O Tla Bontsha Jang Gore o Lebogela Thekololo?

1-2. Thekololo e re tlhotlheletsa go dira eng, mme ka ntlha ya eng? (2 Bakorintha 5:14, 15) (Bona le setshwantsho.)

A RE re o gaeletswe mo ntlong e e gosomaneng, mme mongwe a bo a go ntsha mo go yone, o ne o tla ikutlwa jang ka motho yoo? Le fa gone a ka tswa a ile a thusa batho ba bangwe, ga go pelaelo gore o ne o tla mo leboga e bile o ne o tla mmolelela gore ga o kitla o lebala se a go diretseng sone.

² Mo setlhogong se se fetileng, re bone gore re tlhoka mongwe go re golola mo boleong le mo losong. Mme seo ke se Jehofa a ileng a se dira. O ile a ntsha Morwawe e le thekololo gore (1) a re itshwarele maleo, (2) a re neye tsholofelo ya go gololwa mo boleong le gore (3) a re thuse go boelana le ene. Ka ntlha ya setlhabelo sa ga Jesu, re na le tsholofelo ya go tshelela ruri. Jesu o bontshitse gore o rata batho thata fa a ne a ntsha thekololo. Tota e bile, o ne a sa bolo go rata batho pele a tla mo lefatsheng. (Diane 8:30, 31) Moaposetoloi Paulo o ile a re “lorato lo Keresete a nang le lone lo re tlhotlheletsa gore re mo ikobele.” (Bala 2 Bakorintha 5:14, 15.) Seno se raya gore re tshwanetse go bontsha gore re lebogela tsela e Jesu a re ratang ka yone le gore ga re kitla re lebala se a re diretseng sone.

3. Goreng tsela e re lebogelang thekololo ka yone e sa tshwane?

³ O ka bontsha jang gore o lebogela thekololo? Karabo ya gago e ka tswa e sa tshwane le tsa ba bangwe. Ka sekai, akanya ka batho ba bararo ba ba yang kwa lefelong le le rileng, mme ba tswa kwa metseng e e farologaneng. Ditsela tse ba tla tsamayang ka tsone di ka se tshwane. Ka tsela e e tshwanang, mokgele wa gago ke go bontsha gore o lebogela thekololo. Mme gone, tsela e o bontshang ka yone gore o lebogela thekololo, e tla farologana le ya ba bangwe. Re ntse re akantse ka seno, mo setlhogong seno re tla tlotla ka ditlhopha tse tharo tsa batho: (1) Ba ba ithutang Baebele, (2) ba ba kolobeditsweng le (3) ba ba katogetseng kgakala le phuthego.

BA BA ITHUTANG BAEBELE

4. Ke eng se Jehofa a se bonang mo bathong ba ba ithutang Baebele?

⁴ Fa e le gore o ithuta Baebele, akanya ka seno: E re ka o amogetse dikgang tse di molemo, seno se bontsha gore o mongwe wa batho ba Jehofa a batlang gore ba nne ditsala tsa gagwe. (Joh. 6:44; Dit. 13:48) Baebele e a re “Jehofa ke motlhatlhobi wa dipelo.” Seno se raya gore o bona matsapa a o a tsayang gore o ithute ka ene le diphetogo tse o di dirang gore o mo itumedise. (Diane 17:3; 27:11) Thekololo e dira gore o kgone go atamalana le Jehofa. (Bar. 5:10, 11) O se ka wa tsaya seo lotsatsa.

5. Batho ba ba ithutang Baebele ba ka dirisa jang kgakololo e e mo go Bafilipi 3:16?

⁵ Fa e le gore o ithuta Baebele, o ka bontsha jang gore o lebogela thekololo? Tsela nngwe ke ka go dirisa kgakololo e moaposetoloi Paulo a ileng a e naya Bafilipi. O ile a re: “A re tsweleleng re tsamaya ka mokgwa ono go ya ka tsela e re gatetseng pele ka yone.” (Bafil. 3:16) Baebele e e Boitshepo e ranola temana eno jaana: “Fela kwa re setseng re fitlhile teng, a re ke re nneng re sepele ka fa sekaong seo fela.” Ka jalo, o se ka wa letla ope kgotsa sepe se go thibela gore o tswelele o tsamaya mo tseleng e e isang kwa botshelong.​—Math. 7:14; Luke 9:62.

6. Ke eng se batho ba ba ithutang Baebele ba ka se dirang fa ba thatafalelwa ke go dira sengwe? (Duteronome 30:11-14) (Bona le setshwantsho.)

