Te papai mai nei te feia taio

Te pohe-taue-raa o te aiû fanau apî

Te hinaaro nei au e haamauruuru ia outou [na nia i te iˈoa o te Taatiraa marite no te arairaa i te pohe-taue-raa o te aiû fanau apî] no ta outou mau tumu parau maitatai roa, mea papu maitai hoi e te hohonu atoa, ta outou i nenei i roto i te numera o te 8 no tenuare 1988 o te A ara mai na! no nia i “Te pohe-taue-raa o te aiû fanau apî”. Mea maere mau te neneiraa taatoa o ta outou vea e na te reira e turu i ta matou mau tutavaraa no te faaara i te taata. (...) E nehenehe anei ta outou e hapono mai i teie numera no te 8 no tenuare na roto i te reo helemani, danemata, farani, italia, néerlandais, norevetia, rusia e suede?

C. S., raatira tuhaa fenua, Etats-Unis

I te 18 no tenuare 1988, ua pohe ta mâua tamahine iti nehenehe roa e toru avae e te afa, ua roohia hoi oia i te pohe-taue-raa o te aiû. A feruri na i to mâua maere rahi i to mâua iteraa e ua tupu teie ati i te taime iho a nenei ai o A ara mai na! (8 no tenuare 1988) i te hoê tumu parau no nia i teie ati! Ua haafatata hau atu â teie ati mauiui mau ia matou pauroa. E rave rahi mau hoa tei faaite mai e ua taio faahou ratou i te tumu parau ia ite ratou e eaha te tia ia rave e eaha atoa te tia ia parau mai ia mâua. Ua faaineine ratou i te maa, ua atuatu ratou i te fare, ua tamâ ratou i te aua e ua tope atoa ratou i te mau tumu raau; ua pûpûhia mai na mâua te tahi mau ǒ no te tauturu ia mâua ia aufau i ta mâua mau haamauˈaraa, e te vai atu â. A tamau noâ i te nenei i te mau tumu parau mai teie te huru i te taime mau ra.

L. G., Etats-Unis

I roto i te numera o te A ara mai na! no te 8 no tenuare, api 16 e paratarapha 2, te taiohia ra e e toru mahana anaˈe to te aiû i pohe [te aiu e parauhia ra i roto i te haavaraa i faaotihia e te arii Solomona]. Ia manaˈo anaˈe vau, e ere teie parau i te mea papu roa. Mai te mea ra hoi, ia au i te Bibilia (Te mau Arii 1, 3:18, 19), ua fanauhia te piti o te aiû e toru mahana i muri aˈe i te tahi, e ua pohe oia tau taime i muri aˈe, aita râ i haapapuhia e afea râ.

M. B., Etats-Unis

Ua tano iho â oe. Ua hape hoi te taote ta matou i faahiti, i to ˈna faaotiraa e e toru mahana to te aiû a pohe ai oia, e ua faaô atoa ˈtura matou i teie manaˈo i roto i ta matou tumu parau. — Te feia nenei.

E 12 matahiti to ˈu e te haamauruuru nei au ia outou no te tumu parau a te A ara mai na! no te 8 no titema 1987 oia hoi “Te uiui nei te mau taurearea... Nafea ia faaruru i to ˈu mauiui?”. Hoê avae e te afa i teie nei, ua fanauhia to ˈu teina iti e ua pohe ïa oia. Aita vau i matau ia ˈna, ua mauiui roa râ vau mai te huru ra e o to ˈu tuahine e vau matahiti, tei pohe. Ua tauturu mai te tumu parau ia ˈu ia taa e mea tano iho â ia taˈi e e ere ïa te reira i te tapao no te hoê faaroo paruparu.

P. K., République fédérale no Helemani