Busetsa Pelo ya Gago Kwa go Jehofa

A o ne wa godisiwa ke batsadi ba e leng Basupi ba ga Jehofa? Lefa go ntse jalo, a jaanong o tsidifetse mo tseleng ya boammaaruri go na le jaaka o ne o ntse pele? Fa go ntse jalo, boikitsiso jo bo latelang bo tshwanetse jwa go ama ka mo go kgethegileng.

MAIKUTLO a le mantsi a a ganetsanyang a gogomoga mo pelong ya motho yo mmotlana. Ka motlhala, o ka ne o batla go nna le kgololesego e kgolwane. O lebagane le ditsela tsa botshelo tse di lebegang di kgatlhisa mme di thulana le se o se rutilweng. Fa gongwe melemo e e ithutilweng mo bonyaneng e a tlhokomologiwa. Gongwe se se go diragaletse, le eleng fa batsadi ba gago e le batlhanka ba ga Jehofa Modimo.

Fano le fale, batho ba basha ba katogela kgakajana le phuthego ya Bokeresete. Fa seo se go diragaletse, kwa ntle le pelaelo o gakologelwa dilo tse o di ithutileng ka ga Jehofa. Ka nako nngwe o ka nna wa bo o ne wa ikutlwa o atamalane le Modimo ebile o mo rapela ka metlha. Kwa ntle le pelaelo, Jehofa o ne a go tlhokomela fela jaaka a dirile ka batho ba gagwe ba bogologolo, Baiseraele. A tshwantsha tšhaba e le ngwana yo monnye, Jehofa o ne a re: “Ka lekisa Eferaima [Baiseraele] go tsamaea ka dinaō; ka ba chola mo mabogoñ a me; . . . Ka ba gōga ka megala ea motho, ka dikgōlè tsa loratō.”—Hosea 11:3, 4.

Abo go ama jang ne! Ngwana yo monnyennye yo o thekeselang a thusiwa go tsamaya ka dikgole di tshwerwe ke motsadi yo o lorato! Ka go tshwarelela mo go tsone ngwananyana, o ne a ka itshegetsa mme a tila go wa. Jaanong, a kamego ya ga Jehofa ka wena e ne e se bonolo fela jalo? Ele ruri lorato lwa gagwe lo ne lwa bonala ka tlhokomelo e o neng wa e amogela e ka ne e le mo batsading ba gago ba ba boihang Modimo kana mo go ba bangwe kwa Holong ya Bogosi. A tlhokomelo e e ntseng jalo ga e ka ke ya tshwantshanngwa le go gogwa ga gago “ka dikgōlè tsa loratō”? Ka mo go phepafetseng, batsadi ba gago le bagolwane ba phuthego ba ne ba eleditse go go thusa go tila go ikgobatsa mo maikutlong, mo mmeleng le mo semoeng. Ba ne ba batla o nna mo tseleng ya boammaaruri.—Bapisa 3 Yohane 2-4.

Jaanong seo sotlhe se ka lebega e le kgakologelo fela. Fa o leba kwa morago, o ka nna wa akanya ka mabaka a mantsi a a dirileng gore o katogele kgakajana le tsela ya boammaaruri.

Pelo E E Etsaetsegang

Ke ka ntlha yang fa bontsi jwa Baiseraele ba bogologolo ba ne ba katogela kgakajana le kobamelo ya boammaaruri? Ka ntlha ya gore “pelo ea bōnè e ne e sa siamèla” Jehofa. (Pesalema 78:37) Dikgatlhego tse dingwe di ka pitlaganya lorato lwa Modimo. Go ya ka Jesu Keresete, ditlhobaelo tsa lefatshe leno, maatla a mahumo le “ditlhapèlō tsa botshelō yono” di ka hupetsa lefoko la Modimo le le kileng la bo le jadilwe mo pelong.—Luke 8:14; Mareko 4:19.

