‘Se Ipapalele Ka Lehatshe Go Hetisa Selekanyo’
“Bao ba nang le go dirisanya le lefatshe ba se tshwarege thata mo go lone. Ke bua jaana ka go bo lefatshe jaaka re le itse lea heta.”—1 BAKORINTHA 7:31; “The Jerusalem Bible.”
1, 2. (a) Ke pono efe ka isagwe ya lefatshe eo ba le bantsi ba nang le yone gompieno? (b) Paulo o ne a reng kaga lefatshe le tiriso ya lone?
“MOTHO o ka se bolelele pele dikgakgamatso kana ditshwabo tseo isagwe e di tshotseng. . . . Lefa go le jalo, ka thetheekelo kana thelelo, lefatshe, go bonala le tswelela pele mme le tla nna le tswelela.” Ga tlhalosa jalo raditiragalo yo o itsegeng H. G. Wells masome a dingwaga a sekae a a fetileng. Go sa kgathalesege dipharagobe di le dintsi le dikotsi, ba le bantsi ba ikutlwa gore setho ka tsela nngwe se tla rarabolola mathata a sone, mme lefatshe, fela jaaka re le itse, le tla falola.
2 Lefa go ntse jalo, fa a ne a kwala tlase ga tlhotlheletso ya bomodimo, moaposetoloi wa Mokeresete Paulo o ne a neelana ka pono e e farologaneng fa a ne a kgothaletsa badumedi-ka-ene gore: “Go le ba ba ipapalèlañ ka lehatshe, a ba se hetise selekanyō; gonne mokgwa oa lehatshe yeno oa heta.” Tsela e nngwe e e balegang ka yone ke: “Bao ba nang le go dirisanya le lefatshe ba se tshwarege thata mo go lone. Ke bua jaana ka go bo lefatshe jaaka re le itse lea heta.” (1 Bakorintha 7:29-31, Bibela E E Boitshèpō; JB) Kgakololo eno e rayang go batlhanka ba ga Jehofa Modimo gompieno?
“Lehatshe . . . Lea Heta”
3. Paulo o ne a bua ka eng go 1 Bakorintha kgaolo 7, mme dingwe tsa dintlha tseo a neng a bua ka tsone moo ke dife?
3 Go 1 Bakorintha kgaolo 7 Paulo o ne a buisana ka lenyalo gareng ga Bakeresete. E re ntswa a ne a hakela go sa nyale jaaka tsela e e botoka, gone o ne a dumelana gore bao ba tsenang mo lenyalong ‘ga ba leohe.’ Lefa go le jalo o ne a oketsa ka gore ba tla nna le “pitlaganō mo nameñ,” ka jaana lenyalo le patwa ke ditlhobaelo tse di rileng. Ka motlhala, go Iwala ga moratiwa go ka lere kgagamalo. Lemororo Paulo fano a ne a sa reye pogiso, pitlagano e e oketsegileng e ka diragalela batho ba ba nyalaneng mo nakong ya fa balekane ba kgaogane kana fa batsadi ba kgaogantswe le bana ba bone.—1 Bakorintha 7:25-28.
4. Ke eng seo se bolelwang ke 1 Bakorintha 7:29?
4 Paulo o ne a tswelela ka go re: “Me ke bua lehoko ye, ba ga echo, ka re, lobaka lo khutshahetse, gore e tle e re mo lobakeñ lo lo tlañ, go le ba ba nañ le basadi ba nnè yaka ha ba ka bo ba sena nabō.” (1 Bakorintha 7:29) E re ka jaana “lobaka lo khutshahetse,” Bakeresete ba ba nyetseng ba se ka ba ineela gotlhelele mo ditshiamelong tsa lenyalo le ditlamegong tsa lone mo tseno di tsayang botshelo jotlhe jwa bone. Go na le moo, ba tshwanetse ba baya dikgatlhego tsa Bogosi kwa pele mo botshelong, lemororo ba se ketla ba palelwa ke go diragatsa maikarabelo a lenyalo. (1 Bakorintha 7:3-5, 29-40) Jaaka fa re tshela mo “metlheñ ea bohèlō,” re na le lebaka je le oketsegileng la go latela kgakololo eno e e tlhotlheleditsweng.—2 Timotheo 3:1-5.