⁶ Go tweng fa e le gore o thatafalelwa ke go amogela sengwe se o sa tswang go se ithuta mo Baebeleng? Dira dipatlisiso ka sone, mme o kope Jehofa gore a go thuse go se tlhaloganya botoka. (Pes. 86:11) Fa e le gore go sa ntse go le thata go se tlhaloganya, tswelela o ithuta dilo tse dingwe mo Baebeleng, mme o tla boela kwa go sone moragonyana. Kgotsa go tweng fa e le gore o thatafalelwa ke go tlogela sengwe se Jehofa a se tlhoileng? Gopola gore Jehofa ga a kitla a kopa batho gore ba dire sengwe se ba ka se kgoneng go se dira. O ka kgona go ikobela melao ya gagwe. (Bala Duteronome 30:11-14.) Gape Jehofa o solofetsa gore o tla go thusa. (Isa. 41:10, 13; 1 Bakor. 10:13) Ka jalo, o se ka wa ineela. Go na le gore o nne o akantse ka kgwetlho e o lebaneng le yone, tlhoma mogopolo mo dilong tse Jehofa a go diretseng tsone, go akaretsa le thekololo. Fa tsela e o ratang Jehofa ka yone e gola, o tla lemoga gore “ditaelo tsa gagwe ga di imele.”​—1 Joh. 5:3.a

7. Basha ba batsadi ba bone e leng Basupi, ba tshwanetse go gopola eng?

⁷ Go tweng ka lona basha ba lo godisitsweng ke batsadi ba e leng Basupi? Le lona lo baithuti ba Baebele. Tota e bile, lo baithuti ba Baebele ba ba botlhokwa thata mo batsading ba lona. Baebele e a re: “Atamelang Modimo, mme o tla lo atamela.” (Jak. 4:8; 1 Ditir. 28:9) Fa o tsaya matsapa a go atamalana le Jehofa, le ene o tla go atamela. Ga a atamalane le wena ka gonne batsadi ba gago e le Basupi. Go na le moo, o atamalana le wena ka gonne a batla gore o nne tsala ya gagwe. Ke eng se se go thusitseng gore o nne tsala ya ga Jehofa? Ke thekololo, e leng sengwe se o sa tshwanelang go se tsaya lotsatsa. (Bar. 5:1, 2) Ka jalo, pele o ya Segopotsong mo ngwageng ono, akanyetsa kwa teng ka se Jehofa le Jesu ba go diretseng sone. Letla seo gore se go thuse go fitlhelela mokgele ope fela o o ipeetseng one go bontsha gore o lebogela thekololo e Jehofa a e ntshitseng ka Morwawe.b

BA BA KOLOBEDITSWENG

8. Motho yo o kolobeditsweng o bontshitse jang gore o lebogela thekololo?

⁸ Fa e le gore o kolobeditswe, o setse o bontshitse ka ditsela tse dintsi gore o lebogela thekololo. Ka sekai, o ile wa tsaya matsapa a go atamalana le Jehofa le go tshela go dumalana le melao ya gagwe. O ile wa ikobela taelo ya ga Jesu ya gore o rerele ba bangwe dikgang tse di molemo le go ba ruta ka Jehofa le Jesu. O ile wa ineela mo go Jehofa o bo o kolobediwa. A o kile wa ganediwa ka gonne o direla Jehofa? (2 Tim. 3:12) Fa e le gore go ntse jalo, ga o a ka wa tlogela go direla Jehofa. Mme seo se bontsha gore o lebogela thekololo.​—Baheb. 12:2, 3.

9. Batho ba ba kolobeditsweng ba tshwanetse go ikela tlhoko mo go eng?

⁹ Fa e le gore re na le lobaka lo loleele re kolobeditswe, re ka nna ra simolola go lebala gore thekololo e botlhokwa go le kana kang. Seo se ka direga jang? Akanya ka se se diragaletseng Bakeresete ba bogologolo ba kwa Efeso. Ba ile ba itshokela dilo di le dintsi e bile Jesu o ile a ba akgolela seo. Mme gone, o ile a ba raya a re: “Go na le sengwe se ke se nyatsang ka wena, gore ga o tlhole o na le lorato lo o neng o na le lone pele.” (Tshen. 2:3, 4) Se Jesu a ileng a se bua se bontsha gore fa nako e ntse e tsamaya, dilo tse Mokeresete a di direlang Jehofa a ka simolola go di dira e le seomodiro fela. A ka rapela, a ya dipokanong a bo a ya tshimong fela ka gonne a tshwanetse go dira jalo, mme e se ka gonne a tlhotlhelediwa ke lorato. O ka dira eng fa e le gore ga o sa tlhole o rata Jehofa jaaka pele?

