O ka Laola Maikutlo a Gago Jang?

BA LE bantsi gompieno ba eletsa go tsosiwa maikutlo. Ba senka monate ka go kgweetsa ka lebelo, metshameko e e kotsi, boitshwaro jo bo sa siamang jwa kafa dikobong, le diokobatsi tse di tlhotlheletsang. Eleruri, tsa kgwebo le tsa boitloso-bodutu di otlelela gore go tlhokafala gore go nne le maitemogelo a maikutlo. Ka gone, ba bantsi ba letlelela kagiso le tidimalo go sekae fela, ba akanya gore ba tshwanelwa ke go bona tlhotlheletso e e oketsegileng ya maikutlo mo botshelong

Tota, rotlhe re na le maikutlo. Ka sekai, fa re nyenya, re tshega, kana re lela, re supa boemo jwa maikutlo a rona ka nako eo. Mme a o ne o itse gore maikutlo a ka ama le eleng mmele wa gago, jaaka ka go baka phetogo mo kgatelelong ya gago ya madi, lebelo leo pelo e ubang ka lone, le go fufula? Gape a ka baka go sa ikutlwe sentle mo mmeleng, jaaka go opiwa ke tlhogo, go gadikega, le mathata a mokwatla. Ka gone, batho ka kakaretso ba batla maikutlo a a siameng mme ba tila a a sa siamang. Batho bangwe ba leka go tlosa a a sa siamang ka go ijesa dijo tsa ditoro, go ja go feta selekanyo, le go nwa go feta tekano. Kafa letlhakoreng le lengwe, boemo jo bo tshwanetseng jwa maikutlo bo godisa botsogo jo bo siameng. Diane 14:30 e bolela gore: “Pelo e e thethebetseñ hèla ke botshelō yoa nama.”

Ka mo go kgatlhisang, Lefoko la Modimo le umaka mefuta yotlhe ya maikutlo a batho, jaaka lorato, letlhoo, boitumelo, kutlobotlhoko, bopelokgale, le poifo. Gongwe o ka nna wa gakologelwa gore ka nako nngwe “Yesu [o ne a] lela,” a bontsha maikutlo a gagwe malebana le loso lwa tsala ya gagwe. (Yohane 11:35) Josefa o ne a leka thata gore a seka a lela “ka go bo mateñ a gagwè a hohomela monnawè,” yoo a neng a sa holo go kgaogana le ene dingwaga di le dintsi.​—Genesise 43:30.

Ke ka Ntlhayang fa o Laola Maikutlo a Gago?

Ereka re tshela mo “metlheng ya tlalelo” mme re sa itekanela, maikutlo a a sa siamang a tsenelela mo matshelong a rona go gaisa a a siameng. (2 Timotheo 3:1-5, Revised Standard) Jaaka Bibela e bolela, “kgatelelonyana fela e ka fetola motho yo o botlhale seeleele.” (Moreri 7:7, NW) Jalo fa re sa leke go laola maikutlo a rona a a sa eletsegeng, re ka gobatsa dikamano tsa rona le lelapa la rona, bao re tsenang sekolo le bone, badiri-mmogo le rona, le ditsala taa rona tsa Bakeresete.

Ka tlholego fela, re amiwa maikutlo ke seo Bibela e se bitsang “motlha le bowèlō.” (Moreri 9:11) Ka sekai, banyalani bangwe, bao ba neng ba le mo bodiheding jwa nako e e tletseng, ba ne ba boela kwa legaeng la bone mme ba fitlhela ba utsweditswe bontsi jwa dithoto tsa bone. Seno se ne sa ba utlwisa botlhoko, le go ya bokgakaleng jwa gore ba ikutlwe ba lwala. Go ne ga ba tsaya matsatsi a le mmalwa gore ba kgone go laola maikutlo a bone. Fa fela ba sena go bona nonofo, ba ne ba tswelapele mo tirong ya bone ya ‘go gomotsa bao ba lelang.’​—Isaia 61:2.