5. “Lehatshe” leo re sa tshwanelang go le dirisa go hetisa selekanyo ke lefe?
5 Ereka “lobaka lo khutshahetse,” Paulo o ne a re, “Go le ba ba ipapalèlañ ka lehatshe, a ba se hetise selekanyō.” (1 Bakorintha 7:29-31) Mo temaneng eno lefoko la Segerika leo le kwadilweng ka gore “lehatshe” (kósmos) ga le a lebagana le setho ka tlhamalalo, jaaka fa go ntse ka Yohane 3:16, mme e leng sebakeng sa batho sa botshelo le sebopego sa sone. Setho se na le ditlhopha tsa dipuo, ditšhaba, merafe, malapa, bahumi le bahumanegi, le sebopego fela se se tlwaelegileng se se dikanyeditseng le go ama batho. (1 Bakorintha 14:10: Yakobe 2:5, 6; Tshenolō 7:9; 14:6) Ee, e ne e le sebakeng sa botshelo sa batho le seo se nang naso seo Paulo a neng a lebisitse go sone fa a ne a re: “Lefa lo dirisa lefatshe, se lekeng go bapala gotlhe mo lo ka go kgonang mo go lone.”—1 Bakorintha 7:31, The New Testament in the Language of Today, William F. Beck.
6, 7. (a) Ke jang ‘mokgwa wa lehatshe jeno o hetang’? (b) Ke ntlha efe eo moaposetoloi Johane a neng a e tlhalosa mabapi le isagwe ya lefatshe?
6 Paulo o ne a supa gape gore Bakeresete ga ba a tshwanela go ‘dirisa lefatshe go hetisa selekanyo’ ka go bo “mokgwa [pono, NW] oa lehatshe yeno o a heta.” Lefatshe jeno le tshwana le dipono tse di ntseng di fetoga mo seraleng. Lemororo e ka bonala e kgatlhisa, batshameki ba yone le sebopego sa yone di a fetoga. Batho ba pagama ‘serala,’ mme bangwe ba bone ba itshwara ka go ikgogomosa. Mme ka bonakonyana ba fete le losika Iwa bone ba bo ba lebalwa. (Moreri 1:4) Mo motlheng wa rona, ‘sesiro se gaufi le go folosediwa’ mo lefatsheng leno le legologolo! Ruri, “lefatshe jaaka re le itse lea heta.”—1 Bakorintha 7:31, JB.
7 Moaposetoloi Johane o ne a bua ntlha e e tshwanang, ka go re: “Lehatshe lea heta, le thatō ea yeōna: me eo o dihañ go rata ga Modimo o nnetse rure ka bosakhutleñ.” (1 Yohane 2:15-17) Johane ka phepafalo o ne a raya gore mokgatlho wa batho ba ba sa siamang o ne o tloga o nyelediwa ke tshenyego ya bomodimo, fela jaaka lefatshe je le sa reng Modimo sepe la pele ga Morwalela le ne la nyelela. (Bahebera 11:7; 2 Petere 2:5; 3:6) Legale, ga mmogo le batho ba ba sa siamang go tla feta sebopego sa dilo sa jaanong sa batho le sengwe le sengwe seo se se tlhagisang.
8. Lemororo lefatshe jeno le feta, ke tsholofelo efe e Bakeresete ba nang le yone, mme seno se tshwanetse go ama jang tiriso ya rona ya lefatshe?
8 Mme fela jaaka batho bao ba ratang tshiamo ba ne ba falola Morwalela, jalo Jesu o ne a bontsha gore bangwe ba ne ba tla falola “sepitla se segolo” seo se atamelang ka bofefo. (Mathaio 24:21, 22, 36-39; bapisa Tshenolō 7:9-17.) “Lehatshe ye lesha” le setse jaanong le ntse le nna gone, ebong mokgatlho wa batho bao ba tla tshelang mo lefatsheng leno kafa tlase ga puso ya Bogosi. (2 Petere 3:13; Tshenolō 21:1; bapisa Pesalema 96:1.) Jalo fa rona ka borona re na le tsholofelo ya go falola le ya botshelo jo bo sa khutleng mo Thulaganyong e Ntšha, ke ka baka lang fa re tshwanetse go senya bontsi jwa nako ya rona le nonofo mo lefatsheng je legologolo je le fetang?
