Modimo wa “Kgolagano e Kgologolo”​—A ke Modimo o o Lorato?

“MODIMO wa Kgolagano e Kgologolo, ebong Yahweh wa Bajuda, ke modimo wa thogako, modimo wa kgalefo, modimo wa lefufa, mme ke kgone go ikutlwa ke le gaufi le ene.” Go bolela jalo Youji Inoue, moruti wa Katoliki wa Mojapane, mo setlhogong se se nang le setlhogo se se reng “Majapane le Bokeresete” go nngwe ya dikoranta e e tlhomologileng, ebong Asahi Shimbun. Mme, o tswelela ka gore, Modimo ono kwa bokhutlong “o ne a gola le go fetogela mo go oo e leng Modimo wa Kgolagano e Ntšha, o e eleng, Modimo oo Jesu a rutileng ka ga gagwe.”

Gore re tlhomamisege, moruti Inoue ga se ena fela yo o nang le mogopolo o o ntseng jalo. Mme a o dumalana le ene? A le wena o akanya gore Modimo wa “Kgolagano e Kgologolo,” kana wa Dikwalo tsa Sehebera, ke Modimo o o bogale le o o ipusolosetsang fa a bapisiwa le Modimo wa “Kgolagano e Ntšha,” kana wa Dikwalo tsa Segerika tsa Bokeresete?

Fa e le batho, botho jwa bona bo ka fetoga. Ka sekai, Bibela e rotloetsa bao ba ratang Modimo gore ba “aparè motho eo mosha, eo kaha Modimoñ o bopilweñ mo tshiamoñ, le mo boitshepoñ yoa boamarure.” (Baefesia 4:24) Ka go ithuta Bibela le go dirisa seo ba se ithutileng, ba bantsi bao pele ba neng ba na le lefufa, bogale, jalo le jalo, ba dirile diphetogo tse dikgolo, gore jaanong ba bontshe mo matshelong a bone a letsatsi le letsatsi loungo lwa moya wa Modimo​—“loratō, le boitumèlō, le kagishō, le bopelotelele, le bopelonomi, le molemō, le boikañō, le boiñotlō, le boikgapō.”​—Bagalatia 5:22, 23.

Mme a se se tshwanang se ka bolelwa ka Mmopi, Jehofa Modimo? A “ebile o fetogile” go tswa go “modimo wa kgalefo” go ya go Modimo yo o lorato wa Bokeresete, jaaka bangwe ba ka mmitsa jalo?

Jehofa​—Ka Metlha ke Modimo o o Lorato

“Modimo o loratō,” go kwadile jalo moaposetoloi Johane. (1 Yohane 4:8) Moo o boletse boammaaruri jo bo sa khutleng: Mmopi, ebong Jehofa, e ne e ntse e le, ebile ke, mme o tla nna a nna Modimo wa lorato lo lo sa fetogeng ka metlha. Mme go tloga tshimologong go ya bokhutlong, pego ya Bibela e tshegetsa polelo eo.

Fa Jehofa a ne a bopa lefatshe, ka lorato o ne a le dira legae le le siametseng setho. (Isaia 45:18) Moragonyana fa a ne a tlhola monna le mosadi ba ntlha, Adame le Efa, o ne a ba dira “mo chwanoñ ea ōna” seo se bolela gore, o ne a ba neela dinonofo tsa bomodimo tse di jaaka lorato, tshiamiso, botlhale, le maatla. O ne a ba beela gape tebelelo ya go tshola bana, go fetola lefatshe lotlhe paradaise, le go tshela mo go lona ka bosakhutleng. (Genesise 1:27, 28) A tseno tsotlhe e ne e se bosupi jwa Modimo o o lorato?

Fa batho ba ntlha ba babedi ba ne ba ineela go raelwa ke Satane ka noga, ba ne ba latlhegelwa ke masego a a sa khutleng e seng a bone fela mme gape le a bana ba bone ba ba eseng ba tsholwe. Mo ntlheng eno e e tlhokofatsang, Jehofa o ne a bolela polelelopele ya ntlha e e kwadilweng mo Bibeleng, ebong, gore ‘peo ya mosadi’ e e solofeditsweng e tla tapeta tlhogo ya noga. (Genesise 3:15) A tsholofetso eno e ne e se ya tsholofelo le kgololo eleng tlhaloso e nngwe e e tlhomologileng ya lorato lwa Modimo?

Dingwaga di le 2 000 moragonyana, Jehofa o ne a solofetsa motlhanka wa gagwe yo o ikanyegang ebong Aberahame jaana: “Merahe eotlhe ea lehatshe e tla segōhala mo losikeñ loa gago,” ka gone e senola gore ‘peo ya mosadi’ e tla tla ka losika lwa lelapa la ga Aberahame. (Genesise 22:18) Tsholofetso eno e ne ya netefatsa tsholofelo ya kgololo mme e ne ya bontsha gore lorato lwa ga Jehofa mo sethong lo ne lo sa fokotsega fa nako e ntse e feta. O ne a akantse ka isagwe e e segofaditsweng ya batho fa a ne a dira tsholofetso eno. Ruri-ruri ke Modimo o o lorato!

Lorato lwa Modimo go Iseraele

Go ya pele, Jehofa Modimo o ne a golola Baiseraele mo bokgobeng mo Egepetwa ka 1513 B.C.E. mme o ne a konesetsa kgolagano ya Molao le bone ka Moshe. Mo molaong wa bobedi mo Melaong e e Lesome, Jehofa o ne a re: “Ka gonne Nna, Jehofa, Modimo oa gago, ke Modimo o o lehuha [Modimo o o batlang kobamelo e e itshekileng, New World Translation] eo ke beletsañ bana tshiamololō ea borrabō, go ea kokomaneñ ea boraro le ea bonè ea ba ba nkilañ; Me ba makgolo kgolo ba bōnè ba ba nthatañ, ba tshegetsa ditaolō tsa me.”​—Ekesodo 20:5, 6.

