A haafaufaa maitai i to outou ora, te hoê ô
‘E tamâ te toto o te Mesia i to tatou aau i te ohipa pohe, ia haamori tatou i te Atua ora ra.’—HEBERA 9:14.
1. Eaha te haapapuraa e mea faufaa roa no tatou te ora?
IA UIHIA ia oe e mea faufaa anei no oe to oe ora, eaha ta oe e pahono? E haafaufaa rahi tatou i te ora—to tatou iho e to vetahi ê. Inaha, e haere tatou e hiˈo i te hoê taote no te rapaau ia tatou ia maˈihia tatou aore ra no te hiˈopoa tamau i to tatou ea. E hinaaro tatou e ora maitai noa. Eita atoa te feia ruhiruhia aore ra te feia tino paruparu e hinaaro e pohe; e hinaaro ratou e ora noa.
2, 3. (a) Te haapapu ra te Maseli 23:22 i teihea tarahu? (b) Eaha te taairaa o te tarahu i roto i te Maseli 23:22 i te Atua?
2 E ohipa te haafaufaaraa oe i te ora i nia i to oe mau taairaa e vetahi ê. Ei hiˈoraa, te faaue ra te Parau a te Atua e: “E faaroo mai i to metua tane i fanau ai oe ra, e eiaha e vahavaha i to metua vahine, ia ruhiruhia ra.” (Maseli 23:22) E “faaroo,” e ere noa ïa e faaroo tariˈa i te mau taˈo; te auraa o teie maseli, e faaroo tariˈa ïa e e auraro. (Exodo 15:26; Deuteronomi 7:12; 13:18; 15:5; Iosua 22:2; Salamo 81:13) No te aha e faaroo ai ia au i te Parau a te Atua? E ere no te mea noa e mea paari aˈe aore ra mea ite aˈe to oe metua tane e metua vahine ia oe. No te mea maoti raua “i fanau ai oe ra.” Te huri nei te tahi mau Bibilia i teie irava mai teie: “A faaroo i to metua tane i ora ˈi oe ra.” No reira, ia haafaufaa oe i to oe ora, e taa ia oe e e tarahu ta oe i te tumu o taua ora ra.
3 Parau mau, mai te peu e e Kerisetiano mau oe, e farii oe e o Iehova te Tumu matamua o to oe ora. No ˈna to oe “ora”; e nehenehe oe e “hahaere,” e haa ei taata ma te huru aau; e i teie nei te “parahi” nei oe e e nehenehe ta oe e feruri aore ra e opua no a muri aˈe, oia atoa te ora mure ore. (Ohipa 17:28; Salamo 36:9; Koheleta 3:11) Ia au i te Maseli 23:22, e mea maitai ia “faaroo” maite i te Atua, ma te hinaaro e taa e e pee i to ˈna manaˈo i te ora, eiaha râ i te tahi atu mau manaˈo.
A faatura i te ora
4. I te omuaraa o te tuatapaparaa o te taata, mea nafea te faatura i te ora i te riroraa ei tumu parau faufaa?
4 I te omuaraa o te tuatapaparaa o te taata, ua faataa maitai Iehova e eita oia e faatia ia faaohipa (aore ra ia rave ino) te taata i te ora aita e hiˈoraa eaha te tumu. No to ˈna riri pohehae, ua haapohe Kaina i te hoê taata hapa ore, to ˈna iho taeae o Abela. I to outou manaˈo, e tiaraa anei to Kaina e rave i tera faaotiraa no nia i te ora? E ere tera te manaˈo o te Atua. Ua ani oia ia Kaina ia faataa i ta ˈna i rave: “I aha na oe? te pii maira te reo ra o te toto o to taeae mai te repo maira ia ˈu.” (Genese 4:10) A tapao na e te faahohoˈa ra to Abela toto i nia i te repo i to ˈna ora, tei faaore-oioi-hia, e te pii atura i te Atua ia tahoo mai.—Hebera 12:24.
5. (a) Eaha ta te Atua i opani i te tau o Noa, e ia vai ma? (b) I roto i teihea auraa e e taahiraa faufaa teie opaniraa?