“E le Motlhofo Kafa Go Ka Kgonegang”
9. Ke ditsela dife tse di lekalekaneng tseo basupi ba ga Jehofa ba ka dirisang lefatshe ka tshwanelo?
9 Jaaka basupi ba ga Jehofa ba re tshelang mo tsamaisong eno ya dilo, re ka se ‘tswe mo lefatsheng.’ (1 Bakorintha 5:9, 10) Jalo re ka dirisa lefatshe ka tshwanelo, ka ditsela tse di lekalekaneng, tse di tshwanetseng, le tse di lekanetseng. Ka motlhala, ereka re duela makgetho, re na le tshwanelo mo ditirelong tse di rileng tseo di dirwang ke “babusi ba bagolo” ba ga goromente. (Baroma 13:1-7) Kafa tshwanelong re dirisa ditirelo tsa poso, tsa sepodisi le tse dingwe tse di kafa molaong, jaaka ditsamaiso tsa mesepele. Ka boikaelelo bofe? Go tshela kafa go tshwanetseng le go tsweledisa tiro e re e filweng ke Modimo ya go supa kaga Bogosi. Mme e re ka re sa tshwanela go dirisa lefatshe ‘go hetisa selekanyo’ dilo tsotlhe tse di ntseng jalo di dirisiwa fela go ya bokgakaleng joo di ka direlang dikgatlhego tsa Bakeresete.
10. (a) Re tshwanetse go dikolosa matshelo a rona go eng? (b) Jesu o ne a tshwantshetsa jang bomosola jo bogolo jwa Bogosi? (c) Fa dikgatlhego tsa Bogosi le kamano e e botsalano le Jehofa di kaya mo go golo go rona, seno se tla ama jang tiriso ya rona ya lefatshe?
10 Re ka se letlelele dikgatlhego tsa lefatshe go re laola. Go na le moo, re tshwanetse go dikolosa matshelo a rona mo kamanong ya rona le Jehofa, mo go mo obameleng ga rona le tirelong ya rona go ene. A ditiro tsa rona di senola gore “tsalanō ea Modimo” ruri e botlhokwa go rona? (Yobe 29:4) Mme ebile a re lemoga molemo o o kwa godimodimo wa dilo tsa semoya? Jesu Keresete o ne a tshwantshetsa tlhokego e kgolo ya Bogosi ka ‘perela e le nngwe’ e e neng e le tlhotlhwa kgolo fela thata mo moreki a neng a ya go “bapatsa cotlhe tse o nañ nacō, a e rèka.” (Mathaio 13:45, 46) Ka gone Jesu o ne a bontsha gore motho yo o lemogang bomosola jwa boammaaruri jwa go bona Bogosi o tla bo a ikemiseditse go kgaogana le letlotlo la lefatshe go dira jalo. Fa Bogosi le dikgatlhego tsa jone, mme segolo bogolo tsalano le Jehofa, di raya mo go kalo mo go rona, re tla boloka “kamano nngwe le nngwe le lefatshe . . . e le motlhofo kafa go ka kgonegang.”—1 Bakorintha 7:31, Phillips.
“Re Amogetse Mōea o e Señ oa Lehatshe”
11, 12. (a) ‘Moya wa lehatshe’ ke eng? (b) Bakeresete ba amogetse moya ofe, mme o fapaana jang le moya wa lefatshe jeno?
11 Lebaka le lengwe la go sa dirise lefatshe go fetisa selekanyo ke gore ga go kake ga kgonega go ipelela botsalano le Jehofa fa re na le ‘moya wa lefatshe.’ (1 Bakorintha 2:12) Moya kana nonofo e e tlhagafatsang eo e laolang lefatshe la batho ba ba sa siamang ke wa bodimona ebile ke o o kgatlhanong le Modimo. Tlaseng ga taolo ya ga Diabolo, lefatshe le etleetsa bogagapa le dikeletso tsa nama e e koafetseng, go felela ka bobaba mo go Jehofa Modimo.—Yohane 14:30; Baefesia 2:1-3; 1 Yohane 5:19.