Kana gongwe o ka ne o itse batho bao ba iteseletsang gore ba tsosiwe maikutlo ke go lebelela metshameko ya thelebishene. Ba itshwantsha le batshameki ba yone mo eleng gore gantsi ba ledisiwa ke tlhamanenyana eno fela. Gape, a o ke o tlhokomele kgang ya mosadi mongwe yo o sa nyalwang yo o neng a nna a le esi. Ka bosigo bongwe o ne a simolola go lebelela filime nngwe e e boifisang. Lemororo “a ne a tshogile go feta tekano,” o ne a sa kgone go emisa go e lebelela. Morago ga moo o ne a nna le bothata jwa go tshwarwa ke boroko. Fa labofelo a ne a tshwarwa ke borokonyana, o ka akanya fela gore o ile a lora ka eng: dipoko le dilo tse di boifisang. Ntlha ke gore: Re amiwa maikutlo ke seo se diragalang go re dikologa. Kwantle ga pelaelo, he, re tshwanetse go tlhopha, re tile seo se gobatsang kana seo se utlwisang maikutlo a rona botlhoko go sa tlhokafale

Go Otlelela Maikutlo a a Siameng

Kafa letlhakoreng le lengwe, Lefoko la Modimo le kgothaletsa gore re ‘ikgape,’ re dirisa ‘ditlhaloganyo tsa rona.’ (Tito 2:2; Baroma 12:1, NW) Seo ga se kae gore re tshwanetse go ithiba go ya bokgakaleng jwa gore re nne tsididi fela kaga botshelo. Maikutlo ao a laolwang ka tshwanelo a tsenya motswako mo botshelong. Ka sekai, Bibela e bolela gore: “[Ga go na] sepè se se molemo bogolo go ha motho a ka itumèla mo ditihoñ tsa gagwè.”​—Moreri 3:22.

Ka gone, go dira gore botshelo bo itumedise eletota, re ka ithuta go tlhagolela maikutlo a a siameng. Mo boemong jwa maikutlo a a sa siamang, seno se ka re thusa go ‘tlhoafalela ditiro tse di molemo.’ (Tito 2:14) Maikutlo a a nonofileng, a a molemo a nonotsha maikemisetso le boitshoko gore o fitlhelele se se molemo. Tota, Bakeresete ba itse gore ga ba fitlhelele dilo mo tirelong ya Modimo ka ntlha ya go nna maikutlo mantle ka bogone. Go na le moo, ba lemoga tlhokafalo ya go ikaega ka moya wa ga Jehofa ka botlalo e le gore ba lebane le isagwe. (Luke 11:13; Diane 19:21) Jalo, re ka laola maikutlo a rona jang, ka go godisa a a solegelang molemo?

“Lo Seka lwa Tlhobaela”

Ka ntlha ya diphelelo tsa one tse di gobatsang, maikutlo a a ntseng jaaka go galefa, lefufa, letlhoo, le poifo a tshwanetse go laolwa. Go tshwantshetsa ka moo re ka dirang seno ka gone, a o ke o tlhokomele maikutlo a le mangwe fela: tlhobaelo.

Maatla a a dirang a Modimo a ne a nonotsha batlhanka ba gagwe ba ba ikemiseditseng le ba ba ikanyegang mo nakong e e fetileng, jaaka a dira gompieno. Fa Jesu a ne a gogiwa ke moya o o boitshepo, o ne a boloka pono e e siameng ka go nna le kgatlhego ya mmatota mo dilong tsa semoya. O ne a kgothaletsa balatedi ba gagwe gore ‘ba seka ba akgaakgiwa ke tlhobaelo.’ (Luke 12:29, NW) Le ka motlha o ne a seka a belaela tlhokomelo e e lorato ya ga Rragwe. (Yohane 15:9, 10) Tlhoafalo le matlhagatlhaga tsa gagwe di ne tsa seka tsa kgorelediwa ke go lapa le go retelelwa. Gape, ka mo go tshwanang, fa o batla go laola tlhobaelo e e feteletseng, tlatsa mogopolo wa gago ka ‘dilo tse di bolelwang ka pako.’ (Bafilipi 4:8) Ee, go ikanya Jehofa go ka leleka megopolo e e sa siamang.

