Go Lemoga Dikgang

Badira-Metlae ba ga Keresete?

“Badira-metlae ba Baefangele ba mo Tseleng” e ne e le setlhogo se segolo se se neng sa tlhaga mo go Church Times, pampiri ya dikgang ya Church of England. E ne e itsise ka go etela ga Church Army Roadshow ga ngwaga le ngwaga kwa mafelong a a tlhophilweng a a fa thoko ga lewatle mo Engelane le Wales. Church Army, e e thailweng mo dingwageng tse di fetang lekgolo fela tse di fetileng e le lekgamu la Church of England, e ne e ya go rerela “ditlhobogwa le dikebekwa tsa ditakana tsa Westminster.”

Gompieno, baeteledipele ba Church Army ba santse ba amegile ka gore “boefangele bo tshwanetse go dirwa ka tshwanelo.” Maitlhomo a bone a Ditshupo tsa mo Tseleng e ne e le go neela efangele ka “tsela e e tshegisang go batho bao ba neng ba ise ba ko ba nne le boitemogelo jo bo kalo kaga Modimo pele, le bao ba ka se kakeng ba lora go tla tirong epe e e tshwaretsweng mo kerekeng kana mo holong ya kereke.” “Badira-metlae” ba Baefangele bao ba apereng diaparo tsa teng bao ba dirang ditshupo mo ditseleng ba solofela gore “go tshameka ga bone ga boineelo go ne go le botoka ka gore go ne go tla emisa ba ba fetang ka tsela mme ba reetse ka nakwana,” go lemotsha jalo Church Times.

Lefa go ntse jalo, lefa kapari ya bone ya go dira metlae, go tshameka ga bone, le dibalunu tsa bone tse ba neng ba di aba mahala di ne tsa gogela bana ba bantsi, bagolo ba ne ba sala ba ipotsa gore tiro eno e ne e amana jang le boefangele jo bo neng bo simolotswe ke Jesu Keresete.

Ke boammaaruri, moaposetoloi Paulo o ne a kwala a re: “Re dihilwe segakgamalèlō sa lehatshe, . . . Rona re dieleele ka ntlha ea ga Keresete.” (1 Bakorintha 4:9, 10) Mme o ne a akantse ka eng? Go dira metlae kana “go tshameka” go gogela ba ba fetang ka tsela? Nnyaa. Paulo o ne a tshwantsha kafa lefatshe le lebang Bakeresete ka teng jaaka dieleele, “ba ba sotlwang ke batho le go tlhabisiwa ditlhong,” jaaka The New International Dictionary of New Testament Theology e e baya, ka baka la tumelo le dithuto tsa bone.

Phapaanong le “Badira-metlae ba Baefangele” ba Church Army, Jesu o ne a ruta boidiidi jwa batho “yaka eo o nañ le thata.” Bodihedi jwa gagwe bo ne bo tlhamaletse mme bo sena metshameko. Jaaka a ne a tlhalosa, “ke bua dilō tse hèla yaka Rara a nthutile.” Phelelo e ne ya nna eng? “Ba le bantsi ba dumèla mo go èna.”—Mathaio 7:29; Yohane 8:28, 30.

“Morwalo mo Segakoloding”

Eugene Stockwell ebong mokaedi wa Commission on World Mission and Evangelism ya Lekgotla la Lefatshe la Dikereke, bosheng jaana o ne a dumalana gore baruti le dikereke tsa La-Bodumedi ba nnile le seabe ka boitimokanyo mo dintweng tsa lefatshe tsoopedi. “Ke morwalo o o bokete mo digakolodi tsa Bakeresete go bo dintwa tse pedi tse dikgolo tsa lefatshe tsa lekgolo leno la dingwaga di ne tsa lowa ke merafe eo mengwe ya yone e sa bolong go nna ya Bokeresete le ditlhaselo tsa yone tsa ntwa gantsi di neng di segofadiwa ke baeteledipele ba dikereke tsa Bokeresete,” o ne a bolelela phuthego ya bagolwane ba dikereke tsa lefatshe lotlhe mo Warsaw, Poland.

Stockwell o ne a oketsa ka go re: “Go ne go bolelwa ka moya otlhe fa Modimo o le mo letlhakoreng le le tlhabantshang le lengwe kana le go tlhabanwang nalo. . . . Rona Bakeresete re dirisa tumelo ya rona mo bothubaking jwa rona motlhofo fela.” O ne a bolela gore Ntwa ya Lefatshe II e ne e le “bosupi jo bogolo jwa go retelelwa ga rona jaaka ‘merafe ya Bokeresete’ go tshelela tumelo ya rona, tumelo eo gangwe le gape re e bolelang ka molomo mme ka phepafalo re sa e supe ka ditiro.”

A mme “morwalo ono o o bokete mo segakoloding” o thusitse ba go tweng ke Bakeresete le baruti ba bone gore ba se tlhole ba boelela seo gape? Go ya ka Ecumenical Press Service, Mokaedi Stockwell o ne a dumalana ka gore: “Re bua ka go rata baba ba rona, mme re a ba bolaya. Re bua ka go isa letlhaa je lengwe, mme re tlhomelela ka dibetsa tse dintsi. Re bua ka kagiso e e gaisang tlhaloganyo, mme re tsenelela mo ntweng e e fetang tlhaloganyo yotlhe. Re bua ka go dumela mo Modimong mme re baa tumelo ya rona ya boammaaruri mo dibetseng tsa tshenyo.”

Baruti ba La-Bodumedi ba ba emang ntwa nokeng le balatedi ba bone ka phepafalo ba tshwana le “babui ba ba ithamakañ hèla” ba metlha ya ga moaposetoloi Paulo. Mabapi le bone, o ne a re: “Ba re, ba itse Modimo; me ba o itatole ka ditihō tsa bōnè.”—Tito 1:10, 16.

Setempe “Se se Kgopisang”

Ka November 19, 1987, Batsamaisi ba Poso ba Afrika Borwa ba ne ba rulaganyetsa go dira ditempe tsa go ikgopotsa sengwe tse di malebana le Bibela. Sengwe sa ditempe tseo se ne se kwadilwe mafoko a a reng “Lefoko la Modimo” ka Segerika le “Lefoko la ga Jehofa” ka Sehebera. Dikaelo tsotlhe tsa ditempe tseo di gatisitsweng di ne di le 1 750 000.

Lefa go ntse jalo, ka bokhutshwane fela pele ga letsatsi la go gololwa ga tsone, diofisi tsa diposo di ne tsa amogela mogala o o neng o ba laolela go busa ditempe tseo tsotlhe. Lebaka e ne e le eng? “Ka gonne go ne ga fitlhelwa fa se kgopisa batho ba tumelo ya Sejuda,” ga bega jalo The Star, pampiri ya dikgang ya Johannesburg. E ne ya oketsa ka go re: “Moruti David Hazdan wa Johannesburg o ne a re leina la Modimo fa le kwadilwe ka botlalo jaaka le ne le gatisitswe mo setempeng seo gantsi le ne le dirisiwa mo dipakeng tse di kgethegileng tsa bodumedi fela.”

Ke ka baka la ngwao yone eo ya Bajuda go bo bontsi jwa baranodi ba segompieno ba Bibela ba tidile go dirisa leina Jehofa mme ba le emiseditse ka direto, tse di tshwanang le “Morena” kana “Modimo.” Ga go gakgamatse go bo Jesu a ne a raya baeteledipele ba bodumedi ba nako ya gagwe a re: “Lo diholotse lehoko ya Modimo ka ntlha ea mekgwa [dingwao, NW] ea lona”!—Mathaio 15:6.