5 I muri aˈe i te diluvi, e haamataraa apî to te huitaata e e vau noa taata. I roto i te hoê parau no te taata atoa, ua faaite â te Atua e mea faufaa no ˈna te ora e te toto. Ua parau oia e e nehenehe te taata e amu i te iˈo animara i roto noa râ i teie taotiaraa: “Te mau mea ora atoa e haere nei, ei maa ïa na outou, mai te mau raau maa atoa ra: ua horoa-atoa-hia ˈtu e au na outou: o te iˈo râ ma te ora atoa i roto ra, oia te toto, eiaha outou e amu i te reira.” (Genese 9:3, 4) Ia au i te tatararaa a te tahi mau ati Iuda, aita te taata i faatiahia ia amu i te iˈo aore ra te toto o te hoê animara e ora noa ra. I muri aˈe râ, ua taa-maitai-hia e o te amuraa i te toto no te ora ta te Atua e opani ra i ǒ nei. Hau atu â, e taahiraa faufaa te faaueraa mana ta te Atua i horoa ia Noa ra e tupu ai ta ˈNa opuaraa teitei no nia i te toto—te hoê opuaraa e fanaˈo ai te taata i te ora mure ore.
6. Na roto ia Noa, mea nafea to te Atua haapapuraa i to ˈNa manaˈo i te faufaaraa o te ora?
6 Ua parau â te Atua: ‘E titau au i te hoo i to outou na toto i ora ˈi outou; e titau hoi au i te reira i te mau mea ora atoa, e i te rima hoi o te taata nei; e titau hoi au i te hoo no to te taata nei ora, i te rima o to te taata ihora taeae. O te haamanii i to te taata nei toto, na te taata atoa to ˈna toto e haamanii: i hamani hoi te Atua i te taata ma to ˈna ihora huru.’ (Genese 9:5, 6) Na roto i teie mau parau i te fetii taata taatoa, te taa ra ia outou e no te Atua te faahohoˈa ra te toto o te hoê taata i to ˈna ora. E horoa te Atua Poiete i te ora i te taata, e eiaha te tahi taata e faaore i taua ora ra tei faahohoˈahia e te toto. Mai te peu e mai ia Kaina, e taparahi pohe te hoê taata, e tiaraa to te Atua Poiete e “titau” i te ora o te taata taparahi.
7. No te aha e mea maitai ai ia anaanatae i ta te Atua i parau ia Noa no nia i te toto?
7 Na roto i ta ˈna parau, te faaue ra te Atua i te taata eiaha e faaohipa i te toto ma te tano ore. Ua ui ê na anei outou no te aha? Oia atoa no te aha te Atua e manaˈo ai mai tera? Inaha, ua taaihia te pahonoraa i te hoê o te mau haapiiraa bibilia faufaa roa ˈˈe. E parau rahi teie o te poroi Kerisetiano, noa ˈtu e mea rahi te haapaoraa e maiti i te ore e tâuˈa ˈtu. Eaha taua haapiiraa ra, e eaha te auraa o te reira e to outou oraraa, ta outou mau faaotiraa e ohipa?
E nafea ia faaohipa maitai i te toto?
8. I roto i te Ture, eaha ta Iehova taotiaraa i nia i te faaohiparaa i te toto?
8 Ua haamaramarama ˈtu â Iehova i te parau o te ora e te toto i to ˈna horoaraa i te pǎpǎ Ture ia Iseraela ra. A na reira ˈi oia, ua rave oia i te tahi atu taahiraa ia tupu ta ˈna opuaraa. Ua ite paha outou e ua titau te Ture ia pûpû i te tusia na te Atua, mai te huero maa, te hinu, e te uaina. (Levitiko 2:1-4; 23:13; Numera 15:1-5) Te vai atoa ra te tusia animara. Ua parau te Atua no nia i te reira: “Tei te toto . . . te maa ora e ora ˈi te mau mea atoa ra, i haapao ai au i te reira e o ta outou ïa e hopoi i nia i te fata ei taraehara na outou iho, o te toto hoi tei riro ei taraehara no te taata: i parau ai au i te tamarii a Iseraela e, eiaha roa te hoê o outou e amu i te toto.” Ua na ô â Iehova e ia taparahi te hoê taata, mai te hoê taata aˈuaˈu animara aore ra taata faaapu, i te hoê animara no te amu, e mea tia ia faatahe oia i te toto i raro a tapoˈi atu ai i te repo. E taahiraa avae o te Atua te fenua, e ma te ninii i te toto i nia i te fenua, ua ite te taata e te hoˈi ra te ora i Tei horoa mai i te reira.—Levitiko 17:11-13; Isaia 66:1.
