No te aha te Ekalesia i amahamaha ˈi?

I TE mea e te ite-maitai-hia ra te mau amahamaharaa e vai ra i roto i te Ekalesia katolika ua hoê ïa te manaˈo o te mau katolika aau tae mau e rave rahi e to te aposetolo Paulo o tei faatae i teie mau parau i te amuiraa amahamaha no Korinetia: “E mârôraa tei roto ia outou. (...) Ua amahamaha anei te Mesia?” — Korinetia 1, 1:11, 13.

Ua papu i te mau katolika faaroo e rave rahi e eita e tia i te keresitianoraa ia “amahamaha”. I rotopu i te feia atoa o te parau ra e keresitiano ratou, te haapeapea taa ê ra te mau katolika no nia i te au-tahoê-raa o te haapaoraa kerisetiano. I te matamua ra, te manaˈo ra ratou e te vai ra teie tahoêraa i roto i te Ekalesia katolika. Ua faariro ratou i te haapaoraa porotetani ei anoiraa no te mau haapaoraa taa ê te tahi i te tahi. I to ratou hiˈoraa, mea papu te Ekalesia katolika e e mea tahoê mau. I teie râ mahana, ua feaa roa ïa ratou.

Te mau tumu no te amahamaharaa

Ua amahamaha te Ekalesia katolika i roto e toru na tuhaa rahi: te mau katolika hinaaro ra i te mau tauiraa, te mau katolika patoi i te mau tauiraa e te pae rahi ra o te mau katolika ïa e turu ra i te Vaticana II. Te poro ra e rave rahi mau katolika e hinaaro ra i te mau tauiraa i te mau haapiiraa huru rau no nia i te ravea no te tauturu i te feia veve e no te tururaa ˈtu i te politita orure hau. Ua fatata roa vetahi i te farii i te huru feruriraa a Marx e ua tae roa ratou i te faatiaraa i te orure hau na roto i te raveraa i te mau mauhaa tamaˈi. Teie râ, te taata tei haamau i te kerisetianoraa, teie ïa ta ˈna i parau atu i ta ˈna mau pǐpǐ: “No te mea râ e ere outou i to teie nei ao, o vau i maiti ia outou no roto i teie nei ao. (...) E ere to teie nei ao to ˈu basileia.” — Ioane 15:19; 18:36.

Te turu ra te mau katolika e patoi ra i te mau tauiraa i te mau tutuu a te taata e te hoê lituria latino, aita hoi te reira e itehia ra i te anotau o te Bibilia, no te mea o te reo heleni ïa te reo o te kerisetianoraa tumu, e ere râ i te reo latino. Hau atu i te reira, aita anei to ratou huru farii-ore-raa faatupu peapea e faahapa ra i ta ratou faahua-parau-raa e e kerisetiano ratou? No reira, ua papai o Henri Fesquet, taata papai tahito i te pae no te haapaoraa i roto i te vea Le Monde, e: “Te hiˈoraa o te mau kerisetiano [katolika] o te faaooo ra te tahi i te tahi e te tatamaˈi ra no nia i te mau vahi haamoriraa o te hoê ïa faahaparaa ia ratou iho o tei hoˈi noa mai iho â i nia ia ratou. Eaha ïa te faufaaraa i te pororaa i te maramarama na nia i te iˈoa o te Evanelia mai te peu e te faahapa ra te mau ohipa i ta ratou mau parau?”

Ua parau o Iesu i te mau Pharisea e: “Ua na reira outou i te faaore i te ture a te Atua i ta outou na tutuu.” (Mataio 15:6). I teie nei â mahana, hoê â ïa tera atoa manaˈo o te mau katolika aau tae mau e rave rahi no nia i te mau katolika no teie anotau e patoi ra i te mau tauiraa i teie nei anotau.

No te mau tumu taa ê te tahi i te tahi, te manaˈo ra te mau katolika o te hinaaro i te mau tauiraa e tae noa ˈtu i te mau katolika patoi i te mau tauiraa e ua faatupu te apooraa epikopo no Vaticana II i te hoê ui katolika e ere to ratou mau manaˈo i te mea papu. Ua uiui na taata papai o Jean Puyo e o Patrice Van Eersel i te melo no te apooraa nui no te haapiiraa teitei e philosopho katolika farani o Jean Guitton. Te haapoto ra raua i to ˈna mau manaˈo mai teie te huru: “Te Karedo katolika, te iho mau o te Ekalesia, te huˈahuˈa ra ïa na roto e rave rahi mau tuhaa patoi te tahi e te tahi, te turu ra to ratou mau melo itoito roa ˈˈe i te politita anaˈe, te rave ra te mau taurearea kerisetiano [katolika] i te mau taatiraa i te pae tino hou te faaipoiporaa ma te haapeapea-ore-hia, e aita e taata e ite faahou ra e nafea ia faaohipa maitai i te apooraa epikopo [Vaticana II], e aita ˈtura te nunaa a te Atua e ite faahou ra e nafea râ.”

Ma te taa-maitai-hia, te ui ra te mau katolika aau tae mau e: ‘No te aha te Ekalesia i amahamaha ˈi?’ Teie ïa te pahonoraa: No te mea aita hoê noa ˈˈe o ta ratou mau pǔpǔ e farii ra i te Bibilia mai te parau mana hoê roa o te nehenehe e faataa mai i te tiaraa o te mau kerisetiano mau i roto i te mau tuhaa atoa. No reira, ua amahamaha ihora ratou na roto e rave rahi mau haapiiraa no nia i te parau a te Atua e te mau tatararaa a te mau tutuu.

Eaha ta te mau katolika aau tae mau e nehenehe e rave?