12 Moaposetoloi Paulo o ne a farologanya moya wa lefatshe le moya wa Modimo mme a bua jaana malebana le Bakeresete: “Me rona re amogetse mōea o e señ oa lehatshe, e leñ mōea o e leñ oa Modimo.” (1 Bakorintha 2:12) Ereka jaana tsela ya go akanya le boitshwaro jwa lefatshe di thulana le tlhotlheletso ya moya wa Modimo o o boitshepo le tao e e fitlhelwang mo Lefokong la gagwe, batho ba bomodimo ba tshwanetse go bihela moya wa lone. Mo boemong jwa seo, barati ba ga Jehofa ka tshwanelo ba tlhagolela le go bontsha loungo Iwa moya o o boitshepo e leng lorato, boitumelo, kagiso, bopelotelele, bopelonomi, molemo, tumelo, boingotlo le boikgapo.—Bagalatia 5:22, 23.
13. Ke eng seo Johane a neng a se kwala go 1 Yohane 4:1-6, a mme seno se amana ka gope le tiriso ya rona ya lefatshe?
13 Ka mo go kgatlhisang, moaposetoloi Johane yo o tsofetseng o ne a bontsha gore “mōea” wa Modimo wa boammaaruri o ne o tla ka phuthego ya Bokeresete ya mmaanete, eseng ka metswedi e e seng ya Bokeresete ya selefatshe. Go tswa foo a re: “Eo o itseñ Modimo oa re utlwa: eo e señ oa Modimo ga a re utlwe.” Ke boammaaruri, kgang ya ga Johane e ne e le “mōea.” Mme o ne a tlhalosa gore Bakeresete ga ba ‘bue jaaka lefatshe.’ (1 Yohane 4:1-6) Jalo re batlelang go dirisa lefatshe go fetisa selekanyo?
Go sa “Mathwe Gope kè Lehatshe”
14. Ke jang Bakeresete ba ba tloditsweng le balekane ba bone ba ba ineetseng ba tlhomologang jaaka ‘ba ba seng ba lehatshe’?
14 Mmereko le ditiro tse dingwe di dira gore go tlhokafale ka basupi ba ga Jehofa go “dirisanya le lehatshe” mo ditseleng tse di rileng. Mme ga re a tshwanela go ‘tshwarega thata mo go lone’ ka lebaka le lengwe gape. (JB) Jesu o ne a bolela gore balatedi ba gagwe ga se “ba lehatshe.” (Yohane 17:14) Jehofa, ka Keresete, o baakanyeditse ka poloko mo lefatsheng leno le le kafa tlase ga taolo ya ga Satane. (Bakolosa 1:13, 14) Ka go utlwa boammaaruri jo bo senotsweng jwa lefoko la ga Jehofa, Bakeresete ba ba tloditsweng ba ile ba itshepisiwa, kana ba dirwa boitshepo, ba tlhaolelwa go dirisiwa ke Modimo mo tirelong ya gagwe. Ka gone, bone, ga mmogo le balekane ba bone ba ba ineetseng ba “boidiidi yo bogolo,” ba ema ba tlhaolegile jaaka ‘ba e seng ba lefatshe’ leo le sa ineeleng mo boammaaruring jwa ga Jehofa. (Tshenolō 7:9; Yohane 17:16, 17; Yakobe 1:18; 1 Petere 1:22) Abo go tla bo go sa tshwanela jang gore batho ba ba ntseng jalo ba dirise lefatshe go fetisa selekanyo!
