E tauturu anei outou ia tupu te ati?

E, e pinepine te mau Ite no Iehova i te tauturu ia tupu te ati. E tauturu matou i te mau Ite e i te feia e ere i te Ite. Tei faauehia ïa e te Bibilia i roto i te Galatia 6:10: “E hamani maitai tatou i te taata atoa, ia rahi atu râ i to te fetii faaroo ra.” E turu atoa matou i te feia tei atihia i te pae aau e i te pae varua.—Korinetia 2, 1:3, 4.

Faanahoraa

Ia atihia te hoê vahi, e taniuniu te mau tiaau o te mau amuiraa no ǒ i te feia atoa o ta ratou mau amuiraa no te ite e te maitai ra anei ratou e eaha te tauturu ta ratou e hinaaro ra. Ia oti, e faaite te mau tiaau i tei itea ia ratou e i tei rave-ê-na-hia i te amaa a te mau Ite no Iehova no ǒ.

Aita anaˈe e maraa i te mau amuiraa no ǒ ia horoa i te tauturu e titauhia, e faanaho te Tino aratai a te mau Ite no Iehova i te tauturu hau. Mea na reira te mau Kerisetiano matamua i te tautururaa te tahi i te tahi a tupu ai te hoê oˈe. (Korinetia 1, 16:1-4) E faatoroa te amaa no ǒ i te mau tomite tauturu no te faanaho e te aratai i tei ravehia. E horoa te mau Ite o te tahi atu mau vahi i to ratou taime e faufaa no te tauturu.—Maseli 17:17.

Te moni

E faaohipa-atoa-hia te mau ô e horoahia ra i te mau amaa a te mau Ite no Iehova no te tauturu i tei atihia. (Ohipa 11:27-30; Korinetia 2, 8:13-15) Aita te mau rima tauturu e aufauhia ra. No te ohipa tataîraa ïa te moni, e ere no te aufau i te feia e faanaho ra i te reira. E haapao maite matou i te mau ô atoa.—Korinetia 2, 8:20.