Boitumelo jo Bogolo Gareng ga Batho ba Modimo

MAFOKO a ga Kgosi Dafide, a a kwadilweng go Pesalema 68, ditemana 2-4, a akareletsa taletso e e bothitho go barati botlhe ba kgololesego ya boammaaruri: “Ōpèlèlañ Modimo, ōpèlèlañ leina ya ōna dipakō: o o ralalañ dipoa tsa naga o pagame, lo o dihèlè tsela ea mheru; leina ya ōna ke YAH; lo bo lo kganè ka boitumèlō ha pele ga ōna.” Ke tshiamelo efe e e fetang go itumela fa pele ga Modimo wa rona? (Isaia 12:2, 3) Go ralala ngwaga wa 1986, Jehofa o sireleditse basupi ba gagwe ka mo go gakgamatsang jaaka ba ne ba tswelela go bolelela batho mo lefatsheng kgololesego.

Ditsebe tse di latelang di neela pego e khutshwane ya tiro ya Basupi ba ga Jehofa mo lefatsheng lotlhe ka 1986. Abo e le lebaka la boitumelo jo bogolo jang ne! Jaaka dipalo di bontsha, tlhora ya Basupi ba ba tlhagafetseng mo mafatsheng a le 208 a a begang e tlhatlogetse kwa go 3 229 022, koketsego ya 6,8 mo lekgolong mo ngwageng oo. Palo ya ba ba neng ba kolobediwa e ne ya nna 225 868.

Go Dira Segopotso sa Loso lwa ga Jesu

Palo ya ba ba neng ba nna gone mo pokanong ya botlhokwa ya ngwaga, Segopotso sa Loso lwa ga Jesu, bobotlana e ne ya gola go nna 8 160 597, lemororo dipego dingwe di ne tsa seka tsa amogelwa ka ntlha ya maemo aa senyegelang pele a lefatshe. Palo ya ba ba neng ba a ja e ne ya fologela go 8 927 jaaka fa ba ba godileng ba ba tloditsweng ba ne ba fetsa bodihedi jwa bone jwa selefatshe.​—Tshenolō 2:10.

Bontsi jwa bao ba neng ba nna gone ba utlwa taolo ya ga Jesu ba ne ba bontsha sekao sa bopelokgale. (1 Bakorintha 11:23-26; Yohane 16:33) Mo lefatsheng lengwe la Afrika koo tiro ya ga Jehofa e thibetsweng teng, phuthego e ne e le kwa lelapeng la kgaitsedi mongwe go keteka Segopotso. Mo metsotsong e e robang-bobedi fela puo e setse e simolotse, babusi ba lefelo ba ne ba tla go tshwara bakaulengwe. Ba ne ba ba laela go emisa pokano. Bakaulengwe ka bonolo mme ka go nitama ba ne ba gagamala gore ba tshwanetse go tlotla Segopotso seno sa loso lwa ga Jesu la setlhabelo. Morago ga go fetolana le go buisanya le mapodise, ba ne ba letlelelwa go tswelela ba reeditswe ke mapodise ao. Pokano e ne ya fediwa ka kagiso, mme go tloga foo botlhe ba ne ba tshwarwa. Morago ga lobaka lwa dipotso, ba le batlhano ba ne ba tlhatlhelwa. Ba ne ba nna mo kgolegelong ka lobakanyana mme go tloga foo ba ne ba gololwa, ba itumeletse go bo ba ile ba kgona go tlotla Selalelo sa Morena!​—1 Yohane 5:3, 4.

Nigeria, kwa palo ya Basupi ba ga Jehofa e oketsegileng go nna 128 461, e ne ya nna le palo ya Segopotso ya 394 370​—palo e kgolo go di feta tsotlhe. Pokano nngwe ya Segopotso e ne ya tshwarelwa kwa setsheng sa kago ya dikago tse disha tsa Bethele kwa Igieduma, mme ba ba fetang 700​—mo e batlileng e nna motse otlhe—​ba ne ba le gone!

