“Ha Yehofa a sa Age Ntlo...”

“Lefa re ka itumela ra nna mo dikagong tse dintle tse dikgolo, Lefa le se la sepe, ga go na lefelo le le gaisang legae.”—John Howard Payne

GO SA kgathalesege gore o nna kae, go na le lefelo lengwe leo, mo go wena, e leng legae la gago. Mefuta ya matlo le mekgwa ya go aga e farologana fela thata. Matlo a mmu le letlhaka, matlo a dikota, matlo a a dirilweng ka konkoreite—lenane le lebega le sa fele. Bangwe ba ikutlwa fela ba kgotsofetse mo ntlong ya bojang fela jaaka ba bangwe ba itumelela dikago tsa maemo a a kwa godimo. Ke ka ntlhayang fa go ntse jalo?

Go nna o iketlile, go kgotsofala, go ikaegile thata ka botsalano jo o nang najo. (Diane 18:24) Go sa kgathalesege manobonobo le maphatsiphatsi otlhe a lefatshe le ka a nayang, legae ke koo motho a yang gone go bona kagiso le kgomotso. Lefa go le jalo, go ya ka dipego tsa botshelo jwa segompieno jwa legae, ga go tlhomamisege gore motho a ka bona kagiso le kgomotso mo legaeng ka metlha. Gantsi o fitlhela e le gore ba o tshelang le bone—balelapa la gago—ba ka nna le wena ka kagiso kana ba go tlhokisa kagiso. Jalo he, sephiri sa go aga lelapa le le itumetseng le le nang le kagiso ke sefe?

Go Aga Ntlo

“Ha Yehofa a sa age ntlo, ba ba e agañ ba dihèla lehèla,” go bua jalo temana ya ntlha ya Pesalema 127. Bao ba arolang mo go ageng matlo a kobamelo ya Modimo wa boammaaruri, Jehofa, ba fitlhela seno se le boammaaruri. Lefa badiri ba ba ditswerere ba ithaopela go ntsha nako le maatla a bone go aga Diholo tse dintle tsa Bogosi ka bonako, ba atlega ka ntlha ya tshegofatso ya ga Jehofa. Le eleng batho ba ba lebeletseng ba kgona go bona gore eno ke tiro e e sa tlwaelegang. Ka sekai, makasine mongwe o o neng o bega ka nngwe ya ditiro tseno kwa Colchester, kwa Ennyelane, o ne wa dirisa setlhogo “Jehofa o Aga Ntlo.”

Lefa go ntse jalo, go atlega mo maitekong ao eseng a go aga dikago tsa mmatota le gone go ntse go ikaegile ka tshegofatso ya ga Jehofa. Tlhokomela mafoko a ga Solomone a a mo temaneng ya boraro ya Pesalema 127: “Bōna, bana ke boshwa yoa ga Yehofa: le louñō loa sebopèlō, ke tuèlō ea gagwè.” Jehofa ke Moagi wa setswerere fa go tla mo malapeng, mme batsadi ba na le tshiamelo e e molemo ya go nna badiri-mmogo le ene kana badiredi ba gagwe.a (Bahebera 11:10) Batsadi ba Bakeresete ba ka dirisa tshiamelo eno ya go nna badiri-mmogo mme ba aga malapa a a itumetseng, a a nang le kagiso, a a tlotlang Mmopi Jehofa Modimo ka katlego jang?

Go Aga Lelapa ka Katlego

Sengwe se se tlhokegang fela thata mo kagong ke polane e e siameng ya batshwantshi ba dikago, kana thulaganyo ya ntlo. Ga go polane epe e e gaisang Lefoko la gagwe le le tlhotlheleditsweng Bibela mo go ageng babaki ba bannye ba Modimo. (2 Timotheo 3:16, 17) “Godisetsa ñwana ka thutō mo tseleñ e o chwanetseñ go e tsamaea, me o tla re leha a cohetse ga a ketla a kgaogana naeō,” Solomone o ne a kwala jalo. (Diane 22:6) “[Tsela] e o chwanetseñ go e tsamaea” ke tsela ya ga Jehofa, mme fa batsadi ba e latela, ba naya basha ba bone tebelelo ya go gola go nna batlhanka ba ba ikanyegang ba Modimo.

