Boloka Letsatsi la ga Jehofa le le Gaufi Mo Mogopolong
“Mo metlheng ya bofelo go tla tla batlaopi.”—2 PETERE 3:3.
1. Mokeresete mongwe wa motlha wa rona o ne a na le boikutlo bofe jwa go potlaka?
MODIREDI mongwe wa nako e e tletseng ka dingwaga tse di fetang 66 o ne a kwala jaana: “Ka metlha ke ne ke ikutlwa ke na le boikutlo jwa go potlaka. Tsela e ke neng ke akanya ka yone, mo go nna Haramagedona ka metlha e ne e le letsatsi morago ga la ka moso. (Tshenolo 16:14, 16) Jaaka rre le rremogolo, ke tshedile botshelo jwa me ka tsela e moaposetoloi [Petere] a neng a kgothatsa ka yone, ‘go boloka gaufi mo mogopolong go nna gone ga letsatsi la ga Jehofa.’ Ka dinako tsotlhe ke ne ke leba lefatshe le lesha le le solofeditsweng e le ‘selo sa mmatota lefa se sa bonwe.’”—2 Petere 3:11, 12; Bahebera 11:1; Isaia 11:6-9; Tshenolo 21:3, 4.
2. Go kaya eng go nna le letsatsi la ga Jehofa gaufi mo mogopolong?
2 Mafoko a ga Petere a a reng ‘go boloka gaufi mo mogopolong’ fa a bua ka letsatsi la ga Jehofa a kaya gore ga re le tlose mo mogopolong wa rona. Ga re a tshwanela go lebala gore letsatsi la fa Jehofa a senya tsamaiso eno ya dilo e le tsela ya go baakanyetsa go tlhoma lefatshe la gagwe le lesha le a le solofeditseng le gaufi thata. Le tshwanetse go nna selo sa mmatota mo go rona mo e leng gore re le bona sentle, le le gaufi thata le rona. Ke ka fa e neng e le selo sa mmatota ka teng mo baporofeting ba Modimo ba bogologolo, mme gantsi ba ne ba bua ka lone le le gaufi.—Isaia 13:6; Joele 1:15; 2:1; Obadia 15; Sefania 1:7, 14.
3. Ke eng se go bonalang se ile sa tlhotlheletsa Petere go neela kgakololo e e malebana le letsatsi la ga Jehofa?
3 Ke ka ntlha yang fa Petere a ne a re kgothatsa gore re tseye letsatsi la ga Jehofa jaaka le le tla tlang, re ka re “letsatsi morago ga la ka moso”? Ka gonne go bonala fa bangwe ba ne ba simolotse go sotla kgopolo ya go nna gone ga ga Keresete go go solofeditsweng go ka nako ya gone badirabosula ba tla otlhaiwang. (2 Petere 3:3, 4) Ka jalo mo kgaolong ya 3 ya lekwalo la gagwe la bobedi, e re tla e sekasekang gone jaanong, Petere o araba ditatofatso tsa basotli bano.
Boikuelo jo bo Lorato jo bo Tshwanetseng go Gakologelwa
4. Petere o batla gore re gakologelwe eng?
4 Tsela e Petere a neng a rata bakaulengwe ba gagwe ka yone e supiwa ke go bo a ile a ba bitsa gangwe le gape a re ke “baratwa” mo kgaolong eno. Petere o simolola jaana fa a ikuela ka lorato mo go bone gore ba se ka ba lebala dilo tse ba di rutilweng: “Baratwa, . . . ke [kurusa] dikgono tsa lona tsa go akanya tse di phepa e le kgakololo, gore lo gakologelwe mafoko a a neng a buiwa pelenyana ke baporofeti ba ba boitshepo le taolo ya Morena le Mmoloki ka baaposetoloi ba lona.”—2 Petere 3:1, 2, 8, 14, 17; Jude 17.