“Ditlhapèlō tsa botshelō yono” balekane ba sekolo ba dira gore di ikuele tota, ga mmogo le dikanamiso tsa papatso le boitlosobodutu. Ka sekai, motho mongwe yo mosha, yo batsadi ba gagwe ba neng ba mo rutile Lefoko la Modimo go tswa bonyaneng, o ne a katogela kgakajana le tsela ya boammaaruri fa a sena go tshwara dingwaga tse lesome le borobabongwe. “Ke ne ke batla go lekeletsa gore botshelo bo ntse jang le go dira dilo dingwe tse batho ba basha ba dirileng gore e ne ekete di a ipedisa,” o ne a ipolela jalo. “Ka jalo ke ne ka fudugela kwa ntlwaneng ya me mme ka simolola lefereo le go ya kwa diphathing tse dintsi go ikgotsofatsa fela. Ka bofefo fela ka emisa go ya dipokanong tsa phuthego. Go ise go e kgakala ka bo ke setse ke tlogetse boitsholo jwa Bibela.”

Legale, ga se botlhe ba ba katogelang kgakajana le tsela ya boammaaruri ba ba kopanyelediwang mo phosong. Bangwe ba felelwa ke kgatlhego fela mo go obameleng Jehofa. Gongwe ba ka ne ba ise ba ke ba dire boammaaruri go nna jwa bone. Gongwe sekao se se maswe sa botsadi kana tlhokomologo di ne tsa tlatseletsa go sa tseeng ga bone boammaaruri tsia thata. Jaanong tse dingwe tse di tshwanang jaaka mathata a lelapa, go dira botshelo, gongwe keletso e e maatla ya go batla mokgele o o rileng di ne tsa tlatsa dipelo tsa bone.

A mme ele ruri o ka ipela fa o neela tlhokomelo e nnye go Modiri wa gago? A go latela dikeletso tsa pelo ya gago go tla gogela boitumelong jwa mmaanete?

Pelo—“E Boherehere Bogolo Go Dilō Cotlhe”

“Pelo e boherehere bogolo go dilō cotlhe, e botlhoko thata: e mañ eo o ka e itseñ?” (Yeremia 17:9) Ee, pelo ya gago e ka kgona go go tsietsa—go go gobatsa fela. Se se ne sa diragalela lekgarejwane le le umakilweng go le pele. O ne a ipolela: “Pele fa ke ne ke dira sengwe le sengwe sa boratwa-e-pelo, go ne go le monate. Mme ya re moragonyana, lefa go ne go ntse go balola jalo, ke ne ke lebega ke sena boipelo jwa mo teng. Sengwenyana se ne se lebega se tlhaela. Boitumelo e ne e le jwa maitirelo fela. Ke ne ka tlhomola pelo.”

Ba bantsi ba ba katogetseng kgakajana ka go tshwana ba dumetse fa ba bone ‘boitumelo jwa maitirelo.’ Ka ntlha ya botlhoko jwa pelo le lolea lo lo neng lwa nna gone ka go latela pelo ya bone e e bosula jaanong ba itse gore “e boherehere bogolo go dilō cotlhe.”

Fa o lebelela botshelo jwa gago, a o ikutlwa ka tsela e e tshwanang? A dilo tse pele o neng o akanya gore ke tse di ratwang ke pelo ya gago ele ruri di go tliseditse mogopolo mongwe wa kgotsofalo ya maikutlo? A tsela ya gago ya botshelo e go tliseditse kagiso ya mogopolo le boitlotlo?

Fa o sena kagiso ka bowena, ele ruri o ka se itumele. Fa pelo ya gago e le mo ‘bohutsaneng,’ ga go selekanyo sepe sa setshego se se ka e fodisang. (Diane 14:13) Ka motlhala, mosha mongwe a le dingwaga tse di lesome le boroba bobedi o ne a fapoga maemo a Bibela a a neng a a rutilwe mo botshelong jotlhe jwa gagwe. Lefa go le jalo, fa a ntse a latetse “botshelo jwa botlhaswa le jwa menate,” O gopola seno: “Ke ne ka simolola go akanya ka isagwe. Ke eng se se tla ntiragalelang fa e ka re mo dingwageng tse tlhano ke bo ke ntse ke ganeletse mo tseleng ya me? Ke ne ke sa kgone go tswelela ke itlhatswa pelo gore tota ke a itumela. Kwa ntle go tsholofelo epe ke ne ka ikutlwa ke le mosetsana a le nosi mo lefatsheng yo o sa itumeleng gotlhelele!”

