A Bodumedi Bo Ka Lebana le Masetlapelo?

DIMAKASINE tse di itsegeng le tsa bodumedi le makwalo-dikgang ka go tshwana di itlhaganela go bega ka “dikatlego” tseo dikereke dingwe di nang le tsone. Di bolela ka dikokoano tsa thapelo le pako tseo di tlisang batho gaufi le Modimo. Di bega gore dithero mo dikerekeng dingwe di nna tsa semoya segolo go na le tsa loago kana tsa sepolotiki. Di bua kaga bodihedi go ba ba humanegileng, mafelo-beke a a ntšhafatsang, ditlhopha tsa thuto ya Bibela, mephato e e binang ya bodumedi, le kaga batho ba ba ratang go tsaya maemo a baruti le a baitlami mo go nang le tlhokafalo gone. Tseno tsotlhe di tsewa jaaka sesupo sa go ntšhafadiwa ga bodumedi.

Fa Moperesidente Reagan wa United States a ne a bua le National Association of Evangelicals o rile: “Amerika e setse e simolotse go tsoga gape semoyeng. Tumelo le tsholofelo dia tsosoloswa. Ma-Amerika a boela go Modimo . . . Mme ke dumela gore o setse a simolotse go fodisa lefatshe la rona le le segofaditsweng.” Go bontsha tsholofelo go go ntseng jalo go dira thata mo go tshegetseng mogopolo wa gore kwa bokhutlong mathata a mantsi ao batho ba ba tlaletsweng ba lebaneng le one gompieno a tla rarabololwa ke go tsoga gape semoyeng.

Tseno tsotlhe di ka ne di utlwala di le molemo thata, mme ke eng seo go “tsoga gape semoyeng” le go “ntšhafala” di se fitlheletseng? Batho ba ka ikutlwa botoka ka bobone, mme a e setse e le Bakeresete ba ba botoka? Batho ba ka nna le boikutlo jwa gore ba sekametse thata mo dilong tsa semoya, mme a ba kgatlhegela dilo tsa semoya segolo go na le ditelekiso tsa dikhumo? Fa go se boife Modimo e le gone go lemogilweng fa e le lone lebaka le legolo la tlalelo ya gompieno, he a ba thusitswe go bontsha poifomodimo? Dikarabo di botlhokwa mo go tlhatlhobeng gore a bodumedi bo ka kgona go lebana kana go emelana le masetlapelo a gompieno kana nnya.

Poifomodimo—Ke Eng?

Poifomodimo e tlhalositswe jaaka go ineela go Modimo kana go sekamela go Modimo. Ka gone, e feta go bontsha fela ka kobamelo kana borapedi tsa kafa ntle. Motho yo o nang le poifomodimo o amegile thata, eseng ka go kgotsofatsa ditlhokafalo dingwe tsa botho, mme ka go itse le go dira thato ya Modimo, a nna le botsalano jo bo gaufi-ufi le ene. Phelelo e nna gore botshelo jwa motho bo fetolwa go nna jo bo botoka gonne “poihōmodimo e molemō kaga dilō cotlhe, ka e na le choloheco kaga botshelō yoa gompiyeno, le kaga yōna yo bo tla tlañ.”—1 Timotheo 4:8.

A batho ba ba retologelang kwa bodumeding fela ka ntlha ya go se kgotsofatswe ke ditiragalo tsa botshelo ba tshwanela boemo jono? A kana ba tshwana thata le bao moaposetoloi Paulo a buileng kaga bone jaaka “ba ba chotseñ sechwanchō hèla sa poihōmodimo, me thata ea eōna ba e latotse”?—2 Timotheo 3:5.

Fa motho a retologela go Modimo fela ka ntlha ya go kgotsofatsa tlhokafalo nngwe ya botho go na le go nna le boikaelelo jwa go ithuta thato ya Modimo le go mo direla, selo seo a se boifang ke boene go na le go boifa Modimo, a ga go jalo? Boineelo jwa mofuta ono ga bo na maatla mo go fetoleng botshelo jwa motho go tswa go jwa telekiso ya bogagapa go ya go jwa tirelo ya go intsha setlhabelo ya boammaaruri go Modimo.

Seo Paulo a se boletseng se ne se dumalana le Thero e e itsegeng ya ga Jesu ya kwa Thabeng. Fa a bontsha gore ga se botlhe ba ba ipolelang gore ke balatedi ba gagwe bao a ba amogelang, o okeditse ka gore: “Mo letsatsiñ yeuō batho ba le bantsi ba tla nthaea, ba re, Morèna, Morèna, a ga rea ka ra rèra mo ineñ ya gago, ra ba ra kgoromeletsa ntlè badimo ka leina ya gago, ra ba ra diha ditihō di le dintsi tse di nonohileñ ka leina ya gago? Me ediha gōna ke tla ba ipolèlèlañ, ke re, Ga ke e se nke ke lo itse gopè; tlogañ ha go nna, lona ba lo dihañ tshiamololō.”—Mathaio 7:22, 23.