5. Baporofeti bangwe ba ne ba reng ka letsatsi la ga Jehofa?
5 “Mafoko a a neng a buiwa pelenyana ke baporofeti ba ba boitshepo” ke afe a Petere a kgothaletsang babadi go a gakologelwa? Ebu, ke a a buang ka go nna gone ga ga Keresete a le mo maatleng a Bogosi le ka ga go atlholwa ga ba ba bosula. Petere pelenyana o ne a lebisa tlhokomelo mo mafokong ano. (2 Petere 1:16-19; 2:3-10) Jude o bua ka Enoke, yo e neng e le moporofeti wa ntlha yo go kwadilweng ka ene yo o neng a tlhagisa ka katlholo e e botlhoko ya Modimo mo go ba ba dirang bosula. (Jude 14, 15) Baporofeti ba bangwe ba ne ba latela Enoke mme Petere ga a batle gore re lebale se ba neng ba se kwala.—Isaia 66:15, 16; Sefania 1:15-18; Sekaria 14:6-9.
6. Ke mafoko afe a ga Keresete le baaposetoloi ba gagwe a a re sedimosetsang ka letsatsi la ga Jehofa?
6 Mo godimo ga moo, Petere o bolelela babadi ba gagwe gore ba gakologelwe “taolo ya Morena le Mmoloki.” Taolo ya ga Jesu e akaretsa kgothatso eno: “Itlhokomeleng gore dipelo tsa lona di se ka le ka motlha tsa imelwa . . . mme ka tshoganyetso letsatsi leo la lo wela ka ponyo ya leitlho jaaka seru.” “Nnang lo lebile, nnang lo tsogile, gonne ga lo itse gore nako e e tlhomilweng e leng.” (Luke 21:34-36; Mareko 13:33) Petere gape o ne a re kgothaletsa go tsaya tsia mafoko a baaposetoloi. Ka sekai, moaposetoloi Paulo o ne a kwala jaana: “Letsatsi la ga Jehofa le tla fela jaaka legodu bosigo. Jalo he, a re se nneng re robetse jaaka ba bangwe botlhe ba dira, mme a re nneng re tsogile re bo re nne re thantse mo ditlhaloganyong.”—1 Bathesalonika 5:2, 6.
Dikeletso Tsa Basotli
7, 8. (a) Ke banna ba mofuta ofe ba ba sotlang ka melaetsa ya tlhagiso ya Modimo? (b) Basotli ba iphaka ka goreng?
7 Jaaka re bone pelenyana, lebaka la go bo Petere a ne a neela tlhagiso eno ke ka go bo bangwe ba ne ba setse ba simolotse go nyatsa ditlhagiso tse di ntseng jalo, fela jaaka Baiseraele ba nako ya bogologolo ba ne ba sotla baporofeti ba ga Jehofa. (2 Ditirafalo 36:16) Petere o tlhalosa jaana: “Gonne sa ntlha lo itse seno, gore mo metlheng ya bofelo go tla tla batlaopi ka go tlaopa ga bone, ba tswelela go ya ka dikeletso tsa bone.” (2 Petere 3:3) Jude o bolela gore dikeletso tsa basotli bano ke “dilo tse e seng tsa bomodimo.” O ba bitsa “batho sephologolo, ba ba se nang bomoya.”—Jude 17-19.
8 Gongwe batho ba ba rutang maaka ba Petere a reng ke “ba ba tswelelang ba sala nama morago ka keletso ya go e leswafatsa” ba fa gare ga basotli bano ba ba se nang bomoya. (2 Petere 2:1, 10, 14) Ba botsa Bakeresete ba ba ikanyegang jaana ka tshotlo: “Go kae go nna gone mono ga gagwe mo go solofeditsweng? Aitsane, go tswa letsatsing le borraaronamogologolwane ba neng ba robala mo losong ka lone, dilo tsotlhe di tswelela fela jaaka go tswa kwa tshimologong ya tlhōlō.”—2 Petere 3:4.
