A O A Gakologelwa?
A o ile wa ipelela ditokololo di le mmalwa tse di fetileng tsa Tora ya Tebelo? Bona gore a o ka gakologelwa dintlha tse di latelang:
◻ Ke eng se se ka thusang Bakeresete go fenya diphoso tsa mo sephiring?
Bakeresete ba ba batlang go itumedisa Jehofa ba tshwanetse go tshela ka temogo ya gore ga ba ka ke ba fitlhela Modimo diphoso tsa bone. Gape, ba tshwanetse go amogela thuso ya ga Jehofa go fenya makoa a a ntseng jalo. (Moreri 12:14; Bafilipi 4:13)—4/15, tsebe 20.
◻ Ke kgwetlho efe e e kopanyeletsang bogodi jwa Bokeresete e motlhanka mongwe le mongwe wa ga Jehofa a tshwanetseng go e akanyetsa ka bomasisi?
A motlhanka wa ga Jehofa o iketleeditse ebile o ikemiseditse go amogela boikarabelo jo bo tsamaelanang le bogodi, motho wa semoya yo o nonofileng? Kana, o kgatlhwa ke go itsemeletsa, a tlogelela ba bangwe go sikara boikarabelo jwa gagwe? (Bagalatia 6:4, 5)—5/1, ditsebe 9, 10.
◻ Re ka bontsha bonolo jang ka go tlhagolela botsala jwa boammaaruri?
Bonolo mo letlhakoreng la rona bo bonala fa re letlelela ba bangwe go re ba itse gore re a ba anaanela. Seno se ka dirwa ka go ba reetsa eseng go gogopa puisano ka go bua bobe mo go feteletseng kaga rona. Bonolo bo bonala gape ka go elatlhoko seo re se buang le ba bangwe. (Diane 12:18)—5/15, tsebe 4.
◻ Jesu o ne a raya eng mo go Mareko 9:50 fa a ne a re: “Nnañ le lecwai mo go lona”?
Jesu o ne a lebisitse go barutwa gore ba nne kakanyetso, ba nne botlhale, ba nne phepa, le go nna kagiso mo lefokong le mo boitshwarong—ba dirisana le ba bangwe ka matsetseleko.—5/15, tsebe 23.
◻ Ke mabaka mangwe afe a a leng kgatlhanong le gore Jesu o ne a tsalwa ka Morule 25?
Morule ke paka ya dipula, ya botsididi kwa Bethelehema, jalo badisa ba ka bo ba ne ba se kwantle bosigo le matsomane a bone. Batho bao ga go bonale ba ka bo ba ile ba kopiwa ke Kaesare wa Roma go tsamaya mo marigeng go ya go ikwadisa ka go bo Bajuda ba ne ba setse ba le mo seemong sa go tsuologela Baroma.—6/1, tsebe 8.
◻ Ke ka baka lang fa kolobetso e tshwanetse go tlhatlhanyediwa le go neelwa kakanyetso e e masisi ke ba ba e akanyetsang?
Kolobetso ke nako ya fa motho ka bongwe a bontsha gore o dirile phetso e e botlhokwa-tlhokwa—go ineela go Modimo jaaka Morena Molaodi mme, jaaka Mosupi wa ga Jehofa, go sa nne karolo ya lefatshe. (Luke 3:21; Mathaio 4:10; 1 Yohane 5:19)—6/1, tsebe 31.
◻ Jesu o ne a raya eng fa a ne a re mo go Luke 1:37: “Ga go na lehoko lepè ye le cwañ Modimoñ ye le ka tlhokañ nonohō”?
Mafoko a ga Jesu a ne a sa reye gore Modimo o ipuela sengwe le sengwe fela, mme go na le moo, gore ga go lefoko lepe kana puo epe e e ka buiwang ke Jehofa e e ka tsamayang e sa diragadiwa. (Isaia 55:10, 11)—6/15, tsebe 14.
◻ Batho ba ga Jehofa ba ikotla jang gompieno ka “lehoko leñwe le leñwe le le cwañ mo molomoñ oa Modimo” (Mathaio 4:4)?
Go ikotla mono ga go dirwe fela ka go ipalela Bibela le go ithuta Lefoko ja Modimo Bibela, mme ke ka batho ba ga Jehofa ba itemogela, ba le setlhopha le motho ka bongwe, tsela e e gakgamatsang e Jehofa a diragatsang dipolelo tsa gagwe malebana le batho ba gagwe, a dira sengwe boemong jwa bone.—6/15, tsebe 17.
◻ Dingwe tsa dipopego tse dikgolo tsa tumelo ya Sehindu ke dife?
Baobamedi ba Sehindu ga ba laolwe ke setlhopha sepe sa konokono; ga go na sebopego sepe se se tlhomilweng sa kobamelo; motswedi wa ditumelo tsa bone ga o mo bukeng epe jaaka Bibela; mme, go na le moo, ka makgolo a dingwaga mekwalo e e farologaneng e mentsi ya Sehindu e ne ya kwalwa, mme dibuka tse thataro tse di farologaneng tsa botlhajana di ile tsa kwalwa.—7/1, tsebe 4.
◻ Bakeresete ba lekgolo la ntlha la dingwaga ba ne ba itshwara jang malebana le mongwe yoo e neng e se modira-bosula yo o lelekilweng, mme yoo ka bomo a neng a latofatsa tsela ya Bokeresete?
Moaposetoloi Johane o ne a neela kgakololo kaga batho bao ba neng ba ‘dule mo go rona’ mme le kaga bao ba neng ba tlisa dithuto tsa maaka. (1 Yohane 2:19) Mo go 2 Yohane 10 o ne a tlhaba Bakeresete botlhale go sa ‘amogele batho ba ba ntseng jalo mo magaeng a bone’ kana go ba dumedisa. Lefoko “botenegi” ke sebopego sa lefoko la Segerika leo le nang le tlhaloganyo ya go ‘phatlalalela, go phuaganya, kana botsuolodi,’ mme motho yo ka bomo a bile a ile a kwala a ileng a itomologanya ka boene le phuthego ya Bokeresete o ne a tla tshwanela tlhaloso e e ntseng jalo. Bakeresete ba ba ikanyegang ba ne ba se ketla ba batla gore ba kopane le motenegi yo o ntseng jalo.—7/15, tsebe 31.
◻ Bodumedi jwa boammaaruri bo ka lemogiwa jang?
Bodumedi jwa boammaaruri bo tshwanetse go tsamaelana le ditekanyetso tsa boammaaruri tsa Modimo jaaka di tlhomilwe mo Bibeleng; bo tshwanetse go ungwisa loungo lo lo kagiso lwa lorato; mme bo tshwanetse gape jwa tlotla leina ja Modimo, eleng Jehofa.—7/15, tsebe 7.