Eaha ta te mau fetia e nehenehe e haapii mai ia tatou?
AITA e faufaa te hoê taoˈa hiˈo fetia ia faahiahia roa tatou i te nehenehe o te raˈi e te mau fetia i te hoê po avae. E mau taoˈa unauna anaˈe te marama anaana, te rahiraa fetia e anapanapa noa ra e te Eˈa uouo nehenehe mau ra, e mau taoˈa hau mau e e taoˈa moe atoa. Inaha, teie ïa te uiraa e tupu mai: ‘Eaha te tumu teie mau taoˈa e vai ai i reira?’ ‘E haapii anei ratou i te tahi mea ia tatou nei?’
Mai te tau e te tau to te taata imi-noa-raa i te pahonoraa i taua mau uiraa huru ê mau ra. Aita râ i maoro i teie nei to te feia ite i te pae no te mau fetia, papuraa e aita e faaauraa to te aanoraa o te ao materia e te haihai o te fenua nei i pihai iho. Auê te maamaa e ia manaˈo tatou e ua poietehia taua mau miria rahiraa haapueraa fetia ehia mirioni matahiti-maramarama [te atearaa e terehia e te maramarama i roto i te hoê matahiti] i te atearaa no te faanaho i to tatou oraraa e to tatou tau i faataahia! Ma te papu maitai, mea faufaa roa ˈtu â te ohipa ta ratou e nehenehe e haapii mai ia tatou.
Te hoê poroi maramarama maitai
Mai te peu e te tamau noa nei vetahi mau taata, mai ta tatou i ite iho nei, i te imi i te tapao i roto i te mau fetia e te tahi mau poroi rii moe, e rave rahi mau taata teie e ite nei i roto i te unauna rahi o te mau raˈi e te mau fetia, te tahi poroi teitei o te nanaˈo roa i te mǎtaˈu e te faatura rahi i roto i te hohonuraa o to ratou aau. “No te papu-maitai-raa o te mau ture a te natura i roto i te ao taatoa nei, o ta te hoê taata aravihi i te pae no te tereraa i roto i te reva teitei, o Wernher von Braun, ïa e parau ra, (...) e nehenehe mau â e parau e ua haamauhia [ratou] na te tahi taata.” No nia i te “nahonaho-maitai-raa o te ao taatoa nei”, te manaˈo ra te taata i haere na na roto i te reva ra o John Glenn e, “te vai ra te hoê Puai o tei faanaho i teie mau mea atoa e o te haapao ra e ia ore teie faanahoraa e faaea”.
Tera râ, aita e faufaa ia riro ei taata aivanaa rahi aore ra te hoê taata aravihi roa i te pae no te reva teitei, no te faahiti i teie huru parau. No reira, ua papai te hoê arii hebera no te Tau tahito, tei maere roa i mua i te hohoˈa o te raˈi, i te hoê pehe e faaite maira i te manaˈo hohonu o te rahiraa o tatou nei ia hiˈo tatou i teie hohoˈa faahiahia mau:
“Te parau hua nei te mau raˈi i te hanahana o te Atua!
E te faaite nei te reva i te ohipa a tana rima!
Te haapii nei te tahi ao i te tahi i te parau,
E te faaite nei te tahi rui i te tahi i te ite.
Aore e orero, aore e parau,
Aore to ratou reo i itea;
Ua tae râ to ratou haruru i te mau fenua atoa,
E ta ratou faaiteraa i te otia o teie nei ao.” — Salamo 19:1-4.
Mai ta te hoê hohoˈa i penihia e te hoê taata aravihi e faaite mai i to ˈna maramarama e to ˈna ite rahi, mai te reira atoa te mau fetia i te faahanahana ma te mamû noa — aore e orero, aore e parau, aore e reo. Eiaha ïa no te mea e e mana tahutahu to ratou aore ra e faatere mai ratou i to tatou huru aore ra i to tatou tau i faataahia, tera râ, maoti te nahonaho-maitai-raa e itehia ra na te raˈi e te mau fetia, mea papu maitai ïa e ua riro te reira ei ohipa na te hoê Poiete aravihi, te puai hope e te maramarama rahi. Mai ta te aposetolo Paulo i papai, “te mau mea hoi no ˈna e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa ra”. — Roma 1:20.
