Na vai e haapao i te mau tamarii?

TEI roto tatou i te hoê piha no te tiribuna no New Hampshire (Etats-Unis). Ma te paari hoi to ˈna ouma, te tiai ra o Paul i to ˈna taime. Tau hebedoma na mua ˈˈe, ua faarue mai ta ˈna vahine i te utuafare ma te hopoi atoa na muri ia ˈna ta raua na tamarii e piti o te taˈi noa ra. Ia roaa faahou mai ia ˈna ra, teie na tamarii 13 matahiti e te 7 matahiti, ua opua maitai o Paul e aro.

I teie taime, ua tae roa te aroraa i mua i te haavaraa, i rotopu ia ˈna e ta ˈna vahine, i te hopea. “Auê teie ohipa i te tia ore e!” ta Paul ïa e parau ra, a horoa noa ˈi te haava i ta ˈna faaotiraa i nia i te mau hororaa tataitahi. “Na teie ïa haava, e taata ěê roa hoi i to ˈu nei utuafare, e faaoti i hea roa ta ˈu na tamarii e ora ˈtu ai.”

Tei roto o Paul e ta ˈna vahine i na 1 187 000 feia faaipoipo marite tei faataa i te matahiti 1985 ra. Ua hau atu teie numera i te toru taime ia faaauhia i te matahiti 1960. Aita teie aremiti o te mau faataaraa i faaea noa i te mau Etats-Unis, ua tapoˈi atoa râ oia i te ao taatoa nei. Hau atu, te faatupu nei 15 e tae atu i te 20 % o te mau faataaraa i te mau aroraa i mua i te haavaraa, no te haapaoraa i te tamarii. I roto i te hiˈoraa o Paul, ua tupu noa te mau tiaraa i mua i te aro o te tiribuna, hoê i muri i te tahi, e ua haamaraa noa te reira i te iria. Te haamanaˈo ra o Paul e: “I te hoê mahana i te fare haavaraa, no teie mau ohipa e faatapitapi noa ra i to ˈu feruriraa, ua manaˈo roa ˈˈera vau e e maamaahia vau e e ouˈa ˈtu vau i nia i te mau taata e vai ra i reira, no to ˈu hoi inoino rahi.”

Auaa hoi e ua nehenehe ia Paul ia haavî ia ˈna iho. Tera râ, ua iteahia na roto i te tahi mau tumu parau rarahi o te mau vea e ua tupu te tahi mau hamani-ino-raa aore ra te tahi mau taparahiraa taata i muri aˈe i te mau tatamaˈiraa uˈana no te haapaoraa i te mau tamarii. No te aha râ teie tupuraa e ino roa ˈi e e faatupu pinepine ai i te mau aroraa uˈana mau?

Te aroraa i rotopu i te mau metua

Mea taa ê te ture no nia i te haapaoraa i te mau tamarii ia au i te vahi ta tatou e ora ra. I roto i te rahiraa o te mau fenua i te pae tooa o te râ, ua aifaito te metua tane e te metua vahine i mua i te ture. I roto i na ahuru matahiti i mairi aˈenei, ua haapuai te mau tiribuna i nia i te faufaaraa ia “paruruhia te mea maitai aˈe no te tamarii”. No reira ˈtura ïa, e nehenehe te mau metua tataitahi e manaˈo e o oia te metua maitai aˈe no te haapao i ta ˈna tamarii.

Mai te peu e te aro ra vetahi no te paruru i te maitai o ta ratou mau tamarii, area vetahi ê ra, na to ratou ïa miimii e te riri rahi i to ratou hoa faaipoipo tahito, e turai ia ratou. Ua riro atura ïa te tamarii mai “te ravea hopea no te faautua ˈtu” e ravehia no te faaite i to ˈna riri aore ra to ˈna mauruuru ore. Ma te rave faahou mai i te mau parau a te hoê haava, e nehenehe te mau tamarii e riro ei “popo ta te feia faaipoipo tahito e tairi no te faaite i te huru manaˈo tahoo ta ratou e atuatu pinepine nei”.

Ua tae roa te tahi mau metua i te faatupu i ta ratou iho ture. Te eiâraa te metua tane aore ra te metua vahine i ta ˈna iho tamarii, ua riro ïa i teie mahana ei fifi i roto i te mau nunaa atoa, te tapaohia ra hoi i te mau Etats-Unis, fatata 100 000 eiâraa tamarii i te matahiti hoê. Ua tataipiti te numera o te mau eiâraa aore ra faatapuniraa tamarii i roto i te mau matahiti 1978 e 1983. E pinepine hoi teie ati i te faatupu i te hoê pepe ino roa i te pae no te mau manaˈo hohonu o te mau tamarii. Ua papai o Sally Abrahms no nia i taua fifi ra, i roto i ta ˈna buka Te mau tamarii i ropu i na pae e piti (beretane) e: “Ua riro te eiâraa tamarii ei haamauiuiraa mafatu no te mau matahiti 80.”