10. O ka dirisa jang kgakololo e Paulo a ileng a e naya Timotheo? (1 Timotheo 4:13, 15)

¹⁰ Moaposetoloi Paulo o ile a bolelela Timotheo gore a ‘akanye thata’ le gore a ‘nwelelele’ mo dilong tse di dirwang mo kobamelong ya ga Jehofa. (Bala 1 Timotheo 4:13, 15.) Le wena o ka leka go akanya ka se o ka se dirang gore o direle Jehofa o le matlhagatlhaga. (Bar. 12:11; bona ntlha ya go ithuta e e reng “Be aglow with the spirit.”) Ka sekai, gongwe o ka ipha nako ya go baakanyetsa dipokano sentle. Seo se ka go thusa gore o kgone go tlhoma mogopolo fa o le kwa go tsone. Kgotsa fa o ithuta o le nosi o ka nna mo lefelong le le didimetseng gore o kgone go akanya ka se o se ithutang. Seo se tla go thusa gore se o se ithutileng se go tswele mosola. Fela jaaka o tshwanetse go nna o kgotletsa molelo gore o se ka wa tima, o tshwanetse go nna o dira dilo tseno gore o tswelele o lebogela thekololo le dilo tsotlhe tse Jehofa a go diretseng tsone. Gape dibeke pele ga Segopotso, o ka ipha nako ya go akanya ka dilo tse Jehofa a di direlang batho ba gagwe. Ga go pelaelo gore seo se tla go thusa gore o lebogele thekololo le go feta, ka gonne ke yone e e dirang gore o kgone go atamalana le Jehofa.

11-12. Fa ka dinako dingwe o direla Jehofa o se matlhagatlhaga, a seo se raya gore Jehofa ga a sa tlhole a go naya moya o o boitshepo? Tlhalosa. (Bona le setshwantsho.)

¹¹ Fa e le gore ka dinako dingwe ga o direle Jehofa ka matlhagatlhaga jaaka o batla, o se ka wa kgobega marapo kgotsa wa akanya gore Jehofa ga a sa tlhole a go naya moya o o boitshepo. Gopola se moaposetoloi Paulo a ileng a se bua ka bodiredi jwa gagwe fa a ne a kwalela Bakorintha. O ile a re: “Le fa ke dira jalo ke sa batle, ke sa ntse ke na le maikarabelo a go dira tiro eno.” (1 Bakor. 9:17) O ne a raya jang?

¹² Ka dinako dingwe Paulo o ne a se na keletso ya go rerela batho. Le fa go ntse jalo, o ne a ikemiseditse go dira ka natla mo bodireding le fa ka dinako dingwe a ne a sa eletse go dira jalo. Le wena o ka ikemisetsa go dira se se tshwanang. Ikemisetse go dira dilo tse di siameng, tota le fa ka dinako dingwe o se na keletso ya go di dira. Kopa Jehofa gore a go neye ‘keletso le maatla a gore o di dire.’ (Bafil. 2:13) Tswelela o dira dilo tse di go thusang go atamalana le Jehofa. O ka tlhatswega pelo gore fa nako e ntse e tsamaya, tsela e o ratang Jehofa ka yone e tla gola.

13. Re ka itlhatlhoba jang gore a re “mo tumelong”?

¹³ Go botlhokwa gore nako le nako re itlhatlhobe jaaka re kgothalediwa go dira jalo mo go 2 Bakorintha 13:5. E a re: “Nnang lo itlhatlhobe gore a lo mo tumelong; nnang lo itshupe gore lo batho ba ba ntseng jang.” Ka sekai, re ka ipotsa go re: “A ke dira gore dilo tse di direlwang Bogosi di tle pele mo botshelong jwa me?” (Math. 6:33) “A tsela e ke itlosang bodutu ka yone e bontsha gore ke tlhoile dilo tse di sa siamang?” (Pes. 97:10) “A ke dira dilo tse di tla dirang gore go nne le kagiso le kutlwano mo phuthegong?” (Baef. 4:2, 3) Paka ya Segopotso ke nako e e siameng ya go akanya ka dilo tseno. Fa re akanyetsa kwa teng ka dilo tse Jehofa le Jesu ba re diretseng tsone, re tla batla go bontsha Jehofa gore re a leboga, le go bontsha gore ga re itshelele mme re tshelela Keresete.c

