E umere anei outou ma te oaoa?

E nehenehe anei ta outou e ite i te huru horoa noa e te hamani maitai o to tatou Poiete here na roto i te hiˈopoaraa i te natura? Noa ˈtu â ïa e aita te mau ata, te mau tumu raau, te mau taheraa pape e te mau mouˈa i hamani-noa-hia no te faaunauna i te huru o te fenua, e ere anei i te mea faahiahia e inaha, ua riro atoa ratou ei mau ohipa au mau ia hiˈo atu no to tatou mata? E o vai hoi te ore e mauruuru i te ori-haere-raa na roto i taua mau vahi nehenehe mau ra, o te tamǎrû hoi ia tatou, o te haamâha i to tatou rohirohi — o te faaitoito atoa râ ia tatou nei? Mai te peu e e apiti-atoa-hia ˈtu te mau maitai mai te mataˈi viivii ore, te noanoa o te mau tiare e te himene a te mau manu, e riro ïa tatou i te farii popou i te parau e na ô ra e: “E oaoa vau i te ohipa a to rima. Aore â te rahi o ta oe ra ohipa, e Iehova!” — Salamo 92:4, 5.

Oia mau, no te miimii o te taata nei e no to ˈna tiaraa taata hara, e rave rahi mau taata i teie mahana, o te ore e nehenehe e fanaˈo i taua mau ohipa faahiahia atoa ra. Ua fatata roa râ te taime i reira te Basileia o te Atua e haamâha mai ai i te mau hinaaro o te mau mea ora atoa ra. — Salamo 104; Luka 21:7-36.