E mau faaotiraa ture tano anei?

I te tau Tahito ra, e titau na te mau metua i te hau ia rave i te mau faaotiraa i roto i te mau peapea i te pae no te haapaoraa i te tamarii. Ua tui noa te roo o te arii paari ra o Solomona no ta ˈna huru faaafaroraa i te peapea i rotopu i na metua vahine e piti (Mau Arii 1, 3:16-28). Tera râ, e ere i te mea ohie no te mau haava o teie nei tau ia faatupu i te “Haavaraa [tuiroo] a Solomona”.

Ia amahamaha anaˈe te hoê utuafare fetii na roto i te hoê faataaraa e ia hinaaro te metua tane e te metua vahine toopiti e tapea mai i te mau tamarii, na te haavaraa ïa e rave i te hoê faaotiraa. E haapao te mau haava e rave rahi tumu, mai te maitairaa i te pae o te feruriraa o te mau metua tataitahi, te mau hinaaro o te tamarii, te huru maitai o te mau taatiraa ta te mau metua tataitahi e atuatu nei e te tamarii, e oia atoa ta raua mau ravea no te horoa-tamau-raa ˈtu na ˈna i te mau mea e titauhia no te hoê oraraa papu.

Te mea pinepine roa ˈˈe râ, ta te tamarii e hiaai nei e ta ˈna e tiai nei, o te mau auraa mahanahana ïa e to ˈna na metua toopiti. No reira, te opuaraa e imihia nei e te rahiraa o te mau tiribuna “ia haamau-papu-hia ïa no te mau tamarii aita i raeahia to ratou matahiti, te mau farereiraa pinepine e te tamau e na metua toopiti”. I roto i te hiˈoraa i faahitihia i te omuaraa o teie tumu parau, ua manaˈo te haava “e te horoa nei o Paul i to ˈna oraraa taatoa no ta ˈna mau tamarii”, area ta ˈna vahine ra “mea au aˈe na ˈna i te faaherehere i to ˈna mau taime faafaaearaa no te aparau atu e to ˈna metua vahine e te tahi mau hoa vahine i roto i te hoê fare tamaaraa i pihai atu iǒ ratou”. No reira, ua horoahia ˈtura ia Paul ra i te haapaoraa i te mau tamarii. Ua faˈi atoa râ te haava e, e hinaaro atoa raua i to raua metua vahine e ua horoahia ˈtura na ˈna “te hoê parau faatia no te farerei rahi atu ia raua”.

Tera râ, aita i maoro aˈenei, te itehia ra te hoê tupuraa peapea mau. No te upootia i roto i te hoê haavaraa, ua faariro te tahi mau paruru i te tahi mau peapea no te haapaoraa i te tamarii ei aimǎroraa parau i te pae no te faaroo. Ua haafariu ê teie ravea tia ore i te tahi mau tiribuna mai ta ratou hopoia hoê roa oia hoi te parururaa i te mau mea e maitai ai te mau tamarii. Inaha, ua vaiiho noa ˈtura ïa te tahi mau haava ia ratou iho, ia haava i te tahi mau faufaa i te pae no te faaroo, ma te ore e haapao faahou i to ratou tiaraa. Eaha ˈtura ïa te mau faahopearaa?

Te manaˈo ra te tahi mau taata e paruru nei hoi i te mau tiamâraa o te huiraatira, e na roto i te faaôraahia mai te mau parau no nia i te faaroo i roto i te mau tuatapaparaa no nia i te haapaoraa i te mau tamarii, o te mau tiaraa ïa o te taatoraa o te mau tamarii e te mau metua atoa hoi, teie e faaatâatahia nei. I te mea hoi e e faatupu te faataaraa aore ra te faataa-ê-raa te feia faaipoipo i te amahamaharaa o e rave rahi mau utuafare fetii i roto i te mau matahiti e haere mai nei, e nehenehe paha ïa o outou iho aore ra te feia ta outou i matau, e farerei atoa i teie huru tupuraa.

[Parau iti faaôhia i te api 4]

Fatata 40 % o te mau taata faaipoipo marite e tamarii hoi ta ratou, e nehenehe e faataa aore ra e faataa ê ia ratou, i roto i na matahiti hoê ahuru e haere mai nei.