Goreng re Tlhoka Thekololo?

1-2. Re tlhoka go gololwa mo go eng, mme ka ntlha ya eng? (Baroma 7:22-24) (Bona le setshwantsho.)

AKANYA ka tiragalo eno. Ntlo e gosomana monna mongwe a le mo go yone. O gaeletswe, ga a kgone go tswa ka gonne o wetswe ke ditena le dilo tse dingwe. Se a kgonang go se dira fela ke go goa a kopa thuso.

² Rotlhe mo lefatsheng, re mo seemong se se tshwanang le seno. Jang? Fa Adame a tlhanogela Mmopi wa gagwe, o ile a nna moleofi. E re ka rotlhe re le bana ba gagwe, re baleofi. Fela jaaka monna yo o gaeletsweng mo ntlong e e gosomaneng, batho botlhe ba gaeletswe ka ntlha ya boleo. Fa moaposetoloi Paulo a kwalela Baroma lekwalo, o ile a tlhalosa kafa boleo bo re amang ka teng. (Bala Baroma 7:22-24.) O ile a re: “Ke mang yo o tla nkgololang mo mmeleng ono o o dirang gore ke swe?” Paulo o ne a ikutlwa a gaeletswe ka ntlha ya boleo jwa ga Adame jo bo neng bo tla dira gore a swe. (Bar. 6:23) Le rona re mo boemong joo jo bo thata, re tlhoka mongwe yo o ka re gololang.

3. Thekololo e re tswela mosola jang?

³ Re lebogela gore fa Paulo a sena go tlhalosa boemo jo bo thata jo a neng a le mo go jone, o re naya tsholofelo. Fa a sena go re: “Ke mang yo o tla nkgololang mo mmeleng ono o o dirang gore ke swe?” o ile a re: “Ke leboga Modimo ka gonne o nkgolola a dirisa Jesu Keresete, Morena wa rona!” (Bar. 7:25) Paulo o ne a bua ka setlhabelo sa ga Jesu sa thekololo.a Thekololo (1) e dira gore Jehofa a re itshwarele maleo, (2) e re naya tsholofelo ya go gololwa mo boleong, e bile (3) e re thusa gore re boelane le Mmopi wa rona. Fa re ntse re tlotla ka dintlha tseno, tsela e re ratang Jehofa, “Modimo yo o nayang tsholofelo” ka yone e tla gola. (Bar. 15:13) Gape re tla lebogela le go feta se Jesu, “yo o re golotseng ka thekololo” a se dirileng.​—Bakol. 1:14.

THEKOLOLO E DIRA GORE JEHOFA A RE ITSHWARELE

4-5. Goreng rotlhe re tlhoka thekololo? (Moreri 7:20)

⁴ Re tlhoka thekololo gore Jehofa a re itshwarele maleo. Mongwe le mongwe wa rona o dira diphoso ka se a se dirang le se a se buang. (Bala Moreri 7:20.) Maleo mangwe a masisi go feta a mangwe. Ka sekai, Molao wa ga Moshe o ne o re Moiseraele yo o dirileng boaka kgotsa yo o bolaileng motho o ne a tshwanetse go bolawa. (Lefi. 20:10; Dipa. 35:30, 31) Le fa gone maleo a mantsi a se masisi, boammaaruri ke gore le one ke maleo. Ka sekai, mopesalema Dafide o ne a re: “Ke tla nna kelotlhoko gore ke se ka ka leofa ka se ke se buang.” (Pes. 39:1) Seno se bontsha gore re ka leofa ka se re se buang.​—Jak. 3:2.

⁵ Leka go akanya ka se o kileng wa se bua kgotsa wa se dira mo nakong e e fetileng. A o kile wa bua sengwe kgotsa wa dira dilo dingwe tse o ileng wa di ikwatlhaela? Ga go pelaelo gore seo se kile sa go diragalela. Baebele e a re: “Fa re re, ‘Ga re na boleo,’ re a itsietsa e bile ga re dumele dithuto tsa boammaaruri.”​—1 Joh. 1:8.

6-7. Ke eng se se dirang gore Jehofa a re itshwarele maleo? (Bona le setshwantsho.)

⁶ Thekololo e dira gore Jehofa a re itshwarele maleo. (Baef. 1:7) Mme gone, seo ga se reye gore Jehofa o itshela moriti o o tsididi fa re dira diphoso. Jehofa ga a batle gore re dire boleo. (Isa. 59:2) E re ka a le tshiamiso, o ile a tshwanelwa ke go dira sengwe se se neng se tla dira gore a kgone go re itshwarela maleo.

