Go Dumalana le Ditsela tsa ga Jehofa

Jaaka go boletse Arthur Worsley

ENE e setse e le malatsi a mararo re sa bone letsatsi; re itewa ke phefo le lewatle. Re ne re le mo Bokone jwa Cape Hatteras e e tumileng ya Carolina re ya kwa kabelong ya rona ya go rera kwa Bahamas. E ne e le ka November 1948. Ka bone jwa rona, nna le barongwa ba bararo ba eleng baalogi ba Sekolo sa Bibela sa Watchtower sa Gilead, ra simolola go ipotsa gore a re tla bo ra fitlha koo.

Ke ne ke kgweetsa seketswana sa Mokgatlho wa Watch Tower sefa se boleele jwa dikgato di le 60 (18-m), ebong Sibia. Kgakajana kafa mojeng go ne ga utlwala kgafetsa modumo o o tshwanang le wa mosi o o thunyang fa makhubu a magolo a ntse a re bipa, mme re ne ra koloba fa a ntse a pitikologa mo godimo ga rona. Lebanta le le neng le bofile letheka la me le ne la bofiwa ka dithapo mme tsa bofelelwa mo diboutung tse di nnang le phatlha e e kgolokwe tse di mo bodilong jwa sekepe. Fa re pitikologela ntlheng ya phefo, diketane tse di tshegetsang diseila tsa sekepe di ne di dira modumo o o tshosang, mme fa re pitikologela kgatlhanong le phefo, di ne di tlhakatlhakana.

Mo teng ga kamore e kgolo e e kafa tlase ga bodilo jwa seketswana go ne go na le Stanley Carter le Ron Parkin ba ba neng ba gateletswe ke sedidi ka ntlha ya motsamao wa seketswana. Mme Gust Maki wa dingwaga di le 50, yo ke neng ke sa tswa go mo rola morwalo wa go kgweetsa, o ne a lapile thata. Pele ke simolola go kgweetsa, ke ne ka dira motswako wa lee le branti mme ka bolelela Gust kwa a tla o fitlhelang gone. Ke ne ka feleletsa go mmona ka nako eo mo e ka nnang dioura di le some.

Ga nkitla ke lebala go jewa ke bodutu ga bosigo joo, ke reeditse phefo e e molodi, ke mekamekana le leotwana le le “ragang,” mme ke solofela gore thapo e e neng e ntshireleditse e tla tshwarelela. Go tlile jang gore ke nne mo maemong ano?

Botshelo jwa Bosha mo Engelane le mo Canada

Rre o ne a le mo dikepeng tsa Britani tsa ntwa, mme ka metlha ke ne ke le gaufi le basimegi ba ntwa le masole a mangwe! Fa mmè a sena go swa ka tshoganyetso, ke ne ka romelwa kwa lewatleng go ya go ithuta tiro ya diatla. Ka 1923, fa ke ne ke le dingwaga di le 16, ke ne ka tsaya leeto go dikologa lefatshe ka sekepe sa go katisa.

Fa ke ntse ke le kwa Singapore, ke ne ka utlwa ka morwarre gore Rre o nyetse gape le gore lelapa jaanong le ne le le kwa Alberta, mo Canada. Jalo, ka 1924, ke ne ka ya kwa lelapeng la etsho mo polaseng ya diakere di le 320 (130-ha) gaufi le Lethbrigde. Mokgatlho wa kgwebo o ne o e bitsa “Alberta borwa e mo go yone go phatsimang letsatsi, lefatshe la ditlhaka tsa gauda,” go ne go ntse jalo tota.

Leeto le le Fetotseng Botshelo jwa Me

Selo se le sengwe se go bonalang mokgatlho wa kgwebo o ne o lebetse go se umaka ke mariga a prairie. Ka dinako tse dingwe themperetšha e ne e ya tlase ka didikri di le 30 kafa tlase ga difarenheit di le lefela (-34°C), mme gongwe go feta. Ka le lengwe la malatsi a a ntseng jalo ka mariga a 1926-27, Model T Ford ya bogologolo ya tsena mo jarateng ya etsho mme ya ema gaufi-ufi le ntlo e ntse e theekesela. Mokgweetsi yo o neng a bileditswe mo ntlong go tla go nwa kofi e e bolelo le dikuku, a tlhalosa fa tsela e ne e thibilwe ke semathana se se neng se ntse se wa, le gore o ne a sa tlhomamisege gore o fa kae. Legale, seno sa apoga ka bonako, mme a simolola go bua ka Bibela. Ke ne ka mo naya dolara ya buka e e reng Deliverance le dibukana di le supa.