9. Eaha noa te faaohiparaa i te toto i faataahia i roto i te Ture, e eaha te tumu?
9 E ere taua ture ra i te tahi noa peu faaroo faufaa ore no tatou. Ua tapao anei outou no te aha te mau Iseraela i ore ai e amu i te toto? Ua parau te Atua e: “I parau ai au i te tamarii a Iseraela e, eiaha roa te hoê o outou e amu i te toto.” Eaha te tumu? “I haapao ai au i te [toto] e o ta outou ïa e hopoi i nia i te fata ei taraehara na outou iho.” Te ite ra anei outou e te faataa ra te reira i te tumu i parau ai te Atua ia Noa eiaha te taata e amu i te toto? Ua faaoti te Atua Poiete e e faufaaraa teitei to te toto, o te faataahia no te hoê faaohiparaa taa ê e ora ˈi e rave rahi taata. E tuhaa faufaa roa ta te toto i roto i te tapoˈiraa hara (te taraehara). No reira i raro aˈe i te Ture, ua faatia noa te Atua i te faaohipa i te toto i nia i te fata ei taraehara no te ora o te mau Iseraela, o te imi ra i te faaoreraa hara a Iehova.
10. No te aha e ore ai e tia i te toto animara ia faaore roa i te hara, eaha râ ta te mau tusia i raro aˈe i te Ture i haamanaˈo?
10 E ere teie i te manaˈo matau-ore-hia i roto i te Kerisetianoraa. No nia i teie tuhaa o te Ture i faataahia e te Atua, ua papai te aposetolo Kerisetiano Paulo e: “Aita rea hoi e mea toe i te tamâhia i te toto i ta te ture ra; e aore e toto i faatahehia ra, aita roa e faaoreraa hara.” (Hebera 9:22) Ua faataa maitai Paulo e aita te mau tusia titauhia i faariro i te mau Iseraela ei mau taata tia roa e te hara ore. Ua papai oia e: “I te reira mau tusia, ua faatupu-faahou-hia ïa te manaˈo i te hara i te mau matahiti atoa ra. Eita roa hoi e tia i te toto puaatoro e te puaaniho ia faaore i te hara.” (Hebera 10:1-4) E tumu râ to tera mau tusia. Ua haamanaˈo te reira i te mau Iseraela e e feia hara ratou e te hinaaro ra ratou i te tahi atu â mea ia faaore-roa-hia ta ratou hara. Mai te peu râ e eita e tia i te toto, tei faahohoˈa i te ora o te animara, ia faaore roa i te hara a te taata, e tia anei i te tahi atu toto?
Te ravea a Tei horoa i te ora
11. Mea nafea to tatou iteraa e te tohu ra te mau tusia toto animara i te tahi mea?
11 Te tohu mau ra râ te Ture i te hoê mea maitai aˈe ia tupu te hinaaro o te Atua. Ua ui Paulo: “No te aha hoi te ture?” Ua pahono oia e: “I tuu-atoa-hia mai te reira no te hara, e ia tae mai te huaai no ˈna taua parau i parauhia maira, i tuuhia mai te ture na roto i te nanai melahi i te rima o te arai ra [o Mose].” (Galatia 3:19) Ua papai atoa Paulo e: “E ata anaˈe te ture no te mau mea maitatai a muri atu, e ere râ i taua mau mea mau ihora.”—Hebera 10:1.
12. No nia i te toto, e nafea e taa ˈi ia tatou te tupuraa o te opuaraa a te Atua?
12 Ei haapotoraa, e haamanaˈo anaˈe e i te tau o Noa ua parau te Atua e e nehenehe te taata e amu i te iˈo animara no te ora, eiaha râ e amu i te toto. I muri aˈe, ua parau te Atua e “tei te toto . . . te maa ora e ora ˈi te mau mea atoa ra.” Oia mau, ua maiti oia i te hiˈo i te toto ei ora e ua na ô e: “I haapao ai au i te [toto] e o ta outou ïa e hopoi i nia i te fata ei taraehara na outou iho.” E tupuraa faahiahia ˈtu â râ to te opuaraa a te Atua. Te faaite atea ra te Ture i te mau mea maitatai no a muri aˈe. Eaha taua mau mea ra?