⁷ Molao wa ga Moshe o ne o laela Baiseraele gore ba ntshe ditlhabelo ka diphologolo gore ba itshwarelwe maleo. (Lefi. 4:27-31; 17:11) Ditlhabelo tseo, di ne di bontsha gore batho ba ne ba tlhoka setlhabelo se se botoka sa ga Jesu, se se neng se tla dira gore ba bone masego a mantsintsi. Setlhabelo sa ga Jesu se ne se tla dira gore Jehofa a re itshwarele maleo. Mo lekwalong le Paulo a ileng a le kwalela Bakorintha, o ile a bontsha gore o tlhaloganya kafa setlhabelo sa ga Jesu se leng botlhokwa ka gone. Fa a sena go bua ka dilo tse di sa siamang tse ba neng ba di dira, o ne a ba raya a re: “Lo tlhapisitswe lwa nna phepa; lo dirilwe boitshepo; lo boletswe lo le ba ba siameng ka ntlha ya leina la Morena wa rona Jesu Keresete le ka moya wa Modimo wa rona.”​—1 Bakor. 6:9-11.

8. O ka dira eng pele o ya Segopotsong mo ngwageng ono?

⁸ Pele o ya Segopotsong mo ngwageng ono, iphe nako ya go akanya ka tsela e botshelo jwa gago bo leng botoka ka yone ka gonne Jehofa a go itshwaretse. Ka sekai, thekololo e dira gore o se ka wa ipona molato ka ntlha ya maleo a o a dirileng mo nakong e e fetileng mme o a ikwatlhaetse. Mme go tweng fa e le gore go thata gore o dumele gore Jehofa o go itshwaretse? Gongwe o ipolelela go re, ‘Ke a itse gore Jehofa o intshwaretse, mme nna ga ke kgone go lebala boleo jo ke bo dirileng.’ Fa e le gore o ikutlwa jalo, gopola gore Jehofa ke ene a go itshwarelang e bile o neile Morwawe maikarabelo a go re atlhola. Jehofa ga a letle wena kgotsa ope gore a dire tshwetso ya gore a o tla go itshwarela kgotsa ga a kitla a go itshwarela. Baebele e a re: “Fa re tsamaya mo leseding jaaka . . . [Jehofa] a le mo leseding, . . . madi a ga Morwawe e bong Jesu a re phepafatsa mo boleong bongwe le bongwe.” (1 Joh. 1:6, 7) Re ka dumela kgang eno fela jaaka re dumela dithuto tse dingwe tse di mo Baebeleng. Thekololo e dira gore Jehofa a re itshwarele, e bile Baebele e a re Jehofa o “ikemiseditse go itshwarela.”​—Pes. 86:5.

THEKOLOLO E RE NAYA TSHOLOFELO YA GO GOLOLWA MO BOLEONG

9. Kwantle ga go dira dilo tse di sa siamang, boleo bo akaretsa eng? (Pesalema 51:5)

⁹ Mo Baebeleng, lefoko “boleo” ga le kae fela dilo tse di sa siamang tse re di dirang, gape le akaretsa bosaitekanelang jo re bo ruileng go tloga fela fa re tsholwa. (Bala Pesalema 51:5.) Boemo jono bo dira gore re dire dilo tse di sa siamang, gape bo dira gore re lwale, re tsofale re bo re swe. Seno se re thusa go tlhaloganya gore goreng masea a a iseng a dire dilo tse di sa siamang a lwala kgotsa a swa. Gape se re thusa go tlhaloganya gore goreng batho ba ba siameng le ba ba sa siamang ba boga e bile ba swa. Bana botlhe ba ga Adame ba na le boleo.

10. Boleo bo ile jwa ama Adame le Efa jang?

¹⁰ Boleo bo ile jwa ama tsela e Adame le Efa ba neng ba ikutlwa ka yone. Fela fa ba sena go leofa, digakolodi tsa bone di ne tsa simolola go ba tshwenya. (Bar. 2:15) Ba ile ba lemoga gore go na le sengwe se se sa siamang se se diregang. Ba ne ba ikutlwa ba patelesega go bipa dikarolo dingwe tsa mebele ya bone e bile ba ne ba iphitlhela Mmopi wa bone. (Gen. 3:7, 8) E ne e le lekgetlo la ntlha Adame le Efa ba ikutlwa molato, ba tlhabiwa ke ditlhong e bile ba tlhobaela. Mme ba ne ba nna ba ikutlwa jalo go fitlha ba swa.​—Gen. 3:16-19.

