Disang Mmaba wa Lona, Diabolo!

“Lo nnè lo ikgapè, lo nnè tishō: mmaba oa lona, diabolo, o potologa yaka tau e e dumañ, a batla eo o ka mo kometsañ.”—1 Petere 5:8.

1. Basupi ba ga Jehofa ba na le mmaba ofe, a mme a ka fenngwa?

AO MOSUPI yo o ineetseng ka botlalo wa ga Jehofa Modimo? Fa go ntse jalo, o na le mmaba yo o boferefere, yo e leng diabolo. Lefa go ntse jalo, go sa kgathalesege sotlhe se a ka se dirang, mmaba yo o boferefere yono a ka fenngwa. O ka itshupa o ikanyega go Modimo Mogodimodimo, Jehofa. Kwantle ga pelaelo, o ka nna le seabe mo go galaletseng leina le le sa lekaneng le lepe la ga Rraago wa selegodimo. Ruri, o ka itumedisa pelo ya ga Jehofa ebile o ka mo neela karabo ya Mokgobi yo Mogolo. Ee, mme o ka bona tuelo ya botshelo jo bo sa khutleng mo boitumelong jwa mo paradaiseng.—Diane 27:11; Luke 23:43; Tshenolō 2:7.

2. Moaposetoloi Petere o rileng kaga mmaba yo mogolo wa rona?

² Go nna o ikanyegile go Modimo, o tshwanetse go disa mmaba yo mogolo wa gago. Moaposetoloi Petere o kwadile jaana mabapi le ene: “Lo nnè lo ikgapè, lo nnè tishō: mmaba oa lona, diabolo, o potologa yaka tau e e dumañ, a batla eo o ka mo kometsañ.” Lefa go ntse jalo, goa kgonega go itshireletsa mo mmabeng yono, gonne moaposetoloi o tswelela ka gore: “Lo èmelanè naè lo nitame mo tumeloñ ea lona . . . Modimo oa tshegōhatso eotlhe . . . e tla re lo sena go nna lo boga botlhoko ka lobakanyana . . . o lo tiise, o lo thatahatse.” (1 Petere 5:8-10) Mafoko ao a gomotsa balatedi ba ba tloditsweng ba ga Jesu Keresete segolo. Lefa go ntse jalo, a na le bokao jwa boammaaruri le go batlhanka ba ga Jehofa bao ba lebileng pele go tshela ka bosakhutleng mo lefatsheng la paradaise.

3. (a) Ke bomang bao ba ipaakanyeditseng go re thusa? (b) Satane o dirisa baba bafe go diragatsa maikaelelo a gagwe a a bosula?

³ Gore re tle re dise Mmaba wa rona, re tlhoka thuso gammogo le kitso ka ga maano a gagwe. Jehofa Modimo, Jesu Keresete, baengele ba ba boitshepo le phuthego ya Bokeresete ba ikemiseditse ebile ba rata go re thusa rotlhe gore re boloke bothokgami. Mo letlhakoreng le lengwe, re na le mebele e e sa itekanelang, tsamaiso e e boikepo eno ya dilo mme Satane Diabolo ka boene yo re ganetsanang nae. O tlhotlheleditswe ke letlhoo mme o nna a ipaakanyeditse go dirisa thuso ya baba ba rona ba bangwe ba babedi go diragatsa maikaelelo a gagwe a a bosula.—Yohane 15:19; 1 Bakorintha 9:27.

4. (a) Ke maina afe a mane ao Satane a itsiweng ka one? (b) Ke ka ntlhayang fa Satane a tshwanelwa ke maina ano “Diabolo,” “noga” le “kgogela”?

