Te faufaa ore o te haamoriraa idolo

I te tau veavea o te matahiti 1986, ua haere atu o William Murray, te hoê o te mau papai vea no te New Yorker, e hiˈo ia Sperlonga, te hoê oire iti taiˈaraa tahito roa e vai ra i tahatai i te pae tooa o te râ no Italia, fatata 120 kilometera i te pae apatoa no Roma. I te hoê poipoi, te inu hau noa ra oia i te taofe i roto i te hoê fare inuraa, matau atura oia ia Fernando De Fabritiis, te hoê taata paari. I roto i te tauaparauraa, faatia ihora o De Fabritiis Tane, tei ora noa hoi i Sperlonga, i te hoê aamu arearea ta ˈna i ite mai to ˈna tamariiraa mai â. Teie taua aamu ra:

“Aamu no te hoê taata faaapu pea. Hoê tumu pea ta ˈna aita roa ˈtu i hotu, tâpû atura oia e hoo atura i te hoê taata tamuta raau. Nanaˈo atura oia i roto i taua tumu raau ra i te hoê tii no Iosepha peata, o ta ˈna i pûpû atu na te fare pureraa o te oire iti. I te hoê sabati, haere atura te taata na ˈna te tumu raau, i te fare pureraa e i reira, ite atura oia i te taata te pure ra i mua i te tii o Iosepha peata. Area o ˈna ra, ua patoi oia i te pure. Ua ite o ˈna i taua tapu raau ra. ‘Aita taua tumu raau ra i faahotu mai i te hoê noa ˈˈe maa pea, nafea ïa o ˈna e nehenehe ai e faatupu i te mau semeio?’, ta ˈna ïa i parau atu i te mau taata atoa.”

E au te aamu a De Fabritiis Tane, i te faahohoˈaraa ta Iehova i horoa i Iseraela tahito no te haapiiraa ˈtu ia ˈna e mea faufaa ore te haamoriraa i te idolo. O ta outou ïa e ite atu na roto i te raveraa i ta outou Bibilia e te taioraa ˈtu i te Isaia 44:14-20.