BA BA KATOGETSENG KGAKALA LE PHUTHEGO

14. Goreng bakaulengwe le bokgaitsadi bangwe ba ile ba katogela kgakala le phuthego?

¹⁴ Bakeresete bangwe ba ile ba katogela kgakala le phuthego morago ga dikgwedi kgotsa dingwaga ba direla Jehofa ka boikanyegi. Goreng? Bangwe ba imetswe ke “ditlhobaelo tsa botshelo.” (Luke 21:34) Ba bangwe ba ile ba kgopisiwa ke se Mokeresetemmogo le bone a ileng a se bua kgotsa a se dira. (Jak. 3:2) Ba bangwe bone ba dirile maleo a a masisi, mme ba okaoka go kopa thuso. Le fa o ka tswa o na le lebaka lefe la go bo o katogetse kgakala le phuthego, o ka dira eng gore o boele kwa go Jehofa? Tsela e Jehofa le Jesu ba go bontshitseng ka yone gore ba a go rata ka go ntsha thekololo e go rotloetsa gore o dire eng?

15. Jehofa o ikutlwa jang ka dinku tse di latlhegileng? (Esekiele 34:11, 12, 16)

¹⁵ Akanyetsa kwa teng kafa Jehofa a ikutlwang ka gone ka Bakeresete ba ba katogetseng kgakala le phuthego. Ga a ba galefele e bile ga a ba lebale. Go na le moo, o batla dinku tse di latlhegileng. O a di fepa e bile o di thusa go boela kwa go ene. (Bala Esekiele 34:11, 12, 16.) A Jehofa a ka tswa a dira se se tshwanang ka wena? Ee! Kgang fela ya gore o bala setlhogo seno, e bontsha gore o sa ntse o batla go itumedisa Jehofa. Jehofa o ne a bona dilo tse dintle mo go wena fa a ne a go thusa gore mo itse le gore o tle mo phuthegong ya gagwe. O sa ntse a bona dilo tse dintle mo go wena, e bile o batla gore o boele kwa go ene.

16. Ke eng se se ka thusang dinku tse di latlhegileng go boela kwa go Jehofa? (Bona le setshwantsho.)

¹⁶ Boroutšhara jwa Boela Kwa go Jehofa bo na le mafoko ano a a kgothatsang: “Tlhomamisega gore Jehofa o tla go ema nokeng fa o ntse o dira maiteko a go boela kwa go ene. O tla go thusa gore o lepalepane le go tlhobaela, o lwantshane le kutlobotlhoko le gore o nne le kagiso ya mogopolo o bo o ritibale pelo, e leng maikutlo a a nnang gone ka go bo o na le segakolodi se se phepa. Ka jalo, o ka nna wa ikutlwa o tlhotlheletsega gape go direla Jehofa o na le badumedimmogo le wena.” Gape gopola gore bagolwane ba ikemiseditse go go thusa. Ba ka nna “jaaka lefelo la go iphitlhela phefo, lefelo la go iphitlhela pula ya matsubutsubu.” (Isa. 32:2) Re a itse gore o lebogela thekololo le gore o batla go bontsha Jehofa gore o a e lebogela. Ka jalo, ipotse go re: “Nka dira eng gone jaanong gore ke ‘tlhamalatse dilo’ fa gare ga me le Jehofa?” (Isa. 1:18; 1 Pet. 2:25) Ka sekai, a o ka ya dipokanong kwa Holong ya Bogosi? A o ka bolelela mogolwane mongwe gore o kopa thuso ya gore o boele kwa go Jehofa? A ka rulaganya gore go nne le mongwe yo o ka ithutang Baebele le wena ka nakwana. Tlhatswega pelo gore Jehofa o tla segofatsa maiteko a o a dirang a go boela kwa go ene le se o se dirang go bontsha gore o lebogela thekololo.

O TLA DIRA ENG?

17-18. O ka dira eng pele ga Segopotso sa ngwaga ono?

¹⁷ Jesu o ile a re thekololo e ntsheditswe “gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Joh. 3:16) E re ka Jesu a re swetse, Jehofa o kgona go re golola mo boleong le mo losong. Ga re a tshwanela go tsaya seo lotsatsa. (Bar. 3:23, 24; 2 Bakor. 6:1) Malatsi pele ga Segopotso, a re ipheng nako ya go akanyetsa kwa teng ka se Jehofa le Jesu ba re diretseng sone go re bontsha gore ba a re rata. Seno se tla re rotloetsa go bontsha gore re lebogela tsela e ba re ratang ka yone.

¹⁸ O tla bontsha Jehofa jang gore o a leboga? Karabo ya gago e ka farologana le tsa ba bangwe. Mme gone, o ka tlhatswega pelo gore Jehofa o tla segofatsa matsapa a o a tsayang le a bakaulengwe le bokgaitsadi ba a tsayang gore “ba se ka ba tlhola ba itshelela, mme ba tshelele ene yo o neng a ba swela.”​—2 Bakor. 5:15.