AMAGEZI AGASOBORA KUKONYERA EKA
N’osobora ota Kukonyera Abaana Baawe Obubalemwa Kukora Ebintu Ebimu?
Obwire obumu, abaana baawe nibaija kulemwa kukora ebintu ebimu. N’osobora ota kubakonyera kutahwamu amaani?
Eky’osemeriire kumanya
Obwire obumu itwena tulemwa kukora ekintu. Baibuli egamba ngu “tusobya itwena.” (Yakobo 3:2) N’abaana nabo basobya. Baitu abaana obubalemwa kukora kurungi ekintu, nikisobora kubeegesa kutahwamu bwangu amaani. Abaana tibazaarwa n’obusobozi bunu, baitu ekintu kinu bakyega. Laura n’agamba ati: “Nyowe na iba nyowe tukyetegeriize ngu kirungi kuleka abaana baitu kukirora ngu kya buli kiro kulemwa kukora kurungi ekintu omu kiikaro ky’okwefoora ngu obwire bwona ebintu bikorwa kurungi. Eki kibakonyera kutahwamu amaani obubalemwa kukora kurungi ebintu.”
Abaana baingi bahwamu amaani obubalemwa kukora kurungi ebintu. Abaana abamu obubakora ensobi banguha kuhwamu amaani habwokuba obubakora ekintu ekitahikire, bazaire baabo babaleetera kutekereza ngu tubakozere ensobi. Ekyokurorraho, kakuba omwana alemwa kukora kurungi ha isomero, abazaire abamu bajunaana abegesa. Kakuba omwana arwana na mutaahi we, abazaire be nibasobora kujunaana omwana oubarwaine hamu.
Eki nikisobora kuleetera abaana kulemwa kurora ensobi zaabo kakuba abazaire baikara nibabatonganirra.
Eky’osemeriire kukora
Yegesa abaana baawe kumanya ngu ebikorwa byabo nibisobora kubarugirramu ebizibu.
Baibuli egamba ngu: “Omuntu ebyasiga nibyo aligesa.”—Abagaratiya 6:7.
Buli kintu ekitukora haroho ekirugamu. Ekintu obukisiisikara kyetaagisa sente nyingi kukigarraho. Obutukora ensobi harugamu ebintu ebibi. Omwana waawe asemeriire kumanya ngu buli kimu eky’akora haroho ekirugamu kandi ngu najunanizibwa habw’ekibaireho. Nahabweki, abazaire mwetantale kujunaana abantu abandi habw’ensobi z’omwana wanyu. Oihireho, kusigikirra ha myaka ye, muleke ajunanizibwe habw’ensobi ze. Amananu gali ngu, omwana asemeriire kurora akakwate akali hagati y’ebikorwa bye ebibi n’ebirarugamu.
Konyera omwana kumanya eky’okukora.
Omusingi gwa Baibuli: “Omuntu ahikiririire agwa emirundi musanju, kandi agaruka okuimuka.”—Enfumo 24:16.
Tusaasa muno obutulemwa kukora ekihikire baitu eki tikisemeriire kutumaramu amaani. Konyera omwana waawe kumanya eky’asemeriire kukora kwetantara kukora ensobi niyo emu omu kiikaro ky’okwikara ataire omutima ha kibaireho. Ekyokurorraho, omwana waawe obwaraaba ogwire ebirengeso ha isomero, mukonyere kukirora ngu n’asobora kweyongera kuteekamu amaani kandi omurundi ogundi nakora kurungi. (Enfumo 20:4) Muhara waawe obwaraaba arwaine na munywani we, mwoleke eky’asemeriire kukora kugarraho obusinge n’obukiraaba ngu tali nuwe ali mu nsobi.—Abarumi 12:18; 2 Timoseo 2:24.
Yegesa omwana waawe kumanya obugarukiro bwe.
Omusingi gwa Baibuli: “Wena anyakuli omulinywe aleke okwetekereza wenka okukira okukimusemeriire okutekereza.”—Abarumi 12:3.
Tikiri kirungi kugambira omwana waawe ngu nuwe arukukirayo kukora kurungi ekintu. Amananu gali ngu n’omwana owaine amagezi ha isomero, tasobora kwikara nasinga obwire bwona. Kandi kakuba omwana aba amanyire kurungi omuzaano, tikirukumanyisa ngu naija kwikara nasinga obwire bwona. Abaana basemeriire kumanya obugarukiro bwabo kandi eki nikiija kubakonyera kutahwamu amaani kakuba obwire obumu balemwa kukora kurungi.
Baibuli egamba ngu obututunga ebizibu bitukonyera kuguma n’okuba bantu abarukugumiisiriza. (Yakobo 1:2-4) N’obukiraaba ngu obwire obumu abaana nibasobora kusobya, bakonyere kuba n’entekereza ehikire nukwo batahwamu amaani.
Kitwara obwire abazaire kwegesa abaana baabo kutahwamu amaani obubalemwa kukora kurungi. Eki nikiija kubakonyera obubarafooka nsinganto n’obubarakura. Ekitabu Letting Go With Love and Confidence nikigamba ngu: “Ensinganto abeegere kugumira ebizibu byabo tibakira kukora encwamu ezitahikire obubasindikirizibwa. Kibanguhira kukurra omu nyikara empyaka, rundi ezibabaire batarukunihira.” Kugumira ebizibu bakyali bato nikiija kubakonyera n’obubarakura.
Amagezi agasobora kukukonyera: Batereho ekyokurorraho. Ijuka ngu omulingo oyetwaza obwotunga ebizibu nikiija kwegesa omwana waawe kumanya omulingo arayetwaza obwaratunga ebizibu.