Batsadi ba me ba ne ba ile go reka kwa toropong, jalo nna le morwarre ra tsamaisa matlho go se nene mo dibukeng tseno. Morago ga moo ra di baya mo lekaseng la dibuka mme ra lebala ka tsone ereka re ne re tshwanetse go tlhokomela diruiwa. Lefa go ntse jalo, tse dingwe tsa dilo tse ke di badileng tsa nna di ntse di bowa mo mogopolong wa me. Ke ne ke tsoga le e leng bosigo ke akanya ka tsone. Labofelo, ka swetsa go bona gore dilo tseno di ne di bua ka eng.

Ke ne ka somola buka e e reng Our Lord’s Return fa ke ntse ke fopholetsa. Morago ga go leta go fitlha botlhe ba ya go robala, ke ne ka bala bukana eno mme ka leba lokwalo longwe le longwe mo Bibeleng ya rona ya lelapa. Ka ntlha ya go gakgamadiwa le go kgatlhiwa ke ditlhaloso tsa yone, ka simolola go “supela” lelapa la etsho mo mosong o o latelang fa re ntse re fitlhola. Ba ne ba sa kgatlhege gotlhelele, mme seo sa seka sa okobatsa phisego ya me.

Maiteko a go Rera

Ke ne ka kwalela Mokgatlho wa Watch Tower, ke ba romelela maina le diaterese tsa borra-dipolase ba baagisani mme ka kopa gore ba ba romelele dikaelo tsa Our Lord’s Return. Moragonyana, fa ke ne ke ya go ba botsa gore a ba ratile bukana eno, ke ne ka gakgamadiwa ke dikarabo tse di sa jeseng monate, tse di jaaka gore, ‘Heela, lekawana le le jaaka wena jaana ga lea tshwanela go itlhakanya le dilo tseo’ kana, ‘le Ma-Russele. Batho bao ba tsenngwa mo kgolegelong kwa United States.’

Lemororo ke ne ke swabisitswe, ga kea ka ka tlogela. Ke ne ka otora dibuka tsotlhe tse Mokgatlho wa Watch Tower o neng o di gatisa, go akareletsa le dikaelo tse di oketsegileng tseo ke neng nka di adima ba bangwe. Ke ne ke bala ka paka nngwe le nngwe, ke akanya ka tsela eo nka abalanang le ba bangwe se ke neng ke se ithuta ka yone. Mokgatlho o ne wa nkitsise gore phuthego kana “ecclesia” e e gaufi e ne e le bokgakala jwa dimaele tse di ka nnang lekgolo (160 km) go tswa mo Calgary, e e neng e le kgakala thata gore nka ya kwa go yone.

Ka 1928 ke ne ka tlogela legae go ya go iperekela, mme ka feleletsa ke dira mo karolwaneng ya polase ya diakere di le 160 (65 ha), e ke neng ka dumalana le beng ba yone go ba neela kotara ya se ke neng ke tla se kotula ngwaga mongwe le mongwe. Ka December 1929 ke ne ka tshwanela ke go ya malatsing a boikhutso, ka jalo ka ya kwa go rre le mmè wa bobedi ba ba neng ba fudugetse kwa Vancouver, mo British Columbia. Malatsi a sekae morago ga fa ke sena go fitlha, ga tla mosadi mongwe a tsamaisa dibuka tse di gatisitsweng ke Mokgatlho wa Watch Tower. Ke ne ka utlwa ka ene gore Baithuti ba Bibela (bao jaanong ba bidiwang Basupi ba ga Jehofa) ba kopana kae, mme Sontaga se se latelang ka tsamaya dimaele di le tlhano (8 km) mo puleng e e neng e na ka sefefo se segolo go ya koo.

