Boloka Tekatekano ya Bokeresete

KE MANG yo o iseng a ke a bone ba bangwe ba wa kana a itemogela go wa ka boene? Ka go tlhaela boitemogelo le tiriso ya mesifa, bananyana baa wa. Batsofe ba ka ne ba le bokoa go boloka tekatekano ya bone mo mafelong a a relelang kana a a welelelang. Go wa go ka tsalwa ke go palelwa ke go bontsha boitiso jo bo tshwanetseng kana go nyatsa maemo a a kotsi. Ee, tekatekano ya mmele e ka latlhega ka bofefo le ka mo go sa lebelelwang. Ka mo go tshwanang, Bakeresete ba ka latlhegelwa ke tekatekano ya bone ya semoya.

Gareng ga mabaka a a ka ngotlang tekatekano ya semoya ke go sa kgathale, boitsholo jo bo maswe, boitloso-bodutu jo bo feteletseng le go ikatla tlhogo ka mo go sa tlhokafaleng mo tirong ya boitshediso. A mangwe a ano a ka bo a setse a senya tekatekano ya gago ya Bokeresete kana ya lelapa la gago?

Go Tila go Sa Kgathale

Go sa kgathale go tlwaelegile thata gompieno. Banna ba ka nna ba tlhokomologa ditlhokafalo tsa boikutlo le tsa semoya tsa basadi le bana ba bone. Basadi ba ka bontsha kamego e potlana fa banna ba bone ba tla go bone go bontsha kutlwisiso, kemo-nokeng le lorato lo lo utlwalang. Bahiri ba tlhasetswe ke badiri ba ba sa tlhokomeleng thata ka mekgele e e ikaeletsweng ya poelo le molemo wa khamphane le dikgatlhego tsa yone. A lebane le tlhokomologo e e anameng mo go kana tebang le maikarabelo le ditiro, Mokeresete o tlhoka go itisa kgatlhanong le go jwelwa ke moya o o ntseng jalo wa go sa kgathale.

Go tila go ineela mo go sa kgathaleng, re dira sentle go gakologelwa kgakololo e e latelang e e tlhotlheleditsweng: “Leha e ka bo e le eñ se lo se dihañ, lo se dihè ka pelo eotlhe, yaka e ka bo e le go dihèla Morèna, e señ batho; Lo nntse lo itse ha tuèlō ea boshwa lo tla e amogèla mo Moreneñ.” (Bakolosa 3:23, 24) Fa re amega ka mmaanete ka go itumedisa Mmopi wa rona le Morwawe, seno se tla bontshiwa mo go direng ga rona tiro e e mosola le go sa senye nako.

Ithatafatse Kgatlhanong le Boitsholo jo bo Maswe

Tlhokomologo e e anameng thata ya maemo a boitsholo a Bibela le yone gape e ka nna pōpō ele ruri mo go bolokeng ga Mokeresete tekatekano ya gagwe ya semoya. Moaposetoloi Paulo o ne a gakolola badumedi-ka-ene kwa Korintha: “Le gōna a re se diheñ boaka, yaka bañwe ba bōnè [Baiseraele] ba kile ba diha, me ba shwa ka letsatsi le le leñwe hèla ba le bothousanda ba ba mashomè mabedi le boraro.” (1 Bakorintha 10:8) Moaposetoloi o ne a supela go tiragalo e e neng ya diragala fa Baiseraele ba ne ba thibeletse mo magwatateng a Moaba pele fela fa ba tloga ba tsena mo Lefatsheng la Tsholofetso. Ka nako eo fela ba ne ba hepisediwa mo thaelong ka go amogela ditaletso tsa go ipela mo medihong le basadi ba bantle ba ba obamelang medimo ya disetwa. (Dipalō 25:1-9) Abo matswela a a botlhoko a gatelela jang ka maatla bokotsi jwa go itsalanya le batho ba ba senang sepe le thato ya bomodimo!

Ka jalo, go boloka boemo jo bo phepa jwa boitsholo, ka botlhale re ‘latela tshiamo, le tumelo, le lorato, le kagiso, re na le ba ba bitsang Morena ka pelo e e itshekileng’ (2 Timotheo 2:22) Go behela ga rona bokopano jo bo maswe go tla akaretsa go tila dibuka tse di buang ka bonna le bosadi, dibaesekopo le dithulaganyo tsa dikeletso tse di phoso. Gape, re dira sentle go thatafatsa megopolo ya rona ka go e tlatsa ka dintlha tse di phepa go tswa mo Lefokong la Modimo​—Bafilipi 4:8.