Ka jalo, he, fa o tlogetse tsela ya boammaaruri, ke jang o ka ikamogelelang boitumelo jo e leng jone gape? Mopesalema Dafide o fa lesedi fa a ne a kokotlelela Modimo: “Nthuta tsela ea gago, Yehofa; ke tla tsamaea mo boamarureñ yoa gago: Kitlanya pelo ea me e tlè e boihè leina ya gago.” (Pesalema 86:11) Dafide o ne a itse gore pelo e e kgaoganeng mo dikeletsong tsa yone ke kotsi e kgolo. Ka gone, pelo ya gago e tshwanetse ya fetoga le seemo gore maatla a yone otlhe a ka tlhokomela selo se le sengwe—‘tirelo e e boitshepo’ go Jehofa le go nna wa peloyotlhe mo go boifeng Modimo wa rona. (Baroma 12:1, 2) Mme ke jang boemo jono jo bo eletsegang jwa pelo bo ka nnang gone?

Pelo Ya Gago E Ka Fetolwa

Selo sa ntlha, o tshwanetse go lemoga gore pelo—pelo ya gago—e ka fetolwa. Ka batho ba gagwe ba ba bosula, Jehofa o ne a re: “Ke tla ba naea pelo e le ñwe hèla [e e kitlanyeng], ke tla tsenya mōea o mosha mo go lona; me ke tla ntsha pelo ea sekalencwè mo nameñ ea bōnè, me ke tla ba naea pelo ea senama: Gore ba sepelè mo melaoñ ea me, ba tshegetsè ditaō tsa me, ba di dihè: me ba tla nna batho ba me, le nna ke tla nna Modimo oa bōnè.” (Esekiele 11:19, 20) A bopelonomi jo bo lorato jwa bomodimo! Mme a ko o akanye—dipelo tse di thata jaaka mantswè di nna bonolo, di utlwa, di ikemiseditse go amogela mafoko a semoya.

Lefa go ntse jalo, a mme Jehofa o dira dikgakgamatso go tlisa phetogo e e ntseng jalo? Kana, a go na le karolo nngwe e o e dirang go seno? O tshwanetse go dira maiteko go rulaganya mo pelong ya gago dilo tse o di gakologelwang ka ga Jehofa. (Diane 16:1) Akanyetsa boikitsiso jono. Oketsa kitso go seno. Ke leng la bofelo o neng o bala Bibela kana thuso ya thuto e e baakanyeditsweng ke phuthego ya ga Jehofa? Kwa ntle le pelaelo o na le dingwe tsa dibuka tseno mo legaeng la gago kana o itse kwa o ka di bonang teng. Ke ka ntlha yang ka bopelo-e-phepa o sa simolole go di bala? Go direla mo kitsong ya boammaaruri ya Bibela go ka fetola pelo ya gago le tsela ya gago ya botshelo.—Diane 2:10-14.

Mo go baleng Bibela ka boyone, gongwe o ka fitlhela Pesalema 25 bogolo e gomotsa. Akanyetsa ka dikopo tse di ntseng jalo go Jehofa jaaka “u se ka ua gakologèlwa maleo a yale ke sa le lekau” mme “u tlo u ichwarèlè boikèpō yoa me. gonne bo bogolo.” Mme akanya gore a bo go gomotsa jang go itse gore “maōma a ga Yehofa a na le ba ba mmoihañ.”—Pesalema 25:7, 11, 14.

