Te hoe aua i nia i te taatoaraa o te palaneta—Mea nafea?
NO TE MEA UA TURAIHIA RATOU e te hinaaro mau ia maramarama no nia i te poieteraa e ia fanaˈo i to ˈna mau huru faahiahia, tau milioni taata e haere ra e mataitai i te mau aua i te mau matahiti atoa. O vai i rotopu ia tatou eita e oaoa ia ora i roto i te natura mai teie e faaitehia ˈtura i ô nei? Peneiaˈe te faahaamanaˈo maira teie vahi ia outou i te Paradaiso, i Edene ra, i reira te Poiete i faaparahi ai i na taata matamua ra e piti.
Te vahi faahiahia, te tahe noa ra e piti o na anavai pape e maha i to tatou nei mahana, e hoê anaˈe vahi no reira mai ratou. I reira te vai ra o Hidekela, matauhia aˈe i raro aˈe i te iˈoa o Tigre, e o Eupharate (Genese 2:10-14). No nia i te faaiteraa a te Bibilia, te parau ra te hoê taata iriti i te mau Parau Papai, o Hans Bruns, e: “Te faaite maira teie iˈoa o te anavai pape e e ere roa ˈtu i te hoê aai no te faanavenave i te tariˈa, tera râ e ohipa mau iho â tei tupu i nia i te fenua nei.”
I muri aˈe i te mau omuaraa haihai, e rave rahi mau aua i teie nei tau i faarahihia i te roaraa o te matahiti. Hoê â ïa huru e te opuaraa a te Atua no te ô i Edene. A haere noa ˈi te taata i te rahiraa, e turai ratou i te mau otia o te ô, e tae roa i te taime a î ai te fenua i te Paradaiso ma te pǔpǔ atu i te unauna nehenehe roa ˈˈe.
Parau mau, no to raua faaroo ore, ua erehia i na taata matamua e piti i te fanaˈoraa maoro atu â o te Paradaiso matamua. Tera râ, te opuaraa a te Atua, ia hiˈo i te taata e ora i roto i te hoê ô i te fenua nei, aita i taui (Esaia 46:11; 55:11). No reira, te faahiti pinepine maira te Bibilia i te faatia-faahou-raa o te Paradaiso i te fenua nei i raro aˈe i te faatereraa a te Basileia a te Atua. Ei hiˈoraa, te na ô ra te hoê parau tohu e: “Mai te reira atoa to Iehova faaitoito ia Ziona. (...) e na ˈna e faariro to ˈna vahi medebara mai ia Edene, e to ˈna vahi pâpâmǎrô ra mai te ô a Iehova.” I pihai iho atu â, te faaite maira te parau tohu e e patu te taata i te fare, e tanu i te ô vine, a amu ai i te maa i reira. — Isaia 51:3; 65:21-23.
Te vai atoa ra i roto i te Apokalupo, te buka hopea o te Bibilia, te orama o te ‘hoê raˈi apî e te hoê fenua apî’ e fatata ra i te tupu. Te “raˈi apî”, aore ra faatereraa apî faaohipahia e te Atua, te hohorahia maira ma te faaite i ta ˈna ohipa i te fenua nei. Eaha te mau faahopearaa? “Inaha, e taiohia ra e, tei ô te taata ra te sekene o te Atua [a tapao na e o te Atua tei ô i te taata ra, e e ere te taata tei ô i te Atua ra, i nia i te raˈi], e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa, e e ore roa te pohe, e te oto, e te mihi, e te mauiui, e ore atoa ïa no te mea ua mou te mau mea tahito ra.” — Apokalupo 21:1, 3, 4.
Teie mau parau tohu a te bibilia no nia i te paradaiso i faatia-faahou-hia e ere i te moemoeâ. Mea taotiahia ïa te mau aua natura ta te feia paruru i te natura e te feia tuatapapa i te pae o te natura i roto i to ratou rahiraa, e tei raro aˈe ratou i te mana o te feia horoa ture. Area râ te mau parau tǎpǔ a te bibilia, mea niuhia ïa i nia i te Atua ra o Iehova, te Poiete o te ao atoa, eita hoi ta ˈna parau e ore — e eita iho â e ore — i te tupu.
I to tatou mau mahana, te vai ra te ati e tupu ra na roto i te ori-haere-raa, i roto iho â râ i te mau aua o te mouˈa. Tera râ, ia riro anaˈe te fenua atoa ei aua rarahi roa, eita te taata e mehameha faahou ia hamani-ino-hia ratou e te animala, no te mea eita te taatoaraa o te animala e riro faahou ei mǎtaˈuraa. I to ratou pae, eita te mau animala e riaria faahou e eita atoa e horo faahou e tapuni ia ite atu i te taata. Oia mau, te tǎpǔ maira te Bibilia e: “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê ïa amuraa, e hoê â taotoraa to te fanauˈa. E amu hoi te liona i te aihere mai te puaatoro atoa ra.” — Isaia 11:6-9.
Auê ïa ohipa popou e tupu mai, ia haere i roto i te uru raau, e ia ori haere e te hoê mimi taehae aore râ te hoê daba rarahi e te maitai! E aita roa te hoê taata ora e mǎta ˈu faahou i te tahi atu mea ora.
No to ratou hinaaroraa e faataa ê i te mau vahi, no te paruru atu i te uru raau e te animala oviri, mea faahiahia mau te opuaraa a te feia i haamau i te mau aua ruperupe no teie nei mau mahana. Tera râ, na te opuaraa noa iho a te Atua i faaitehia mai e faatupu i te hoê aua o te ao taatoa nei faaterehia e to ˈna Basileia, e nehenehe e haapapu mai i te vai-maitai-raa o te mau hotu natura i te fenua e a muri noa ˈtu. Na teie anaˈe Basileia, e i to ˈna upoo o Iesu Mesia, te Tamaiti a te Atua, e nehenehe e faatia faahou, i te hoê paradaiso e a muri atu i nia i te palaneta taatoa e e haamau i te hoê hau mau, eiaha i rotopu anaˈe i te taata, tera râ i rotopu atoa i te taata e te animala.