Te mahana te mau aiû atoa e oraora maitai ai

I TE hoê po toetoe roa, ua riro ïa mai te huru ra e e ohipa taparahi taata ia huti mai tatou i te hoê taata mai roto mai i to ˈna ie puhaparaa e mai roto mai i to ˈna pute taotoraa, e a vaiiho noa ˈtu ai ia ˈna fatata aita e ahu faahou ia faaruru noa ˈtu i te toetoe. Oia atoa, mai te huru ra ïa e ua riro atoa ei ohipa taparahi taata ia tatara mai tatou i te hoê aiû i te mahanahana e i te parururaa o te opu o to ˈna mama hou aˈe oia e ineine ai i te faaruru atu i te mau huru tupuraa i rapae. O vai râ hoi ta tatou e pari i te rave i taua ohipa hairiiri mau ra?

Papu maitai, aita te mau metua e hinaaro ra ia farerei ta ratou aiû i taua huru tupuraa ra. Inaha hoi, ia tupu te fanauraa e ua taeahia te avae o te aiû aore ra eita, ia haamata te fanauraa, eita ïa ta te metua vahine e nehenehe e tapea i te reira. Aita atoa te mau taote iho i ite e na te aha e faatupu ra i te reira. Ta tatou râ i ite maitai, e nehenehe ïa te tereraa o te faanahoraa e fifi i te tahi taime e inaha, tei rapaeau atura ïa te aiû i roto i te hoê ao aita roa ˈtu o ˈna i ineine no te faaruru atu.

Ua faataahia mai te tumu no taua fifi ra i roto i te Bibilia. Ma te faauruahia mai e te Atua, ua papai te papai salamo e: “Inaha, i fanau mai au ma te hara! e i tôhia vau e tau metua vahine ma te ino.” (Salamo 51:5). Ma te faaitoitohia mai e te hoê mea i poiete-varua-hia e te patoi atoa hoi, ua patoi atoa aˈera te taata matamua e te vahine matamua i te Atua; ua riro maira ïa raua ei mau taata hara, e aita aˈera hoi i taeahia ia raua i te tapao i haapaohia no raua oia hoi: te auraroraa i to raua Poiete. Mea na reira ˈtura hoi to raua mau huaai atoa i te fanauraahia mai i roto i te hara, aore ra i roto i te huru taata tia ore (Roma 5:12). O te maˈi e te pohe atura ïa te mau faahopearaa, e tae noa ˈtu hoi te tahi mau fifi i te pae no te tereraa o te tino. E aita te tereraa i te pae no te fanauraa i ore i roohia i taua fifi ra, no te reira ˈtura ïa e itehia ˈi i te tahi taime i te aiû faufaa roa e vai ra i roto ia ˈna, ia haere mai i rapae na mua ˈˈe e tia ˈtu ai i te avae.

Te hoê ao aita e aiû faahou tei ore i tia i te avae

Ahiri te mau taata i faaea taata tia noa, aita roa ˈtu ïa e tamarii i fanauhia na mua ˈˈe e tia ˈtu ai te avae e eita hoi ïa oia e faaruru i te mau fifi e farereihia nei e te mau aiû aita i tia i te avae i to tatou nei tau. Teie râ, te fatata maira te tau i reira te fanauraa i te mau aiû aita i tia i te avae, e ore roa ˈi. Ma te faaite mai i te parau tǎpǔ a to tatou Poiete here mau no nia i taua tau ra, ua papai te peropheta Isaia ma te faauruahia mai e te Atua e: “Inaha, te hamani nei au i te raˈi apî e te fenua apî, e ore hoi tei mutaa ihora e manaˈohia, e ore e faatupu-faahou-hia i roto i te aau.” — Isaia 65:17.

Te faataa maira te parau tohu i muri iho i te mau huru tupuraa mahanahana mau e itea ˈtu i roto i taua ao apî e haamauhia e te Atua i te na ôraa mai e: “E ore hoi e itea-faahou-hia i reira te reo oto e te reo auê. E ore e itea te aruaru i mure noa te aho i reira (...). E ore hoi ratou e ohipa faufaa ore noa; e ore ratou e faafanau i te tamarii pohe noa: e tamarii hoi ratou na tei haamaitaihia mai e Iehova: ratou, e ta ratou atoa ra mau tamarii.” — Isaia 65:19-24.

Auê hoi te oraraa i te au e ia riro te mau mauiui e te mau peapea ei mau mea tahito, e ia ore roa te mau ravea rapaauraa a te taote mauiui mau e tae noa ˈtu hoi te mau pu rapaauraa uˈana no te mau aiû aita i tia i te avae! No te mea e faaore roa te hoo ta to tatou Atua rahi ra i horoa maite mai i te huru taata tia ore, eita te hoê noa ˈˈe tamarii e faarue faahou mai i te opu o to ˈna metua vahine hou aˈe oia e ineine maitai ai no te fanaˈo roa i te oraraa. — Apokalupo 21:3, 4.

[Tumu parau tarenihia i te api 21]

E nehenehe e itea ia outou i te tamahanahanaraa mau

◆ Mai te peu e ua pohe ta outou tamarii, a tamata i te farii i te tauturu e te tamahanahanaraa a to outou mau hoa e te mau melo o to outou utuafare. Peneiaˈe e riro te feia atoa i pohe na ta ratou tamarii i te ite i te tamahanahana mai ia outou.

◆ Mai te peu e te tiaturi ra outou i te tia-faahou-raa, eiaha e faateimaha ia outou i te mea e eita taua tiaturiraa ra e hopoi oioi mai i te tamahanahanaraa. I roto i te roaraa o te tau, ia ore to outou mauiui, e riro outou i te haafaufaa rahi mau â i taua tiaturiraa ra oia hoi, ia farerei â i ta outou tamarii. — Isaia 25:8; 65:23; Ioane 5:28, 29; Korinetia 1, 15:25, 26.

◆ A faaitoito i te tiaturi ia Iehova, “te Atua no ˈna anaˈe te mahanahana”. (Korinetia 2, 1:3.) O ˈna te nehenehe e “faaere atu ia ˈna no ˈna te pohe nei, oia hoi te Diabolo ra”. — Hebera 2:14.

◆ Mai te peu e e hoa outou no te tahi mau metua i roto i te ati, eiaha e parau atu ia ratou e e noaa â ta raua tamarii. No te mea i taua taime ra, aita e mea e nehenehe e mono i te aiû i pohe aˈenei. I roto i taua mau huru tupuraa ra, te ohipa maitai ia rave ‘ia oto ïa outou e te feia e oto ra’. (Roma 12:15.) Ia ore outou ia rave e mai te huru ra ïa e aita te aiû i pohe, e ia oto e te mau metua e oto ra, e riro ïa outou i te tamahanahana ia ratou.

◆ E ohipa tano mau hoi ia faaite i to ˈna oto; a horoa i te taime au no te faaore i to outou oto e i to outou moemoe. (Hiˈo “A ara mai na!” o te 8 no titema 1985, “Ia pohe anaˈe tei herehia e tatou...”, e o te 8 no atete 1987, “Nafea ia faaruru atu ia pohe te hoê tamarii”.)