⁴ Maina ao Dikwalo dia nayang Mmaba wa rona a re thusa go tlhaloganya mekgwa ya gagwe botoka, le maano a gagwe. O bolelwa jaaka Satane, Diabolo, noga le kgogela. (Tshenolō 12:4, 9, 10) Leina la gagwe Satane le kaya “Moganetsi,” kana “Mmaba.” (Yobe 1:6; 2:1) Leina “Diabolo” le kaya “Mosebi,” “Mopateletsi,” kana “Moaki.” Gape Satane o bidiwa “noga” gonne o dirisitse noga go tsietsa Efa mo tshimong ya Edena. (Genesise 3:1-17) Mme o bidiwa “kgogela” ka ntlha ya mokgwa wa gagwe wa go kometsa.

Maitlhomo le Maikaelelo tsa ga Satane

5. Satane o tsere boemo bofe mabapi le Jehofa?

⁵ Satane Diabolo o simologile e le yo mongwe wa barwa ba Modimo ba selegodimo, a wela mo go ganetseng le go seba Jehofa. Boikaelelo jwa ga Satane e ne e le go katosetsa batho kgakala le Modimo, gore ba direle maikaelelo a a bogagapa a ga Satane. Tsela ya ga Diabolo ya go dira e phepafatsa gore o belaetse boikanyegi jwa Modimo, gammogo le go tlhoka ga batho go ikaega ka Jehofa le go lebelela go ene go tswelela ka botshelo le boitumelo. Se se tlhaloganngwang gape mo tseleng ya ga Satane ke dipelaelo tsa gagwe kaga tshiamelo ya Modimo ya go busa gammogo le mokgwa wa gagwe wa go busa. Jehofa o dirisa molao-motheo wa go busa ka tshiamo le go nna le dibopiwa tse di ithaopelang go mo direla ka go bo di mo rata le ka ntlha ya tshiamo. Mo letlhakoreng le lengwe, Satane o tsere boemo jwa gore go bapala ka bogagapa ke boitlhomo jo bo eletsegang segolo. Ka mafoko a mangwe, o Iwela gore dibopiwa tsotlhe tse di botlhale di tshwanetse ebile di bogagapa jaaka ene.—Yobe, Dikgaolo 1 le 2.

6. Tsela ya ga Satane e senolang mabapi le boitlhomo jwa gagwe?

⁶ Go re Satane a simolole kgato e e ntseng jalo go senola gore o ne a letla boikgogomoso jo bo feteletseng go nna boikutlo le boitlhomo tse di laolang. Seno se bonala gape mo tlhagisong ya ga moaposetoloi Paulo kgatlhanong le go tlhongwa ga modumedi yo mosha mo boemong jwa bolebedi, fa a ne a re “e se re goñwe a ikgogomosa me a wèla mo tshekisoñ ea diabolo.” (1 Timotheo 3:6) Ee, eleruri go bontshitse boikgogomoso jo bogolo gore Satane a ikemisetse go ema kgatlhanong le Mothatayotlhe, Mogodimodimo, Molaodi wa Lobopo, Kgosi ya bosakhutleng, Jehofa Modimo. (Genesise 17:1; 2 Samuele 7:28; Pesalema 83:18; 1 Timotheo 1:17) Gore boikutlo jo bo laolang jwa ga Diabolo ke jwa boikgogomoso, gore o ne a eletsa kobamelo eo dibopiwa tse di botlhale di neng di e neela Jehofa Modimo, go senotswe ke ene fa a ne a re o tla naya Jesu Keresete “magosi aotlhe a lehatshe” fa Jesu a ne a ka mo obamela.—Mathaio 4:8, 9.

7. Ke ka ntlhayang fa Modimo a sa ka a fedisa batsuolodi Satane, Adame le Efa ka gangwe fela?

⁷ Tota, Jehofa Modimo a kabo a fedisitse Satane gammogo le batho ba babedi ba ntlha ka bonako fela fa ba sena go leofa. Mme ka ntlha ya kganetsano eo Satane a e tsositseng, le ka go utlwela bana bao ba neng ba ise ba tsalwe ba ga Adame botlhoko, Modimo a letlelela Diabolo go tshela le go leka go supa dikgwetlho tsa gagwe tsa boikgogomoso. Ka nako e e tshwanang, Jehofa ka gone a naya batho bao ba batlang go ipusa tshiamelo ya go leka go dira jalo ntle le Modimo le melaometheo ya gagwe e e siameng.