Ka sekai, mosetsanyana mongwe yo o golafetseng wa São Paulo, Brazil, o ne a tshwenyegile ka go tlhaela dikgono ga gagwe le ka isagwe ya gagwe. O ne a tlhokomela bana ba bannyane mo ntlong fa batsadi ba gagwe ba ne ba bereka boo babedi. Fa a ne a ikutlwa e se wa sepe, o ne a kwala jaana: “Ke boifa gore ke tla feletsa ke tlhakane tlhogo, ke dira selo sa boeleele. Ke ile ka ba ka akanya le ka go ipolaya. Ke akanya gore ga ke kitla ke kgona go nyalwa le ka motlha.” Morago ga a sena go amogela lekwalo leo le neng le mo kgothaletsa go oketsa go ithuta ga gagwe Bibela, o ne a kwala jaana: “Ke ne ka simolola go ikutlwa gore go ile ga bo ga tsamaya ga nna le mongwe yo o kgatlhegelang go sekaseka mathata a me. O mpontshitse ka moo go leng botlhokwa ka gone go tshela mo tsamaisong e ntšha ya ga Jehofa.” Ka gone, mo boemong jwa go tshwenyega fela, ke ka ntlhayang fa o sa tlhome mekgele e e nitameng, segolo-bogolo ya semoya, e e ntseng jaaka go dira mo go oketsegileng mo go anamiseng mafoko a a molemo a Bogosi kana go dirisa nako e e oketsegileng mo go ithuteng Lefoko la Modimo?

Ke boammaaruri gore, kgololesego ya nakwana e ka nna teng ka ntlha ya go itapolosa, go taboga, go fetola thulaganyo kana dilo tse di go dikologileng, kana go reetsa mmino o o lapolosang. Lefa go ntse jalo, re ka nna ra sekamela mo go akanyeng dilo tse di sa siamang le mo go tlhobaeleng, go ikaegile ka dilo tseo re di rutilweng kana tseo di re diragaletseng. Ka ntlha ya lebaka leno, kgono ya botlhale le mogopolo ga di a lekana go tlhagisa kagiso ya mogopolo kana go dira gore motho a amogelwe ke Modimo. Re tshwanetse go ithuta ‘go latlhela tlhobaelo ya rona yotlhe mo go Jehofa.’ Re ka dira seno ‘ka gonne o a re kgatlhegela.’​—1 Petere 5:7.

Kgatlhego ya Botho ya Modimo mo go Wena

Mmopi o ne a sa ikaelela gore batho botlhe ba tshwane le go arabela ka tsela e e tshwanang. Mo Bibeleng, o tlametse ka melao-metheo e e kaelang eo e tshwanetseng ebile e lekane botlhe. Gape o re neetse dikao tse di phepafetseng tsa go bontsha ga gagwe kgatlhego ya botho mo botsogong jo bo siameng jwa batlhanka ba gagwe. “Yehofa o gauhi le ba ba pelo e phatlogileñ, . . . Dipatikègō tsa mosiami di dintsi: me Yehofa o mo golola mo go cōna cotlhe.” (Pesalema 34:18, 19) Tota, Jehofa o itse maikutlo a rona a a kwa tengteng, le eleng mathata le dikeledi tsa rona. Pesalema 56:8 e e tlhagisa ka tsela eno: “A u ko u tsenyè dikeledi tsa me cotlhe mo modutwaneñ oa gago; a ga di mo lokwaloñ loa gago?” Ka gone, fa re tlhoka eletota, le eleng fa re ‘le lehuma le go tlhoka,’ Jehofa e ka nna “thushō ea [rona], le mogolodi oa [rona].” (Pesalema 40:17) Mme tota ke eng seo se batlegang mo go wena gore o bone thuso eno?

Go anaanela dinonofo tse di tlhomologileng tsa Modimo, “mautlwèlō botlhoko” a gagwe, go re thusa go tila go tlhoma mogopolo mo go rona ka mo go sa tshwanelang (2 Bakorintha 1:3, 4) Ga re kake ra sala maikutlo a rona morago ka bofofu re tlhomile megopolo mo go rona ka gonne pelo ya motho e ka nna “boherehere,” e gogela kwa ditirong tse di senang tlhaloganyo, le eleng dikamano tsa boitshwaro jo bo sa siamang. (Yeremia 17:9) Ka sekai, mosadi mongwe yo o nyetsweng kwa Latin America o ne a gapiwa pelo ke monna mongwe yo o agisaneng le ene. A tlhotlhelediwa ke maikutlo ao a gagwe, o ne a mpampetsa keletso ya gagwe ka gore a mo “thuse.” Ka lesego, o ne a senka kgakololo ya semoya go tswa mo Bakereseteng ba ba godileng. Fa a sena go nna le kanaanelo e e godisitsweng mo dinonofong tsa Modimo, o ne a emisa kamano eo. Jaanong o bolela jaana ka boitumelo: “Lenyalo la me le ne la bolokiwa.” Ka tlhomamo, rotlhe re dira sentle go tlhagolela go ikemisetsa go rutwa ke Jehofa le go atamela gaufi le ene.​—Pesalema 19:7-11