I te matahiti 1981, ua haafifi te mau katolika patoi i te mau tauiraa i te hoê oroa eukumene i roto i te hoê fare pure katolika no Paris. I te oreraa te haapeapearaa, ua faatae te Metua epikopo Lustiger, arii epikopo no Paris (i teie mahana e karadino oia), i teie mau parau i te mau melo tei faaea mai i roto i te fare pure: “Ua putuputu tatou i reira no te ani i te mau ô a te Varua o te tahoê mai i te mau tamarii tei purara, ua ite râ tatou i te hiˈo no te amahamaha o te mau kerisetiano, te ohipa mehameha a Babela.”

I Babela to te Atua haapeapearaa i te reo o te feia e faatupu ra i te haamoriraa hape (Genese 11:1-9). I reira te paturaahia i muri iho te oire no Babulonia, te pû no te amuiraa o te mau atua e te mau ruahine e rave rahi. I roto i te Bibilia, ua riro maira teie oire ei taipe no te hoê amuiraa haapaoraa i roto i te ao taatoa nei i reira te ite-maitai-raahia te huenaneraa. Teie ta te hoê Titionare e tuatapapa ra i te parau no nia i te Atua,no nia i te Faufaa Tahito (beretane) e parau nei: “I te senekele I o to tatou nei tau, te faahiti faahou ra [te aposetolo] Ioane i te parau no te amuiraa o te mau haapaoraa, o Babulonia, ma te parauraa e o oia ‘te Metua vahine o te mau faaturi, e no te mau mea faufau o te ao nei’. (Apok. 17:5.)”

Ma te faahitiraa i te parau no teie Babulonia taipe, aore ra hau emepera no te haapaoraa hape i roto i te ao taatoa nei, te titau maira te Bibilia i te mau taata aau tae mau ia ohipa ma te haamarirau ore. Teie ta ˈna e parau ra: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe.” — Apokalupo 18:4.

Te faarue ra e rave rahi mau taata aau tae mau i te mau haapaoraa faanahohia o te amuiraa faaroo kerisetiano. Ei hiˈoraa, te hoê katolika tahito o tei papu te manaˈo, e ora ra i Alpes, teie ta ˈna iho i papai i te amaa o te mau Ite no Iehova no Farani: “Ia au i te tutuu tausani matahiti o te Ekalesia katolika, ua bapetizohia vau mai to ˈu fanauraahia mai â, i roto i te faaroo katolika. Fatata e 50 matahiti te maororaa e katolika itoito mau vau. I te matahiti 1980 ra i reira to ˈu papu-maitai-raa tei roto te Ekalesia i te hape. Ua paruparu ihora vau. E ua inoino atura vau. E rave rahi mau taime to ˈu aimârôraa e te tahi mau perepitero o te ore e faatura ra i ta ratou euhe. E rave rahi mau matahiti i teie nei to ˈu faaroo-noa-raa i te mau parau faaino no nia i te mau Ite no Iehova. I muri aˈe i to ˈu feruri-maoro-raa, farii [ihora vau ia ratou] i roto i to ˈu fare. Mea na reira vau i te iteraa e e horoa mai te haapiiraa Bibilia i te mau pahonoraa o ta tatou e tiai ra. Na reira vau i te iteraa e i muri aˈe e 50 matahiti taviniraa i roto i te Ekalesia katolika, aita vau i ite i te hoê noa ˈˈe mea i roto i te Bibilia, e e Bibilia hoi ta ˈu. Na te mau Ite no Iehova i tauturu mai ia ˈu ia ‘ite atu’ i te reira.”

E katolika itoito hoi o Ginette, o te ora ra i pihai iho ia Paris. I to ta ˈna tane haamataraa i te haapii i te Bibilia e te mau Ite no Iehova, ua imi o ˈna i te mau ravea atoa ia faaea o ˈna e ua na reira o ˈna i te patoi-noa-raa e rave rahi mau matahiti. Na te aha râ i faataui i to ˈna huru feruriraa? Te papai ra o ˈna e: “Ua erehia vau i te tiaturiraa. Aita te Ekalesia e horoa maira i te hoê noa ˈˈe maitai no ˈu. I te haamataraa, ua faatupu vau i te mau farereiraa i rotopu i te mau [Ite] e ta ˈu perepitero, ua ite râ vau e aita te perepitero i ite e nafea râ ia pahono atu.” Ua farii ihora o Ginette e haapii i te Bibilia e te mau Ite. I teie nei mahana, te oaoa ra o ˈna e ta ˈna tane i te taviniraa i te Atua i roto i te utuafare fetii tahoê o te mau Ite no Iehova i roto i te ao taatoa nei.

Mai te peu e te feaa ra outou e te peapea ra outou no te amahamaha e vai ra i roto i te Ekalesia, te titau nei matou ia outou ia ani atu i te tahi mau haamaramaramaraa hau atu â i te mau Ite o tei horoa mai ïa i teie vea ia outou aore ra i te feia papai i teie vea. E oaoa atoa te mau Ite no Iehova i te tautururaa ˈtu ia outou ia ite i te hoê utuafare fetii kerisetiano no te mau nunaa atoa o te faaite ra i te here e o te tahoê mau ra no te tavini i te Atua.

[Parau iti faaôhia i te api 20]

Eaha ïa te faufaaraa i te pororaa i te maramarama na nia i te iˈoa o te Evanelia mai te peu e te faahapa ra te mau ohipa i ta ratou mau parau?” — “Le Monde”.

[Parau iti faaôhia i te api 21]

“Ua ite râ tatou i te hiˈo no te amahamaha o te mau kerisetiano, te ohipa mehameha a Babela.” — Karadino Lustiger, Paris.