“Kagishō ea Modimo e e Hetañ Tlhaloganyō Eotlhe”

“Kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.”​—Bafil. 4:7.

1. Ke ka ntlhayang fa moaposetoloi Paulo a ne a itse gore batho ba ba boifang Modimo ga ba na lebaka la tlhobaelo e e sa tlhokafaleng?

MOAPOSETOLOI Paulo wa Mokeresete o ithutile go tswa boitemogelong gore batho ba ba boifang Modimo ga ba na lebaka la go tlhobaela mo go sa tlhokafaleng, gonne Jehofa o na le bona. Paulo o ne a kile a golegwa, a itewa, a kgobotlediwa ka maje, gantsi o batlile aa swa, ebile o kile a nna mo dikotsing tse dintsi, le eleng mo bakaulengweng bao eseng bone. Mme Modimo ga o ise o ke o mo latlhe. Moaposetoloi yo o ne a rapela Rraagwe wa selegodimo ka tlhoafalo ka metlha yotlhe, a latlhela ditlhobaelo mo go ene mme a sa swabisiwe ka gope.​—2 Bakor. 4:7-9; 11:23-27.

2. Fa Bakeresete-mmogo le Paulo ba ne ba ka latela kgakololo ya gagwe e e kwadilweng go Bafilipi kgaolo ya bone, temana ya borataro, ba ne ba tla thusega ka eng?

² Ka jalo Paulo o ne a tlhomamisegile tota fa a ne a kgothaletsa Bakeresete-ka-ene gore ba se ka ba tlhobaediwa ke sepe, mme ba itsise Modimo ditōpō tsa bone, ba mmolelela tsotlhe ka thapelo le kokotlelo di na le malebogo. Go dira jalo go ne go tla ba thusa ka eng? Moaposetoloi yo o tswetsepele ka go re: “Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.”​—Bafil. 4:6, 7.

Kagiso e e “Hetañ Tlhaloganyō Eotlhe”

3. (a) “Kagishō ea Modimo” ke eng? (b) Fa re na le kagiso e e neelwang ke Modimo, ke ka ntlhayang fa re sena lebaka la go phikanngwa ke tlhobaelo?

³ “Kagishō ea Modimo” ke boiketlo le thethebalo tseo di ipelelwang ke basupi ba ga Jehofa ba ba ineetseng le eleng gareng ga maemo a a thata tota. E tliswa ke kamano ya botho e e gaufi-ufi le Rraarona o o kwa legodimong. Ereka re le bao re nang le kagiso e e ntseng jalo e e tswang go Jehofa, re letlelela moya o o boitshepo wa Modimo gore o re tlhotlheletse ebile re bofefo go latela ketelelo-pele ya ona. Tota-tota, re rapelela moya oo, gammogo le leungo la ona la kagiso. (Luke 11:13; Bagal. 5:22, 23; Baef. 4:30) Ka gone, ga re na lebaka lepe la go phikanngwa ke tlhobaelo, ka gobo re itse gore ga go sepe se se ka diragalang re se kitla re thusiwa ke Modimo. (Bapisa Ditiho 11:26.) Eleruri, Jehofa o dira gore batlhanka botlhe ba gagwe ba ‘robale mo kagisong.’​—Pes. 4:8.

4, 5. (a) Fa ba bangwe ba bapisiwa le Basupi ba ga Jehofa, ba na le mofuta ofe wa kagiso? (b) “Kagishō ea Modimo” e farologana jang le kagiso eo bao ba sa direleng Modimo ka boikanyegi ba ka nnang le yone?

⁴ Fa batho ba bantsi ba bapisiwa le Basupi ba ga Jehofa, ba ka ne ba na le thuto ya lefatshe e e oketsegileng kana kgono e kgolwane mo ditemeng tse di rileng tsa maiteko a batho. Legale ba na le mathata, mme ba ikanya gore ba tla iponela ditharabololo tse di tshwanetseng. Ka gone, ba ikutlwa ba sireletsegile tota, ba sa tlhobaele thata kaga isagwe ya bone ya botho. Ba bonala ba le mo kagisong, ba ipelela boiketlo jo bo rileng. Ebu, Dikwalo di umaka le eleng ‘letlhogonolo [kagiso] la baikepi’!​—Pes. 73:3.

