Te hauti nei au i teie nei i te hoê pehe taa ê

I TE ahururaa o to ˈu matahiti, e faahohoˈa na vau i te mau fenua mediteranea mai te mau vahi atea taa ê e tei î i te mau parau moe. Ua faahiahia roa vau i ta ratou pehe huru ê roa e faaohipa ra i te mau nota maere roa e te mau taˈi no te tau tahito. Aita roa ˈtu vau e manaˈo ra e e ite atu vau e rave rahi o taua mau fenua ra na roto i te arai o to ˈu toroa. Oia mau, ia au i to ˈu tiaraa faataˈi upaupa i roto i te hoê pupu paniora faaoto upaupa no te ori, ua hauti vau i roto i te fenua Maroka, i Etiopia, i Heleni, i Libia, i Soudan, i Aiphiti e i te tahi atu mau vahi.

Ua fanauhia vau i Cervera del Río Alhama, te hoê oire iti no te fenua tuiroo faaapu vine ra no La Rioja, i te pae apatoerau no Paniora. Ua hinaaro hoi to ˈu metua tane ia haapii vau i te faaoto i te pu mai to ˈu nainairaa mai â; area to ˈu metua vahine ra, ua haapao ïa oia ia roaa ia ˈu i te hoê haapiiraa etaeta i te pae faaroo. Ua haapii mai oia ia ˈu ia haere vau i te pureraa i te mau sabati atoa e i te mau mahana oroa.

I te mea hoi e ua aˈa hohonu roa teie peu i roto ia ˈu, i te tahi atu mau matahiti i muri aˈe, i roto i to ˈu mau tere, e imi iho â vau i te hoê fare pure ia nehenehe vau e faaroo atu i te oreroraa.

Te tahi atu mauhaa

I te matahiti 1959, ua faaô atu vau ia ˈu i roto i te pupu faataˈi upaupa oia hoi Na taata Toopae no Paniora (Los Cinco de España). I roto i te hoê tere, a hauti ai au i Chypre, ua ani maira te tahi atu taata faataˈi upaupa ia ˈu i te mea au-roa-hia ˈˈe e au i te taio. “Te aamu moˈa”, o ta ˈu ïa i pahono atu ia ˈna. Ua parau maira oia ia ˈu e: “Mai te peu mea au na oe i te aamu moˈa, ua matau vau i te hoê taata o te nehenehe e paraparau mai ia oe no nia i te reira tumu parau.”

Aitâ vau i farerei aˈenei i taua taata ra, ua faatae mai râ oia na ˈu i te hoê Bibilia. Auê ïa taoˈa horoa faahiahia mau e! Ua taio aˈera vau i taua Bibilia ma te anaanatae mau, e ua riro maira hoi te reira ei mauhaa apî na ˈu — ei mauhaa nehenehe mau. I roto râ i to ˈu rima, mai te hoê upaupa umeume faahiahia roa ïa te reira na ˈu ta te hoê taata tei ore i noaa ia ˈna i te aravihi, e nehenehe e hauti.

I muri iho, ua haere atura vau i te fenua Libia e ua farerei aˈera vau i te hoê taata Heleni o Panos te iˈoa, e e Ite no Iehova hoi o ˈna. E inaha, ua tanohia mauâ i roto i te hoê â piha. I te mahana matamua, ia ˈu i tatara i to ˈu afata vairaa ahu, ua rave maira vau i to ˈu satauro e pura noa e na te uira atura ïa e faahaere. Ua faanaho atura vau i muri iho, i nia i te amuraa maa te tahi mau hohoˈa no te “feia moˈa”. E i roto â i ta ˈu mau tauihaa, te vai ra ïa e maha satauro ta ˈu i hoo mai no te hopoi atu na to ˈu mau tuahine, i Paniora. Te tautau atoa ra hoi i nia i to ˈu arapoa ta ˈu iho satauro i nia i te hoê fifi auro. E i te pae hopea, ua tatara maira vau i te Bibilia tei horoahia mai na ˈu i Chypre.

Ua hiˈo noa mai o Panos ia ˈu, aita râ o ˈna i faahiti i te hoê noa ˈˈe parau. Tau mahana noa i muri iho to ˈna faahitiraa mai no nia i taua tumu parau e ua aparau aˈera hoi mâua. Ua maere roa vau ia faaohipa oia i te Bibilia ma te ohie. Ua faaite mai oia i te Exodo pene 20, irava 1 e tae atu i te 7, e te Deuteronomi pene 7, irava 25.

Ua taio vau i taua mau irava: “Eaha râ ïa te auraa?” ta ˈu ïa i aniani ia ˈu iho. “Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei (...): Eiaha roa oe e piˈo i raro ia ratou, eiaha oe e tavini ia ratou.” E: “E tahu outou i to ratou mau atua taraihia ra i te auahi: eiaha oe e nounou i te ario e te auro i nia iho ia ratou.”

Ua hiˈo aˈera vau i to ˈu satauro, ta ˈu mau hohoˈa no te “feia moˈa” e ta ˈu satauro auro. Ua manaˈo atoa ˈtura vau i te mau rahiraa tii e vai ra i roto i te mau fare pure i reira vau e haere ai i te pureraa — i to ˈu hiˈoraa, e mau taoˈa haamoriraa anaˈe hoi teie!