15. Go ya ka Yakobe 1:27, kobamelo e e itshekileng le e sa leswehalang e tlhoka eng?
15 Go sa nne ‘wa lefatshe’ go raya boitlhaodi tebang le dikgotlhang le dipolotiki tsa lefatshe. (Mathaio 22:21; Yohane 18:36, 37) Balatedi ba ba tloditsweng ba ga Keresete le balekane ba bone ba ba ineetseng ba tshwanetse gape ba tila boaka jwa semoya ka go itsalanya le lefatshe. Bophepa jwa boitsholo le jwa semoya di a tlhokwa mo go bone. (Baefesia 4:25-32; Yakobe 4:4) Go neelana ka kobamelo e e phepa le e e sa leswefalang go Jehofa, he, re tshwanetse ra se “mathwe gopè ke lehatshe” ka go sa inaakanye le maikutlo, puo kana boitshwaro tse di tlwaelegileng thata mo sethong se se leofileng le se se kgatlhanong le Modimo. (Yakobe 1:27) Re tshwanetse ra ikgolola mo go boleng ga lefatshe, thubakanyong, maanong a a senang tshiamo, jalo jalo. Ee, tlhokafalo ya go sa “mathwe gopè ke lehatshe” ke lebaka je lengwe ja go sa ‘dirise lefatshe go bapala gotlhe mo re ka go bonang mo go lone.’—Beck.
Go Nna ‘Boitshepelo Go Modimo Wa Rona’
16. Ke ka baka lang fa Baiseraele ba ne ba tshwanetse go itirela “makantsa ha dintlheñ” tsa diaparo tsa bone tsa seka-kobo?
16 Batho ba ga Jehofa ba farologane le lefatshe mabapi le ditsholofelo, ditebelelo le go dumalana le thato ya Modimo wa bone o o boitshepo. (Ekesodo 39:30) Ba tshwanetse ba itshupa ba le boitshepo go Modimo. Jalo he, batho ba Iseraele wa bogologolo ba ne ba tshwanetse go itirela “makantsa ha dintlheñ tsa diaparō tsa bōnè [tsa seka-kobo],” go na le mogala oo bobududu mo ntlheng ya lekantsa. Ba ne ba tshwanetse go dira seno gore ba se nne ‘mokgwa mongwe fela’ le Bamoaba. Baegepeto kana ba bangwe le go gakololwa gore ba ne ba tshwanetse go farologana jaaka batho ba ga Jehofa le gore ba tshwanetse go mo utlwa, ‘ba nna boitshepelo go Modimo wa bone.’ (Dipalō 15:37-41) Keletso ya go ‘itshepela Modimo wa rona’ e tshwanetse ya re tlhotlheletsa go itisa fa re dirisa lefatshe.
17. Maitlhomo a lefatshe a go bapala khumo a ka baya jang kamano ya rona le Jehofa mo kotsing?
17 Lefatshe le tlhomile matlho mo khumong, tumong le ditirong tse di seng phepa kafa semoyeng tse di ka hupetsang tumelo ya Mokeresete. Ka motlhala, go lelekisa dilo tse di bonalang le khumo, fa di dumelelwa go laola matshelo a rona, di ka nna tsa bo tsa re raela go dira phoso gore re bone poelo ya bogagapa, ka gone re baya kamano ya rona le Jehofa mo kotsing. (Diane 28:20; bapisa Yeremia 5:26-28; 17:9-11.) Ruri, ba ba dirisang lefatshe go ya bokgakaleng jwa gore ba bo ba dira telekiso ya dilo tse di bonalang go nna kamego e kgolo ya bone ba mo kotsing ya go kopanyelediwa mo ditlwaelong tse di sa ikanyegeng le go latlhegelwa ke tumelo ka ntlha ya go tlhokomologa dikgang tsa bone tsa semoya. Mongwe yo o atlegang mo kgwebong kana a huma o ka nna gape a “ipègèla godimo,” ka boikgogomoso a tsholeletsa dipono tsa gagwe kwa godimo ga kgakololo ya phuthego ya Modimo. (1 Timotheo 6:9, 10, 17) Seno ruri ga se tsela eo re ka ‘itshepelang Modimo’ ka yone.
18. Ke ka baka lang fa re sa tshwanela go nna le mokgele wa lefatshe wa go bapala dithoto tse di bonalang ka bontsi jo bogolo?
18 Jesu ka tshwanelo o ne a re: “Itiheleñ ditsala ka mahumō a a sa siamañ; gore, e tle e re a tlhaèla, di lo [Ditsala tsa lona tsa selegodimo, Jehofa Modimo le Jesu Keresete] cholèlè mo maagoñ a a sa khutleñ.” (Luke 16:9) Jalo, lefa gone re tlhoka dingwe tsa dilo tse di bonalang ebile re ka dirisa ditsompelo tse di ntseng jalo go tsweledisa dikgatlhego tsa Bogosi le go itirela Ditsala tsa selegodimo, mokgele wa lefatshe wa go bapala dilo tseno ka bontsintsi ga o a tshwanelwa go letlelelwa go bodisa dipelo tsa rona.—Luke 12:34.
