E poroi ta te mau fetia na outou!

MAI te faaitehia i roto i te mau tumu parau na mua ˈˈe, noa ˈtu te hanahana o te mau fetia, e hiˈo noa te taata i te fetia ia au i to ratou iho huru— e mau taoˈa ora ore tuuhia i roto i te mau raˈi e te Poiete no ta ˈna opuaraa. Aita e tia ia haamorihia ratou. Mai te hoê tuhaa faufaa no te poieteraa nehenehe mau a Iehova tuuhia i raro aˈe i ta ˈna mau ture, e tia i te mau fetia ia ‘parau hua i te hanahana o te Atua’ e oia atoa ei pu no te maramarama no te taata mai ta te Atua i faaoti.—Salamo 19:1; Deuteronomi 4:19.

Te taiohia ra i roto i te Bibilia e: “Eiaha roa te hoê i roto ia outou . . . ei pifao, e te hiˈo ata, e tei imi i te tapao, e te hiˈohiˈo, e te hebere, e te feia imi i te varua ino, e te taura, e te feia uiui i tei pohe ra. O te feia atoa hoi i rave i te reira ra mau peu, e feia faufau ïa na Iehova.” (Deuteronomi 18:10-12) Ua parau o Isaia e: “Ia tia mai [to oe ra feia aˈo] i tena na, a faaora ia oe, o tei hiˈo i te mau raˈi ra, tei tiatonu i te mau fetia ra . . . Inaha! e riro ratou mai te aihere ra.”—Isaia 47:13, 14.

Eaha ta te fetia e nehenehe e haapii mai ia tatou

E nehenehe râ te mau fetia ora ore e parau mai ia tatou i te hoê ohipa mai te peu e ua ineine tatou i te faaroo. Ua papai o Edwin Way Teale e: “Te faahiti ra te mau fetia no nia i te faufaaraa iti haihai o te taata i roto i te roaraa o te tau.” Oia, ia ite tatou e e ua hiˈohia te rahiraa o te mau fetia ta tatou e hiˈo ra e to tatou mau tupuna e tau senekele i teie nei, eita anei te reira e faahaehaa ia tatou? Aita anei tatou e turaihia ia faatura i te Mana ra o tei poiete ia ratou “i te matamua ra” e o tei hamani i te taata? Ua papai te arii ra no Iseraela o Davida ma te tura e: “Ia hiˈo vau i te mau raˈi i te ohipa a to rima ra; te marama e te mau fetia ta oe i faaau ra, eaha te taata nei i manaˈo mai ai oe ia ˈna? e ta te taata nei tamaiti i haapao mai ai oe ia ˈna?” Na te mau raˈi e faahaehaa nei ia tatou e e rave e ia uiui tatou e eaha ta tatou e rave râ i to tatou oraraa.—Genese 1:1; Salamo 8:3, 4.

I te hoê taime ua pure o Davida e: “E haapii mai oe ia ˈu ia rave au i to oe ra hinaaro; o oe hoi tau Atua.” (Salamo 143:10) E itehia e ua pahonohia te pure a Davida ia hiˈohia te roaraa o to ˈna oraraa. Ua haapii oia i te rave i te hinaaro o te Atua mai tei faaitehia i roto i ta ˈna Ture. Ua haapii atoa oia i te opuaraa a te Poiete no te huitaata, e ua papai no nia i te reira. “No parahirahi aˈe te paieti ore, e aita ra . . . Area te feia mǎrû ra, e parahi ïa i te fenua, e oaoa ratou i te rahi o te hau ra. . . . A faarue i te parau ino, a rave i te parau maitai; e maoro roa ïa to oe parahiraa i te fenua nei. . . . E parahi te feia parau-tia i nia i te fenua, e parahi tamau â ratou i reira.” Na roto i te iteraa i taua opuaraa ra, e hopoia te noaa mai, oia hoi: “A faarue i te parau ino, a rave i te parau maitai.”—Salamo 37:10, 11, 27-29.

Hoê â poroi ta te mau fetia no te huitaata taatoa. Ma te ore e haamori ia ratou aore ra e “hiˈopoa” ia ratou, e nehenehe tatou e ite i te here, te paari, e te puai o te Poiete i roto ia ratou. E faatupu te haapiiraa o te tuatapaparaa i te reva i te faatura i roto i to tatou mafatu. Hau atu râ i te reira, te vai ra anei i roto ia tatou te hinaaro ia haapii hau atu no nia i te Atua? Ua horoa mai oia i ta ˈna Parau, te Bibilia, no taua mau tumu ra. Mai te peu e ua ite outou teie poroi mai roto mai i te mau fetia, e nehenehe outou e haapii e eaha ta Iehova i faaherehere no te huitaata nei e, mea faufaa ˈtu â, mea nafea outou e nehenehe ai e fanaˈo i te mau haamaitairaa i faanahohia no ratou. Mai te peu e uiraa ta outou no nia i te Atua e no nia i te tumu o te ora, a farerei atu i te mau Ite no Iehova no to outou vahi nohoraa, aore ra a papai atu i te hoê o te mau vahi nohoraa piri roa ˈˈe i faataahia i te api 5.

[Hohoˈa i te api 8]

E nehenehe te mau fetia e haapii mai ia tatou i te haehaa