Kago e e siameng e tlhoka didirisiwa tsa go aga tse di siameng. Moeti mongwe wa Moafrika yo a neng a etetse kwa Yuropa o ne a fitlhela go se motlhofo go dumela gore dikago dingwe tseo a neng a di bona di ne di na le makgolokgolo a dingwaga. O ne a gakgamalela go bona didirisiwa tse di thata tsa go aga tse di dirisitsweng mo dikagong tseo. Kafa letlhakoreng le lengwe, fa baagi ba ngotla didirisiwa, go felela ka gore go bake kotsi, le eleng loso. Seno se ka nna boammaaruri le mo go godiseng bana.

Fa ba imiwa, bana ba amogela dinonofo dingwe tse di nang le bosaitekanelang ka ntlha ya boleo. (Pesalema 51:5) Ka mafoko a mangwe, ba tsholwa ba ntse ba na le bogole. Batsadi ba Bakeresete ba tshwanetse go lwa kgatlhanong le seno ka go leka go aga dinonofo tsa bomodimo tse di nnelang ruri mo baneng ba bone. (1 Bakorintha 3:10-15) Fa seno se sa dirwe, lefa batsadi ba ka dira ka natla jang mo dikarolong tse dingwe, jaaka mo go neyeng barwa le barwadi ba bone dijo, diaparo, legae, tse di gaisang tsotlhe, maiteko a bone a go aga ga a kitla a thusa sepe.

Ke gone ka moo go nang le kgothatso eno ya bomodimo e e newang batsadi, segolo bogolo borre: “[Bana] lo ba godisetsè mo koatlhaoñ le mo taoñ ea Morèna.” (Baefesia 6:4) Go ba laya le go ba godisetsa mo taong ya ga Jehofa go kopanyeletsa thulaganyo e e gaisang le didirisiwa tse di gaisang tsa go aga. Go di dirisa go tla felela ka melemo ya goyagoile mo lelapeng lotlhe.

Go Katisediwa mo Tirong

Lefa go ka dirwa dithulaganyo tse di gaisang jang, ka metlha go na le dilo dingwe tse di sa lebelelwang tseo di tlhagelelang fa go ntse go agiwa. Ka tsela e e tshwanang, batsadi ba tshwanetse go ithuta go lebelela mathata a a sa lebelelwang mo botshelong jwa letsatsi le letsatsi jwa maloko a lelapa mme ba ipaakanyetse go dirisana le one. Seno se ka dirwa jang?

Go tlhokega puisano e e molemo fa gare ga batsadi ka bobedi. Fa rre le mmè ka thapelo ba buisana mmogo ka botswelelopele jwa ba bannye, ba tla bona dikarolo dingwe tseo ba tlhokang go ba akgola mo go tsone le tseo ba tlhokang go “agiwa” mo go oketsegileng mo go tsone. Fela fa makoa a a ntseng jalo a lemogiwa, batsadi ba ka dirisana mmogo mme ba tsaya dikgato tse di tshwanetseng go a baakanya.

Mme gongwe o na le lelapa le legolo, mme o ka nna wa ipotsa go re: ‘Re ka dira maiteko a rona go nna ka tsela efe gore a tshwanele ditlhokafalo tsa ngwana mongwe le mongwe wa bana ba rona ba bantsi?’ Ke ka ntlhayang fa o sa ba katisetse mo tirong wa dira gore bana ba gago ba thusane? Batho ba ba ithutang tiro ba fetsa dingwaga di le dintsi ba ithuta go dira ka botswerere ba dira le batho ba ba itseng tiro sentle. Gongwe mo thutong ya gago ya lelapa o ka leka go kopa bana ba bagolwane go tlhalosetsa ba bannye dilo tse di rileng. Go ikanyega, go tlhopha ditsala, go ganela tlhotlheletso e e bosula kwa sekolong, jalo le jalo, ke dikgang tseo bannye le bagolo ba ka tlotlang ka tsone kwantle ga bothata. Fa o naya bana ba bagolwane ditiro tse di ntseng jalo tsa mmatota, o ka ba thusa go godisa nonofo ya bone ya go akanya le nonofo ya bone ya go ruta ka go ruta ba bannye se ba tlhokang go se itse. (Bahebera 5:14) Seno se ka thusa gape go dira gore go nne le borwaraamotho fa gare ga bana ba motho.

Gongwe lelapa la gago le lennye, gongwe le na le ngwana a le mongwe fela. He, o na le ditshono tse dintsi tsa go itse le go tlhaloganya ngwana wa gago. Lefa go ntse jalo, o tlhokomele ka kotsi ya go senya ngwana ka go mo naya tlhokomelo e ntsi. Lo bararo fela, a ga go jalo? Ka jalo dirang dilo mmogo. Seno se tla mo ruta go buisana le ba bangwe mme a lebise tlhokomelo ya gagwe mo go ba bangwe, ka go dira jalo se mo thibela gore a seke a ikakanyetsa a le nosi mo go ene.