Go ne go itumedisa go nna gone kwa pokanong le ba bangwe ba ba neng ba abalana kgatlhego ya me mo Bibeleng. Beke e e latelang, le beke nngwe le nngwe morago ga moo ke ne ka kopanela le setlhopha mo tirong ya go rera ka ntlo le ntlo. Morago Watchtower ya January 15, 1930, ya tlhaga e tshotse taletso ya go ya go thusa kwa ntlong-kgolo ya Mokgatlho wa Watch Tower kwa Brooklyn, e e bidiwang Bethele. Ke ne ka tlogela tiro ya me, mme se se nkgakgamaditseng, ke ne ka bidiwa. Go ntsere nako go konesetsa mabaka a me, mme ka yone nako eo ke ne ka kolobediwa. Labofelo ka fitlha kwa Bethele ka June 13, 1930.

Go Direla kwa Bethele

Ke ne ka abelwa go bereka mo lefelong la go tshwaraganya dibuka, ka feleletsa ke dirisa motšhine wa go tshwaraganya, o o tsenyang disetepolete tsa terata kafa morago ga bukana. Abo go ne go itumedisa jang ne go bereka ka Our Lord’s Return, yone bukana e e nthusitseng go fetola botshelo jwa me! Go ise go ye kae ke ne ke tshwaraganya bukana e ntšha e e reng The Kingdom, the Hope of the World.

Kopano ya me ya ntlha, mo Columbus, Ohio, ka July 1931 ga e lebalesege eleruri. Ga nkitla ke lebala loshalaba la fa go ne go itsisiwe gore go tloga ka nako eo go ya pele re ne re tla itsiwe jaaka Basupi ba ga Jehofa. Morago ga moo bukana e e reng The Kingdom, the Hope of the World e ne ya gololwa. E ne ya tlhalosa lebaka la go bo leina leno le tlhophilwe. Morago ga moo re ne ra e isa go basimegi botlhe ba masole, ba sepolotiki, ba kgwebo, le ba bodumedi, ke ne ka abelwa go dira seno gaufi le Bethele mo Brooklyn Heights le mo Governor’s Island.

Boemakepe jwa New York bo fela mo mojako wa Bethele, mme ka ke ne ke tlwaelane le dikepe, lebopo la nna tshimo ya me. Letsatsi lengwe mokapotene wa dikepe a ganetsa ka go re: “Jaanong, o se ka wa leka go tla go nthekisetsa dibuka tseo. Ke na le buka e le nngwe e tota e buang boammaaruri kaga Bibela.”

“Tswee tswee mpontshe e o e tshotseng,” ka rialo.

A ntsha sekaelo se se makgasa sa buka ya Government, a tlhalosa jaana: “Ke e inolotse mo nokeng mme ka e omisa. Ke buka e e molemo-lemo eo ke kileng ka e bala.”

Morago ga gore ke mmontshe gore dibuka tse ke neng ke di tsamaisa di ne di tswa go bagatisi ba le bangwe mo tsebeng ya bagatisi, tse dingwe tsotlhe tsa ‘tsamaya motlhofo.’ Re ne ra nna le nako e e molemo mmogo!

E ne e le ba sekae fela ba ba neng ba rera mo malatsing ao fa go bapisiwa le gompieno, jalo re ne re leka sengwe le sengwe go isa mafoko a a molemo mo bathong pele Hara-Magedona e fitlha. Toropo ya New York e ne e na le phuthego e le nngwe fela. Jaanong go na le diphuthego tse di fetang 300 le baboledi ba le 30 000 mo toropong eo, mme masimo a mantsi a berekwa kgwedi nngwe le nngwe!

Rutherford​—Mmereki Yo o sa Lapeng

Joseph F. Rutherford yo e neng e le mookamedi wa Mokgatlho wa Watch Tower mo dingwageng tsa me tse 11 tsa ntlha kwa Bethele, o ne a aga a nkgakgamatsa ka namane e tona ya tiro e a neng a e dira. O ne a sa kwale fela bontsi jwa dibuka tsa rona tsa Bibela, a ruta gotlhe, le go lwa dintwa tsa kgotla-tshekelo, mme gape o ne a na le kgatlhego ya botho mo dikgannyeng tsa lelapa la Bethele, leo le neng le na le maloko a le 200 ka nako eo.