Tsietso Mabapi le go Nna Gone ga Gagwe

8. Satane o tsieditse batho mabapi le go nna gone ga gagwe jang?

⁸ Satane o dirisitse maano a mantsi le a a farologaneng go tsweledisa boikaelelo jwa gagwe e le Mmaba wa ga Jehofa Modimo mme, fa go kgonega, a katosetse batho botlhe kgakala le kobamelo e e siameng ya Mmopi wa bone. Lengwe la maano ano ke go dira ga gagwe gore batho ba dumele gore gaa teng! Seno se dira gore a ba tlhasele motlhofo. Ka gone, gompieno, mo ditlhopheng tse dintsi tsa bodumedi go tlwaelegile go dumela gore ga go na motho wa go tshwana le Satane Diabolo. Ka sekai, palo ya batho e e dirilweng ke Center for Policy Research mo Motseng wa New York ba begile gore ka 1974 go feta sephatlho sa Ma-Amerika ba ne ba sa dumele gotlhelele ka go nna gone ga ga Diabolo jaaka motho. Tota le baruti ba bantsi ga ba dumele mo go nneng gone ga ga Diabolo jaaka motho.

9, 10. Dikwalo di tlhomamisa jang ntlha ya gore Diabolo ke motho?

⁹ Mme Dikwalo ga dia re tlogela re na le pelaelo epe ya gore go na le motho yo go tweng Diabolo. Di bontsha gore ke motho yo o neng a bua ka noga, a tsietsa le go hepisa mosadi wa ntlha, Efa. Buka ya ga Jobe e tswelela ka go tlhomamisa bogone jwa ga Satane jaaka motho, gonne e bolela ka go bua ga gagwe le Jehofa Modimo, a tlhasela bothokgami jwa motlhanka wa Modimo Jobe. Go feta moo, bakwadi ba Efangele Mathaio, Mareko le Luke ba kwala gore Jesu Keresete o ne a lekwa ke Diabolo. Go phepafetse gore diteko tseo di tshwanetse tsa bo di ne di tla go Jesu go tswa motsweding o sele e seng fela ka seo re se itseng ka boitekanelo le botho tsa ga Jesu, mme gape go tswa mo mokgweng wa boraro wa teko ya ga Satane. Jesu o ne a ka wela fa fatshe mme a obama fa pele ga boikutlo kana mogopolo o o bosula jang? Se se bontshang seno gape, ke dipoapoeletso tsa ga Jesu fa a umaka Satane jaaka motho le jaaka “kgōsana ea lehatshe yeno.”—Yohane 12:31; 14:30; 16:11; 8:44; Mathaio 4:1-10; 12:26; Luke 10:18.

¹⁰ Baaposetoloi ba ga Jesu le bone ba supile Diabolo e le motho. Paulo o supile gore Bakeresete ba boammaaruri ba itse kaga “maanō” a ga Satane mme moaposetoloi o ba tlhagisa kgatlhanong le “maanō a a boherehere a diabolo.” (2 Bakorintha 2:11; Baefesia 6:11) Jaaka go setse go boletswe, Petere o ne a tlhotlheletsa badumedi ka ene go disa Mmaba wa bone, Diabolo. Le moaposetoloi Johane o supile gore “lehatshe yeotlhe le namaletse ha tlhatse ga eo o boshula” le gore “diabolo o tloga a latlhèla [Bakeresete] bañwe ba lona mo tluñ ea kgolegèlō.”—1 Yohane 5:19; Tshenolō 2:10; 1 Petere 5:8.

