Te ati rahi o te mau hohoˈa faufau: ua ite maite anei outou eaha to ˈna faito ino?

TE HAAMATAˈU nei te hoê ati rahi ia outou e te feia herehia e outou. Te haapeapea nei hoi i te mau milioni taata. Mai te mau faahopearaa ino o te mataˈi atomi te tupu i muri aˈe i te hoê ati i roto i te hoê pu atomi, ma te itea-ore-hia e te haapohe atoa râ, te topa nei te reira ma te ite-ore-hia i nia i te mau nunaa taatoa hou ratou a ite maite atu ai i te mea e roohia ra i nia ia ratou. Eaha taua ati rahi ra? Te mau hohoˈa faufau ïa.

E rave rahi teie e hape nei no nia i teie ati. No te mea aita ratou e ite maite nei i te atâata o te reira, e nehenehe atura ïa e parare ohie noa. Mai te peu, ei hiˈoraa, te manaˈo nei outou e e au noa te reira no te mau oire rarahi, inaha e nehenehe ïa outou e to outou utuafare fetii e roo-noa-hia ˈtu. Oia mau, i teie nei, te topa atoa nei te reira i nia i te mau oire nainai. Ua ô atu hoi i roto i te mau utuafare, te mau fare haapiiraa, te mau fare vairaa buka, te mau fare tapearaa e te mau vahi raveraa ohipa.

Eiaha atoa e manaˈo e e mau “puaa ruau” anaˈe to muri mai i teie ati te haamataˈu nei i to outou utuafare fetii. Ua faaite mai te tahi mau tuatapaparaa e te vai atoa ra te mau faatere scouts, te mau haava, te mau taata hauti teata, te feia no te pae faanavairaa faufaa, te mau upoo faatere haapaoraa, e tae noa ˈtu te mau tamarii apî, ei haapoto-noa-raa te feia manaˈo-ore-roa-hia ˈˈe.

E rave rahi mau mea teie e haaparare nei i teie ino riaria mau: vea, buka, hohoˈa teata, afata radio teata, ripene e hautiraa vidéo, pehe e ohipa faaiteiteraa. Tae roa ˈtu i te niuniu, te faaohipa-atoa-hia nei no te mea te titau nei vetahi i te feia tamatahitihia i te niuniu i te hoê numera niuniu no te mau aparauraa faufau. Te rahi noa ˈtura te mau fare teata, te mau vahi hooraa hohoˈa vidéo e te mau fare rii hooraa hohoˈa “na te mau taata paari”.

Ua tapao te vea no te pae hooraa i te mau hohoˈa faufau marite, i te hoê mahana, ma te mauruuru e “i te matahiti 1979, ua (...) hau te mau vahi hooraa buka na te mau taata paari, e toru e tae atu i te maha taime hau atu i te mau fare tamaaraa McDonald i Marite”. Peneiaˈe aita outou i manaˈo e ua parare roa teie ati rahi. Noa ˈtu râ, te haapapu noa ra te reira e ua parare roa teie ati, parau mau ma te huna, ma te faaea ore atoa râ.

Parau mau, e ere te mau hohoˈa faufau i te hoê ati rahi au noa i to tatou nei senekele XX. Ua itehia mai i te mau hohoˈa papai e te mau hohoˈa faufau no te mau tau atoa. Ua rave tamau na te tahi mau totaiete taata i te faaturiraa moˈa i roto i te mau fare pure e ua haamori na ratou i te mau hohoˈa faataipe i te melo taatiraa o te tane. I te anotau no te Hau emepera roma, ua uˈana te mau ohipa hohoˈa faufau i roto i te oire viivii roa no Pompéi. Oia mau, e aamu roa roa to te mau hohoˈa faufau.