Ka gone, ga se go bontsha bodumedi jwa gago go go kgathalesegang go Modimo. Gore motho a amogele dikaelo le tshegofatso tsa Modimo, o tshwanetse go rata go amogela dikaelo tsa Modimo jaaka di le mo Bibeleng le go di dirisa mo botshelong jwa gagwe. Jaaka mopesalema a re: “Lehoko ya gago ke lobōnè loa dinaō tsa me, le lesedi ya tsela ea me.” (Pesalema 119:105) A batho ba ba retologelang kwa bodumeding gompieno ba thusiwa go ithuta le go latela dikaelo tseo?

Dintlha Di Reng?

Patlisiso ya bosheng ya Bakatoliki ba le 10 000 ba ba tlhaga mo dikerekeng di le 60 mo United States e supile gore diperesente di le 77 tsa bone di amegile thata kaga seo se tla diragalelang naga eo, fa go bapisiwa le diperesente di le 40 fela tsa bao ba amegileng kaga “dikganetsano tsa go bolokega ga botho.” Ka mo go tshwanang, patlisiso ya Gallup e fitlhetse gore mo dipotsong tsotlhe tseo batho ba ka ratang go di botsa Modimo, e e tumileng thata ke e e reng: “A go tla ke go nne le kagiso e e nnelang ruri ya lefatshe?”

Ka mo go tlhomamisegileng, mo dipakeng tse di tlhokofatsang tseno ga go sepe se se phoso ka go amega kaga isagwe ya rona. Mme abo dikarabelo tseno di farologane jang ne le seo Jesu a se boleletseng barutwa ba gagwe: “Me e tla re dilō tse di simologa go dihala, hoñ lo lelalè, lo choletsè ditlhōgō tsa lona; ka gonne thekololō ea lona e tla bo e atamèla.” (Luke 21:28) Seo matswela a patlisiso a se bontshang ke gore go sa kgathalesege dipuo tsotlhe tsa go tsoga gape semoyeng, tlhobaelo kaga isagwe e rena mo dipelong le mo megopolong ya batho gompieno. Sebopego sa bone sa bodumedi se dirile go le gonnye mo go ba thuseng go lebana le tlalelo ya dipaka tsa rona tse di tlhokofatsang.—Bona Luke 21:26.

Mabapi le go dira maloko a kereke go nna ba ba sekametseng mo dilong tsa semoya segolo, mokwadi wa dikoranta mo makasineng wa Masabata wa Ministry o ledile ka gore: “gantsi thata go na le mo gonnye mo mokgweng wa tota wa go tshela wa maloko a rona kana mo mokgweng wa rona go re farologanya mo baagelaning ba rona bao e seng Bakeresete.” Go na le moo, e tswelapele ka gore, kereke e neela maloko a yone “tumelo ya thuto ya bomodimo go kgobokanya dikhumo le mokgwa wa botshelo wa” batho ba ba sa dumeleng ka go tshwantsha Modimo jaaka “mongwe yo o batlelang batho ba Gagwe se se molemo-lemo le yo o ikaelelang gore ba se bone.”

Ka mo go tshwanang, The Economist ya London, morago ga go bega gore “go na le ditshupo dingwe tsa kgatlhego mo dipotsong tsa bodumedi tse di tswelelang (le e leng tse di golang),” o tlhomamisa gore “bothata jwa Kereke ya Engelane ke tsela eo e ka direlang bao ba batlang go itse kaga tumelo fa yone ka boyone e sa tlhomamisege ka seo e se dumelang.”

Go tweng ka lefelo la lelapa le ditekanyetso tsa boitsholo jwa batho? A dikereke di nonotshitse maloko a tsone kgatlhanong le ditlhotlheletso tse di bodisang le ditsela tsa boitsholo jo bo maswe tsa lefatshe leno? A ba dirile banna, basadi, batsadi le bana ba ba botoka? Patlisiso ya bosheng ya basha ba le 8 000 le batsadi ba le 10 000 ba malapa a a tsenang dikereke mo ditlhopheng di le 13 tsa dikereke di neela bobotlana mogopolo o o lotobo ka boemo jono.