Leano la ga Satane la Bodumedi jwa Maaka

11. Satane o dirileng ka keletso ya tlhago ya batho ya go obamela?

¹¹ Leano la ga Satane la go foufatsa batho le kopanyeletsa go dirisa ga gagwe bodumedi jwa maaka. (2 Bakorintha 4:4) Motho o ne a bopiwa ke Modimo a tlhoka go nna a amana le Mmopi wa gagwe ka kobamelo. Satane o fapositse tshekamelo eno ya tlholego ka go ipiletsa mo bogagapeng le ka go godisa go tlhokomologa bodumedi jo bo phepa. Go diragatsa boikaelelo jwa gagwe “o tla a ichwantshe le moengele oa lesedi.” (2 Bakorintha 11:14) Ka ntlha ya tsietso e e ntseng jalo, batho ba mo mefuteng e e farologaneng ya bodumedi jwa maaka.

12. Re tshwanetse go leba bodumedi jwa maaka le ditumelo tse di farologaneng jang?

¹² Bodumedi jotlhe jwa maaka tota bo simolotswe ke Satane, gonne Paulo o rile: “Dilō tse Badichaba ba di isañ ditlhabelō ba di isetsa badimo, e señ Modimo.” Jesu o rile: “Eo o sa èmañ le nna o tlhabana le nna; le eo o sa phutheñ le nna oa halatsa.” Go tswela pele, Keresete gaa ka a letla sebaka sa ditumelo tse di farologaneng, mme o rile: “Ga go tle opè mo go Rara ha e se ka nna.”—1 Bakorintha 10:20; Mathaio 12:30; Yohane 14:6.

13. Satane o dirisitse keletso ya batho e e mabapi le boloi ka ditsela dife?

¹³ Satane o gobolotse keletso ya batho ya go itse ka boloi le boemo jwa baswi. Ka maano a a ntseng jalo ao gotlhelele e seng a dikwalo jaaka go bua le baswi, kana tirisa-badimo, go bolelela-pele ditiragalo, bolepi jwa dinaledi le bodemona, o raetse bontsi-ntsi jo bo senang palo. Tota, gompieno go na le kgatlhego e e oketsegelang pele mo dilong tse di ntseng jalo. Seno se ile bokgakaleng jwa gore bangwe tota ba obamele Diabolo ka boene.—Ekesodo 22:18; Lefitiko 19:26; 20:6; Duteronome 18:10:12.

Go Kgatlhegela ga ga Satane Boikgogomoso

14, 15. (a) Satane o dirisitseng go dira gore Efa le Kaene ba direle maikaelelo a gagwe? (b) Ke dikao dife tse dingwe tse Bibela e re di neelang tumalanong le kgang eno?

¹⁴ Satane o ineetse mo tekong ya boikgogomoso. Ka mo go tshwanang, o ne a tsosetsa Efa keletso e e bogagapa le ya boikgogomoso ya gore a tshwane le Modimo Mogodimodimo, mme ka gone a atlega mo go faposeng batsadi ba rona ba pele mo kobamelong ya ga Jehofa Modimo. Kwantle ga pelaelo Satane o dirisitse katamelo e e tshwanang go Kaene. Fa Diabolo a lemoga ka moo Kaene a neng a galefile ka gone ka ntlha ya gore Abele monnawe a ne a bone kamogelo ya bomodimo, o ne a tlhotlheletsa kgalefo eo go nna polao ya bogagapa.—Genesise 4:3-8; 1 Yohane 3:11, 12.

¹⁵ Mo hisetoring yotlhe ya batho, Satane o kgonne go dirisa bao ba ikgogomosang—banna ba ba jaaka Nimerode, Farwe wa Egepeto mo motlheng wa ga Moshe le Senakeribe Kgosi ya Asiria. (Genesise 10:8-12; Ekesodo 5:2; Isaia 36:7-10, 16-20) Gompieno Satane o tshwere matshwititshwiti ka boikgogomoso: boikgogomoso jwa lotso, boikgogomoso jwa bomorafe, boikgogomoso jwa thuto, boikgogomoso jwa maemo a loago, jalo le jalo. Tseno tsotlhe di direla boikaelelo jwa ga Diabolo jwa go dira gore batho ba se reetse molaetsa wa Modimo.