11. Boleo bo re ama jang?

¹¹ Ka dinako dingwe le rona re ikutlwa molato, re tlhabiwa ke ditlhong e bile re a tlhobaela ka ntlha ya boleo. Gape boleo bo dira gore re tshwenyege thata le gore re utlwe botlhoko. Tota le fa re leka go tokafatsa botshelo jwa rona kgotsa go tila mathata, mathata a re sa kgoneng go a rarabolola one a nna a le teng. Goreng? Ka gonne Baebele e tlhalosa gore fa e sa le Adame a leofa, batho ba ‘atlholetswe go tshela botshelo jo bo se nang mosola.’ (Bar. 8:20) Seno se diragalela batho botlhe mo lefatsheng. Ka sekai, batho ba le bantsi ba tsaya matsapa a go tlhokomela tikologo, go fedisa bokebekwa, go thusa mongwe le mongwe go nna le se a se tlhokang le go fedisa ntwa. Ka maswabi, mathata ao a sa ntse a le teng. Mme gone, thekololo e dira gore re nne le tsholofelo. Ke tsholofelo efe eo?

12. Thekololo e re naya tsholofelo efe?

¹² Thekololo e dira gore re nne le tsholofelo ya gore “popo e tla gololwa gore e se ka ya nna motlhanka wa mmele o o swang.” (Bar. 8:21) Seno se raya gore fa re se na boleo kwa Paradaiseng, re ka se ka ra tlhola re lwala kgotsa re tshwenyega. Gape ga re kitla re tlhola re ikutlwa molato, re tlhabiwa ke ditlhong kgotsa re tlhobaela. Mo godimo ga moo, Jesu yo e leng “Kgosana ya Kagiso,” o tla bo a busa. E re ka a ntshitse thekololo, o tla kgona go thusa batho go rarabolola mathata otlhe a ba neng ba ka se kgone go a rarabolola ka bobone.​—Isa. 9:6, 7.

13. Ke eng gape se o ka akanyang ka sone pele o ya Segopotsong mo ngwageng ono?

¹³ Leka go akanya gore botshelo bo tla bo ntse jang fa o tla bo o se na boleo. O tla bo o tsoga letsatsi le letsatsi o itumetse, o sa tshoge gore wena kgotsa batho ba o ba ratang lo tla tlhoka dijo, lo tla lwala kgotsa lo tla swa. Tota le gone jaanong o ka nna le kagiso fa o ‘ikanya tsholofelo e leng tshetledi ya matshelo a rona e e re thusang go nna re nonofile re sa belaele sepe.’ (Baheb. 6:18, 19) Fela jaaka tshetledi e kgona go tshwara sekepe gore se se ka sa ya kwa le kwa, tsholofelo e o nang le yone e ka nonotsha tumelo ya gago e bile e ka go thusa go itshokela diteko dipe fela tse o lebanang le tsone. Tlhomamisega gore Jehofa o tla “duela ba ba batlang go dira thato ya gagwe ka tlhoafalo.” (Baheb. 11:6) Thekololo ke yone fela e e dirang gore o nne le kagiso gone jaanong le tsholofelo ka bokamoso.

THEKOLOLO E RE THUSA GO BOELANA LE MODIMO

14. Boleo bo amile botsala jwa rona le Jehofa jang, mme ka ntlha ya eng?

¹⁴ Fa Adame le Efa ba sena go leofa, ba ne ba sa tlhole ba atamalane le Jehofa. Tota e bile, Baebele e a re batho botlhe ba ne ba nna kgakala le Mmopi wa bone. (Bar. 8:7, 8; Bakol. 1:21) Goreng? Ka gonne Jehofa ga a na boleo, e bile ga a itlhokomolose boleo. Baebele e bua jaana ka Jehofa: “Matlho a gago a boitshepo thata gore a ka leba se se sa siamang, e bile ga o ka ke wa letlelela bosula.” (Hab. 1:13) Ka jalo, boleo bo dirile gore go nne le lobota fa gare ga Modimo le batho. Ga go na ope yo o neng a ka kgona go tlosa lobota loo a bo a dira gore re atamalane le Jehofa gape. Thekololo ke yone fela e e neng e ka kgona go dira gore seo se kgonege.