9. (a) Ke ka ntlha yang fa basotli ba leka go nyatsa go potlaka go go leng mo Lefokong la Modimo? (b) Go boloka letsatsi la ga Jehofa gaufi mo megopolong go re sireletsa jang?
9 Ke ka ntlha yang fa ba sotla jaana? Ke ka ntlha yang fa ba akantsha gore go nna gone ga ga Keresete le ka motlha go ka se ka ga nna teng, gore Modimo le ka motlha ga a ise a ko a tseye kgato mo dilo tse di dirwang ke batho e bile a ka se ka a dira jalo le ka motlha? Ebu, ka go nyatsa go potlaka go go leng mo Lefokong la Modimo, basotli bano ba ba nang le bophologolo ba batla go otsedisa ba bangwe gore ba nne mo boemong jwa go itlhokomolosa dilo ka tsela ya semoya mme ka tsela eo ba dire gore go nne motlhofo go ba faposa ka tsela ya bopelotshetlha. A bo e le kgakololo e e maatla jang mo go rona go nna re tsogile mo semoyeng! E kete re ka nna re bolokile letsatsi la ga Jehofa gaufi mo mogopolong mme ka metlha re gakologelwa gore matlho a gagwe a re bona! Ka jalo re tla tlhotlheletsega go direla Jehofa ka tlhagafalo le go nna re le phepa mo boitsholong.—Pesalema 11:4; Isaia 29:15; Esekiele 8:12; 12:27; Sefania 1:12.
Ba Dira ka Boomo le ka Lonyatso
10. Petere o supa jang gore basotli ba phoso?
10 Basotli ba ba ntseng jalo ba itlhokomolosa ntlha e e botlhokwa. Ba e itlhokomolosa ka boomo mme ba leka go dira gore ba bangwe ba e lebale. Ka ntlha yang? Gore go nne motlhofo go faposa batho. Petere o kwala jaana: “Gonne, go ya ka keletso ya bone, ntlha eno ga ba kgone go e lemoga.” Ntlha efe? “Gore go ne go na le magodimo go tswa bogologolong le lefatshe le eme le le kompa go tswa mo metsing le mo gare ga metsi ka lefoko la Modimo; mme lefatshe la nako eo le ne la senngwa ka dilo tseo fa le ne le rwalelelwa ka metsi.” (2 Petere 3:5, 6) Ee, Jehofa o ne a tlosa boikepo mo lefatsheng ka Morwalela wa motlha wa ga Noa, ntlha e Jesu le ene a ileng a e gatelela. (Mathaio 24:37-39; Luke 17:26, 27: 2 Petere 2:5) Ka jalo, go farologana le se basotli ba se bolelang, dilo tsotlhe ga di a tswelela pele di ntse “fela jaaka go tswa kwa tshimologong ya tlhōlō.”
11. Ke go itlhaganelela ditebelelo dife ga Bakeresete ba bogologolo go go ileng ga dira gore bangwe ba ba sotle?
11 Basotli ba ka tswa ba ne ba sotla Bakeresete ba ba ikanyegang ka gore ba ne ba sa ntse ba lebeletse dilo tse di iseng di diragale. Pelenyana ga fa Jesu a swa, barutwa ba gagwe “ba ne ba ithaya ba re bogosi jwa Modimo bo ne bo tlile go iponatsa ka ponyo ya leitlho.” Morago ga foo, fa a sena go tsosiwa ba ne ba botsa gore a Bogosi bo tla tlhomiwa ka yone nako eo. Gape mo e ka nnang dingwaga di le lesome pele ga Petere a kwala lekwalo la gagwe la bobedi, bangwe ba ne ba “tsosiwa maikutlo” ka “molaetsa o o buiwang ka molomo” kana “lekwalo” le go neng go lebega le tswa mo go moaposetoloi Paulo kana ditsala tsa gagwe, “kaga gore letsatsi la ga Jehofa le gorogile.” (Luke 19:11; 2 Bathesalonika 2:2; Ditiro 1:6) Le fa go ntse jalo, ditebelelo tse di ntseng jalo tsa barutwa ba ga Jesu, e ne e se tsa maaka, e ne e le fela gore ba di lebeletse pele ga nako ya tsone. Letsatsi la ga Jehofa le tla tla!