⁵ Lefa go ntse jalo, “kagishō ea Modimo” e farologane gotlhelele. Ga e a thaiwa mo go ikgantsheng le mo ntlheng ya gore dithuto tsa batho di tla atlega ka metlha. Paulo o rile kagiso e e neelwang ke Modimo eno e ‘feta tlhaloganyo yotlhe’ kana e ‘gaisa mogopolo otlhe.’ Dithanolo tse dingwe di e bitsa “kagiso eo ya Modimo, e e leng kgolwane thata bogolo go seo re ka se tlhaloganyang.” (Bafil. 4:7, New World Translation of the Holy Scriptures; The New American Standard Bible: New Testament; The Jerusalem Bible) Ee, bao ba direlang Jehofa ka boikanyegi ba na le thethebalo e batho ka kakaretso ba senang nayo kana e ba ka e tlhaloganyang.

6. (a) Go bonala leng segolo-bogolo gore re na le “kagishō ea Modimo”? (b) Fa re santse re letile gore Jehofa a arabele kgang eo re e rapeletseng, a re na le thuso epe? (c) A go ‘latlhela merwalo ya rona go Jehofa’ goa nitamisa semoyeng, mme ke ka ntlhayang o araba jalo?

⁶ Gore ekane bao ba ineetseng go Jehofa eleruri ba na le “kagishō ea Modimo” go bonala thata-thata fa dilo tse di ba amang tota mme ba sa kgone go di laola di ba diragalela. Ka e le batho, ga ba kgone go dirisana le ditlhobaelo tse di ntseng jalo. A ka dinako dingwe re iphitlhela mo maemong ano? Abo go tshwanela jang he gore re rapele ka tlhoafalo, re tlhamaletse mo ditōpong tsa rona gammogo le mo go lopeng thuso kana kaelo ya bomodimo! (Bapisa Baatlhodi 6:36-40.) Morago ga foo, re tshwanetse go letela Jehofa gore a arabele. Kgabagareng, fa re na le “kagishō ea Modimo,” re ka lemoga thuso ya moya o o boitshepo wa ga Jehofa mme ra nna re ritibetse, ka bopelotelele re letetse go bona ka moo Mogodimodimo a tla rarabololang bothata joo ka gone. Go dira jaana ga se boeleele, ka gobo mopesalema Dafide o rile: “Latlhèla morwalō oa gago mo go Yehofa, me o tla gu kokotletsa: ga a ketla a leseletsa mosiami gopè go tshikiñwa.” (Pes. 55:22) Go feta moo, fa bothata joo bo setse bo rarabolotswe mme teko e fetile, re tla itse gore ‘Modimo o o neelang kagiso’ o arabile dithapelo tsa rona.​—Bar. 15:33.

E Dibelela Dipelo le Megopolo

7. (a) Mo Dikwalong, “pelo” gantsi e kaya eng? (b) Fa re na le “kagishō ea Modimo,” ke ka ntlhayang fa re se kitla re ‘tshwenyega ka ntlha ya badira-bosula’?

