E roohia anei te mau tamarii i te ati?

MEA nafea te mau poroi faatianiani e haapurorohia nei na roto i te afata teata, ia ohipa i nia i te mau tamarii apî roa? Ia au i te parau a te taote rapaau i te tamarii no Canada ra o Percy Barsky, mea puai roa ïa te mana o teie mau poroi. Ia au i te “Toronto Star”, ua papu i teie taote i taua ohipa nei, i to te hoê tamarii e toru matahiti parauraa mai ia ˈna e e hinaaro o ˈna i te “mauhaa mana hope” no te oroa Noela. No reira, te haa nei te hoê taatiraa no te parururaa i te maitai o te tamarii, ia opanihia te haapurororaa i te mau poroi faatianiani atoa no te mau hauti. Te manaˈo nei o Percy Barsky e e nehenehe te mau “hauti hamani ino” e faatupu i te peu hamani ino. Hau atu, ma te faataa mai i te parau no nia i te hoê hiˈopoaraa i ravehia no te Ohipa maimiraa no nia i te mariri ai taata i Glasgow, i te fenua Ecosse, te na ô ra te “Times” e: “Mai te onoraa o te matahiti, mea puai aˈe te mau poroi faatianiani no te avaava i te ohipa i nia i te mau tamarii i ta te mau taata paari e tiaturi nei.” I roto i teie na tupuraa e piti nei, mea atâata roa ïa te fifi, nafea râ ia arai i te reira? Ma te papu maitai, na te mau metua te hopoia matamua no te haapaoraa e ia oaoa ta ratou mau tamarii na roto i te maitiraa i te mau hohoˈa afata teata ta ratou e nehenehe e mataitai.