13. No te aha e mea faufaa ˈi te pohe o Iesu?
13 Ua taaihia te mau mea mau i te pohe o Iesu Mesia. Ua ite outou e ua haamauiuihia Iesu e ua patǐtǐhia i nia i te raau. Ua pohe oia mai te hoê taata ohipa ino. Ua papai Paulo e: ‘I to tatou vai-paruparu-raa ra i pohe ai te Mesia i te tau mau ra, no te feia paieti ore ra. Ua faarahi te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.’ (Roma 5:6, 8) A pohe ai oia no tatou, ua horoa te Mesia i te hoo no te tapoˈi i ta tatou mau hara. O taua hoo ra te parau rahi o te poroi Kerisetiano. (Mataio 20:28; Ioane 3:16; Korinetia 1, 15:3; Timoteo 1, 2:6) Eaha ïa te taairaa o te hoo i te toto e te ora, e mea nafea te reira i taaihia i to tatou ora?
14, 15. (a) E nafea te tahi mau tatararaa o te Ephesia 1:7 e tuu ai i te tapao i nia i te pohe o Iesu? (b) Eaha te manaˈo no nia i te Ephesia 1:7 e nehenehe ai tatou e ere?
14 I te mea e e tuu te tahi mau haapaoraa i te tapao i nia i te pohe o Iesu, e parau to ratou mau taata e ‘ua pohe Iesu no ˈu.’ A hiˈo na e nafea te tahi mau tatararaa o te Bibilia e huri ai i te Ephesia 1:7: “Tei roto ia ˈna e na roto i to ˈna pohe e noaa ˈi ia tatou te ora, oia hoi, te faaoreraa o ta tatou mau hapa.” (The American Bible, a Frank Scheil Ballentine, 1902) “Maoti te pohe o te Mesia i tiamâ ˈi tatou, e i faaorehia ˈi ta tatou mau hara.” (Today’s English Version, 1966) “Tei roto ia ˈna e na roto i te Mesia e te tusia o to ˈna ora i tiamâ ˈi tatou, te hoê tiamâraa o te faaoreraa i te mau hara te auraa.” (The New Testament, a William Barclay, 1969) “Mea na roto i te pohe o te Mesia i faaorehia ˈi ta tatou mau hara e i tiamâ ˈi tatou.” (The Translator’s New Testament, 1973) Te ite ra outou i roto i tera mau tatararaa e te tuuhia ra te tapao i nia i te pohe o Iesu. E parau paha ïa te tahi pae e mea faufaa mau ‘hoi’ te pohe o ‘Iesu.’ No reira, eaha te ere ra i roto i tera mau tatararaa?
15 Mai te peu e tera anaˈe ta outou mau tatararaa, e nehenehe outou e ere i te hoê manaˈo faufaa roa, a ore atu ai e taa maitai ia outou te poroi bibilia. Te huna ra tera mau tatararaa i te parau e i roto i te papai matamua o te Ephesia 1:7, te vai ra te hoê taˈo Heleni o te “toto” te auraa. No reira, mea rahi te Bibilia, mai Te Bibilia Moˈa ra, o te huri maitai aˈe i te papai matamua: “No ˈna i noaa ˈi te ora ia tatou i to ˈna ra toto, i te hara i faaorehia nei no te rahi o to ˈna ra aroha mau.”
16. Eaha ta te parau “to ˈna ra toto” e haamanaˈo ia tatou?
16 E auraa rahi to te parau “to ˈna ra toto” o te haamanaˈo ia tatou e rave rahi tuhaa no nia i te toto. Eita e navai noa te pohe, tae noa ˈtu te pohe o te taata tia roa ra o Iesu. Ua faatupu oia i tei faaite-atea-hia i roto i te Ture, i te Mahana taraehara iho â râ. I taua mahana taa ê ra, e mau animara taa maitai te pûpûhia ei tusia. I muri iho, e hopoi te tahuˈa rahi maa vahi o to ratou toto i roto i te piha Moˈa Roa o te sekene aore ra hiero, a faaite atu ai i mua i te aro o te Atua, mai te huru ra i mua roa ia ˈna.—Exodo 25:22; Levitiko 16:2-19.