Laola Boitloso-Bodutu

Morwa Modimo o ne a bontsha gore “ditlhapèlō tsa botshelō yono” di ka hupetsa kanaanelo ya dilo tsa semoya. (Luke 8:14) Ke ka gone Bakeresete ba boammaaruri ba gagamalelang go nna ba tsogile gore boitloso-bodutu ga e nne jone selo sa botlhokwa jo bogolo mo matshelong a bone. Ga bo a tshwanelwa go letlelelwa gore bo itlhakanye ka mo go sa tlhokafaleng le nako e e senngwang mo go baleng le go tlhatlhanya ka Lefoko la Modimo, go bolela “mahoko a a molemō,” go arabela ditlhokafalo tsa ba bangwe le go phuthega le batho ba tumelo e e tshwanang e e tlhokegang.

Le eleng fa di le tumalanong le melaometheo ya tshiamo, ditiro tsa maipelo ga di ketla di tlisa kgotsofalo ya mmaanete fa go itlhapedisiwa ka mo go feteletseng. Maipelo a a ikuelang mo maikutlong a tshwana le letswai mo dijong. Ka ditekanyetso, go iphokisa phefo, boikhutso kana maipelo di ka itumedisa. Mme fa di feteletse di ka Iwatsa, ka go bo di tlogela motho a ikutlwa a le lolea ka go bo a seka a fitlhelela sepe se se mosola wa boammaaruri.

Mo godimo ga moo, mo boitloso-bodutung Mokeresete o dira sentle go gakologelwa gore, selo sa ntlha ebile e le se se golo, ke motlhanka wa Modimo. Seno se ka mo thusa go tila go bontsha moya wa go phadisanya le eleng go tsaya metshameko ka masisi thata, gongwe go ya bokgakaleng jwa go ikgobatsa le ba bangwe.​—Bagalatia 5:26.

Tekatekano kwa Tirong ya Boitshediso

Kwa tirong ya boitshediso, gape, go na le tlhokafalo ya tekatekano. Go botlhokwa gore batlhanka ba Modimo ba bereke go itlamela le baratiwa ba bone, go “gopola dilō tse di tlotlègañ, e señ mo ponoñ ea Morèna hèla, e leñ le mo ponoñ ea batho.” (2 Bakorintha 8:21) Ka go dira tiro ka boikanyegi, Mokeresete o ka tshegetsa maiteko a gagwe go thusa ba bangwe semoeng le ka dilo tse di bonalang. Fa tiro ya boitshediso e baya ditopo tse di ntsi mo go ene mo a salelwang ke nako e potlana le nonofo go thusa ba bangwe ka kgomotso ya semoya, ka botlhale o dira dipaakanyo mo matshelong a gagwe.

Go a kgothatsa ele ruri go bona batho bangwe ba lekanyetsa ditiro tsa bone tsa boitshediso go nna le nako e e oketsegileng ya ditiro tsa semoya tse di botlhokwa. Ka sekai, mo lelapeng le lengwe, barwadi ba babedi ba ne ba kgaogana tiro ya nako e e tletseng mo ofising, mongwe le mongwe a bereka malatsi a mabedi le halofo mo bekeng mo boemong jwa a le matlhano. Se se ne sa kgonisa mongwe le mongwe wa bone go senya mo e ka nnang dioura tse di 100 ka kgwedi ka maiteko a go thusa batho mo tikologong ya bone go amogela kitso ya Bibela.

Fela jaaka go wa ga mmele go ka thibelwa, tatlhegelo ya tekatekano ya semoya le gone e ka tilwa ka go ikaga semoyeng ka go ithuta Lefoko la Modimo le go kopanela le badumedi-ka-rona. Gape, jaaka re intsha-setlhabelo go abalana boammaaruri jwa Bibela le ba bangwe, re itemogela boitumelo jo bogolo jo bo nnang gone ka go aba re bile re thusiwa go tlhoma matlho a rona mo dilong tse di botlhokwa ele ruri tsa botshelo. (Ditihō 20:35) Ka go boloka tekatekano ya semoya he, re ka lebelela ka tsholofelo mo isagweng, “gonne Modimo ga o tshiamololō ea gore, o ka lebala tihō ea lona, le go rata leina ya ōna mo lo go bonyweñ.”​—Bahebera 6:10.