Serai sa go Nna Bogagapa mo Dikhumong

16. Ke katlego efe eo Satane a nnileng le yone mo go diriseng bogagapa jwa dikhumo?

¹⁶ Leano le lengwe leo Satane a le dirisang go raela batho ke khumo, bogagapa, go rata madi, go ikgogomosa ka dikhumo. Ka tsone, o raetse baruti ba motlha wa ga Jesu bao ba neng ba le barati ba ba bogagapa ba madi. (Luke 16:14) Ka go dirisa serai sa bogagapa jwa dikhumo, ‘Satane o tladitse pelo ya ga [Ananiase] go aketsa Moya o o Boitshepo.’ (Ditihō 5:1-11) Mme ga go belaetse gore Diabolo o dirisitse lorato Iwa dikhumo le menate ya lefatshe go faposa Demase le Bakeresete ba bangwe mo tirelong ya ga Jehofa.—2 Timotheo 4:10.

17. Re na le sekao sefe seo se itsegeng ka mo go kgethegileng sa motho yo o ineetseng mo go diriseng ga ga Satane bogagapa jaaka serai?

¹⁷ Sekao se se bosula thata sa go dirisa ga ga Satane bogagapa go raela ke sa ga Judase Isekariota. Gaa ka a nna legodu le le bogagapa fela, mme ke ka ntlha ya bogagapa Judase a neng a oka Morena wa gagwe. Gore mogopolo wa gagwe o ne o sekamiseditswe ntlheng eo go bontshwa ke go ganela ga gagwe Maria go tlotsa dinao tsa ga Jesu ka lookwane lo lo tlhotlhwa kgolo. (Yohane 12:4-6; Mathaio 26:14-16) Abo re tshwanetse go nna kelotlhoko jang ne gore Satane a se re raele ka bogagapa jwa dikhumo!

Satane o Dirisa Makoa a Batho

18. (a) Modimo o diretse motho dipaakanyetso dife gore a bone boitumelo mo botshelong? (b) Satane o dirisitse tseno go utlwisa batho botlhoko jang?

¹⁸ Mo gare ga makoa a a farologaneng ao Satane a kgatlhegang mo go one ke keletso ya menate e e ilediwang ya nama. Jehofa Modimo o ne a ikaeletse gore re ipelele menate e mentsi, mme fa e ipelelwa mo meleIwaneng eo a e re beetseng, e ka felela ka molemo le boitumelo tse dikgolo. Mme Satane o raela batho gore ba eteletse dilo tseno pele mo matshelong a bone le go ineela mo go tsone ka ditsela tsa boitsholo jo bo maswe tse di thulanang le molao wa Modimo. Ka gone Satane o dirile gore Baiseraele ba le 24 000 ba ineele mo seraing sa ga Baala-peora. (Dipalō 25:1-9) Gompieno lefatshe le tsentshwa thata ke go batla ga lone menate ya nama. Dimakasine, dikoranta, dibaesekopo le mananeo a thelebishene ka gale di ipiletsa ka mo go tlhomologileng mo kgatlhegong e e maswe. Lefa go ntse jalo, jaaka Bakeresete ba ba kaelwang ke moya wa Modimo, re tshwanetse go ikgogona mo ditekong tse di ntseng jalo.—1 Bakorintha 14:20.

19. (a) Ke serai sefe sa ga Satane seo Bakeresete ba basha segolo ba leng mo kotsing ya sone? (b) Bakeresete ba basha ba tshwanetse go tlhokomela eng?

