Te mau raau chimiques: te mau faahopearaa

TEI te hoê po toetoe no te avae titema 1984, i muri rii aˈe i te hora 12, te tupuraa te ati rahi roa ˈˈe o te Aamu o te taata nei i te pae hamaniraa taoˈa. Taa ê noa ˈtu i to Inidia, mea iti roa te taata tei faaroo i te parau no Bhopâl, te hoê oire hamaniraa taoˈa hau atu i te 800 000 taata, e vai ra i ropu i taua fenua ra. I taua po ra, aita roa ˈtu te feia e taoto ra e ite ra i te ati e tupu ra i pihai iho i to ratou vahi.

I roto i te fare hamaniraa taoˈa a te totaiete marite ra te Union Carbide i haamauhia i Bhopâl, ma te atâata mau, te rahi noa ˈtura te neneiraa i roto i te hoê tura e 45 tane isocyanate de méthyl, te hoê taoˈa chimique pohe e ravehia no te hamani i te raau tupohe manumanu. Inaha, te maˈi maira te gaz taero na roto mai i te hoê tamauraa pê e ua ueue aˈera te reira i te pohe e te mauiui pohe i roto i te oire maniania ore. Hau atu i te 2 500 tane, vahine e tamarii tei pohe, e hau atu i te hanere tausani tei riro ei feia hapepa.

E mau tausani animala pohe — te mau puaatoro oni taehae, te mau puaatoro e te mau uri — tei teitei noa ˈtu i roto i te mau aua faaapuraa, i nia i te mau purumu e te mau aroâ o te oire. Ua riro o Bhopâl ei umu taninaraa tino pohe tei rave-rû-noa-hia, i reira te feia pohe e taninahia ˈi i te po e te ao. Ua taninahia te mau tino pohe e 25 i te hoê â haereraa i nia i na 70 vahi taninaraa. Ua hunahia e rave rahi atu â i roto i te mau apoo amui i ôhia ma te rû.

E piti matahiti i muri aˈe, i Europa, ua tupu te tahi atu â ati rahi chimique i roto i te hoê fare hamaniraa taoˈa i pihai iho ia Bâle (Suisse). Fatata e 40 tane toetoea taero tei manii atu i roto i te Rhin. Ua pohe tau hanere tausani puhi pape e te tahi atu â mau iˈa na roto i teie haaviiviiraa tei “tahe mǎrû noa ˈtu na te hiti o te otia i rotopu ia Farani e ia Heremani, i Rhénanie, e na roto atu i te mau Pays-Bas e tae roa ˈtu i te miti no Apatoerau”. Ua papai te hoê vea e: “Ua tui te roo o te fenua Suisse i te pae no te vai-mâ-raa, e te pae no te papuraa o ta ˈna ohipa hamaniraa taoˈa e oia atoa o ta ˈna ohipa hamaniraa taoˈa chimique. Mea tahito ïa te reira i teie nei.”

Ua riro te feia no Bhopâl e te feia no te mau fenua no te hiti i te Rhin ei feia ati no te hoê anotau technologique (aravihi i te pae o te mau matini) o tei faahua hamani hau atu i te 66000 taoˈa chimique. E rave rahi o taua mau taoˈa tei hamanihia no te faaohie i te oraraa o te taata nei, teie râ, mea ê roa, mea taero roa te rahiraa e e nehenehe e faatupu mai i te tahi atu â mau faahopearaa pohe e te ino roa, i nia i te taata e i nia atoa i te mau faaohuraa o te natura. Ua horoa te hoê taata aivanaa i te iˈoa ra “raau tupoheraa ora” i nia i taua mau taoˈa chimiques ra.

E mau iˈoa fifi roa to teie mau taoˈa chimiques e mea iti roa te taata e ite i te faahiti atu i te reira. Ei faaohieraa, e faataa-noa-hia ïa te reira na roto i te mau haapotoraa mai te P.C.B., D.D.T., P.C.D.D., P.C.D.F., T.C.D.D. Mea atâata roa e te pohe atoa teie mau taoˈa taero no te taata e no te mau maitai o te fenua ta te taata e titau rahi nei. Inaha, te taiohia ra i te mau matahiti atoa “i te mau tausani e te mau tausani faarueraa taoˈa taero i roto i te natura”, ta te afai parau ïa no te Pû parururaa i te natura i te mau Etats-Unis, i parau. E haamataˈu teie mau faarueraa i te maitairaa o te mataˈi, te pape ûa e te mau pape no raro i te fenua. E haaviivii te reira i te repo fenua no te mau ahuru matahiti e haere mai nei.

I te mau Etats-Unis noa, te manaˈo ra te Pû parururaa i te natura e, i te mau matahiti atoa, fatata e 6 milia metera afata toetoea taero teie e haaviivii nei i te mau pape no raro i te fenua. Ia ite tatou e e haaviivii te hoê noa litera pua pape i te 20 milioni litera pape no raro i te fenua, i nia ˈˈe i te faito ino ore teitei roa ˈˈe, eita ïa e nehenehe e feruri i nia i te mau faainoraa e faatupuhia e te 6 milia metera afata taoˈa taero.

Ua viiviihia te mau anavai pape na roto i te mau taoˈa chimiques atâata mau e te mau toetoea ta te feia aroha ore e manii nei i reira. Te pohe nei te mau iˈa. Na nia ˈˈe, no te mea hoi e tahe atu te mau anavai rii e te mau anavai rahi i roto i te miti, e viivii-atoa-hia ïa te reira na roto i te mau taoˈa pohe e maniihia ˈtu i reira. No reira, ia au i te taata tuatapapa i te pae o te miti e te tuiroo hoi o Jacques-Yves Cousteau, i te tahi mau vahi i î na i te mau mea ora no roto i te miti, ua ore roa te iˈa.

Te haamataˈu atoa ra te viiviiraa o te fenua nei i te mau manu e te mau animala e ora i nia i te fenua. Tae noa ˈtu i te mau aua animala, aita ïa e parururaa. “Ahuru aua o te fenua [marite] tei viiviihia na roto i te mau taoˈa chimiques taero, e e 74 aua ê atu â te nehenehe e viiviihia mai. (...) Ua pohe e rave rahi mau manu e ora i roto i te pape, i roto i te aua, no te mau taheraa raau faatupuraa tiare hamanihia i te sélénium e te tahi atu â mau raau chimique, i roto i te pape”, ta te New York Times ïa no te 4 no febuare 1986, e faataa ra.

Aita roa ˈtu te feia aivanaa o te ao taatoa nei e manaˈo oaoa nei. Aita noa te toparaa oioi roa o te mau maitai o te fenua nei e au i te pauraa o te repo e i te viiviiraa o te mataˈi e te pape. Eaha râ no nia i te mau uru raau rarahi o te mau fenua veavea, tei tia noa ˈtu hoi te mau raau tau ahuru metera i te teitei, i nia i te raˈi tau tausani matahiti i te roaraa? Te haamataˈu-atoa-hia ra anei te reira, mai te tahi atoa mau maitai o te fenua nei? Ia ite maite atu tatou aore ra eita, e ohipa na tatou te huru o teie mau uru raau ruperupe i hamanihia e Iehova. O ta te tumu parau ïa i mua nei e faataa mai.