Lefa go ntse jalo, thuto e e ntseng jalo ya Bibela e tshwanetse go feta fela go bapala dintlha. Re tshwanetse go nna le boikutlo jo bo tshwanang le joo jwa mopesalema, yo o neng a re: “Ke beile lehoko ya gago [Jehofa] mo peduñ ea me, gore ke se ka ka gu leohèla.” (Pesalema 119:11) O ka ‘baya’ jang lefoko la ga Jehofa? Morago ga go bala Bibela le dikgatiso tse di tshwanang tsa “motlhanka eo o boikañō le eo o botlhale,” ipotse: Tota kgakololo eno e mosola go le kana kang? A e tla nthusa go itumedisa Jehofa le go tila go opa ga pelo mo go sa tlhokafaleng? Ke ka e dirisa jang? A kgakololo eno e e dirang ga e bontshe gore Ntate wa selegodimo o itse se se ntshiametseng?—Mathaio 24:45-47.

Fa o tsenya molao wa Modimo mo pelong ya gago, he dikgato tsa gago ga di ketla di ‘relela.’ (Pesalema 37:31) Go busetsa pelo ya gago kwa go Jehofa, lefa go ntse jalo, gantsi o tla tlhoka thuso e e lorato ya Mosupi wa ga Jehofa yo o godileng. Ee, gongwe o ka tlhoka mongwe go simolola mo ‘tshimologong’ le go go ruta ‘dilo tsa tshimologo tsa mafoko a Modimo.’ (Bahebera 5:12) Bagolwane ba phuthego ba tla itumelela go thusa. Goreng o sa ikopanye le bone?

Disa Bokopano jwa Gago

Batho ba ka ‘haposa pelo ya gago’ ga motlhofo go dira molemo kana bosula. (Bapisa 1 Dikgosi 11:3, 4.) Gongwe e ne e le tlhotlheletso ya mekgwa e e repileng le “puo ya boikgantsho” ya ditsala tsa gago tse di neng tsa tlatseletsa go katogeleng ga gago kgakajana mo tseleng ya boammaaruri. Batho ba ba ntseng jalo ba ka bolela: ‘Ga go ope yo o mpolelang gore ke dire eng! Ke ka ntlha yang o ikgagamaletsa dilo mo go kalo?’ A mme ele ruri ba gololesegile? Gotweng ka mekgwa mengwe e e seng ya bokeresete e ba ka neng ba le botlhankeng jwa yone? (Bapisa 2 Petere 2:18, 19.) A batho bano ba go thusa go dira dilo tse di tla nnang le molemo wa bosakhutleng? Nnyaa, baa go kgoreletsa. Ka jalo ikgaoganye le ditsala tse di maswe tse di ntseng jalo mme o batle batho ba ba godileng, bao ba leng “botlhale” mo ponong ya Modimo!—Diane 13:20; 1 Bakorintha 15:33.

‘Modimo o Mogolo go Feta Pelo Ya Gago’

Motho mongwe yo mmotlana yo o neng ya re a le dingwaga tse di lesome le boroba bobedi a kopanyelediwa mo mekgweng e e seng ya bokeresete o ne a bolela: “Lebaka le legolo la go bo go ne go le bokete gore ke boele mo tseleng ya boammaaruri ke gore ke ne ke ikutlwa ke sena mosola. Ke ne ke dumela gore sotlhe se ke se dirileng se ne se le maswe mo e leng gore Jehofa o ne a se ketla a intshwarela kana a nkamogela gape.” Lefa pelo ya gagwe e ne e mo atlhola, fa nako e ntse e ya o ne a bona kutlwelo-botlhoko ya Modimo. Mo maemong ano, abo dikwalo tse di tshwanang le 1 Yohane 3:19, 20 di ka gomotsa jang ne! Koo re a bala: “Re tla itse ha re le ba boamarure ka gōna mo, me re tla icholohetsa pelo ha pele ga ōna, Mo go se hèla pelo tsa rona di re nyatsañ mo go shōna; ka Modimo o le mogolo go heta dipelo tsa rona, me o itse dilō cotlhe.”