¹⁹ Leano le lengwe la ga Satane ke go ipiletsa ga gagwe mo keletsong e e tlhotlheletsang ya menate. Bakeresete ba basha ke bone bao segolo ba leng mo kotsing ya serai seno. Gantsi, ba ya kwa mefuteng e e farologaneng ya metshameko e le babogedi kana batsaya-karolo. Mme seno se ka ba dira gore ba nne “barati ba dikgatlhègo, bogolo go go nna barati ba Modimo.” (2 Timotheo 3:4) Basha ba bangwe ka go rata menate ba fetogela mo mminong le mo dipineng tse di godisang boitsholo jo bo maswe le thubakanyo. Ruri, go tlhokega gore re tlhokomele thata, gonne dilo tse di ntseng jalo di ka gogela Bakeresete ba basha kgakala le tsela ya boitsholo jo bo siameng le thokgamo.—Pesalema 16:11; 2 Petere 2:20-22.

20. Satane o dirisa poifo jang?

²⁰ Satane o dirisa gape serai sa go boifa batho. Ke ga tlholego go swaba fa o kgobiwa le go leka go tila tshotlego. Poifo e e ntseng jalo e ne ya baka gore ba bantsi ba ineele fa ba le mo dinakong tsa mathata. (Diane 29:25; Bahebera 2:14, 15) Ka thuso ya Modimo ga re kitla re letla gore seo se re diragalele.

21. Ke ka ntlhayang fa go sa tlhokege gore re fenngwe ke go kgobiwa marapo?

²¹ Maano a mangwe a ga Satane ke go leka ga gagwe go kgoba batlhanka ba Modimo marapo gore ba ineele. Ka mo go tlhomamisegileng, Diabolo o lekile go dira seno ka Jobe, a mo dira gore a eletse ekete a ka bo a sule kana a sa tsalwa. Satane gape o ne a leka seno go Moshe. (Yobe 3:1-13; 14:13; Dipalō 11:10-15) Ga go ope wa banna bano ba ba ikanyegang yo o neng a kgobega marapo. Go na le moo, ba ne ba ngaparela thato ya Modimo. Ga rea tshwanela go fekeediwa ke maemo ape fela jaaka bone, gonne Jehofa a ka re kokotletsa mme a ka se letlelele gore mosiami a tshikinngwe.—Pesalema 55:22.

Nitamang!

22, 23. Re tshwanetse go dirang gore re eme re tiile kgatlhanong le “maanō” a ga Satane le go se direle maano a gagwe?

²² Ka ntlha ya go atlega ga ga Satane mo go katosetseng batho ba bantsi-ntsi kgakala le Jehofa Modimo, re tshwanetse go dirang? Jaaka basupi ba ba pelokgale ba ga Jehofa, re tshwanetse go “ganèla le maanō a boherehere a diabolo,” le ditogamaano le mekgwa tsa gagwe. (Baefesia 6:11) Ka gone re ka mo supa e le moaki yo mogolo le yo o ikgogomosang.

²³ Lefa go ntse jalo, re ka se eme re tiile kgatlhanong le Satane ka nonofo ya rona, gonne o na le maatla a magolwane, kitso e kgolwane le maitemogelo a mantsi go feta ao re nang le one. Ka gone, gore re kgone go ema re tiile kgatlhanong le ene, re tlhoka go dirisa melemo ya dithuso tsotlhe tse Jehofa Modimo a di baakanyeleditseng batho ba gagwe. Ka jalo re ka fenya mmaba yo o boferefere yono.

A O Ka Gakologelwa?

◻ Diabolo o dirisa baba bafe go diragatsa maikaelelo a gagwe a a bosula?

◻ Ke boemo bofe joo Satane a bo tsereng mabapi le Jehofa?

◻ Bibela e supa jang gore Satane ke motho?

◻ Ke dilo dife tse dingwe tseo Diabolo a di dirisang go re raela, mme re ka di tila jang gore di se re fenye?

[Setshwantsho mo go tsebe 11]

Basupi ba ga Jehofa ga ba ineele mo go boifeng batho