I muri aˈe i taua tauaparauraa ra, ua feruri vau e hia rahiraa mahana no nia i ta te Bibilia e parau e, inaha, ua rave aˈera vau i ta ˈu opuaraa. Aita e otoheraa. Ua tuparari atura vau i taua mau idolo ra i te hoê ofai rarahi, e ua taora aˈera hoi au i te mau huˈahuˈa i roto i te miti. Ua faaore roa te haapiiraa tamau o te Bibilia ta ˈu i rave na e to ˈu hoa heleni i to ˈu mau manaˈo feaa hopea.

Te hoê pehe ê atu

Hou atoa hoi au e hoˈi atu ai i te fenua Paniora, ua papai atu vau i to ˈu fetii no te faaite atu ia ratou i to ˈu mau tiaturiraa apî — e i te tahi taime e ere atoa na roto i te mǎrû. Ia ˈu i hoˈi atu i te fare, ua haaputu aˈera vau i te taatoaraa o ta ˈu mau taoˈa faaroo e ua faahuˈahuˈa aˈera au e ua tutui aˈera i te reira.

I te hoê ahiahi, ua titau atura vau fatata 80 o to ˈu mau taata tapiri e mau hoa no te poro atu ia ratou. Ua faaara maira te hoê o ratou e roo-mau-hia vau i te fifi. E tia ia parau e i taua tau ra, na mua ˈˈe i te matahiti 1970, aitâ te tiamâraa i te pae no te haamoriraa i horoahia ˈtura i te mau Ite no Iehova i te fenua Paniora. Ua parau-atoa-hia mai ia ˈu e ua faaineine te mau taata o te hoê oire tapiri mai i te hoê pou no te tarî ia ˈu. Aita râ vau i tâuˈa noa ˈtu i taua haamataˈuraa ra. Te ohipa faufaa roa ˈˈe no ˈu o te haapiiraa ïa i te faaohipa ma te aravihi i te mauhaa rahi roa ˈˈe: oia hoi te Bibilia.

I te mea hoi e e rahi noa hoi au i te faaohipa i te reira, ua ohie roa ˈtura ïa vau i te haapapu i te tahi mau tumu parau i te pae no te haapiiraa maoti te mau irava bibilia: Exodo 20:1-5, te opani ra te Atua e ia faaohipahia te mau hohoˈa i roto i te haamoriraa; Ezekiela 18:4, 20, e ere te nephe (âme) i te mea pohe ore; Ioane 1:1, 18, e Tamaiti Iesu na te Atua, e ere râ oia o te Atua iho. E nehenehe atura ïa ta ˈu e paruru i to ˈu faaroo na roto i te faaohiparaa i te mau ravea ohie e te paari atoa.

Te hauti ra vau no te hoê tumu faufaa aˈe

I muri aˈe, i te 19 me 1968, ua bapetizohia aˈera vau i roto i te hoê tere i Holane.

I reira hoi to ˈu faaôraa ˈtu ia ˈu i roto i te hoê toroa apî. Ua hoˈi faahou atu vau i roto i te tuhaa fenua no La Rioja, i reira to ˈu farerei-faahou-raa ˈtu i to ˈu tuahine e ta ˈna tamahine tei bapetizo atoa ia raua. O raua te mau taata matamua i roto i ta ˈu pororaa matamua fifi mau hoi. I taua tau ra, ua tapeahia hoi au a poro noa ˈi vau ei tiaau haaati i Soria. Ua tupu te reira na mua ˈˈe i te matahiti 1970, matahiti i reira te pororaa a te mau Ite no Iehova i farii-faahou-hia ˈi e te mau tia mana. I muri aˈe i to ˈu anianiraahia 12 hora te maoro, ua tapeahia ˈtura vau e toru mahana. Ua faaohipa aˈera vau i taua taime ra no te poro i roto i te fare auri e ua anaanatae maira te hoê mau auri no Séville, i te parau mau. I muri aˈe i to ˈu hoˈiraa ˈtu i Andalousie, ua farii aˈera oia i te haapii i te Bibilia e e i muri iho ua bapetizohia ˈˈera oia.

I te mea hoi ua pûpû vau ia ˈu i te Atua e ua oti au i te bapetizohia i teie nei, aita ˈtura ïa hoê noa ˈˈe mea e tapea ra ia ˈu i te rave i te taviniraa ma te taime taatoa. Ua nominohia vau ei pionie taa ê i te matahiti 1970 e ua poro vau i roto e rave rahi mau tuhaa fenua taa ê no Paniora i roto i te mau matahiti i muri aˈe. I roto i te mau tuhaa fenua atoa i reira to ˈu tonoraahia ˈtu, ua farii maira te mau taata i te parau apî maitai taˈi navenave o te Basileia ta te Atua i horoa ˈtu i roto i te rima o te Mesia, ma te oaoa. Mea itoito te mau amuiraa a te mau Ite no Iehova i teie nei, inaha, e mau pupu iti hoi to reira na mua ˈˈe, aore ra aita roa ˈtu e taata poro i reira, a piti ahuru matahiti i teie nei.

Ua noaa ia ˈu i te haamaitairaa i roto i te hoê tuhaa iti haihai, i te apitiraa ˈtu vau i roto i taua maraaraa ra, eiaha e ta ˈu pu, e te Parau râ a te Atua, te Bibilia (Salamo 9:11). — Faatiahia mai e José María Peláez.

[Hohoˈa i te api 25]

I teie nei, ta ˈu mauhaa o te Bibilia ïa, e to ˈna oto navenave, o te parau no nia i te Basileia ïa.