Go tswa kwa Mexico go tla pego eno: “Gongwe le gongwe kwa re yang teng mo nageng, baboledi ba tletse tlhoafalo e kgolo, mme naga yotlhe e lebega e apesitswe ke boammaaruri. Boammaaruri bo ageletse bakaulengwe, mme matshelo a bone a apesitswe ke boammaaruri. Malapa a tla mo boammaaruring a le pope. Palo e e kgatlhisang ya batho ba ba ithutang ba simolola go ya dipokanong ka nako e le nngwe fela. Seno se ba thusa go nna le botswelelo pele ka bofefo.” Mexico e ne ya bega palo a ba ba neng ba le gone ya Segopotso ya 838 467. Ka August, baboledi ba Bogosi ba ba 198 003 mo lefatsheng leo ba ne ba kgweetsa dithuto tsa Bibela di le 327 664 mo magaeng a batho. Abo go na le kgonego e kgolo jang ne e ba nang le yone ya go tswelela pele mo kgolong!

Koketsego e Nngwe ya Lefatshe Lotlhe

Go tswa mo bogareng jwa La-Bodumedi go tla dipego tse di tshwanang tsa koketsego.Italy e ne ya nna le tlhora e ntšha ya baboledi ba ba 139 570 ka August, mme ba le 301 009 ba ne ba le teng go keteka Selalelo sa Morena. Ka boammaaruri Basupi ba ga Jehofa ba ‘letlelela lesedi la bone go phatsima mo bathong.’ (Mathaio 5:16) Ka sekai: “Kgaitsedi mongwe o ne a tsenya madi mo motšhineng wa dithekethe mo beseng nngwe fa mongwe yo a mo itseng a ne a mmolelela gore go ne go sa tlhokafale go duelela thekethe ka gore loeto lo ne lo le lokhutshwane. Kgaitsedi yoo o ne a tlhalosa gore go ne go tshwanetse go duelelwa thekethe, le eleng go feta fa go emiwang teng ga ntlha. Morago ga moo, tsala ya gagwe e ne ya fologa bese. Ka ntlha ya moo, mokgweetsi wa bese o ne a retologela kwa go ene mme a re: ‘A o mongwe wa Basupi ba ga Jehofa?’ ‘Ee,’ kgaitsedi o ne a araba, ‘ke eng se se dirileng gore o botse?’ ‘Ke ne ka utlwa puisanyo ya lona mabapi le go duelela thekethe, mme ke itse gore Basupi ba ga Jehofa ba gareng ga batho ba sekae ba ba dirang jalo le gore ba boikanyego mo dilong tsotlhe.’ Dikgwedi di sekae moragonyana, monna a atamela kgaitsedi yoo kwa pokanong nngwe mme a re, ‘A oa nkitse? Ke mokgweetsi wa bese yo o neng a bua le wena kaga go duelela thekethe. Ka go elatlhoko boitshwaro jwa gago, ke ne ka fetsa mogopolo go simolola thuto ya Bibela le Basupi ba ga Jehofa.’”

Britani e ne ya nna le tlhora ya 107 767 ya baboledi ba Bogosi, go akareletsa le mokaulengwe yono yo o kolobeditsweng bosheng: “Jaanong George o tshedile dingwaga di le 84. Morago ga dingwaga tse 50 jaaka moreri yo o sa tlotlegeng mo kerekeng ya lefelo, o ne a itse boammaaruri. Kwa tshimologong, fa a ne a feditse thuto ya gagwe ya Bibela ya legae, o ne a tle a itlhaganelele kwa ntlwaneng e nngwe mme a fete a goge motsoko. O ne a ntse a le mogogi wa ka metlha ka dingwaga tse 70. Mme morago ga go ithuta kgaolo 26 ya buka O Ka Tshelela Ruri mo Lefatsheng la Paradaise, ga a ise a ke a tlhole a goga gape. George jaanong o feditse lobaka lo lo fetileng ngwaga a ntse a kolobeditswe mme o tlhagafetse thata mo tirelong ya tshimo, a bolelela ba bangwe ka masego a Jehofa a tla a tlisang mo tsamaisong e ntšha ya Gagwe.”