19. Re tshwanetse ra leba jang mokgele wa lefatshe wa go iponela kgalaletso?
19 Mokgele o mongwe wa lefatshe ke go fitlhelela maemo, tumo le kgalalelo. Seno gantsi se tlhoka dingwaga-ngwaga tsa thutego e e kwa godimo, tlhatlogelo godimo ya tsa-loago le tse di tshwanang. Mme batho bao ba senkang go ikgalaletsa. Dikwalo di ba tshwantsha le bao ba jang dinotshe di le dintsi, mo go ka ferosang sebete. Ka gone re bala jaana: “Ga go molemō go ya dinotshe bobe: go ntse yalo ga se tlotlègō mo bathuñ go ipatlèla tlotlō.” (Diane 25:16, 27) Ka mo go tshwanang, go galaletsa bagaka ba lefatshe le bommampodi ga go kafa dikwalong, eleng sengwe seo batsadi ba Bakeresete nako tse dingwe ba ka fitlhelang go tshwanela go se tlhalosetsa babotlana ba bone ka bonolo. (Bapisa Ditihō 12:21-23.) Eleruri, pono e e tshwanetseng ya dikgang tse di ntseng jalo e botlhokwa gape fa re eletsa go nna re le ‘boitshepelo go Modimo wa rona’ le go tila go dirisa lefatshe go fetisa selekanyo.
Se ‘Dirise Lefatshe go Hetisa Selekanyo’
20, 21. Ke ka baka lang fa re sa tshwanela go dirisa lefatshe go hetisa selekanyo?
20 Jalo he, jaaka basupi ba ba ikanyegang ba ga Jehofa, re tshwanetse ra seka ra dirisa lefatshe go fetisa selekanyo. Re seka ra ‘tshwarega mo go lone’ ka go bo (1) “lobaka lo khutshahetse”; (2) “lehatshe yaka re le itse lea heta”; (3) botshelo jwa rona bo tshwanetse jwa ikaega ka kamano e e tlhokegang thata le Jehofa; (4) re tshwanetse ra bontsha moya wa Modimo, eseng wa lefatshe; (5) re tshwanetse ra se “mathwe gopè ke lehatshe”; mme gape (6) re tshwanetse ra nna ‘boitshepelo go Modimo wa rona.’
21 Re ka dira mono gotlhe ka thuso ya ga Jehofa fela. (Bapisa Sekaria 4:6.) E re ka jaana re na le tsholofelo ya Bogosi e e gakgamatsang, ga re a tshwanela go batla go dirisa lefatshe go fetisa selekanyo, jaaka ekete seo le se ntshang ke sone fela seo re se tlhokang. Mme ke eng seo tota se ka re thusang go ganana le ditsela le dikeletso tsa lefatshe?
A O A Gakologelwa?
◻ Ke “lehatshe” lefe leo le bolelwang go 1 Bakorintha 7:31?
◻ Ereka “mokgwa oa lehatshe yeno [o] heta,” Bakeresete ba tshwanetse go leba jang tiriso ya lefatshe?
◻ Ke go ya bokgakaleng bofe Bakeresete ka tshwanelo ba ka dirisang lefatshe?
◻ ‘Moya wa lefatshe’ ke eng, mme ke moya ofe o barati ba ga Jehofa ba o bontshang?
◻ Batho ba ga Jehofa ba farologana jang le lefatshe malebana le maitlhomo?
[Setshwantsho mo go tsebe 18]
Moreki o ne a rekisa sengwe le sengwe go reka “[perela e le] ñwe e e tlhwatlhwa e kgolo”
[Setshwantsho mo go tsebe 20]
Makantsa a a neng a le mo diaparong tsa Baiseraele a ne a ba gakolola gore ba ne ba tshwanetse go itshupa ba le boitshepo go Jehofa. Keletso ya go ‘itshepela Modimo wa rona’ e tshwanetse ya dira gore re itise fa re dirisa lefatshe