Tlhoma Mokgele wa go Kitlana ga Lelapa

Legale, go na le go le gontsi mo go ageng lelapa go na le go tshwara thuto ya Bibela ya legae le go naya kgakololo le kotlhao. Solomone o ne a bua jaana: “Ga go na sepè se se molemō mo mothuñ bogolo go go ya, le go nwa, le go yesa mōea oa gagwè molemō mo letsapeñ ya gagwè.” (Moreri 2:24) Ga go belaetse gore lelapa la gago le ipelela dijo fa di apeilwe sentle. A lo baakanyetsa gore lo je dijo mmogo le le lelapa? Seno se ka nna sa seka sa kgonega fa maloko a mangwe a lelapa a le kwa tirong, kwa sekolong, kana ba dira dilo dingwe. Lefa go le jalo, gantsi go na le dijo di le dingwe fela ka letsatsi tseo lo ka kgonang go di ja mmogo jaaka lelapa. Ke eng seo se ka tlaleletsang mo boitumelong fa go jewa dijo kwa tafoleng?

Mokaulengwe mongwe o dirisa nako eno go tsosa dipotso tsa Bibela tseo botlhe ba ba leng gone ba ka tlotlang ka tsone. Legale, o leka go tila go tlhabisa bao ba sa itseng dikarabo ditlhong. Bangwe ba bolela maitemogelo a bodihedi jwa tshimo. Ka go elatlhoko dilo tsa semoya, nako ya dijo e nna nako ya go aga lelapa lotlhe. (Bona Baroma 14:19.) Ka boammaaruri, mo dikarolong tse dingwe tsa lefatshe, ga go ke go buiwa thata fa go jewa. Lefa go le jalo, go tshwanetswe ga dirwa boiteko jwa go tshola botlhe ba itumetse. Diane 15:17 e bua jaana: “Go ya diyō tsa merōgō hèla, ha e na le loratō, go molemō bogolo go kgomo e e otlilweñ, ha e na le kilō.”

Go ikhutsa le go iketla le tsone di na le lefelo la tsone mo botshelong jwa lelapa la Bokeresete. Batsadi ba ba botlhale ba dirisa dinako tseno go bopa malapa a a nonofileng a bolegodimo. Jang?

Lefa go le motlhofo go letla bana go dira seo ba kgatlhegelang go se dira, go na le kotsi mo go seno. Ka sekai, abo go se botlhale jang ne go letla bana go tsenelela fela thata mo metshamekong mme ba baya matshelo a bone mo kotsing kana ba golafala! (1 Timotheo 4:8) Fa go kgonega, tlhopha boitlosobodutu jo leloko lengwe le lengwe la lelapa le ka kopanelang mo go jone. Rre a ka nna a tlhatlhoba dikgopolo le dikakanyo tsa mongwe le mongwe mme a mo abela go baakanya sengwe.

A lona jaaka lelapa lo ka kgona go pitlologa mo loratong lwa lona mme lwa laletsa maloko a mangwe a phuthego go tla go ipela le lona jaaka lelapa? Maloko a a godileng a phuthego gantsi a ipelela moya wa lelapa, segolo bogolo fa malapa a bone a seyo kana a sa tshele tumalanong le melao-metheo ya Bokeresete. (Yakobe 1:27) Mo diphuthegong tse dintsi, go na le malapa a mantsi a a nang le motsadi a le mongwe. Bagolwane gammogo le ba bangwe ba ka naya maloko a malapa a a ntseng jalo tshireletso ya semoya ba ntse ba akanyetsa fela thata botlhogo jwa selegodimo le go se kgopise Bakeresete-ka-bone. (Isaia 32:1) “Masiela” a mantsi a ile a ipelela go nna ditlhogo tsa malapa tse di lekalekanyeng ka ntlha ya kgatlhegelo e e lorato eo ba neng ba e bontshiwa ke Bakeresete ba ba godileng.—Pesalema 82:3.

Go aga lelapa la Bokeresete ke tiro e e boima. Mme ka thuso ya ga Jehofa, eleruri o tla lemoga gore “bana ke boshwa yoa ga Yehofa: le louñō loa sebopèlō, ke tuèlō ea gagwè.” (Pesalema 127:1, 3) Ba ka nna motswedi wa pako eseng fela mo batsading ba bone ba Bakeresete mme le mo go Mmopi wa bone, Jehofa Modimo.

[Ntlha e e kwa tlase]