Nafea te hau e riro mai ai ei tupuraa mau?
Eaha te mau haafifiraa rahi no te haamauraa i te hoê hau papu maitai? Ia au i te tumu parau i muri nei, teie te tahi mau fifi e nehenehe e faahiti:
1) Te feia faatere miimii (politita, faehau, tapi-hoo-raa tauihaa e te haapaoraa) o tei matau noa i te faahepo i te taata nei.
2) Te faahuru-ê-raa i te feruriraa na roto i te haapiiraa niuhia i nia i te here aiˈa e te haapii i te “manaˈo miimii e te moˈa”, te faateiteiraa i to ˈna iho nunaa, te tiaturi ore e te riri.
3) O Satani te Diabolo, ‘te atua no teie nei ao o te haapouri nei i te feruriraa o te feia faaroo ore’, te fatu no teie nei ao. — Korinetia 2, 4:4.
NA TE AO taatoa nei, e tia ia taui roa te feruriraa e te mafatu o te mau taata. E titau te reira i te tauiraa i te pae o te haapiiraa: ia haapii te mau nunaa atoa i te hau, te here e te faaturaraa te tahi i te tahi. E titau atoa te reira i te tauiraa o te faatere i te ao taatoa nei e te haamauraa i te hoê faatereraa tahoê maitai, e te faaturahia e te mau fenua atoa: te hoê faatereraa i te ao taatoa e te tahuti ore. No reira, e titau te reira i te hoê tauiraa i roto i te faatereraa i te ao nei: mai raro aˈe ia Satani e riro atu ei raro aˈe i te Atua. Nafea râ teie mau tauiraa e faatupuhia ˈi?
Ua hau i te 2 500 matahiti i teie nei, ua tohu te Bibilia e ia tae i te anotau hopea o teie nei fanahonahoraa ‘e faatupu ai te Atua o te raˈi ra i te hoê basileia o te ore roa e mou’. (Daniela 2:44.) O te Basileia mure ore ïa o ta Iesu i haapii i ta ˈna mau pǐpǐ ia pure: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10).Teie Basileia o te hoê ïa faatereraa apî ta Iesu Mesia e faaohipa mai nia mai i te raˈi i nia i te fenua taatoa nei, ia au i ta te peropheta Daniela i tohu: “To ˈna mana, e mana mure ore ïa, e ore ïa e mou, e to ˈna basileia, e ore ïa e pau.” — Daniela 7:13, 14.
E mono teie Faatereraa i nia i te raˈi o te Mesia hoi te Upoo, i te mau pupu faatere miimii o tei ore roa i faatahoê i te mau taata, o tei faatere râ i roto i te ino i rotopu i te mau tausani matahiti. O te tuhaa ïa te reira no te ‘raˈi apî e te fenua apî ta te Atua i parau maira, i te vai-mau-raa o te parau-tia ra’. (Petero 2, 3:13.) Eita roa ˈtu mai ta Robert Muller, te mono papai parau matamua o te O.N.U. i parau, te mau Hau amui o te vai i New York te “niu no te ora no a muri atu no te ao nei” o taua Faatereraa râ. Noa ˈtu e ua faaoti te O.N.U. i te matahiti 1986 ei Matahiti i te ao taatoa nei no te hau, na te ravea hoê roa tei faatiahia e te Atua, ta ˈna iho Basileia, e haamau i te hau mau.
Te ravea o te haapiiraa
Te faaineine nei te mau milioni taata i te ora i roto i te hau i raro aˈe i teie Faatereraa arii. Ua hau i te hoê hanere matahiti i teie nei, ua haamauhia te hoê tapura haapiiraa rahi roa i roto i te mau fenua atoa; te tapao o teie tapura haapiiraa te haaparareraa ïa i te parau no nia i teie Basileia. Peneiaˈe ua ite ê na outou i te hoê tia no teie Faatereraa a te Atua tei au i te hau, noa ˈtu e aita outou i ite maite i te faufaaraa mau o taua tere ra i te reira taime. Te apiti atura teie taata aore ra teie vahine i te hoê ohipa haapiiraa, te ohipa rahi roa ˈˈe aore i itehia aˈenei i roto i te oraraa taata nei. O vai taua taata i haere mai e farerei ia outou? Te hoê ite no Iehova. No te aha râ te mau Ite no Iehova e haere mai ai i outou na?
Te titau nei ratou i te mau taata mafatu rotahi atoa o tei hinaaro nei ia ite nafea o Iehova e haamau ai i te hau, ia hiˈopoa i te Bibilia. Ua tauturu ê na teie haapiiraa tamoni ore i te mau milioni taata ia “tiapai i ta ratou ˈoˈe ei auri arote e ta ratou mau mahae ei tipi tope raau”. Te parau ra te peropheta Isaia e: “E ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” — Isaia 2:4.
Ua faatupu ê na te mau Ite no Iehova i teie parau tohu, eiaha mai te mau melo o te mau Hau amui o te tamau nei i te tatamaˈi, na roto i te parau e tae roa ˈtu i te tamaˈi-roa-raa. Nafea taua hau ra i te noaaraa mai i te mau Ite ra? Ua haapii ratou i te Bibilia e ia noaa mai te manaˈo o te Mesia; ua haapii ratou e Atua aroha mau o te Atua e e tia ia ratou ia faaite i te hotu o te Atua i nia i to ratou taata-tupu no te mau fenua atoa e no te mau nunaa atoa. No reira ratou e ore ai e amui atu i roto i te mau ohipa politita e ore ai e faaô atu i roto i te tamaˈi e te mau aroraa, noa ˈtu eaha te roohia ia ratou. — Ioane 1, 4:8; Ioane 13:34, 35.
Te faaite maira te mau parau tohu tei tupu ê na e te fatata maira te Basileia o te Atua ia tatou (Mataio 24:3-35). Fatata roa te tamaˈi a te Atua, o Aramagedo, i te haamou i te faatereraa a Satani e te mau faanahoraa politita atoa, tumu no te amahamaharaa e no te faainoraa (Apokalupo 16:14-16; 19:17-21). I teie nei te taime tano no te fariu i nia i te Atua e ta ˈna ra Parau. E oaoa te mau Ite no Iehova no to outou vahi i te tauturu ia outou ia ite outou iho e ere te hau i te hoê noa moemoeâ, e tupu mau râ i nia i te fenua taatoa nei. Teie râ, mai te peu e mea hau aˈe na outou, eiaha e mataˈu i te papai mai i te feia nenei i teie nei vea, ua ineine hoi ratou i te horoa ˈtu i te tauturu e te mau haamaramaramaraa hau atu.
[Parau iti faaôhia i te api 8]
“Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.” — Te aposetolo Petero.
[Parau iti faaôhia i te api 9]
O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” — Iesu Mesia.
[Parau iti faaôhia i te api 9]
“E tiapai ratou i ta ratou ˈoˈe ei auri arote (...); e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” — Te peropheta Isaia.