Jaaka Mothatayotlhe le monna wa bone, Jehofa o ne a na le tshwanelo ya go batla kobamelo e e itshekileng go batho ba kgolagano ya gagwe, Baiseraele. (Isaia 54:5; Yeremia 3:14) Fa batho ba gagwe ba ne ba sa ikanyege mme ba ne ba boela kwa medimong ya maaka gangwe le gape, a go ne go sa utlwale gore Jehofa, ka lorato lwa gagwe mo go bone, a ba otlhae, a bontsha go se ba amogele le go ba bona molato mo tseleng ya bone e e sa siamang?

Ka makgetlo a le mantsi, Jehofa o ne a bontsha kamego e e boteng ka batho ba gagwe mme o ne a ikuela go bone gore ba boele mo go ene. (Isaia 55:7) Lemororo a ne a ba otlhaela maleo a bone, kwa bokhutlong o ne a letla morafe wa bone gore o nyelediwe le gore ba isiwe botshwarwa mo lefatsheng la seeng, ka nako e e tshwanetseng o ne a ba busetsa morago mo nagalegaeng ya bone. Seno sotlhe se bontshang ka Jehofa? A ke Modimo o o lefufa, o o letlhoo, le o o ipusolosetsang? Nnyaa! Go na le moo, go bontsha gore ke “Modimo o o tletseñ bopelotlhomogi, o o tsalanō, o o bonya go galeha, le o o letlōtlō ya boutlwèlō botlhoko le boamarure.”​—Ekesodo 34:6; Nehemia 9:17; Yoele 2:13; Nahume 1:2, 3.

Lorato lo lo Bontshitsweng ka Morwawe

Go kgabaganya makgolo a dingwaga Jehofa Modimo o ne a neela dintlha tse di oketsegileng malebana le ‘peo ya mosadi’ le ‘peo ya ga Aberahame,’ mme ka baperofeti ba Gagwe O ne a bolelela pele go tla ga ga Mesia. Fa nako e e tlhophilweng e ne e fitlha, Modimo o ne a bontsha lorato lwa gagwe ka tsela e e feletseng​—ka go romela Morwawe yo o tsetsweng a le esi mo lefatsheng go neela setlhabelo sa thekololo.

Moaposetoloi Johane o ne a kwala jaana ka paakanyetso eno e e tlhomologileng: “Modimo o ratile lehatshe mo go kalo kalo, oa ntsha Morwa ōna eo o tsecweñ a le esi, gore leha e le mañ eo o dumèlañ mo go èna a se ka a nyèlèla, me a bōnè botshelō yo bo sa khutleñ.” (Yohane 3:16) Ka gonne lorato lwa Modimo ka Morwa ona, Jesu Keresete, ke lo lo golo thata, bangwe ka phoso ba konetse ka gore E ka se ke e nne Modimo o o tshwanang le o go boletsweng ka ene mo Dikwalong tsa Sehebera jaaka o o otlhayang le o o atlholang.

Mme a Modimo o Jesu a rutileng ka ene o farologane thata le Modimo o o tlhalositsweng mo Dikwalong tsa Sehebera? Kana a ke gore batho ba itlhophetse go bona fela seo ba batlang go se bona? A lokwalo loo lo lo itsegeng thata, lwa Yohane 3:16, ga lo bontshe ka phepafalo gore fa mongwe a sa ‘dumele’ mo go Morwa, ene yoo o tla ‘nyelediwa’? Mo godimo ga moo, Johane o ne a tswelela ka gore: “Eo o ganañ go utlwa Morwa Modimo, ga a ketla a bōna botshelō, me bogale yoa Modimo bo nntse mo go èna.” (Yohane 3:36) Fa seno se sa fokotse bogolo jwa lorato lwa Modimo ka tsela epe, ka gone ke ka ntlhayang fa mafoko a gagwe a go se itumelele Baiseraele le bangwe ba ba sa ikanyegeng mo Dikwalong tsa Sehebera a mo dira gore a nne Modimo o o senang lorato?

Boikaelelo jo bo Lorato jwa Modimo Ka Wena

Ka moperofeti wa gagwe Malaki, Modimo o ne a re: “Nna Yehofa ga ke hetoge.” (Malaki 3:6) Ga a ka a nna fela a sa fetoge jaaka Modimo o o lorato mme boikaelelo jwa gagwe jo bo lorato ka setho le lefatshe le jone bo ntse bo sa fetoge. Jaaka Jehofa a beile fa pele ga ga Adame le Efa tebelelo ya botshelo jo bo sa khutleng mo lefatsheng la paradaise, jalo Modimo ono o o lorato o batla gore o nne mo go bao ba tla tshelelang ruri ka boitumelo mo Paradaiseng eo. (Luke 23:43; 2 Petere 3:13; Tshenolō 21:4) Mme go tlhokega eng? Jesu o ne a re: “Me botshelō yo bo sa khutleñ ke yo, gore ba gu itse, wèna, Modimo o osi, o o boamarure, le èna eo u mo romileñ, eboñ Yesu Keresete.” (Yohane 17:3) Basupi ba ga Jehofa ba tla itumelela go go thusa go ithuta ka ga Jehofa, Modimo o lorato lwa one le sa fetogeng.