Aita e fare — E te ora noa nei râ!

Na ta matou papai vea i Tapone

UA tae mai te mau pahi matamua e uta ra i te feia e horo ê ra i te mau tapaeraa pahi ra o te otue no Izu i te po 21 no novema. I muri aˈe, no te mea hoi ua taaihia o Oshima i te oire no Tokyo, ua opuahia ia aratai i te feia e horo ê ra i roto i taua oire ra. Ua faanaho te oire i te mau tauturu ma te tauturuhia e te faatereraa tapone. Ua hopoi atoa mai te mau Ite no Iehova no te mau tuhaa fenua no Izu e no Tokyo i ta ratou tauturu, e oia atoa te mau Ite e rave ra i te ohipa i te amaa a te Taiete Watch Tower e vai ra i Ebina, fatata e 80 kilometera noa i te mouˈa Mihara.

No te mea hoi te tâpû-pinepine-hia ra te tabula o te afata teata no te haaparare i te mau parau apî no taua tupuraa ra, ua haapeapea roa aˈera te mau Ite no Iehova no taua mau vahi ra no to ratou mau taeae e mau tuahine i te pae varua no te motu. Ua faaau aˈera o Nobusama Obata, no te amuiraa no Ito, e te tahi atu â mau Ite i to te tuhaa fenua no Izu e ua faanahonaho aˈera ratou ia ratou no te farii i te feia e horo ê ra. I te hora 6 e te afa i te ahiahi, i taua mahana ra, te vai ra te mau Ite i nia i te mau uahu atoa o te otue no Izu e i Atami atoa. Ua ineine ratou pauroa i te farii i to ratou mau taeae no Oshima.

I to Jiro Nishimura e na melo e maha o to ˈna utuafare fetii taeraa mai i Atami fatata i te hora 10 i taua ahiahi ra, tei reira te mau Ite no taua oire ra no te farii atu ia ratou, e mau vea A ara mai na! e Te Pare Tiairaa i roto i te rima. No te mea hoi aitâ te mau mana faatere i faaoti atura i te parau no te nohoraa, ua faatiahia ˈtura te utuafare fetii Nishimura ia haere atu i te vahi ta ratou e hinaaro ra. Ua haere atura ïa ratou i Yugawara, i reira te tamaiti a Jiro Nishimura e ohipa ˈi ei matahiapo i roto i te amuiraa o taua vahi ra. Ua riro maira te fare i reira ratou te faaearaa ei pû no te faanahonahoraa i te pae o te feia no te amuiraa no Oshima tei horo ê.

I te hora 8 i te poipoi aˈe, ua opua aˈera te tomite o te amaa tapone a te Taiete Watch Tower, tei Ebina hoi te mau piha raveraa ohipa, ia tono oioi noa mai e piti na tia o te amaa i roto i te tuhaa fenua no Izu, e e piti atoa i roto i te tuhaa fenua no Tokyo, no te faanahonaho i te mau tauturu.

A hiˈopoa noa ˈi te mau tia o te amaa e o Jiro Nishimura i te mea e nehenehe e ravehia, ua tae maira o Mitsuo Shiozaki. Te afai maira o ˈna i te mau tauturu a ta ˈna amuiraa, te amuiraa ïa o Numazu. Ua mauruuru roa te feia tei horo ê i te mau ahu i horoahia na ratou, no te mea, te ahu e vai ra i nia i te rahiraa a faarue ai ratou i te motu, te reira anaˈe ïa. Ua farii atoa ratou ma te aau mehara i te maa ta ˈna i afai mai.

Ua faanahohia te tahi mau tomite tauturu i Izu e i Tokyo no te opere i te mau tino moni i titauhia na te mau melo o te amuiraa no Oshima. E hopoia atoa na teie mau tomite te haapaoraa ˈtu i te mau hinaaro i te pae varua o te feia tei horo ê.

Te mau tauturu i faanahohia i Tokyo

I te 21 no novema, i te hora 9 mairi e 55 minuti i te ahiahi, i muri aˈe a faarue ai tau pahi i te motu no te haere atu i roto i te mau oire e rave rau no te otue no Izu, ua aratai maira te tavana rahi no Tokyo i te feia atoa tei horo ê i to ˈna ra oire. Ua faatoroahia o Yoshio Nakamura, te hoê matahiapo no te amuiraa a te mau Ite no Iehova no Mita (Tokyo), no te faanahonaho i te mau tauturu i roto i taua oire ra. Ua riro maira to ˈna fare ei pû no te tauturu.

Ua titau o ˈna i to ˈna vahi tau melo no ta ˈna amuiraa e no te amuiraa no Shinagawa. Ua haere faahou atura ahuru i roto ia ratou i te mahana maa, fatata i te hora piti i te aahiata, no te haere atu i nia i te mau uahu i reira te mau pahi na Oshima mai e tapae mai ai. Te vai ra ta ratou te mau iri piaraa parau, teie tei papaihia: “Te mau Ite no Iehova no Oshima: A haere mai i o nei.”

