Ditebelelo tsa Gago Ka Isagwe Di Tlhomame Go le Kana Kang?
MONNYE kana mogolo, mohumi kana mohumanegi, molwetsi kana yo o itekanetseng, o na le isagwe, ka go bo lefoko “isagwe” le raya “nako e e sa ntseng e tla tla.” Mme mongwe le mongwe o fitlha isagweng ka lobelo lo lo tshwanang lwa metsotso e 60 oura nngwe le nngwe. Lefa go ntse jalo, seo isagwe eo e tla go tlisetsang sone se ikaegile kafa o e lebang ka teng le kafa o e rulaganyetsang ka teng.
Isagwe ya gago e kopanyeletsa go feta eseng fela nako ya gago e e sa ntseng e setse ya botshelo jwa gago jwa jaanong. E akaretsa le gape gore o dirisa nako eo jang, dithulaganyo tse o di dirileng, le mekgele e o itlhometseng. “Re tshwanetse ra tshwenyega rotlhe ka isagwe ka go bane re tla senya botshelo jotlhe jwa rona koo.”
O Leba Isagwe Jang?
Ke ka ntlha yang fa bontsi jo bo kana bo sa akanyetse isagwe mo go kalo? Go na le mabaka a le mmalwa a seno. Mangwe a one ke ano:
◻ Tlhobaelo le tshuka-tshukano ya botshelo jwa letsatsi le letsatsi e hupetsa dikakanyo tsa isagwe.
◻ Botlhajana jwa “losika lwa jaanong’’ bo godisa pono, ‘itšheba-tšhebele gone jaana mme isagwe e tla itaetela ka boyone.’
◻ Bao ba lelekisang tsela ya botshelo ya ‘re tla utlwela teng’ ba dumela gore bowelo ke jone fela bo betlang isagwe.
◻ Boikutlo jwa ‘go thusa eng’ bo felela ka kgobego-marapo le go kgoreletsa go tlhoma mekgele bakeng sa isagwe.
Mme go tweng ka bao ba rulaganyetsang isagwe? Dithulaganyo tsa bone di ka tlhaela boikaelelo mme ka gone, isagwe ya bone e ka nna e e swabisang. Jang jalo? Fa e le gore dithulaganyo di ikaegile fela mo kakanyetsong ya motho le boiteko jwa se se tla fitlhelelwang, di ka gogela isagweng e e farologaneng le seo se neng se lebeletswe. Mokwadi yo o botlhale wa bogologolo o ne a elatlhoko ka gore mabapi le go akanya ga motho: “Yehofa, kea itse ha tsela ea motho e se mo go èna ka esi: ga goeō mo mothuñ eo o tsamaeañ ka dinaō go siamisa dikgatō tsa gagwè.”—Yeremia 10:23.
Fa e le gore motho o na le bothata jwa go siamisa dikgato tsa gagwe malebana le isagwe, o ka kgona jang go siamisa tsa ba bangwe ka katlego? O ka se kgone, ka go bo dilo tse pedi tse di betlang go akanya ga motho di leswe. E nngwe ke mekgwa e e jelweng boswa; e nngwe, ke tikologo. Mme botlhajana jwa sepolotiki, sedumedi, itsholelo le botshelo jwa batho ka metlha bo ntse bo sukaganyetsa batho mo popegong ya jone. Matswela? Go fapoga boiteko jwa mmatota mo isagweng ya mmaanete.—Baroma 5:12; 1 Yohane 5:19.
Ka sekai, boiteko jono bo ka kopanyeletsa go baakanyeletsa bana ba rona thuto, re gopola gore seno se tla ba neela isagwe e e botoka segolo. Lefa go le Jalo go na le dialogane tsa Yunibesithi tse di tlhokang mmereko. Kana e ka nna go bereka ka natla fela thata gone jaana go bona letlotlo la madi gore mo isagweng re bo re eme sentle. Mme tlhatlogo-ditlhotlhwa e tlhotlhorile mabolokelo otlhe a madi. Kana e ka nna go lebelela pele nako ya go tlogela mmereko go nna le legae le madi a a tla dirang gore motho a ikemele ka nosi ka dithoto tse di bonalang le kgono ya go tshela dingwaga tsa boroba go se letsapa le fisang pelo. Lefa go le jalo loso kana kudumedi nngwe fela di amogile bontsi tsholofelo eo. Kana e ka nna go dumela gore isagwe e tla tlisa sengwe se se botoka ka moso. Mme “ka moso” yoo ga a ke a tla.
Go Atamela Isagwe ya Gago ka Tekatekano
‘Ke ka nna jang le isagwe e e tlhomameng le e e nang le bokao’? o a ipotsa. Karabo e ka tswa e le mo go seo mogapadikgele wa Nobel a neng a se kwala ebong John Galsworthy: “Fa o sa akanye ka isagwe, o ka se nne le yone.” Akanyetsa ka bomasisi pele gore isagwe e ka tlisang. Se se latelang akanya ka se o ka ratang go nna sone le go se dira mo isagweng eo. Ka jalo tsaya dikgato tse di tlhokafalang go siamisa dikgato tsa gago malebana le mokgele oo.
Fa o tlhatlhanya ka isagwe, akareletsa Bibela mo go akanyeng ga gago ka go bo e ka tsisa ponong ya gago ditiragalo tsa isagwe tseo o ka tswang o sa gopole gore di teng fa pele ga gago. Go bolelela pele ditiragalo tsa isagwe ka tlhomamo ke nngwe ya dikarolo tse di tlhomologileng thata tsa Bibela. Seno se ka nna jalo ka go bane Mokwadi wa yone, Jehofa, ke Modimo wa polelelo-pele. O tlhalosa ka gore: “Go tswa tshimologong ke ne ke bolelele pele isagwe, mme ka supela go sa le pele gore e tla nna jang.” (Isaia 46:10, The Jerusalem Bible) Ka gone, go ithuta malebana le maikaelelo a Modimo ka isagwe le gore e tla re ama jang ke tsela e e molemo bogolo go e latela, a ga go jalo? Ditebelelo tsa rona ka isagwe e ka nna ditoro fela fa e le gore kakanyetso ya polelelo-pele ya bomodimo ga e yo mo ditogamaanong tsa rona. Modimo o bolelela pele eng seo re tshwanetseng go se itse? A re ka fetola ditogamaano tsa rona tsa isagwe gore di dumalane ka botlalo le dipolelelo-pele tsa Modimo?