Nimusobora Kukora ki Obumurukuba Mwine Entekereza Ezirukwahukana

Habwokuba abali omu buswere bagonza ebintu ebirukwahukana kandi betwaza omu mulingo ogutarukusisana, nikisobora kubagumira kuba n’entekereza erukusisana. Baitu ensonga ezimu nizisobora kugumangana kukira ezindi. Ekyokurorraho:

• Obukirukuhika ha bwire obumusemeriire kumara n’abanyabuzaale

• Kukozesa kurungi sente

• Kuzaara abaana rundi nangwa

Kiki eky’osobora kukora kakuba ow’oli nauwe omu buswere aba n’entekereza erukwahukana ha yaawe?

• Eky’osemeriire kumanya

• Eky’osobora kukora

Eky’osemeriire kumanya

Kukorra hamu tikurukumanyisa ngu mwine kuba n’entekereza erukusisana. Nyineeka na nyinabwenge abarukukwataniza kurungi, nabo nibasobora kuba n’entekereza erukwahukana ha nsonga ezimu.

Tamara n’agamba ati: “Eka nambere nakuliire twagonzaaga kuba hamu n’abanyabuzaale baitu. Ha wiikendi twagendaga kuroraho isenkuru na nyinenkuru itwe n’abanyabuzaale abandi. Baitu eka nambere iba nyowe yakuliire, tibakiraga kumara obwire n’abanyabuzaale baabu. Nahabweki twine entekereza erukwahukana obukirukuhika ha bwire obutusemeriire kumara n’abanyabuzaale baitu abali haihi rundi nitubaza naabo abaikara hara.”

Tyler n’agamba ati: “Habw’omulingo twakuziibwemu, nyowe na mukazi wange twine entekereza erukwahukana ha mulingo tusemeriire kukozesa sente. Omu myezi ey’okubanza hanyuma y’okutaaha obuswere, twaikaraga nitukunganira ensonga enu. Tukagibazaaho emirundi nyingi tutakakozere encwamu itwena eiturukwikiranganiza nayo.”

Kwikiriza kukora omugonzebwa waawe ekyarukugonza nikisobora kutamaraho ebizibu ebimu. Ekyokurorraho, omunyabuzaale n’asobora kurwara kandi kiketaagisa omu hali inywe kumurolerra. Rundi omu hali inywe n’asobora kuba nagonza kuzaara abaana baitu ondi atarukugonza.a

“Alex n’agamba ati: “Nyowe na mukazi wange tukira kubazaaho ensonga ey’okuzaara abaana. Twine entekereza erukwahukana baitu aliyo nakitekerezaaho. Nimpurra ntasobora kuhindura entekereza yange.”

Kuba n’entekereza erukwahukana tikisemeriire kusiisa obuswere bwanyu. Abakugu abamu bagamba ngu kakuba iwe n’ow’oli nauwe omu buswere muba mutarukwikiranganiza ha nsonga enkuru, osemeriire kukora kyona ekirukusoboka kutunga ekyorukwetaaga n’obukirayetaagisa kumuleka. Baitu kakuba okora eki, nooba noyebembeza enyehurra zaawe omu kiikaro ky’okwebembeza ekiwayeragire omu maiso ga Ruhanga, kwikara n’omugonzebwa waawe n’obuharaabaho ki.

What you can do

Cweramu kimu kulinda ekiragaano kyawe eky’obuswere. Obworacweramu kimu kulinda ekiragaano eky’obuswere, nikiija kubakonyera kukorra hamu kusobora kumaraho ebizibu omu kiikaro ky’okuhakanizangana.

Omusingi gwa Baibuli: “Ruhanga ekiyateraniize ahamu, omuntu atalikibaganizamu.”—Matayo 19:6.

Tekerezaaho ebisobora kurugamu. Ekyokurorraho, ow’oli nauwe omu buswere obwaraaba nagonza kuzaara abaana baitu iwe otarukugonza nimusobora kutekerezaaho ensonga zinu:

• Obuswere bwanyu buli buta.

  N’osobora kugumira okwetuntura okuleetwa kukuza omwana?

• Obujunanizibwa obw’okukuza mwana.

  Kukuza omwana tikigarukira ha kumuha ebyokulya, ebijwaro, n’oburaaro.

• Entahya yanyu eri eta.

  Nimusobora kukora, murolerre omwana kandi muhikiirize n’obujunanizibwa obundi?

Omusingi gwa Baibuli: “Araha omuliinywe obwaba nagonza okwombeka orukomera, atabanza okuikarra nabalirra ebyemirimo yarwo?”—Luka 14:28.

Tekerezaaho byona ebirukukwata ha nsonga eimurukubazaaho. Nimusobora kwikiranganiza ha nsonga ezimu. Ekyokurorraho, ensonga obweraaba nekwataho kuzaara abaana, atarukugonza kuzaara n’asobora kwekaguza ati:

• ‘Obundukugamba ngu tindukugonza kuzaara abaana, nimanyisa ngu tindukugondeza kimu rundi kubanza kulindaho?’

• ‘Nintekereza ngu tindukwija kuba muzaire murungi?’

• ‘Nintiina ngu oundi nauwe omu buswere naija kuleka kunfaaho?’

Ha rubaju orundi ow’arukugonza kuzaara abaana n’asobora kwekaguza ebikaguzo binu:

• ‘Twetekaniize kuhikiiriza obujunanizibwa bw’okukuza abaana?’

• ‘Twine sente eziratusobozesa kurolerra omwana?’

Omusingi gwa Baibuli: ‘Amagezi aganyakuruga haiguru . . . garahuka okwesengerezebwa.’—Yakobo 3:17.

Tekerezaaho ebirungi ebisobora kuruga omu ntekereza y’ow’oli nauwe omu buswere. Abantu babiri nibasobora kuba nibatekerezaaho ekintu nikyo kimu baitu baine entekereza ezirukwahukana. Omulingo nugwo gumu, abaswerangaine nibasobora kuba baine entekereza ezirukwahukana ha kintu. Ekyokurorraho, obukirukuhika ha mulingo barakozesa kurungi sente. Kusobora kubazaaho enyikara nambere musobora kuba n’entekereza ezirukwahukana, tandika n’ebintu inywena ebimukira kugonza.

• Bintu ki ebimukira kwikiranganizaaho?

• Birungi ki ebisobora kuruga omu entekereza ya buli omu?

• Kusobora kwikazaaho obuswere bwanyu, omu hali inywe n’asobora kuhinduramu entekereza ye?

Omusingi gwa Baibuli: “Omuntu wena aleke okuserra ebye wenka, baitu aserre ebyabandi.”—1 Abakolinso 10:24.