Go boammaaruri, dipelo tsa rona di ka re atlhola. Lefa go le jalo Jehofa o bona go feta maleo a rona. O bona “maōma a pelo” otlhe. (Pesalema 44:21) Bogolo jwa kitso ya gagwe bo mo kgonisa go utlwa dithapelo tsa rona tse di tlhoafetseng tsa boitshwarelo ka kutlwelo-botlhoko. Fa re ipolela dibe tsa rona re bile re fetola tsela ya rona, Modimo o iketleeleditse go phimola maleo lefa a le magolo mo motheong wa setlhabelo sa thekololo sa ga Jesu. Lebaka la gore motho o ikutlwa a garoga pelo le bontsha gore ga a ya kgakala mo a ka se tokafaleng. Mme go bona thuso ya semoya le go fola, motho yo o ntseng jalo gape o tlhoka go bona thuso ya Dikwalo ya bagolwane ba phuthego. (Isaia 1:18; 1 Yohane 2:1, 2; 3:21; Yakobe 5:13-16) Fa o katogetse kgakajana mo boammaaruring, a o tla tsaya dikgato tse di tlhokafalang go tokafala? Re go kgothaletsa go dira jalo.

Jehofa O tla Baakanyetsa Thuso

Ka jalo ‘tsamaisa pelo ya gago,’ go na le go e leseletsa go go timetsa. Godisa poifo e e tshwanetseng ka Jehofa. Bibela e re: “Rure go na le tuèlō: le cholohèlō ea gago ga e ketla e kgaolwa.” (Diane 23:17-19) Mme a bo e le tsholofelo e e eletsegang jang ne—isagwe e e senang bokhutlo mo lefatsheng le lesha le le tlisitsweng bontleng jwa paradaise ke puso ya bogosi jwa Modimo! Akanya tlhe o sa tlhole o tlhaselwa ke ditshekamelo tsa pelo ya gago e e boleo. Go feta moo, maemo a lefatshe a bontsha gore re tseneletse thata mo malatsing a bofelo mme ka bofefo tsholofelo eno e tla tloga e nna ya sebele. Go gagamalela go bona tsholofelo eo ruri go na le mosola!—Mathaio 24:7-14, 34; 2 Timotheo 3:1-5; 2 Petere 3:13; Luke 23:43; Tshenolo 21:3, 4.

Lebaka la gore Jehofa o re neela isagwe e e molemo-lemo mme ebile o re thatahaletsa go e bona le tshwanetse la re atametsa thata go ene. Kamano eno ya botho ke tuelo e e humileng ka boyone. Morago ga go tokafala ga gagwe semoeng, lekgarejwane le le umakilweng go le pele le ne la re: ‘Ke ikutlwa ekete Jehofa ke Ntate gape.’ Kamano e e atamalaneng le Jehofa e tlisa segakolodi se se phepa, kagiso ya moteng le boitlotlo. Mo godimo ga moo, ka go boela go Jehofa le phuthego ya gagwe, o tla ipelela gape botsalano jwa mmaanete.

Gone, ga go motlhofo go fetola pelo. Lefa go le jalo, Jehofa o tla segofatsa maiteko a gago. Moya wa gagwe o tla go thusa go “thatahadiwa ka nonohō mo mothuñ eo o kwa teñ.” (Baefesia 3:16) O tla fitlhela gore jaaka o tswelela mo thapelong ebile o ithuta semoeng, go kopanela le Basupi ba ga Jehofa le go laya pelo ya gago, ntwa e tla nna motlhofo. Pelo e tla simolola go nna le keletso ya se se molemo. E tla batla go boela go Jehofa.

“U se ka ua boiha, gonne ke na nau: u se ka ua kgaoga pelo, gonne ke Modimo oa gago: ke tla gu thatahatsa; E, ke tla gu thusa.” (Isaia 41:10) Se ke se Jehofa o tla se direlang botlhe ba ba mo ratang tota. Fa o katogetse kgakajana mo boammaaruring mme gone pelo ya gago e go tlhotlheletsa go dira se se siameng, Modimo ‘ele ruri o tla go thusa’ ka moya wa gagwe o o boitshepo le ka bangwe ba ba nang le boikarabelo mo phuthegong ya bokeresete. Ka jalo, bagolwane ba ba tlhophilweng ba tla itumelela go baakanyetsa ka thuso ya semoya. (1 Bathesalonia 5:12; Bahebera 13:7) Itseele sebaka ka thuso ya bone e e lorato. Ke ka ntlha yang o sa e batle go ne jaana?