Ebirungi Ebiruga omu Kwehangahanga

Kwehangahanga nikimanyisa kukozesa ebitekerezo byawe kukora ekintu ekyotakakorahoga. Kinu kikonyera abaana kukura omu bitekerezo n’okwega kukora ebintu ebimu.

Ekyokurorraho ebintu nka:

• Kuteera ebisisani

• Kucumba

• Kukora ebintu eby’okuzaanisa

• Kuzina

• Kwombeka enju

• Kuruka

Omu mahanga maingi, abaana bakira kurora tiivi omu kiikaro ky’okukora ebintu eby’okwehangahanga.

Kisemeriire kukweraliikiriza?

• Eky’osemeriire kumanya

• Eky’osobora kukora

Eky’osemeriire kumanya

• Kwehangahanga kikonyera omwana kukura omu bitekerezo. Nikisobora kukonyera omwana kukura omu bitekerezo, kwega ebintu ebimu otwaliremu n’okwega kukoragana n’abantu abandi. Ekindi, kikonyera abaana kwega kuba bantu abarukugumiisiriza, kubakonyera kwega kukora encwamu, kulema enyehurra zaabo, n’okwega omulingo basobora kwetwaza obubaba nibazaana n’abaana abandi. Eki nikimanyisa ngu kwega kwehangahanga kikonyera abaana n’obubaba bakuzire.

• Kumara obwire bwingi ha byoma bya kalimagezi nikisobora kuba ky’akabi h’abaana. Nigusobora kufooka muze kakuba omwana aikara nakozesa muno ekyoma kya kalimagezi. Nikisobora kumuleetera kunyeeta ekihinguraine, n’okugonza kurwana. Nahabweki abazaire basemeriire kwerinda kukozesa ebyoma bya kalimagezi kulera abaana baabo.

• Otabaha eby’okukora bingi ha murundi gumu. Abaana obubaheebwa ebintu bingi eby’okukora, baburwa obwire obwokwejumbira omu bintu ebirabakonyera kwehangahanga n’okwega ebintu ebindi.

Eky’osobora kukora

• Batereho obwire bw’okwehangahanga. Enyikara obuziraaba nizikusobozesa, ikiriza abaana baawe kugenda kwegondeza omu byahangirwe. Baikirize kukora ebintu ebirukubasemeza, n’okuzaanisa ebidoli ebirabegesa kwehangahanga.a

  Ekyokutekerezaaho: Kwehangahanga nikusobora kukonyera omwana wange kukurakuraniza miringo ki rundi bukugu ki, kandi nikiija kumugasira kita omu bwomeezi?

  Omusingi gwa Baibuli: “Okwemanyiza okwomubiri nukugasa.”—1 Timoseo 4:8.

• Batereho obwire obubaramara ha tiivi. Banza okitekerezeeho otakakozeseze esimu, tabbuleeti, rundi tiivi kulera omwana waawe. Badakitaali b’abaana bagamba ngu abaana abali hansi y’emyaka ebiri tibasemeriire kurora tiivi rundi kuheebwa ekyoma kyona ekya kalimagezi. Ekindi, bagamba ngu abaana abali hagati y’emyaka ebiri kuhika ha etaano, tibasemeriire kumara obwire oburukukira ha saaha emu kurora tiivi rundi nibakozesa ebyoma bya kalimagezi.b

  Ekyokutekerezaaho: Omwana wange asemeriire kumara bwire burukwingana nkaha ha tiivi? Nsemeriire kurora nauwe tiivi? Bintu ebindi ebirungi ebyasobora kukora omu kiikaro ky’okukozesa ebyoma bya kalimagezi rundi kurora tiivi?

  Omusingi gwa Baibuli: “Nukwo mwerindege okumugenda nimwekenga, tikuli nkabadomadoma, baitu nkabamagezi; nimwegurra [obwire].”—Abefeso 5:15, 16.

• Kitekerezeeho otakatwaire omwana waawe omu biikaro ebitekaniziibwe kwegesa abaana. Ky’amananu ngu omu biikaro ebi nibasobora kukonyera omwana waawe kutunga obukugu rundi kwega kukora ebintu ebimu. Baitu obwire oburukukira obwingi kiretera omwana hamu n’omuzaire kweralikirra rundi kwetuntura ekihinguraine. Nahabweki omusingi oguli omu Abefeso 5:15, 16, ogurukututererra kukozesa kurungi obwire nigutukonyera kukora encwamu.

  Ekyokutekerezaaho: Abaana bange baine ebintu bingi ebibarukwega kuruga omu biikaro binu eby’okwegesezaamu abaana? Obukiraaba nukwo kiri, mpindahinduka ki ezinsemeriire kukora?

  Omusingi gwa Baibuli: “Mumanye ebintu ebirukukira obukuru.”—Abafiripi 1:10, NWT.