Lefoko la Modimo le a Ikanyega
12. Lefoko la Modimo le itshupile jang gore le a ikanyega ka boporofeti jwa lone malebana le “letsatsi la ga Jehofa”?
12 Jaaka go umakilwe kwa pelenyana, baporofeti ba nako ya pele ga Bokeresete gantsi ba ne ba tlhagisa gore letsatsi la ipusolosetso la ga Jehofa le gaufi. “Letsatsi la ga Jehofa” le lennye le ne la tla ka 607 B.C.E. fa Jehofa a ne a ipusolosetsa mo bathong ba gagwe ba ba neng ba dule mo tseleng. (Sefania 1:14-18) Moragonyana, ditšhaba tse dingwe, go akaretsa Babilone le Egepeto di ne tsa welwa ke “letsatsi la ga Jehofa” le le ntseng jalo. (Isaia 13:6-9; Jeremia 46:1-10; Obadia 15) Bokhutlo jwa tsamaiso ya dilo ya Sejuda ya lekgolo la ntlha la dingwaga le jone bo ile jwa bolelelwa pele, mme bo ne jwa direga fa masole a Baroma a ne a senya Judea ka 70 C.E. (Luke 19:41-44; 1 Petere 4:7) Mme Petere o bua ka “letsatsi la ga Jehofa” la mo isagweng, le le tla fetang thata fela Morwalela wa lefatshe lotlhe ka bogolo!
13. Ke sekai sefe sa hisitori se se supang gore tota tsamaiso eno ya dilo e tla fela?
13 Petere o simolola go tlhalosa tshenyego e e tlang eo ka go bolela jaana: “Mme . . . ka lone lefoko leo.” O ne a sa tswa go re “ka lefoko la Modimo,” lefatshe la pele ga Morwalela le ne la ema “go tswa mo metsing le mo gare ga metsi.” Boemo jono jo bo ileng jwa tlhalosiwa mo pegong ya Baebele ya popo, bo ne jwa dira gore go kgonege gore go nne le Morwalela fa metsi a elela ka kaelo kana ka lefoko la Modimo. Petere o tswelela pele jaana: “Magodimo a gompieno a beetswe molelo le lefatshe, ka lone lefoko leo [la Modimo] e bile di beilwe go ya letsatsing la katlholo le la go senngwa ga batho ba e seng ba bomodimo.” (2 Petere 3:5-7; Genesise 1:6-8) Re na le lefoko la ga Jehofa le le ikanyegang malebana le seo! O tla fedisa “magodimo . . . le lefatshe”—tsamaiso eno ya dilo—mo bogaleng jo bo tukang jwa letsatsi la gagwe le legolo! (Sefania 3:8) Mme gone leng?
Go Tlhoafalela Gore Bokhutlo bo Tle
14. Ke ka ntlha yang fa re ka tlhatswega pelo gore gone jaanong re tshela mo “malatsing a bofelo”?
14 Barutwa ba ga Jesu ba ne ba batla go itse gore bokhutlo bo tla tla leng, ka jalo ba ne ba mmotsa jaana: “Sesupo e tla nna eng sa go nna gone ga gago le sa bokhutlo jwa tsamaiso eno ya dilo?” Go bonala fa ba ne ba botsa gore tsamaiso ya Sejuda e tla khutla leng, mme karabo ya ga Jesu e ne e lebisitse thata mo go reng “magodimo . . . le lefatshe” a gone jaanong a tla senngwa leng. Jesu o ne a bolelela pele ka dilo tse di ntseng jaaka dintwa tse dikgolo, go tlhaela ga dijo, dithoromo tsa lefatshe, malwetse le bokebekwa. (Mathaio 24:3-14; Luke 21:5-36) Fa e sale ka ngwaga wa 1914, re ile ra bona ditshupo tseno tse Jesu a ileng a di neela go supa “bokhutlo jwa tsamaiso eno ya dilo” di diragadiwa, mmogo le dilo tse moaposetoloi Paulo a ileng a di umaka gore di tla supa ‘malatsi a bofelo.’ (2 Timotheo 3:1-5) Eleruri, bosupi bo bontsi thata jwa gore re tshela mo nakong ya bokhutlo jwa tsamaiso eno ya dilo!
