E mea maitai aˈe no tatou “i te ohipa maitatai ra, ia rahi atu ïa ia ratou ia horoa haere”. Mea na reira tatou, ma te peapea ore, e haapue maite ai “i te maitai tumu (...) a muri atu, ia rave [tatou] i te ora mure ore”. — Timoteo 1, 6:17-19.

Mai te peu e na reira oe, e papu mau ïa oe i te manuïa. E ere ïa ma te manaˈo-ore-hia i te toparaa ˈtu i nia i te numera maitai. Mai ta Iesu i haamaramarama mai, e au ra ia oe ‘ia haapii ia ite i te Atua mau ra’ e ta ˈna mau opuaraa, e i muri iho ia rave i te mau faanahoraa e au no te faaauraa ˈtu to oe oraraa i nia i ta ˈna Parau. Te reira te haamauraahia to oe oraraa no a muri atu, no te mea na te Atua “e horoa mai i te re”. Inaha te aufau ta ˈna e pupu maira ia oe, ua hau aˈe ïa i te mau tano matamua atoa: o te ora mure ore ïa! — Ioane 17:3; Korinetia 1, 15:57.

[Parau iti faaôhia i te api 30]

E nehenehe atoa te feia i tano e pau atu.

[Parau iti faaôhia i te api 31]

Mea papu aˈe oe i te naeahia i te patiri i te tano atu i te tano matamua.