Ka sekai, ka 1932 o ne a swetsa gore re tshwanetse go oketsa dijo tsa rona, segolo-bogolo nama. Jalo a rulaganyetsa gore go agiwe dirobi di sekae mo polaseng ya Mokgatlho ya diakere di le 15 (6-ha) mo Staten Island. Ka tsela nngwe o ne a lemoga gore ke itse go le gonnye kaga go tlhokomela dikoko. Seno sa baka gore nna le ene re dirisetse mafelo-beke go dira dipolane tsa dirobi le go lekanya lebala gore re kgone go di aga.

Mo go lengwe la maeto ano, Mokaulengwe Rutherford o ne a lebega a tshwenyegile thata kaga sengwe. Morago ga sebakanyana ka ipeta pelo go botsa fa go ne go na le sengwe se se phoso le gore a nka dira sengwe go thusa. A araba ka gore nka se kgone go thusa. Mme jaaka re ne re ntse re ya re lebile kwa tshingwaneng, o ne a re: “Ga ke ise ke ipone ke palelwa. Nako le nako fa ke dira sengwe sa botlhokwa, go nna le bothata bongwe, mme gone jaanong ke tshwaragane le sengwe sa ditlhogo tse di botlhokwa-tlhokwa mo dingwageng tseno tsotlhe.” Ke ne ke gakgametse tota gore o ne a mpolelela, ke sa le mosha fela mo Bethele fa go bapisiwa.

Dibeke di le mmalwa moragonyana, batho ba ga Jehofa ba ne ba neelwa ditokololo tsa Watchtower ya August 15 le September 1, 1932, tse di neng di na le setlhogo se se nang le dikarolo tse pedi se se reng “Phuthego ya ga Jehofa.” Ditlhogo tseno di ne tsa senola gore thulaganyo ya go tlhopha bagolwane e ne e se ya dikwalo. Di ne tsa baka tlhakatlhakano e kgolo, mme e ne e le kgato e le nngwe go ya kwa bolebeding jo bo feletseng jwa bolegodimo.

Mo malatsing ao Mokaulengwe Rutherford o ne a lebana le kganetso e kgolo e e neng e tswa go bao ba neng ba leka go mo diga. Mme e ne e le molwi mme gaa ka a ineela mo baganetsing ba gagwe ba bodumedi.

Dikgatelelo Dia Gola, Rutherford Oa Tlhokafala

Pogiso e ne ya oketsega ka bo-1930. Kwa Jeremane ya Bo-Nazi ba bantsi ba ne ba romelwa kwa dikampong tsa pogisetso mme ba bolawa ka ntlha ya tumelo ya bone. Le e leng kwa United States bakaulengwe bangwe ba ne ba tshasiwa sekontiri mme ba tlhomiwa mafofa; ba bangwe ba ne ba patelediwa go nwa kaseterole (castor oil). Dithoto di ne di senngwa, mme bana ba ne ba kobiwa kwa sekolong.

Ka 1941 Mokaulengwe Rutherford a simolola go nna bokoa mo mmeleng, mme o ne a santse a na le tlhotlheletso e kgolo ebile a kgona go etelela-pele. Mo go rona bao re neng re mo itse sentle, go koafala ga gagwe go ne go bonala ka mo go utlwisang botlhoko. O ne a fedile mo eleng gore diaparo tsa gagwe di ne di leketla mo mmeleng wa gagwe. Lefa mmele wa gagwe o ne o swa, tlhaloganyo ya gagwe e ne e phaphame mme go fisegela ga gagwe boammaaruri le go itsise leina la ga Jehofa di ne tsa seka tsa fokotsega.