15. Ke eng se Bakeresete ba neng ba leka go se dira go sa kgathalesege tlhagiso ya ga Jesu?
15 Basupi ba ga Jehofa ba ntse ba tlhoafaletse go itse gore letsatsi la ga Jehofa le tla diragala leng. Ka ntlha ya tlhoafalo ya bone ka dinako tse dingwe ba ile ba leka go fopholetsa gore le ka nna la tla leng. Mme ka go dira jalo ba ne ba palelwa ke go tsaya tsia tlhagiso ya Mong wa bone fela jaaka barutwa ba ga Jesu ba pele, ya gore “ga [re] itse gore nako e e tlhomilweng ke leng.” (Mareko 13:32, 33) Basotli ba ile ba sotla Bakeresete ba ba ikanyegang ka ntlha ya go lebelela dilo pele ga nako ya tsone. (2 Petere 3:3, 4) Le fa go ntse jalo, letsatsi la ga Jehofa le tla tla, Petere o a tlhomamisa, go ya ka nako e Ene a e beileng.
Botlhokwa Jwa go Nna le Pono ya ga Jehofa
16. Ke kgakololo efe e re e tsayang tsia ka botlhale?
16 Re tlhoka go nna le pono ya ga Jehofa malebana le nako, jaaka fa Petere a re gakolola jaana: “Lefa go ntse jalo, lo se ka lwa tlhoka go lemoga ntlha e nngwe fela eno, baratwa, gore letsatsi le le lengwe mo go Jehofa le ntse jaaka dingwaga di le sekete le dingwaga di le sekete jaaka letsatsi le le lengwe.” A bo nako ya rona ya go tshela ya dingwaga tse 70 kana 80 e le khutshwane jang ne fa e bapisiwa le seo! (2 Petere 3:8; Pesalema 90:4, 10) Ka jalo fa go bonala e kete go diragadiwa ga ditsholofetso tsa Modimo go a diega, re tshwanetse go amogela kgakololo ya moporofeti wa Modimo e e bolelang jaana: “Le fa [nako e e beilweng] e ko e diega, lo e lete; gonne ruri e tlaa tla, ga e ketla e diega.” (Mokwalo o o sekameng ke wa rona.)—Habakuke 2:3.
17. Le mororo malatsi a bofelo a ne a tswelela ka nako e telele go feta ka fa ba le bantsi ba ne ba lebeletse, ke eng se re ka tlhatswegang pelo ka sone?
17 Ke ka ntlha yang fa malatsi a bofelo a tsamaiso eno a ile a nna matelele go feta ka fa ba le bantsi ba ne ba lebeletse ka teng? Ka ntlha ya lebaka le le molemo, jaaka fa Petere a tlhalosa jaana: “Jehofa ga a bonya mabapi le tsholofetso ya gagwe, jaaka batho bangwe ba tsaya gore ke bonya, mme o pelotelele le lona ka gonne ga a eletse gore ope a senngwe mme o eletsa gore botlhe ba fitlhe mo boikotlhaong.” (2 Petere 3:9) Jehofa o akanya ka se se tla solegelang batho botlhe molemo thata. O amegile ka matshelo a batho, jaaka a bolela jaana: “Ga ke na kgatlhego epe mo losong lwa moikepi; fa e se go re moikepi a sokologe mo tseleng ya gagwe, mme a tshele.” (Esekiele 33:11) Ka jalo re ka tlhatswega pelo gore bokhutlo bo tla tla ka nako e e tshwanetseng go diragatsa boikaelelo jwa Mmopi wa rona yo o botlhale thata le yo o lorato!