Te haaparare nei ratou i te ino no to ratou hinaaro i te moni

Te taa-ê-raa e to tatou nei tau, te mea ïa ua taui oioi roa teie ino ei ohipa imiraa moni rahi roa e te ruperupe. Ma te faaohipa maite i te ite aravihi no teie nei, ua hamani te feia no te pae hohoˈa faufau e rave rau mau taoˈa ia î roa te mau vahi hooraa o te ao nei. O ta teie ïa mau tapao riaria mau e faaite nei:

CANADA: Ia au i te vea ra Chatelaine, i Canada te raeahia nei i te mau hooraa tauihaa faufau “fatata e 6 milia moni marite i te matahiti”. Te faaite nei te hoê parau faataa piihia Te mau hohoˈa faufau e te faaturiraa i Canada (beretane) e te horoa nei teie imiraa moni fatata “e 500 milioni moni marite i te matahiti” i te ohipa tia ore e te manaˈo-maite-hia. Ia au i te raatira mutoi no Ottawa, e 20 milioni moni marite te faufaaraa o te mau buka e te mau hohoˈa teata faufau haruhia i te mau matahiti atoa e te mau tia mana faatere.

ETATS-UNIS: I Californie, ua manaˈo te mau piha ohipa no te Haavaraa e i roto i taua Hau ra, ua noaa mai i te mau hohoˈa faufau i te “hoê tino moni matahiti e 4 milia moni marite” i te matahiti 1978 ra. Te faaite ra te tahi atu â mau parau faataa e “ahuru mau vea faufau tuiroo” teie e apî nei e 475 milioni moni marite i te mau matahiti atoa e e naeahia te moni apî a te mau fare teata e pata noa nei i te mau hohoˈa faataahia no te mau taata paari, i nia i te faito e 365 milioni moni marite i te matahiti. I New York, e nehenehe te hoê fare hooraa buka “no te mau taata paari” e faatupu i te tino moni ra 10 000 moni marite i te mahana. I roto i taua oire ra, e nehenehe te hoê noa numera niuniu no te mau aparauraa faufau e horoa mai e 35 000 moni marite paraparauraa i te mahana i te totaiete niuniu noa. E faatupu teie huru “hooraa”, horoahia i roto hau atu i te hoê ahuru mau oire rahi no Marite, i te mau taniuniuraa fatata e pae hanere tausani i te mahana!

No te mea e mea huna te tahi mau buka, e mea fifi ïa ia noaa mai i te mau numera tano. Te faaite nei râ te hoê pû haamanahia e i Marite Apatoerau, te noaa nei i te mau hohoˈa faufau “12 e tae atu i te 50 milia moni marite i te matahiti, taa ê noa ˈtu i te mau hohoˈa vidéo”.

TE TAHI ATU MAU FENUA: I te matahiti 1984, i Tapone, ua faaî te “imiraa moni ruperupe o te mau hohoˈa faufau” i te mau fare rii hooraa “vea faufau taa ê maitai no te mau taurearea tamahine”. Ua oioi roa te hau faatere i te opua i te mau ture no te iriti mai i te reira i rapae i te hooraa. Te hoo nei te imiraa moni o te mau hohoˈa faufau i Suede, tei riro ei ona e rave rahi milia, “afa milioni vea faufau hard [haama ore mau e te uˈana atoa]” i te mau avae atoa. I Inidia, i Malaisie, e i Bulgarie, ua faatupu te mau hohoˈa vidéo faufau i te mau faahopearaa iteahia i nia i te mau taurearea. E i Tinito ra, ia au i te hoê tumu parau a te Associated Press, ua turai te hoê tupu-faahou-raa i te rahi o te mau buka faufau “i roto i te hooraa tiamâ” i te hau faatere, ia opani roa i te mau hohoˈa faufau i te matahiti 1985.

E mea papu maitai, te uˈana nei teie ati rahi i te hiti ia tatou. Ia ara maitai outou ia itea mai te reira i roto i te mau huru e nehenehe roa ˈi e tomo ohie noa mai i roto i to outou utuafare aore ra e noaa noa mai ia outou i te fare toa no to outou vahi.

E mea tano roa anei ia parau e e “ati rahi” te mau hohoˈa faufau? Te vai ra anei te mau haapapuraa e e faaino te reira i te taata? E nehenehe anei e parau ma te tia e e haamataˈuraa mau te reira no outou e te feia herehia e outou? Eita anei te hoê faanahoraa etaeta aore ra te hoê opaniraa e faaino i te tiaraa o te mau taata no te taio atu e no te mataitai atu i ta ratou e au?