Letsatsi lengwe morago ga sefitlholo kwa bofelong jwa 1941, o ne a bolelela lelapa gore o ne a ya go nna le karo e e diphatsa. O ne a kgothatsa lelapa go se go kae mme a konela ka gore: “Jalo fa Modimo o rata, ke tla lo bona gape. Fa go sa nna jalo, ke a itse gore lona basimane lo tla lwa ntwa.” Botlhe mo lelapang ba ne ba lela, mme ga rea ka ra tlhola re mmona gape. O ne a ya California tsatsi leo kwa a neng a swela gone ka January 8, 1942.

Mo dingwageng di le dintsi, go ne go na le ditlhaselo tse dintsi tse di matlho mahibidu go Mokaulengwe Rutherford, mme ditatofatso tse di ntseng jalo di ne di itaya sefoletse mo go rona ba re neng re bereka le ene mme re mo utlwa a neela thuto ya semoya mo kobamelong ya mo mosong letsatsi lengwe le lengwe. Re ne re mo itse ka seo tota a neng a le sone​—mongwe wa Basupi ba ga Jehofa. Go ka tweng gape?

Dikabelo tse Disha

Go ise go e kae morago ga gore Nathan H. Knorr e nne mookamedi, a biletsa ba le mmalwa ba rona kwa ofising ya gagwe, a tlhalosa dithulaganyo tsa go tsosolosa go etela diphuthego ga baemedi ba Mokgatlho, mme a botsa fa re ne re ka rata go nna le seabe. Ke ne ka dumela mme ka simolola tiro ya go eta ka 1942. Re ne re bidiwa “motlhanka wa bakaulengwe,” leina le morago le neng la fetolelwa go “motlhanka wa potologo.”

Ka May 1948, kwa kopanong ya kgaolo mo Houston, Texas, Mokaulengwe Knorr a mpiletsa kwa ofising ya gagwe. Morago ga dipuisano di le mmalwa tsa ntlha tse di mabapi le tiro mo lefelong leo le botsogo jwa me, a botsa jaana: “A o akanya go nyala?”

Go bua boammmaaruri ke ne nka seka ka re nnya, mme ka ntlha ya lebaka le le tshwanang ke ne nka seka ka re ee. Jalo ka araba ka gore: “Mokaulengwe, ke ne ke ntse ke akanya ka gone fa e sale go tloga ke na le dingwaga di le tlhano.” Seno sa ntlogela ke ntse ke le mo magareng. Morago ga moo Mokaulengwe Knorr a tlhalosa gore Mokgatlho o bone seketswana, mme a botsa fa nka rata go ya kwa kabelong ya borongwa ka sone.

Ke ka moo ke nnileng mokgweetsi wa Sibia mo bosigong joo jwa difefo tse dikgolo kwa Cape Hatteras ka 1948.

Go Neela Bosupi mo Ditlhakeng

Mo malatsing a le mmalwa re ne ra fitlha kwa Bahamas koo re neng ra fitlhela batho ba ba amogelang baeng le ba ba bolaetsweng boammaaruri jwa Bibela ke tlala. Re ne ra neela bosupi mo ditlhakeng tseno tsotlhe tse dikgolo, re etela tse dingwe tsa tsone makgetlho a le mmalwa mo dikgweding tse supa tse re di ntseng koo. Morago ra ya Virgin Islands, ra neela bosupi go ralala setlhopha seno sa ditlhake.

Bosigo bongwe mo St. Martin, majoro kana komishinara wa setlhake, a tla kwa go nna mme a re: “Go tla go fitlha mo dibekeng di sekae tse di fetileng, jaaka ke ne ke ntse ke tsamaya mo motseng, o ne o ka utlwa go buiwa fela ka dintwa tsa mekoko le ka basadi. Jaanong gongwe le gongwe kwa ke yang gone ke ba utlwa ba bua ka Jehofa le Bibela. Lona banna ba ga Jehofa lo dirile tiro e e molemo, mme kea e lo lebogela.”

Ke ne ka nna le tshiamelo ya go neela puo ya ntlha-ntlha ya Segopotso mo St. Vincent. Morago ga yone mosadi mongwe o ne a re: “Rre Brown a ka bo a ratile go utlwa puo eno, fela o nna kgakala.” Ke ne ka laelwa tsela e e yang kwa motseng oo ka bokhutshwane, mme mo mosong wa le le latelang, ka simolola go o batla.