Go ya ka Christianity Today, thuto e fitlhetse gore diperesente tse 42 tsa basha di bolela gore malapa a bone gaa nke a tlotla ka dikgang tsa bodumedi, mme diperesente tse 40 ba bolela gore ba batla kaelo e e oketsegileng ya batsadi mo dikgannyeng tsa dikobo. Mo gare ga bao ba dingwaga tse 15, diperesente tse 53 di dirisitse tagi, diperesente tse 20 di dirisitse motekwane. Thuto ya gale, e e begiIweng mo The Ann Arbor News, e fitlhetse gore diperesente tse 59 tsa basimane le diperesente tse 42 tsa basetsana di boletse gore di nnile le dikamano tsa kafa dikobong ka nako ya fa ba ne ba le dingwaga di le 18.

Kwa bokhutlong, a bodumedi bo thusa balatedi ba jone go ikgogona mo moyeng o o thubakanyang wa lefatshe? Ruri, fa e le gore bodumedi bo ka nna maatla a a lekalekanyang mo dipakeng tse di tlhokofatsang tsa gompieno, a re ne re ka se lebelele bobotlana se se fetang seno? Mme, ka maswabi, batho ba bantsi-ntsi ba lemogile gore bodumedi bo tlatseleditse mo dintweng le mo dikgotlhannyeng tse dintsi tse di tlhokofaditseng batho ka tlhamalalo kana ka bokhukhuntshwane. Umaka mafelo a a jaaka Ireland, Lebanon le Iran, mme ke eng se se tlang mo mogopolong? Go sa kgathalesege makwalo a baruti le ditlhopha tsa kagiso, a dikereke tse dikgolo ga di tlhakanele mo dintweng tse di tshololang madi a mantsi gompieno?

Ka gone, re ka reng kaga seo go tweng ke go tsoga gape ga bodumedi? Gongwe go na le dipontsho tsa go ntšhafadiwa ga bodumedi, mme go ka se twe ke go tsosoloswa ga semoya. Go na le gore ba agiwe semoyeng, ba nonotshetswe go lebana le dipaka tse di tlhokofatsang, bontsi jwa bao ba retologelang go bodumedi jwa lefatshe ba forwa fela ka mofuta wa tirelo ya kobamelo. Ke “sechwanchō hèla sa poihōmodimo, me thata ya eōna ba e latotse,” jaaka fa moaposetoloi Paulo a boleletse pele. Go “tsoga gape” le go “ntšhafadiwa” ga ka kwantle fela ka mo go phepafetseng go tshwanela maemo a a setseng a a senyegelang pele—go bola ga boitsholo, go thubega ga malapa, bokebekwa le thubakanyo, jalo le jalo—tse di tshwayang dipaka tsa rona tse di tlhokofatsang.—2 Timotheo 3:1-5.

Phelelo e Tla Nna Efe?

Fa e dirisa motse wa bogologolo wa bodumedi wa Babelona jaaka sekao, Bibela e supa go wa go go feletseng jaaka tshenyego ya bodumedi jwa lefatshe. Buka ya Tshenolō e bolelela pele jaana: “Moengele moñwe eo o thata a tsaea lencwè, ekete lolwala lo logolo, me a lo thabuetsa mo lewatleñ, a re, Babelona, motse o mogolo, o tla pirigañwa yalo ka piriganyō e kgolo, me ga o ketla o tlhōla o bōnwa gopè.”—Tshenolō 18:21.

Lefa go ntse jalo, pele ga fa bokhutlo jono jo bo bofefo bo tla, go na le sebaka sa go tsaya tlhagiso ya bomodimo ya Tshenolō 18:4 tsia: “Cwañ mo go èna, lona batho ba me, gore lo se tlhakanele naè dibe tsa gagwè, le gore lo se bone dipecō tsa gagwè.” Go dikologa le lefatshe, mo dinageng di le 205, Basupi ba ga Jehofa ba tsere tlhagiso eo tsia mme ba tshabetse mo Bogosing jwa Modimo jaaka tsholofelo e le yosi ya batho. (Mathaio 24:14) A o tla nna mo gare ga dikete tseo di kopanelang le bone mo go tshabeleng kwa polokesegong? O tla swetsa.

[Mafoko a setshwatsho mo go tsebe 6]

Go sa kgathalesege makwalo a baruti le ditlhopha tsa kagiso, a dikereke tse dikgolo ga di tlhakanele mo dintweng tse di tshololang madi a mantsi gompieno?

[Setshwantsho mo go tsebe 5]

Batho ba ka nna le boikutlo jwa gore ba sekametse thata mo bodumeding, mme a ba kgatlhegela dilo tsa semoya segolo?

[Setshwantsho mo go tsebe 7]

Gompieno makgolo a a dikete a tsaya tlhagiso ya go tlogela bodumedi jwa maaka tsia