17. Mea nafea to Iesu faatupuraa i tei faaite-atea-hia e te Mahana taraehara?
17 Ua faatupu Iesu i tei faaite-atea-hia e te Mahana taraehara, mai ta Paulo i faataa. Na mua, ua parau oia e e tomo te tahuˈa rahi i Iseraela i roto i te vahi Moˈa Roa hoê taime i te matahiti e te toto e pûpûhia “no ta ˈna iho hapa, e ta te taata atoa i rave no te ite ore.” (Hebera 9:6, 7) Ia au i taua hohoˈa ra, i muri aˈe i to ˈna tia-faahou-raa mai ei varua, ua haere Iesu i nia i te raˈi iho. Ei varua, aita hoi e tino iˈo e te toto, ua nehenehe oia e tia ˈtu i mua i “te aro o te Atua no tatou.” Eaha ta ˈna i faaite i te Atua? E ere i te hoê mea materia, te hoê mea faufaa roa râ. Ua parau â Paulo e: “O te Mesia . . . i tae maira ei tahuˈa rahi . . . e ere hoi ma te toto puaaniho, e te toto kafa, ma to ˈna iho râ toto, i te tomoraa hoê i roto i te vahi moˈa roa ra, e ma te ora mure ore te noaaraa no tatou. I moˈa ˈtura te taata, e mâ ˈtura te tino i te toto puaatoro, e to te puaaniho, . . . a tae ai hoi i te toto o te Mesia ra, o tei pûpû ia ˈna iho ma te ino ore i te Atua, i te turu o te [v]arua pohe ore ra, e rahi atu ïa te mâ o to outou aau i te ohipa pohe, ia haamori outou i te Atua ora ra?” Oia, ua faaite Iesu i te faufaa o to ˈna toto i te Atua.—Hebera 9:11-14, 24, 28; 10:11-14; Petero 1, 3:18.
18. No te aha e mea faufaa ˈi ta te Bibilia e parau ra no nia i te toto no te mau Kerisetiano i teie mahana?
18 Maoti teie parau mau a te Atua e taa ˈi ia tatou te mau tuhaa faahiahia o ta te Bibilia e parau ra no nia i te toto—no te aha te Atua e manaˈo ai mai tera, eaha to tatou manaˈo i te reira e tia ˈi, e no te aha e titauhia ˈi ia faatura tatou i ta te Atua mau taotiaraa i nia i te faaohiparaa i te toto. Ia taio outou i te mau buka o te mau Papai Heleni Kerisetiano, e ite outou e rave rahi faahitiraa i te toto o te Mesia. (A hiˈo i te tumu parau tarenihia i te api 12.) Te faaite maitai ra te reira e e mea tia ia tiaturi te Kerisetiano taitahi “i to ˈna [to Iesu] ra toto.” (Roma 3:25) E nehenehe tatou e fanaˈo i te faaoreraa hara e te hau e te Atua na roto noa ‘i te toto ta Iesu i haamanii.’ (Kolosa 1:20, MN) E parau mau atoa no te feia ta Iesu i faaau i te hoê faufaa taa ê no te faatere e o ˈna i nia i te raˈi. (Luka 22:20, 28-30; Korinetia 1, 11:25; Hebera 13:20) Oia atoa no te “feia rahi roa” i teie mahana, o te ora ˈtu i “te ati rahi” i mua nei e o te fanaˈo i te ora mure ore i roto i te hoê paradaiso i te fenua nei. Ei auraa taipe, e ‘horoi ratou i to ratou ahu i te toto o te Arenio.’—Apokalupo 7:9, 14.
19, 20. (a) No te aha te Atua i maiti ai i te taotia i te faaohiparaa i te toto, e eaha to tatou manaˈo i te reira e tia ˈi? (b) Ia hinaaro tatou e ite i te aha e tia ˈi?
