AMAGEZI AGASOBORA KUKONYERA EKA | OBUSWERE
Mumale Hamu Obwire
Banyineeka na banyinabwenge baingi kibagumira kutunga obwire obw’okubaza hamu n’obukiraaba ngu baikara hamu. Habwaki?
Habwaki nibasobora kuba bali hamu baitu buli omu ali ha bye?
Kujwaha muno
Anna n’agamba ati: “Obutuba nitugonza kumara hamu obwire, iba nyowe rundi nyowe itwena tuba tujwahire muno. Obumba njwahire, n’ebintu ebitaito bimbihiza. Nahabweki kurora tiivi nikikira.”
Kuhugurwa ebyoma bya kalimagezi
Katherine n’agamba ati: “Emikura ey’okubalizaaho n’eby’okwesemeza ebya ha mukura nibisobora kutumarra obwire. N’osobora kumarraho obwire bwingi kandi okesanga otabalize n’ow’oli nauwe omu buswere. Eki obukibaho musisana nk’abatali omu kiikaro kimu.”
Kugonza ebintu ebirukwahukana
Jane n’agamba ati: “Iba nyowe obwaruga ha mulimo, amara obwire nakora ebintu ebirukumusemeza. Akora n’amaani, nahabweki nauwe asemeriire kutunga obwire akole ebintu ebyarukugonza. Baitu nakugondeze kumara nauwe obwire bwingi.”
Emirimo
Mark n’agamba ati: “Habwokuba twine ebyoma bya kalimagezi, nitusobora n’okukorra omuka. Emirundi nyingi, nyesanga ningarukamu obutumwa kuruga ha mulimo omu kiikaro ky’okumara obwire obu na mukazi wange.”
Ekimusobora kukora
Kumara hamu obwire mukitwale kuba kikuru.
Omusingi gwa Baibuli: “Mumanye ebintu ebirukukira obukuru.”—Abafiripi 1:10, NWT.
Ekyokutekerezaaho: Ebikorwa byange byoleka ngu nintwara obuswere bwange nk’ekintu ekikuru kukira omulimo gwange n’ebintu ebirukunsemeza? Ow’oli nauwe omu buswere omuha obwire obworukuba otaine eby’okukora?
Amagezi agasobora kukukonyera: Mukole entekaniza ey’okumara hamu obwire mutaine ebirukubahugura.
Anna n’agamba ati: “Kinsemeza iba nyowe obwakora entekaniza ey’okumara hamu obwire itwenka. Eki kindetera kwehurra ngu nangonza kandi asemererwa kumara nanyowe obwire. Kindetera kweyongera kumugonza.”
Yega kukozesa ebyoma bya kalimagezi omu bwire obusemeriire.
Omusingi gwa Baibuli: “Buli kintu kyona kiine akasumi kakyo.”—Omugambizi 3:1, NWT.
Ekyokutekerezaaho: Obutumwa obwa ha simu bukira kubahugura obumuba nimubaza?
Amagezi agasobora kukukonyera: Buli kiro mulengeho kulya hamu ebyokulya, kandi esimu muzireke omu kisiika. Omu bwire bwokulya, nimusobora kubazaaho nk’oku ekiro kigenzere.
Obukiraaba nikisoboka mukole hamu emirimo y’omuka rundi mugende hamu kugura ebintu.
Omusingi gwa Baibuli: “Babiri nibakira omu; baitu banyina empera enungi habwokutalibana kwabu.”—Omugambizi 4:9.
Ekyokutekerezaaho: Iwe hamu n’ow’oli nauwe omu buswere buli omu akira kukora wenka emirimo?
Amagezi agasobora kukukonyera: Mukorre hamu emirimo n’obukiraaba ngu omuntu omu wenka namara.
Nina n’agamba ati: “Emirimo nk’okugura ebyokulya, kwogya ebintu, kutekaniza engoye, n’okulima mubirole nk’omugisa ogw’okumara hamu obwire.”
Ba muntu arukwetegereza
Omusingi gwa Baibuli: “Leka okwetegereza kwanyu kumanywe abantu boona.”—Abafiripi 4:5, NWT.
Ekyokutekerezaaho: N’osobora ota kwoleka ngu torukunihirramu ow’oli nauwe omu buswere bingi kukira ebyarukusobora?
Amagezi agasobora kukukonyera: Mubaze hamu kandi mulengeho kwetegerezangana. Mwikiranganize omulingo muramara hamu obwire, kandi mukigumye ngu inywena mwasagika encwamu egi.
Daniela n’agamba ati: “Iba nyowe aine amaani, baitu nyowe ndi muceke habw’oburwaire. Nkira kumugambira agende ayegonze kandi ngu ndamurora agarukire. Tukaikiranganiza ngu agendege akole ebisasaizi nukwo nyowe nsigale muka mpumuleho. Itwena twehurra kurungi habwokukora buli omu ekyasobora.”
Ebikaguzo ebimusobora kubazaaho
Buli omu abanze atekerezeeho ebikaguzo binu ali wenka, hanyuma mubazeeho ebyokugarukamu ebi hamu.
Notekereza ngu iwe n’ow’oli nauwe omu buswere nimumara hamu obwire?
Bintu ki ow’oli nauwe omu buswere ebyakozere nukwo mweyongere kumara hamu obwire kandi habwaki osemeriire kumusiima?
Ninkaha orukugonza ahindulemu?
Okira kuhugurwa ebyoma bya kalimagezi obwoba n’obaza n’ow’oli nauwe omu buswere?
Buli omu hali inywe n’asobora ata kwoleka ngu taruhunihirramu mutaahi we ebyatarukusobora?
Bintu ki ebimusobora kukora nukwo mumale hamu obwire hataroho ebirukubahugura?