15. Loso lwa ga Jesu lo ile lwa thusa batho jang gore ba boelane le Modimo?

¹⁵ Baebele e a re Jesu “ke setlhabelo se se ntshediwang gore re kgone go nna le kagiso le Modimo gape.” (1 Joh. 2:2) Setlhabelo sa ga Jesu se ile sa thusa batho jang gore ba atamalane le Jehofa gape? Loso lwa ga Jesu lo ile lwa diragatsa melao ya Modimo ya tshiamiso, mme seo sa dira gore Jehofa a atamalane le batho gape. (Bar. 3:23-26) Tota e bile, go ne go ka twe batho ba ba diretseng Jehofa ka boikanyegi pele ga loso lwa ga Jesu ke basiami. (Gen. 15:1, 6) Goreng? Ka gonne Jehofa o ne a tlhatswegile pelo gore Morwawe e bong Jesu, o ne a tla ntsha thekololo. (Isa. 46:10) Thekololo e ile ya dira gore batho ba kgone go boelana le Modimo.

16. Ke eng gape se o ka se dirang pele o ya Segopotsong mo ngwageng ono? (Bona le setshwantsho.)

¹⁶ Leka go akanya gore se Jehofa a se dirileng gore re boelane le ene se go tswela mosola jang. Ka sekai, o ka bitsa Jehofa “Rraarona” jaaka Jesu a re rutile. (Math. 6:9) Ka dinako dingwe, o ka nna wa bo wa mmitsa “Tsala.” Fa re dirisa mafoko a a jaaka “Rraarona” kgotsa “Tsala,” re tshwanetse go dira jalo ka boikokobetso. Goreng? Ka gonne re baleofi e bile ga re ka ke ra kgona go atamalana le Jehofa ka borona kgotsa re sa thusiwe ke ope. Jehofa o ntshitse Morwawe gore re boe re “atamalane le ene gore go nne le kagiso ka ntlha ya madi a [Jesu] a a tsholotseng mo koteng ya tlhokofatso.” (Bakol. 1:19, 20) Ke gone ka moo re kgonang go atamalana le Jehofa le fa gone re na le boleo.

THEKOLOLO E BONTSHA GORE JEHOFA O KUTLWELOBOTLHOKO

17. Thekololo e bontsha jang gore Jehofa o kutlwelobotlhoko? (Baefeso 2:4, 5)

¹⁷ Thekololo e bontsha gore Jehofa o “kutlwelobotlhoko.” O ne a “dira gore re tshele . . . le fa re ne re sule ka ntlha ya boleo.” (Bala Baefeso 2:4, 5.) Fela jaaka motho yo o gaeletsweng mo ntlong e e oleng, batho ba ba boikokobetso ba a lemoga gore ga ba kgone go ikgolola mo dilong tse boleo bo di bakileng. (Dit. 13:48) Jehofa o thusa batho bao ka go tlhomamisa gore ba rutiwa dikgang tse di molemo tsa Bogosi gore ba kgone go mo itse le gore ba kgone go itse Morwawe e bong Jesu. (Joh. 17:3) Fa e le gore Satane o ne a akanya gore boleo jwa ga Adame le Efa bo ne bo tla kgoreletsa Jehofa go diragatsa maikaelelo a gagwe, ruri o ne a fositse!

18. Fa o ntse o akanyetsa kwa teng ka thekololo, ke eng se o tshwanetseng go nna o se gopotse?

¹⁸ Fa re akanyetsa kwa teng kafa thekololo e re tswelang mosola ka gone, re tshwanetse go nna re gopotse lebaka la botlhokwa la bo go Jehofa a ile a e ntsha. Thekololo ga e a ntshediwa fela go re golola, gape Jehofa o e ntsheditse go araba tatofatso ya ga Satane ya kwa tshimong ya Edene. (Gen. 3:1-5, 15) Thekololo e bontsha gore dilo tse Satane a neng a di bua ka Jehofa ga di boammaaruri. Gape e re golola mo boleong le mo losong go bontsha gore Modimo wa rona o lorato. E re ka Jehofa a na le bopelonomi jo bogolo, tota le fa re le baleofi o re letla gore re bontshe gore se Satane a se buang ka ene ke maaka. (Diane 27:11) O ka bontsha jang gore o lebogela thekololo? Re tla araba potso eno mo setlhogong se se latelang.