Go ne go sena ditsela, fa e se ditselana tsa maoto fela. Ke ne ka tsamaya dioura di le dintsi, ke eta ke botsa tsela kgafetsa. Mo e ka nnang ka oura ya bobedi thapama ke setse ke lapile thata ka fitlha mo lebaleng le lennye le le nang le matlwana a le mmalwa a a phatlhaletseng. Ke ne ka swetsa go ya go ikhutsa mo go e nngwe ya tsone. Fa ke ntse ke e atamela, ka bona go kwadilwe, “Holo ya Bogosi ya Basupi ba ga Jehofa” fa godimo ga lebati. Go lapa ga me ga apoga jaaka kobo.

Ka bonako ga tla monna mme a botsa gore a o ne a ka thusa. Ka mmotsa gore “Nka bona batho ba ba agileng holonyana eno jang?”

“Ke yo mongwe ma bone,” a rialo.

Ke ne ka mmolelela gore ke tswa kwa seketswaneng sa Sibia mme ga bonala a sa tlhaloganye. Jalo ka re, “A ga o itse seketswana sa Jehofa.” Morago ga go utlwa seo a tlola ka ntlha ya go itumela. Moragonyana, ka utlwa ka moo holo e neng ya agiwa ka gone.

“Ba ne ba mpolelela kaga boammaaruri fa ke ne ke ile kwa Trinidad. Mme ka bolelela batho ba bangwe fa ke boa koo,” a tlhalosa jalo. A mpotsa fa nka rata go neela puo.

Ka mo raya ka re, “nka itumelela go dira jalo.” Jalo a futswetsa nakana, mme ka ponyo ya leitlho holo e nnye ya bo e setse e tletse mme batho ba eme mo diphatlheng tsa difensetere. Ke ne ka neela puo, mme morago ga moo ga tshwarwa thuto ya Tora ya Tebelo, e e neng ya tshwarwa sentle! Morago ga yone, mokaulengwe a ntaletsa go ya go ja kwa lapeng la gagwe. Letsatsi le ne le ntse le dikela, mme ka ba bolelela gore ke tshwanetse go wela tsela. Ba ne ba mphelegetsa ka tsela e khutshwane thata. Ke ne ke santse ke saletswe ke dimaele di le mmalwa go ya kwa seketswaneng fa ba boa, mme e ne e le bosigo jo bo monate.

Go Boela kwa Bethele

Ka 1950 go ne ga tshwarwa kopano ya ntlha e kgolo mo Setediamong sa Yankee. Rona bao re neng re le mo seketswaneng sa Sibia re ne ra lalediwa go tla. Fa ke ntse ke le mo New York, ke ne ka abelwa gape tiro ya go eta mo United States. Morago ga dingwaga di le mmalwa ke ne ka lwala, mme ka bilediwa kwa Bethele ka 1956. Ke ne ka fola ka iketlo, mme ka nna kwa Bethele.

Nako nngwe fa Mokaulengwe Knorr a ne a bua ka tlhokafalo ya barongwa ba ba oketsegileng kwa Afrika, ke ne ka kopa gore a nthomele koo. Lefa go ntse jalo, a nkgopotsa ka dingwaga tsa me le makgetlho a ke nnileng kwa sepatela ka one, mme a mpolelela gore go botoka gore ke nne koo nka bonang tlhokomelo gone fa ke e tlhoka.

Jaanong ke dingwaga di le 79, mme ke na le dingwaga di ka nna 56 mo tirelong ya nako e e tletseng, mme go a itumedisa go itse gore ke tsene mo tirelong e e ntseng jalo ke sale mosha. Gantsi, fa ke sena go boa kwa dipokanong kana kwa tirong, ke dula mo kamoreng ya me e ntle mo Bethele mme ke akanye ka ditiragalo tsa dingwaga tse di 60 tse di fetileng. Ruri, ke tshegofaditswe ka ntlha ya go sepela mo ditseleng tsa ga Jehofa.

[Setshwantsho mo go tsebe 23]

Fa ke ne ke rera kwa Alabama ka 1934, ke ne ke ananya dibuka tsa Bibele ka dikoko