⁷ Paulo o rile “kagishō ea Modimo” e tla ‘dibelela dipelo tsa rona le megopolo ya rona.’ (Bafil. 4:7) Thanolo e nngwe ya Bibela e bitsa kagiso eno “mophato wa masole o o dibelang dipelo tsa lona le megopolo ya lona.” (Weymouth) Mo Dikwalong, “pelo” gantsi e kaya bodulo jwa lorato kana jwa tlhotlheletso. (Ekes. 35:21, 26, 29; Pes. 119:11) Fa re tlhorontshiwa ke tlhobaelo e e sa tlhokafaleng, go rata le ditlhotlheletso tsa rona di ka nna tsa koafala mme re ka itshwara ka tsela e e sa tshwanelang. Ka sekai, re ka ‘tshwenyega ka ntlha ya badira-bosula,’ ka gone re amogiwa boiketlo jotlhe. Mme seno ga se ne se diragala fa re na le “kagishō ea Modimo,” ka gobo re tla bo re itse gore Jehofa o bona dilo tsotlhe ebile o tla siamisa melato ka nako e e tshwanetseng. (Pes. 37:1-11) Ka jalo dipelo tsa rona di tla nna di ritibetse ebile ga di ne di re tlhotlheletsa go dira botlhaswa. Mo go re solegela molemo mo maikutlong, mo moeng le eleng mo mmeleng, ka gobo “pelo e e thethebetseñ hèla ke botshelō yoa nama.”​—Dia. 14:30.

8. (a) Go Bafilipi 4:7, “dipelo” di farologana jang le “megopolō”? (b) Fa re na le “kagishō ea Modimo,” ke ka ntlhayang go sa bonale gore re tla latlhegelwa ke tekatekano ya mogopolo? (c) A sengwe le sengwe se se letlelelwang ke Rraarona wa selegodimo se tla re gobaletsa ruri?

⁸ Ga se gore “megopolō” e ntse e le “dipelo,” lemororo go na le nyalano fa gare ga tsone. Fa mogopolo o tlhatlhanya ka boikitsiso, pelo yone e tlhotlheletsa motho. Ka jalo go tlhomamisega gore re latela tsela e e siameng, re tshwanetse ra itse Lefoko la Modimo ebile re tshwanetse ra ikaega ka ona ka thapelo. Fa megopolo ya rona e ka bo e tobekane ka mo go sa tlhokafaleng​—fa re ne re ka tlhobaela thatathata—​re ne re se kitla re dira ditshwetso tse di tshwanetseng. Tota re ka ba ra latlhegelwa ke tekatekano ya mogopolo. Lefa go ntse jalo, seno ga se kitla se re diragalela fa fela re na le “kagishō ea Modimo,” ka gobo fa re na le yone dipelo tsa rona di a re tlhokomedisa ebile megopolo ya rona e ikhuditse. Re dumela tota gore ‘seatla sa ga Jehofa se na le rona’ le gore ga go sepe seo Rraarona wa selegodimo a ka se letlelelang sa bo sa re gobaletsa ruri. (Math. 10:28; Dit. 11:21) Bogolo go go tlhobaela le go tseanngwa ke dikgopolo tse dintsi tse di tobekaneng, re ikanya mo go Jehofa tota, mme ka jalo “megopolō” ya rona e ntse e dibetswe. Jang? Ka “Keresete Yesu,” yo kamano e e gaufi ya botho le Rre wa selegodimo e kgonegileng ka ene.​—Bagal. 1:3-5.

9. Lemororo Paulo a ne a na le “kagishō ea Modimo,” a o ne a sa amege go tswa pelong gotlhelele?

⁹ Jaaka motho, Paulo le ene o ne a itse gore ga se gore Bakeresete ga ba amege go tswa pelong gotlhelele. O dumetse gore go retelelwa ga Bajuda-ka-ene go amogela “mahoko a a molemō” go mmaketse “bohutsana yo bogolo, le botlhoko yo bo sa kokobeleñ mo peduñ ea gagwe. Mme moaposetoloi yo o ne a sa phikanngwa ke tlhobaelo ebile o ne a kgotsofalela go tlogela dikgang mo diatleng tsa Modimo, o o dirang ka tshiamo mo go tlhopheng bao o tla ba utlwelang botlhoko. (Bar. 9:1-18) Ka gone, go sa kgathalesege bohutsana le botlhoko, Paulo o ne a letlelela “kagishō ea Modimo” gore e dibele pelo le megopolo tsa gagwe.