Federal Republic of Germany e bega tlhora ya baboledi ba le 118 645. Gape go na le masome a dikete tsa Basupi ba ba ikanyegang ba ba ‘letlelelang lesedi la bone go phatsima’ mo lefatsheng le le gaufi le German Democratic Republic. Mo Jeremane ba ba boikanyego ba ba godileng ba gana go baya “chaka ea Mōea” fa fatshe. (Baefesia 6:16, 17) Phuthego nngwe e a bega: “Re na le kgaitsedi yo o setseng a le dingwaga tse di 103 mme o santse a nna a le nosi. Bagolwane ba ne ba rulaganya ka setlhopha sa boikgaitsedi ba le supa go ya go ba roba-bobedi go refosana ka go mo tlhokomela beke nngwe le nngwe. Ba ntse ba dira seno ka dingwaga tse tharo go ya go tse nne jaanong. Badiredi ba leago, ba ba duelwang ke morafe, ba mo tlhokomela ka go mo tlhapisa le go fetola diaparo tsa gagwe. Mme fa ba lwala kana ba le mo malatsing a boikhutso, bokgaitsedi ba rona ba tsaya tiro. Sesupo seno sa lorato lwa Bokeresete le go intsha setlhabelo di ile tsa direla jaaka bosupi jo bo molemo mo go ba ba ka kwantle. Kgaitsedi wa rona yo o nang le dingwaga tse di 103 o tsogile tlhaloganyo mme o leba badiredi ba leago jaaka ‘tshimo’ ya gagwe. O a ba rerela ka tlhagafalo le go tsamaisa dibuka fa ba ntse ba mo tlhapisa. Ruri “tlhōgō e e pududu ke serwalō sa kgalalèlō, ha e bōnwa mo tseleñ ea tshiamō.”​—Diane 16:31.

Lefa go ntse jalo, taletso ya go baka Jehofa e lebisitswe batho ba dingwaga tsotlhe​—“makau a na le basetsana; banna bagolo le banyana.” Bontsi jwa batho ba basha ba ‘gakologelwa Mmopi wa bone yo Mogolo mo malatsing a bokau jwa bone.’ (Dipesalema 148:12; Moreri 12:1) Mo Brazil, kwa go neng go na le tlhora e e kgatlhisang ya baboledi ba le 196 948, Mokgatlho wa Watch Tower o ne wa amogela lekwalo le le tswang mo toropong nngwe e e kwa thoko kwa bakaulengweng ba babedi ba basha ba neng ba neela bosupi ka dikgwedinyana teng. Karolo ya lone e balega jaana: “Ke lo akgolela batho ba basha ba lo nang le bone mo bodumeding jwa lona. Ke morutabana mme ke dira le basha, mme ke itse gore ga baa nna jaaka ba ne ba ntse pele. Basha ba lona ruri ke sekao. Ba tlotla bagolo ba bone, ba maitseo mme ba apara sentle. Mme abo ba itse Bibela ya bone jang ne! Se ruri ke bodumedi! Ke maswabi go bo ba ne ba tshwanelwa ke go tsamaya.” Malapa a bakaulengwe ba rona jaanong a huduga le go nnela ruri mo mangweng a mafelo a a kwa thoko ano go tlhokomela ba ba kgatlhegang.

Boammaaruri bo dira kgatelo pele efe mo mafelong a e seng a Bokeresete? The Wall Street Journal ya July 9, 1986, e ne ya gatisa kgang e telele tlase ga setlhogo “Tshimo e e Thata​—Barongwa ba Bakeresete ba Jala Peo mo Japane Mme ba Fitlhela Gore go Mela go le Gonnye Fela.” Morongwa mongwe wa United Church of Christ o ne a begwa a re, “Ga go na ka tsela epe e Bokeresete bo ka itshetlelang ka teng mo Japane,” le moruti wa Mo-Fora jaaka a ne a re, “Motlha wa barongwa ba seeng mo Japane o fedile.” Bobeding jwa bone ba ile ba dira kwantle ga matswela go feta dingwaga tse 30. Kgang e ne ya re: “Mo go kwa tlase ga 1% ya batho ke Bakeresete, mme go sa kgathalesege tiro e e kalo ya barongwa, palo e wela kwa tlase.” Go ntse jalo ka ditumelo tsa La-Bodumedi! Mme go tweng ka Basupi ba ga Jehofa, ba ba rutang Bokeresete jo bo phepa mo lefatsheng leo? Mo dikgweding tse 92 tse di fetileng ka go tlhomagana ga tsone, ba ile ba oketsa palo ya bone ya badiredi ba ba tlhagafetseng go ya tlhoreng ya 113 062 (go akareletsa le palo-gare ya 46 390 ya babulatsela kgwedi le kgwedi). Mo Japane dithuto tsa Bibela di le 146 316 di tsamaisiwa le batho ba ba sa tswang go kgatlhega bosheng. Eno ruri ke ketapele ya koketsego e nngwe e kgolo. Mono re bona tiragatso e e tshelang ya Isaia 65:13, 14.