19 Papu maitai, e auraa taa ê to te toto no te Atua. No tatou atoa ïa. E tiaraa to te Atua Poiete, o te tapitapi ra i te ora, e taotia i ta te taata faaohiparaa i te toto. No to ˈna tapitapi rahi i to tatou iho ora, ua faaoti oia e faataa i te toto no te hoê faaohiparaa faufaa roa, tera anaˈe te faaohiparaa e noaa ˈi te ora mure ore. O te toto taoˈa ïa o Iesu. Auê tatou i te mauruuru i to te Atua ra o Iehova ohiparaa no to tatou maitai ma te faaohipa i te toto—te toto o Iesu—ia ora te taata! E auê tatou i te mauruuru ia Iesu i to ˈna haamaniiraa i to ˈna toto ei tusia no tatou! Oia mau, e nehenehe e taa ia tatou te manaˈo o te aposetolo Ioane: “Ei ia ˈna, ei tei aroha mai ia tatou nei, e ua tamâ ia tatou i ta tatou hara i to ˈna ihora toto, e ua faariro ia tatou ei arii anaˈe, e ei tahuˈa na te Atua i to ˈna ra Metua; ei ia ˈna te haamaitai e te mana e a muri noa ˈtu. Amene.”—Apokalupo 1:5, 6.
20 Mea maoro to to tatou Atua paari hope o tei horoa mai i te ora, manaˈoraa i teie ohipa o te faaora i te taata. E nehenehe ïa tatou e ui, ‘Eaha te faahopearaa o te reira i nia i ta tatou mau faaotiraa e ohipa?’ E pahono te tumu parau i muri nei i teie uiraa.
E nafea outou e pahono ai?
• Na roto i na aamu o Abela e o Noa, eaha ta tatou e haapii no nia i to te Atua manaˈo i te toto?
• I roto i te Ture, eaha ta te Atua taotiaraa i nia i te faaohiparaa i te toto, e no te aha?
• Mea nafea to Iesu faatupuraa i tei faaite-atea-hia e te Mahana taraehara?
• E nafea te toto o Iesu e nehenehe ai e faaora ia tatou?
[Tumu parau tarenihia i te api 12]
E ORA TE TAATA I TO VAI TOTO?
“E ara ia outou iho, e te nǎnǎ atoa i faarirohia ˈi outou e te [varua moˈa ei tiaau no roto mai ia ratou], ia faaamu hoi outou i te [amuiraa a] te Atua, o ta ˈna i hoo i [te toto o ta ˈna iho Tamaiti].”—Ohipa 20:28; MN.
“E teie nei, ua tiahia tatou i to ˈna ra toto, e rahi atu ïa to tatou ora ia ˈna ra i te pohe.”—Roma 5:9.
“Te tiaturiraa ore, e aore hoi e Atua i te ao nei. I teie nei râ, i te Mesia nei ia Iesu, . . . outou o te feia i te atea ê i mutaa ihora, ua faafatatahia mai ïa i te toto o te Mesia nei.”—Ephesia 2:12, 13.
“E mea tia . . . i te Metua e ei roto ia ˈna te î i te mau mea atoa ra vai mau atu ai; e ia faafaite hoi oia i te mau mea atoa ra ia ˈna iho i roto ia ˈna ra, i te hau i noaa i te toto [ta ˈna i haamanii i nia i te pou haamauiuiraa].”—Kolosa 1:19, 20; MN.
“E teie nei, e te mau taeae, ua noaa te tomoraa mǎtaˈu ore i roto i te vahi moˈa roa, no te toto o Iesu ra.”—Hebera 10:19.
“Aore outou i hoohia i te mea e ino noa ra . . . i ta outou parau faufaa ore i tuuhia mai e to outou hui metua ra; i te toto taoˈa râ o te Mesia ra, mai to te arenio ino ore e te maˈi ore.”—Petero 1, 1:18, 19.
“Ia haere . . . tatou na te maramarama, mai ia ˈna i roto i te maramarama ra, te au nei ïa tatou tatou iho, e te mâ nei tatou i ta tatou mau hara atoa i te toto o ta ˈna Tamaiti, o Iesu Mesia ra.”—Ioane 1, 1:7.
“E au oe ia rave i te buka e ia vahi i te mau tapao taati ra: i taparahihia hoi oe, e ua hoo oe ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa.”—Apokalupo 5:9.
“Ua hurihia hoi te tihotiho i to tatou mau taeae i raro . . . Pohe atura râ oia ia ratou i te toto o te Arenio, e i te parau ta ratou i faaite ra.”—Apokalupo 12:10, 11.
[Hohoˈa i te api 10]
Ua faataa maitai te Atua i roto i te Ture e e tuhaa ta te toto i roto i te faaoreraa hara
[Hohoˈa i te api 11]
Mea rahi te taata e nehenehe e ora maoti te toto o Iesu