Tumelo e e tiileng ke gore, tebelelo le tsholofelo tse di tlhomameng, e tlatseletsa mo mogopolong o o siameng, fa dilo tse di sa itsegeng tsone di tlhotlheletsa tlhobaelo le poifo. (Bahebera 11:6) Eleruri, go akanya go go sa siamang kana dipelaelo di ka re dira gore re palelwe moo re ka bong re atlegile gone. Go tlhaela tumelo go supa tlhokafalo ya go nna le ikanyo e e oketsegileng mo kgonong ya Modimo ya go dira. (1 Yohane 5:10) Abo go le botlhokwa jang ne, he, go ikaega ka Modimo, ka go rapelela thuso ya gore re laole maikutlo a rona kgapetsa!​—Yakobe 1:5.

Boikgapo le boiphapaanyo, le tsone, ke dinonofo tseo re tshwanetseng go di tlhagolela e le gore re godise dikamano tse di molemo le ba bangwe. “Eo o mōea o o tsididi ke motho oa tlhaloganyō,” a laola maikutlo a gagwe. (Diane 17:27) Mo godimo ga seno, moaposetoloi Paulo o kwadile jaana: “A boiphapaanyo yoa lona bo itsiwe mo bathuñ botlhe,” ka gone go tlatseletsa mo botshelong jo bo nang le thulaganyo le kagiso.​—Bafilipi 4:5.

Go rata ba bangwe go godisa maikutlo a a eletsegang tota, go ikemisetsa go kgothatsa ba bangwe le go ba dira gore ba ikutlwe ba ritibetse maikutlo. “Mo go rateñ bakauleñwe lo nne lo ratane ka loratō lo lo pepetletsañ; mo tlotloñ a moñwe a bee eo moñwe kwa pele.” “Loratō lo ichōka ka pelotelele, lo pelonomi; loratō ga lo pelotshètlha; loratō ga lo ko lo ikgantsha, ga lo mabela, Ga lo ko lo diha kaha go sa chwanèlañ, ga lo ko lo ipatlèla hèla, ga lo ko lo gakatsèga, ga ko lo akanya boshula.”​—Baroma 12:10; 1 Bakorintha 13:4, 5.

Fa o tswela pele go tlhagolela dinonofo tseno, o ka tlhomamisega gore Jehofa o tla go thusa. Jaaka Paulo a kwadile a re: “Kagishō ea Modimo e e hetañ tlhaloganyō eotlhe, e tla dibelela dipelo tsa lona le megopolō ea lona mo go Keresete Yesu.”​—Bafilipi 4:7.

O Batla Go Dirang?

Lemororo mongwe le mongwe wa rona a ka lemoga seo a se tlhokang ka namana gore a laole maikutlo a a rileng botoka, re ka tlhomamisega gore kgatelopele le boitumelo jo bogolwane di a kgonagala. Jalo, re tshwanetse go tlhokomela thata gore re seka ra ijesa dijo tsa ditoro kana go ineela mo maikutlong a a sa laoleseng jaaka go tshwenyega go go sa tlhokafaleng. Go na le moo, a re itekeng ka natla gore re tlhagolele maikutlo a a siameng, le a a molemo gore re ke re nneng mo kagisong le rona ka borona, le ditsala tsa rona, le Modimo. Ee, go botlhokwa go ikemisetsa go dira seo, o lebeletse pele letsatsi leo Jehofa a ‘tla kgorisang keletso ya ditshedi tsotlhe’ ka lone. (Pesalema 145:16) Jalo, dira ka tlhomamo gore o ipelele botshelo mo tsamaisong e ntšha ya dilo ya Modimo e e nang le kagiso. Go dira jalo go tla tlatseletsa le eleng mo boitumelong jwa gago jwa ga jaanong, joo kwantle ga pelaelo eleng boikutlo jo bo eletsegang eletota.