Ua haere noa ratou i rotopu i na uahu e piti i reira te mau pahi e vaiiho ai i ta ratou mau horo patete, e ia tae roa mai te pahi hopea. Ua tae ïa i te hora ahuru i te poipoi. Ua haere atoa te mau Ite no Iehova o te amuiraa no Chuo i nia i te tahi atu uahu i reira te tahi mau pahi na Oshima mai e tapae mai ai. No te mea hoi aita ratou e ite tei hea râ pahi ta to ratou mau taeae e mau tuahine i rave, ua faaitoito aˈera te mau Ite no Iehova o te mau amuiraa no Tokyo i te haere atu i te mau tapaeraa pahi atoa.

“O te mau Ite no Iehova anaˈe, ta te taata ra o Kazuyuki Kawashima ïa e faataa ra, te feia no te hoê pupu faaroo tei tae mai i nia i te mau uahu no te farii i to ratou hoa i te pae faaroo. Te tahi noa pupu tei haere mai i mua i te feia tei horo ê, no te syndicat o te mau orometua haapii ïa.”

I te mahana maa i te ahiahi, ua haapue oioi aˈera te tahi mau melo o te mau amuiraa no Mita e no Shinagawa i te mau ahu e te tahi atu â mau taoˈa tauturu no te opere oioi atu na to ratou mau taeae i te pae varua no Oshima. I reira, ua faatomo ratou i te mau mea atoa i nia i te hoê pereoo rahi e ua haere atura i te mau vahi hororaa i reira te mau Ite tei faahorohia mai, i te faaearaa. Ua fanaˈo aˈera te mau Ite no Oshima e te tahi atoa feia tei horo ê e vai ra i reira, i te mau tauturu.

Faaitoitohia e te mau tapao aroha

Ua parau aˈera te hoê Ite tei faahorohia mai e: “I to matou faarueraa ia Oshima, aita roa ˈtu matou i ite e e haere râ matou i hea. I to matou râ pouraa mai mai nia mai i te pahi, ua ite aˈera matou i te hoê iri piaraa parau tei papaihia ‘Ite no Iehova’. Auê ïa maereraa e! Auê ïa oaoaraa hohonu e! Te hotaˈihia ra ta ˈu vahine i te iteraa ˈtu i to matou mau taeae tei haere mai no te farii ia matou i nia i te uahu.

“No tae noa mai nei matou i roto i te piha faaetaetaraa tino no Koto Ward e no niuniu noa ˈtura matou i te taeae Nakamaru e, inaha, te tae maira te mau tia no te amaa no te faaitoito mai ia matou. Ua faahiahia-roa-hia matou i teie mau tapao no te haapao-maitai-raa e te erehia ra matou i te mau parau no te faaite i to matou mauruuru.”

I roto i te hebedoma, ua haere aˈera te tahi mau melo o te tomite no te tauturu i roto i te mau vahi hororaa atoa te vai ra te mau Ite i reira e ua hapao maite ratou eiaha ratou ia erehia i te hoê aˈe mea. Ua ite mai ratou e ua hamani maitai mau te mau melo o te mau amuiraa no te reira mau vahi, i te mau Ite tei faahorohia mai. Ua titauhia te feia e haapii ra i te Bibilia, i te mau mahana atoa, ia tamaa i te fare o te tahi mau Ite no taua vahi ra. Ua mauruuru roa ratou i te maitai ta teie mau Ite i faaite mai ia ratou a ore noa ˈi hoi ratou i ite ia ratou na mua ˈˈe i te faarueraa i te motu.

Ua manuïa maite teie haafaarueraa i te motu no te mea ua horoahia te mau faaararaa tano maitai e no te mea ua faaroo atu te mau taata i te reira. Teie râ, te fatata roa maira te hoê ati rahi roa ˈtu â i te tutuharaa auahi o te hoê mouˈa auahi e te haamataˈu ra i te taatoaraa o te mau taata. Te faaarahia ra ratou no nia i teie ati e no nia i te mea e tia ia ratou ia rave no te ape atu i te reira e ia ora mai ratou. E faaroo anei outou i teie faaararaa?

[Hohoˈa i te api 7]

Te aniani ra o Jiro Nishimura no nia i te tahi atu mau Ite tei faahorohia maia.

[Nota i raro i te api]

[Hohoˈa i te api 8]

O Mitsuo Shiozaki, teie e opere nei i te mau tauturu.

E rave rahi mau tei faahorohia mai tei taoto i roto i te mau piha faaetaetaraa tino, i nia noa i te tahua.