Mea hinaaro mau â na te mau aiû i fanauhia e aita i tia i te avae i te here

SABATI poipoi i te hora toru. Aita vau i ite e na te aha i rave e ia fanau vau hou aˈe e tia ˈtu ai te avae, peneiaˈe paha ua rohirohi roa vau no te mau taata e rave rahi i titauhia i te fare. Noa ˈtu e eaha râ, te faaineine ra ta ˈu tamaroa iti i te haere mai i rapae hoê avae na mua ˈˈe.

Te mahana sabati atoa e te po i muri iho to ˈu mauiui-noa-raa e aita e ravea e fanau ai. E rave rahi taime to te vahine haafanau i te iteraa i te upoo o te pepe ia ˈu i turai i te hoê taime, teie râ a turai faahou ai au, ua moe ê aˈera to ˈna upoo e aita aˈera e noaa ia tapea mai. Monire, i te hora maha i te poipoi, oia hoi e 25 hora i muri aˈe i te omuaraa o te fanauraa, ia ˈna i fafa i te mafatu o te tamarii, taa aˈera i te vahine haafanau e te fifi ra oia. Ua tuu aˈera oia ia ˈu i raro aˈe i te mataˈi ora e ua aratai oioi aˈera ia ˈu i te fare maˈi. E toru hora i muri iho, ua fanauhia o Danny.

Ua tapao mai ta ˈu tane Bill e o vau atoa nei, e mea fifi roa te aiû ia hutihuti i te aho, no te mea aita to ˈna mau mahaha e tere maitai ra. Ua vaiihohia maira oia ia mâua ra te tahi tau taime e ua ite aˈera au e e hutihuti maitai aˈe o ˈna i te aho ia amo mâua ia ˈna e ia paraparau atu mâua ia ˈna. Ua opua aˈera te mau taote e tuu ia ˈna i roto i te tahi farii faataahia no te mau aiû aita i tia i te avae; i te mea hoi e ua rohirohi roa vau i taua fanauraa roa mau ra e te fifi atoa hoi, aita vau i parau noa ˈˈe.

I te hora 9 e te afa, ua haere mai te taote e hiˈo ia ˈu. Ua hiˈopoa o ˈna i te aiû e i to ˈna manaˈoraa, mea maitai roa; e afaihia mai hoi o ˈna ia ˈu ra, ia horoa vau i to ˈu tîtî. Ua tiai noa vau e ua tiai noa e aita i tae mai. Hora ahuru, hora ahuru ma hoê, hora ahuru ma piti, e aita e Danny. I te pae hopea, i muri noa ˈˈe i te hora ahuru ma piti, ua haere maira te vahine tuati mai roto mai i te mau piha o te mau aiû e ua na ô maira ia ˈu e: “Te fifi ra to oe aiû i te pae no te hutihutiraa i te aho; ua tuuhia o ˈna i roto i te hoê farii i faataahia no te mau tamarii aita i tia i te avae.” E ia oti, ma te ore e horoa faahou mai i te tahi mau haamaramaramaraa, ua reva ê atura oia.

No to ˈu rohirohi, te taa ra iho â ïa ia outou e eaha râ te auraa o taua mau parau no ˈu. Ma te ore e taa maitai i te auraa, ua pii atura vau i te vahine haafanau e ua ani atura vau e mea ino roa anei. Ua pahono maira oia e: “E, mea ino roa. Tera iho â te ohipa e farereihia e te mau aiû i fanauhia aita i tia i te avae.”

“Eaha ïa ta oe e hinaaro ra e parau? E nehenehe anei o ˈna e pohe?”

“E, e nehenehe”, ta ˈna ïa i pahono mai. Ua parau maira oia ia ˈu e ia onoono vau no te haere e hiˈo ia ˈna.

A parau mai ai te mau vahine tuati e e nehenehe ta ˈu e hiˈo ia ˈna ia oti te mau taote i te hiˈopoa ia ˈna, ua auê au. “No ˈu tera aiû, e te pohe ra o ˈna e eita outou e hinaaro e ia haere vau e hiˈo ia ˈna!”, ta ˈu ïa i tuô. E ua hopoi-oioi-hia ˈtura vau e hiˈo ia ˈna. Eita ta ˈu e nehenehe e rave mai ia Danny i roto ia ˈu, te vai ra râ te hoê vahi i te hiti i te vairaa tamarii e na reira ˈtu vau e nehenehe ai e tapea ˈtu ia ˈna.

Mea peapea mau â o ˈna ia hiˈohia ˈtu. Aita o ˈna e hutihuti maitai ra i te aho e e oru mai hoi te mau iˈo amui o to ˈna vairaa maa; e rarahi roa to ˈna apoo ihu, no te mea te erehia ra oia i te mataˈi ora. Ua ereere roa to ˈna rima e to ˈna avae no te mea te erehia ra oia i te mataˈi ora.

Ua tuu aˈera vau i to ˈu rima i roto mai i te farii e ua haamata aˈera vau i te taurumi mǎrû noa ˈtu ia ˈna mai te upoo mai e tae noa ˈtu i nia i te avae, ma te parau noa ˈtu ia ˈna e mea here mau â na ˈu ia ˈna. Ua faaite rahi atu vau ia ˈna i te parau no to ˈna papa, no to ˈna taeae ia Timmy, e no te utuafare taatoa. Ua parau noa ˈtu vau ia ˈna e mea here roa na matou paatoa ia ˈna e te hinaaro nei matou ia haere mai o ˈna i te fare. Ua faaroo noa mai o ˈna ia ˈu, e ua tamǎrû hoi ta ˈu mau taurumi rahi ia ˈna. Aita e taata e nehenehe e parau mai ia ˈu e eita te here e nehenehe e faatupu i te mau semeio. Ua ite hoi au i te reira i taua mahana ra. I roto i te area hoê afa hora, ua hutihuti faahou aˈera o Danny i te aho, e i teie nei, aita to ˈna rima e to ˈna avae i ereere faahou.

A ite mai ai te vahine tuati ia ˈna, ua na ô aˈera oia e: “Eita ta ˈu e nehenehe e tiaturi! A hiˈo na! Te hutihuti ra oia i te aho ma te ore roa ˈtu e fifi; e a hiˈo na i to ˈna rima e to ˈna avae!” E ma te ore e tiai ia faatia mai te taote ia ˈna, ua rave maira o ˈna ia Danny, ua tatara maira na roto mai i to ˈna vairaa e ua horoa maira ia ˈu ra.

Ua ore te hepohepo, ua ora o Danny. Ua tupu taua ohipa nei hau atu i te hitu matahiti i teie nei. I teie nei â mahana, mea au roa na Danny ia faatia ˈtu vau ia ˈna i te aamu no nia i to ˈna fanauraahia. — Faatiahia mai e Mary Jane Triggs.

[Hohoˈa o Danny Triggs i te api 19]