E maraa te neˈiraa toto ia paraparau anaˈe tatou

“MAI te huru ra e e faatupu te paraparauraa — eiaha noa ia riri tatou aore ra ia riaria roa tatou, ia tauaparau noa râ tatou — i te tahi maraaraa o te neˈiraa toto”, ta te vea “Aviation Safety” ïa e faataa ra. Ta te feia iho â râ e fifihia nei i te pae no te maraa-rahi-roa-raa te neˈiraa toto aore ra e rapaauhia nei no te faaaifaito i te faito taheraa toto, e ite nei. Teie râ, i roto i te rahiraa o te mau tupuraa, “e maraa te neˈiraa i nia i te faito e 10 e tae atu i te 50 %” ia paraparau anaˈe tatou. E te mea maere roa ˈtu â, “e tupu atoa teie ohipa i nia i te mau taata tariˈa turi, e tauaparau nei hoi e to ratou rima”.

No reira, ia paraparau noa ˈtu te hoê taata maˈi i to ˈna taote a faito ai oia i to ˈna neˈiraa toto, e hape roa ïa te numera. Oia mau, e ravehia teie huru tauaparauraa “auhoa no te tamǎrû i te taata”, teie râ ‘e faarahi oia i te faito taheraa toto’. Area râ, “ua faaite mai te tahi mau maimiraa e e topa te neˈiraa toto ia faaroo atu tatou i te tahi taata”. Taa ê atu i te mea e e haamaitai te reira i te mau auraa i rotopu i te mau taata, e riro atoa te faaohiparaa i te aˈoraa i horoahia mai e te Atua ra i roto i te Maseli 21:23, i te faatupu i te mau faahopearaa maitatai i nia i te tino.