Tshimo ya Bobulatsela

Mme go tweng ka tshoso-e-rweleng ya tiro e e maatla eno​—United States of America? Koo, tlhora ya baboledi ba Bogosi ba ba 744 919 ba ne ba le mo tshimong. A mme ‘barongwa bao ba magae’ ba ba ntseng jalo ruri ba a tlhokega? Ruri ba a tlhokega, jaaka bokebekwa, diokobatsi, boitsholo jo bo maswe jwa kafa dikobong, malwetse, le go sa ikanyegeng go gola go nna maswe go gaisa le mo mafatsheng a a bidiwang a boheitane. Batho ba ba eletsang dilo tse di botoka ba tlhoka kgomotso le tsholofelo, mme Basupi ba ga Jehofa ba na le molaetsa o o ntseng jalo. (Isaia 61:1, 2; Mathaio 24:14) Mo United States, ka 1986, badiredi bano ba ne ba senya dioura tse 146 673 490 mo go boleleng mafoko a a molemo a Bogosi. Seo se ne sa tlisa koketsego ya 12,6 mo lekgolong, kana koketsego ya dioura tse di 16 449 229 go feta ngwaga o o fetileng. Nako eo e ne ya solwa molemo, jaaka dibuka di le 6 138 938 di ne tsa tsamaisiwa, mo eleng tokafatso ya 23,2 mo lekgolong go feta ngwaga o o fetileng. Ka April fela, palo-kakaretso e ne e le dibuka tse di fetileng 1 000 000 tse di neng di tlhalosa ka tsholofelo ya boammaaruri ya kagiso le polokesego.

Sengwe se se kgatlhisang thata ka pego ya United States ke kgolo ya bodihedi jwa bobulatsela. Ka April go ne ga nna le tlhora ya 45 786 ya babulatsela ba ka metlha, koketsego ya 23 mo lekgolong go feta ngwaga o o fetileng. Fa o kopanya palo eo le palo-gare ya 43 369 ya babulatsela ba ba thusang le palo-gare ya 279 ya babulatsela ba ba kgethegileng, go raya gore kgwedi nngwe le nngwe ba ba batlileng go tshwara 90 000 ba ne ba bolela kgakala Bogosi jwa Modimo mo tirong ya bobulatsela. Bano ke batho ba basha gammogo le ba bagolo ba ba dirisang nako ya bone ka botlhale mo go galaletseng Jehofa.

Go Neela Bosupi ka Botlalo

Mo go ruteng phatlalatsa le ka ntlo le ntlo, moaposetoloi Paulo ‘o ne a neela bosupi ka botlalo’ mo mafokong a a molemo. (Ditihō 20:20, 21) Bosupi jo bo tshwanang bo a neelwa mo ditshimong di le dintsi gompieno. Ka sekai, pego eno e tswa kwa Guadeloupe: “Kwa bokhutlong jwa ngwaga wa tirelo, re ne re na le mmoledi a le mongwe fela go batho ba le 72. Kwantle ga pelaelo re itsege thata mo nageng yotlhe! Tota, mo mafelong a le mantsi, re dira tshimo e le nngwe fela beke le beke. Bangwe ba ne ba ka nna ba re ruri batho ba lapisitswe ke go re bona, kana gore go ka kgoba marapo go dira tshimo e le nngwe fela. Mme se se farologanyeng, fa re dira tiro e ntsi mo tshimong, kgatlhego e a tsoga. Ke eng se se neelang bosupi? Ruri, ke tlhora ya April ya dithuto tsa Bibela tsa magae ya 7 136 tse di neng tsa tsamaisiwa ke baboledi ba rona ba ba 4 558! Bogautshwaneng jaana makasine mongwe o ne o na le setlhogo: ‘Basupi ba ga Jehofa​—Dikgosi tsa Ntlo le Ntlo’! Re leba seo jaaka tlotlo. Mo ngwageng wa tirelo, bakaulengwe le bokgaitsedi ba basha ba ba 458 ba ne ba kolobediwa.” Go tlhamalala le boipelo jo bo neng jwa bontshiwa mo go direng tshimo ya rona gangwe le gape, go itse batho le go tsalana le bone, ka lorato re nyeletsa megopolo ya bone e e phoso​—mo go ka gogela kwa go boneng ba le bantsi ba seka-dinku.