Ke Eng se se Tla Fetang?
18, 19. (a) Ke ka ntlha yang fa Jehofa a ikaeletse go senya tsamaiso eno ya dilo? (b) Petere o tlhalosa jang bokhutlo jwa tsamaiso eno mme ke eng se tota se tla senngwang?
18 E re ka Jehofa a rata ba ba mo direlang ka boammaaruri, o tla tlosa botlhe ba ba ba ngomolang pelo. (Pesalema 37:9-11, 29) Fa Petere a akgela jaaka Paulo pelenyana gore tshenyego eno e tla tla ka nako e e sa lebelelwang, o kwala jaana: “Letsatsi la ga Jehofa le tla tla jaaka legodu, le mo go lone magodimo a tla fetang ka modumo o o sumang, mme dilo tse di a bopang e re ka di tla bo di le mogote mo gogolo di tla nyerologa, mme lefatshe le ditiro tse di mo go lone di tla senolwa.” (2 Petere 3:10; 1 Bathesalonika 5:2) Magodimo le lefatshe tsa mmatota ga di a ka tsa fedisiwa ka Morwalela, e bile di ka se ka tsa fedisiwa ka letsatsi la ga Jehofa. Ka jalo he, ke eng se se tla “fetang” kana se tla senngwang?
19 Mebuso ya batho e e ileng ya rena mo godimo ga batho jaaka “magodimo” e tla fela mme le “lefatshe” kana setšhaba sa batho ba ba boikepo. Gongwe “modumo o o sumang” go supa tsela e magodimo a tla fetang ka bonako ka yone. “Dilo tse di a bopang” tse di bopang setšhaba sa batho ba ba senyegileng se tla “nyerologa” kana go nyelediwa. Mme “lefatshe” go akaretsa le “ditiro tse di mo go lone,” di tla “senolwa.” Jehofa o tla senola ditiro tsa batho ka botlalo fa a fedisa tsamaiso ya lefatshe lotlhe go ya ka tsela e go e tshwanelang.
Tlhoma Mogopolo mo Tsholofelong ya Gago
20. Matshelo a rona a tshwanetse go amiwa jang ke go itse ka dilo tse di tla diragalang mo nakong e e tlang?
20 E re ka ditiragalo tse di gakgamatsang tseno di le gaufi, Petere a re re tshwanetse go dira ‘ditiro tse di boitshepo tsa boitshwaro le ditiro tsa boineelo jwa bomodimo, re letetse e bile re ntse re bolokile gaufi mo mogopolong go nna gone ga letsatsi la ga Jehofa.’ Ga go na pelaelo epe kaga seno! “Magodimo ka a tla bo a le mo molelong a tla [nyerologa] le dilo tse di a bopang ka di tla bo di le mogote mo gogolo di tla [tlhaologa]!” (2 Petere 3:11, 12) Lebaka la go bo ditiragalo tse di gakgamatsang tseno di ka nna tsa diragala ka moso go tshwanetse ga ama sengwe le sengwe se re se dirang kana se re se rulaganyang.
21. Ke eng se se tla emisetsang magodimo le lefatshe la jaanong?
21 Petere jaanong o re bolelela gore tsamaiso ya bogologolo e tla emisediwa ke eng ka go bolela jaana: “Mme go na le magodimo a masha le lefatshe le lesha tse re di letetseng go ya ka tsholofetso ya gagwe, mme ruri go tla nna tshiamo mo go tsone.” (2 Petere 3:13; Isaia 65:17) Ee, a bo e tla nna kgololesego jang ne! Keresete le babusikaene ba le 144 000 ba tla bopa puso ya “magodimo” a “masha” le batho ba ba tla falolang bokhutlo jwa lefatshe leno ba tla bopa “lefatshe le lesha.”—1 Johane 2:17; Tshenolo 5:9, 10; 14:1, 3.