Te puai e faatere ra i te mau mea atoa
Ua itea mai i te feia ite aravihi e, i te mau faito atoa — mai te mau haapueraa fetia rarahi e tae roa ˈtu i te mau pueraa rii haihai roa — te auraro nei te ao taatoa nei i te mau ture materia. No roto atoa tatou i teie ao, e inaha, te auraro atoa ra tatou i te mau ture e te mau faaueraa tumu papu maitai, e oia atoa i te pae morare.
Teie ta Immanuel Kant, philosopho helemani no te senekele XVIII, tei matau-maitai-hia no ta ˈna mau tuatapaparaa no nia i te manaˈo afaro e te feruriraa, i papai: “Maoti e piti mea e î roa ˈi te mafatu i te faahiahia e te faahanahanaraa apî o te rahi noa ˈtu, a tuatapapa ˈi te feruri-maite-raa e a hiˈopoa maite ai oia i te reira: te raˈi e te mau fetia i nia ia ˈu nei e te ture morare i roto ia ˈu nei.” Parau mau, te taata i faaoti i te mau ture e faatere ra i “te raˈi e te mau fetia”, ua tuu atoa mai oia i roto roa ia tatou nei i “te ture morare”. (Roma 2:14, 15.) Ia faaitoitohia oia e ia faaauhia oia maoti te Parau a te Atua, e nehenehe taua ture morare nei e aratai ia tatou i roto i to tatou titauraa i te oaoaraa e te tumu o te oraraa. Tera te tumu te papai salamo i papai faahou ai, i muri aˈe i to ˈna faaiteraa i te hanahana o te Atua ia ˈna i hiˈo atu i te raˈi e te mau fetia, e:
“Oia atoa te ture a Iehova aita e hapa, i te faafariuraa i te varua;
Te faaite a Iehova e mea mau ïa, e paari ai te aau o te maua;
Te haapaoraa a Iehova e mea tia ïa, e oaoa ˈi te aau;
Te aˈo a Iehova e mea maramarama ïa, e maramarama ˈi te mata nei;
Te mǎtaˈu ia Iehova e mea viivii ore ïa, e tia ïa i te vai-maite-raa;
Te faaauraa a Iehova e parau mau ïa, e te mea tia anaˈe.” — Salamo 19:7-9.
Eaha ïa ta te mau fetia e haapii mai nei? Inaha, i roto i to ˈna paari e to ˈna aroha, ua haamau te Poiete, eiaha noa te mau ture materia e faatere nei i te faanahoraa paari mau o te ao taatoa nei, i te mau ture morare atoa râ e nehenehe e tauturu ia tatou ia haa ma te haapao maitai i roto i te hoê totaiete taata arepurepu e o te taui haere noa. Aita, aita te Atua i hamani ia tatou mai te mau taoˈa i nia i te hoê hautiraa pere, te mau taoˈa tei faataa-ê-na-hia te mau “huru” e o te “hautihia” ia au i te hinaaro o te taata hauti. Ua horoa mai râ oia i te mau ture morare o te tauturu ia tatou ia rave i te mau opuaraa i feruri-maitai-hia; teie râ, i te mea e tiamâraa atoa to tatou no te maiti, tei ia tatou ïa te faaotiraa mai te peu e e farii tatou e e faaohipa tatou i teie mau ture a te Atua.
Ihea roa e itehia ˈi taua mau ture ra? Te faaite maira te aposetolo Paulo i te pahonoraa i te na ôraa e: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.” (Timoteo 2, 3:16, 17). Oia mau, te vai ra i roto i te Parau i faauruahia mai a te Atua, oia hoi te Bibilia, i te mau parau ora no nia i te taatoaraa o te mau ohipa a te taata nei. No reira oia e horoa mai ai i teie nei aˈoraa: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea. Eiaha oe ia paari i to oe iho manaˈoraa; o Iehova ra ta oe e mǎtaˈu, a faarue ai i te ino.” — Maseli 3:5-7.