Jehofa o tshegofatsa batlhanka ba gagwe thata mo lefatsheng lengwe la Afrika kwa tiro e thibetsweng le mo ntwa ya bana ba mpa e phagetseng gone. Mo lefatsheng leo ba le bantsi ba bakaulengwe ba rona ba boga mo dikgolegelong, le Basupi bangwe ba basha ba ile ba bolawa. Lefa go ntse jalo, April e ne ya nna le pego e e tlhomologileng, ka ditlhora di le lesome ka go tlhomagana. Palo e ntšha ya baboledi ke koketsego ya 29 mo lekgolong go feta ngwaga o o fetileng. Abo bakaulengwe bano ba supa tlhagafalo jang ne! Ka April, mmoledi mongwe le mongwe o ne a nna le palo-gare ya dioura tse di fetang 18 mme dithuto tsa Bibela tsa magae e ne e le 2,6 go mmoledi mongwe le mongwe.

Molaetsa wa sephiri o o neng wa amogelwa ke ofisi ya lekala e e tlhokomelang tshimo eno o lekane go ka neela lesedi kaga maemo a koo. O balega jaana: “Mogote o ntse o le mo godimo ga rona. Boiteko jo bo tlhokafalang jwa go tsamaya-tsamaya le go bona motho ke bosupi gore re mo mogoteng. Mme re itse gore re dirilwe ka tsela e leng gore re ka itshokela seemo sengwe le sengwe sa mogote le tikologo epe fela. Go sa kgathalesege dilo tsotlhe, re a itshoka le go solofela gore re tla tshela.” A bothokgami ruri!

Baboloka bothokgami ka bongwe ba dira phuthego ya baboloka bothokgami. Phuthego ya lefatshe lotlhe ya Basupi ba ba 3 229 022 ba ga Jehofa ke sone seo! Ba solofetse go falola “sepitla se segolo” se se tlang le go arola, kafa tlase ga Bogosi jwa ga Keresete, mo tirong e kgolo ya go fetolela lefatshe mo paradaiseng. (Tshenolō 7:14; 21:3, 4; Isaia 65:17, 21-23, 25) Ba itumetse ka tsela e Jehofa a ba tshegofatsang ka yone jaanong le tiro ya bone e e tlhagafetseng, ba ka tswa ba rera lefoko “go le lobaka” kana “go se lobaka.” (2 Timotheo 4:2) Ditsebe tse di latelang di bontsha ka mo ba nnileng kutlo mo setlhogong sa bone sa 1986 sa temana ya ngwaga: “Tsamaea . . . u utlwatsè bogosi yoa Modimo.”​—Luke 9:60.

[Lebokoso/​Setshwantsho mo go tsebe 7]

Dikarolo dingwe tsa Pego ya Lefatshe Lotlhe ya Basupi ba ga Jehofa

Koketsego:

Tlhora ya baboledi: 3 229 022 6,8%

[Tšhate mo go tsebe 10-13]

PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1986

(Leba kgatiso)

[Ditshwantsho mo go tsebe 8, 9]

GO SUPA ‘MO PONONG LE KA GO TSAMAYA LE MATLO’ “GO EA HÈLA KWA SEKHUTLOÑ SA LEHATSHE”

Davao Philippines

Venice Italy

Castle Combe England

Kowloon Hong Kong

Gålå Norway

Taipei Taiwan

Queenstown New Zealand

Bolgatanga Ghana

Paris France

Quetzaltenango Guatemala

Kerala India

Banff Canada