Te tahi mau aua faaiteiteraa o te ao nei
NIU-TIRANI
Aua faaiteiteraa no Fiordland: Haamauhia i te matahiti 1904, teie te aua rahi roa ˈˈe no Niu-Tirani. E itehia i te roaraa o te pae miti te fenua mai te huru ra e ua tipitipihia, te mau mouˈa teitei, te mau pape roto, te mau tahora pape, te mau toparaa pape, te mau uru raau e te pueraa pape paari. I te matahiti 1948, ua itehia mai i reira te takahe, e manu eita e maurere e ua manaˈohia e ua mou teie huru manu.
KENYA
Aua faaiteiteraa no Nairobi: Tei te uputa o te oire rahi o te fenua oia, i te tahi noa ˈˈe minuti na ropu mai i te oire na nia i te pereoo. Te haapuhia ra e te puaatoro oviri, te puaahorofenua toretore, te animala arapoa roroa, te gnous, te animala avae roroa, te animala hoê tara i mua i te rae, e te liona atoa tei taoto ma te ore roa e haafifihia e te feia ratere.
FENUA MARITE/CANADA
Aua faaiteiteraa no te mau pape roto Waterton: Vahi farereiraa o te vahi matie e te mouˈa, mea haamauhia i te matahiti 1895. Te aua faaiteiteraa no Glacier, no te matahiti 1910 mai ïa. Mai ta te rahiraa i hinaaro, ua amuihia teie na aua toopiti i te matahiti 1932 i raro aˈe i te iˈoa aua faaiteiteraa no te hau i te ao nei Waterton-Glacier, a tahi ra aua mai teie te huru. Haamauhia i nia i te reni taotiaraa fenua, e horoa teie na aua toopiti i te mau vahi fenua nehenehe mau. Te daba rarahi, te daba ereere, te animala mai te mamoe te huru e piti tara fefe, te puaaniho oviri no te mouˈa Rocheuses, te animala mai te aili e piti tara amaa parahurahu, te mimi taehae, te aili niuru, te aili no Virginie e te tahi atu mau animala ua faaea ratou i roto i teie aua e vai ra i te otia o Canada e te fenua Marite.
BERESILIA/RA-PARATA
Aua faaiteiteraa no Iguaçú: I te tupuraa mau te vai ra e piti aua. Ua haamauhia te aua ra-parata i te matahiti 1909 e te aua beresilia i te matahiti 1939. Te mau toparaa pape no Iguaçú, tuiroo i te ao nei, mea teitei aˈe i to te Niagara e mea aano aˈe i te toparaa pape no Victoria, i Afirika. Te vai atoa ra i roto i teie aua te hoê o te mau uru raau nehenehe e te ruperupe o te palaneta.
TAPONE
Aua faaiteiteraa no Nikko: Huru taa ê no te natura tapone, e vahi rarahi teie te vai ra i reira te pape roto, te toparaa pape, te vahi teitei e te mouˈa. E itehia i reira te serow no Tapone, aore ra te antilope caprine, e huru animala paruruhia, te daba ereere atoa no Tapone, e te urî taata no Tapone, aore ra urî taata e afii uteute.