Boloka Moya wa go Potlaka le Boitsheko Jwa Boitsholo
22. (a) Ke eng se se tla re thusang go tila selabe kana setshubaba sepe fela sa semoya? (b) Petere o tlhagisa ka kotsi efe?
22 Petere o tswelela pele jaana: “Ka gone, baratwa, e re ka lo letetse dilo tseno, dirang bojotlhe jwa lona gore kwa bofelong a lo fitlhele lo se na selabe e bile lo se na setshubaba e bile lo le mo kagisong. Go feta moo, tsayang bopelotelele jwa Morena wa rona e le poloko.” Fa re leta ka tlhoafalo e bile re leba se se bonalang e le go diega ga letsatsi la ga Jehofa e le bopelotelele jwa Modimo go tla re thusa go tila selabe kana setshubaba sepe fela sa semoya. Le fa go ntse jalo, go na le kotsi! Petere o tlhagisa gore mo mekwalong ya “mokaulengwe wa rona yo o rategang Paulo . . . go na le dilo dingwe tse di thata go tlhaloganngwa, tse ba ba sa rutwang le ba ba sa nitamang ba di sokang, jaaka ba dira le ka Dikwalo tse dingwe tsotlhe, tshenyegong ya bone.”—2 Petere 3:14-16.
23. Kgothatso ya ga Petere e e konelang ya reng?
23 Go bonala fa batho ba ba rutang maaka ba ile ba sokamisa mekwalo ya ga Paulo e e malebana le bopelonomi jo bo sa re tshwanelang jwa Modimo, ba di dirisa go nna seipato sa boitshwaro jo bo sa siamang. Gongwe Petere o akantse ka seno fa a kwala kgakololo ya gagwe ya bofelo: “Jalo, lona baratwa, ka lo na le kitso eno go sa le gale, nnang lo itisitse gore lo se ka lwa ya le bone ka phapogo ya batho ba ba tlhokomologang molao mme lwa wa mo go nitameng ga lona.” Morago ga foo o konela lekwalo la gagwe ka go kgothatsa jaana: “Tswelelang lo gola mo bopelonoming jo bo sa re tshwanelang le mo kitsong ya Morena wa rona le Mmoloki Jesu Keresete.”—2 Petere 3:17, 18.
24. Batlhanka botlhe ba ga Jehofa ba tshwanetse go nna le boikutlo bofe?
24 Ka mo go phepafetseng, Petere o batla go nonotsha bakaulengwe ba gagwe. O eletsa gore botlhe ba nne le boikutlo jo bo tlhalositsweng ke Mosupi mongwe yo o ikanyegang wa dingwaga di le 82 yo o neng a nopolwa kwa tshimologong: “Ke tshedile botshelo jwa me jaaka moaposetoloi a kgothaditse, ‘ke bolokile go nna gone ga letsatsi la ga Jehofa gaufi mo mogopolong.’ Ka dinako tsotlhe ke ne ke leba lefatshe le lesha le le solofeditsweng e le ‘selo sa mmatota lefa se sa bonwe.’” E kete rotlhe re ka tshela botshelo jwa rona ka tsela eo.
O ne O Tla Araba Jang?
◻ Go “boloka gaufi mo mogopolong” letsatsi la ga Jehofa go kaya eng?
◻ Basotli ba itlhokomolosa eng ka boomo mme ka ntlha yang?
◻ Ke ka lebaka lefe basotli ba ileng ba sotla Bakeresete ba ba ikanyegang?
◻ Re tshwanetse go nna re ntse re na le pono efe?
[Setshwantsho mo go tsebe 23]
Boloka letsatsi la ga Jehofa le le gaufi mo mogopolong . . .
[Setshwantsho mo go tsebe 24]
. . . le lefatshe le lesha le le tla tlang morago ga foo