Na vai e haamau i te hau i nia i te fenua?

Te pahonoraa a te Bibilia

E ere na te taata e haamau i te hau i nia i te fenua. Tera râ, na te Basileia o te Atua aore ra te Faatereraa arii a te Atua faaterehia e Iesu Mesia mai te raˈi mai e haamau i te reira. A tapao na eaha ta te Bibilia e haapii ra no nia i teie tiaturiraa faahiahia mau.

1. Ua tohu te Bibilia e “tupu te hau i te fenua nei no te taata ta te Atua e farii.” Ia tupuhia te hinaaro o te Atua, e titauhia ia faaore “oia i te mau tamaˈi ati aˈe i te fenua.”—Luka 2:14; Salamo 46:9.

2. E faatere te Faatereraa arii a te Atua i te fenua taatoa mai te raˈi mai. (Daniela 7:14) No reira, eita e ite-faahou-hia te here aiˈa, te tumu hoi o e rave rahi aroraa i teie mahana.

3. O Iesu te faatere o te Faatereraa arii a te Atua te “Huiarii o te hau.” E haapapu o ˈna “e te hau aita e hopearaa.”—Isaia 9:6, 7.

4. I raro aˈe i te Faatereraa arii, aita te Atua e farii i te taata e tamau ra i te aro no te mea “mea hae na ˈna i tei au i te hamani-ino-raa.”—Salamo 11:5; Maseli 2:22.

5. Te haapii ra te Atua i to ˈna nunaa e nafea ia ora ma te hau. Oia hoi, te parau ra te Bibilia: “E tupai ratou i ta ratou mau ˈoˈe ei auri arote e ta ratou mau omore ei tipi tope raau. E ore te hoê nunaa e amo i ta ratou ˈoˈe i nia i te tahi nunaa, e ore atoa ratou e haapii faahou i te tamaˈi.”—Isaia 2:3, 4.

I teie mahana, te haapii ra te Atua e na mirioni Ite no Iehova na te ao e nafea ia riro ei “feia faatupu i te hau.” (Mataio 5:9) No roto mai ratou hau atu i te 230 fenua e e rave rahi nunaa, tera râ aita ratou e rave i te mau mauhaa tamaˈi no te haapohe i to ratou taata tupu.