10. He kagiso e e neelwang ke Modimo e tla dibela dipelo tsa rona le megopolo ya rona jang?

¹⁰ Fela jaaka Paulo, yo kwantle ga pelaelo a neng a amega thata, re ka nna le “kagishō ea Modimo”​—eleng thethebalo le boiketlo tseo tsa ka fa gare tseo di tlisiwang ke kamano e e botlhokwa le Jehofa. Eleruri e ka dibela dipelo tsa rona le megopolo ya rona mo go tlhobaeleng mo go feteletseng kaga ditlhokafalo tsa rona. Re ka ikanya Jehofa, re tlhomamisegile ka botlalo gore o tlhokomela batlhanka ba gagwe ebile o araba dithapelo tsa bone. Mo boemong jwa gore dipelo tsa rona le megopolo ya rona di nne di tobekane ka metlha, di tla ikhutsa ka gobo re ikanya Rraarona wa selegodimo ka botlalo.​—Pes. 33:20-22.

Re Tlhomamisediwa go Tlhokomelwa ka Ditlhokafalo tsa Botshelo

11. Ereka re na le “kagishō ea Modimo,” ke ka ntlhayang re sa tshwanela go tlhobaela mo go sa tlhokafaleng kaga ditlhokafalo tsa botshelo?

¹¹ Fa tota re na le “kagishō ea Modimo” ebile re tlhatswegile pelo gore ke “eo u utlwañ thapèlō,” re tla kgona go dirisana le ditlhobaelo. (Pes. 65:2) Ka metlha re tla ikutlwa gore re thusiwa ke Modimo, mme ka ntlha ya moo re tla nna le kagiso e kgolo ya pelo le mogopolo. Ka sekai, ga re ne re tlhobaela ka mo go sa tlhokafaleng kaga ditlhokafalo tsa botshelo. Jesu o boleletse barutwa ba gagwe gore: “Se tlhobaeleñ kaga botshelō yoa lona, go re, lo tla ya eñ; leha e le kaga mmele, go re, lo tla apara eñ.” Ke ka ntlhayang fa re sa tshwanela go tlhobaela jalo? Ka ntlha ya gore Jehofa, yo o otlang dinonyane le dithunya sentle, eleruri a ka kgona go otla le go apesa batlhanka ba gagwe ba ba ikanyegang. Jalo Jesu a re: “Me se batleñ se lo tla se yañ, le se lo tla se nwañ, le gōna lo se ka loa etsaetsèga. . . . Me bogolo, batlañ bogosi yoa [Modimo] me dilō cotlhe tse, lo tla di okelediwa.” (Luke 12:22-31) Eleruri, fa re baya dikgatlhego tsa semoya kwa pele mo botshelong, re ka ikanya gore Rraarona wa selegodimo o tla re tlhokomela.

12. Ke setshwantsho sefe sa Dikwalo seo se bontshang gore ke ka ntlhayang le eleng ba ba ineetseng mo go Jehofa ba tshwanetseng go tila go kaya dilo tse di bonalang e le tsa botlhokwa jo bogolo?

¹² Le eleng batho ba ba ineetseng mo go Jehofa ba tshwanetse go tila go kaya dilo tse di bonalang e le tsa botlhokwa thata. Ka sekai, ka ntlha ya gobo Aberahame le setlogolo sa gagwe Lote ba ne ba sa tlhole ba lekanwa ke lefatshe, Aberahame o ne a raya Lote a re a itlhophele koo a neng a batla go nna teng, gore ba fedise dikomang gare ga badisa ba bone. Lote o ne a tlhopha lefatshe le lentle go gaisa, ntekwane seno se ne se kaya go tshela gare ga badira-bosula. Fa nako e ntse e tswelela, o ne a golegwa ga ba ga baka gore a tle go gololwa. (Gen. 13:1–14:16) Moragonyana, Lote o ne a go fitlhela go tshwanetse gore a tlogele dithoto tsa gagwe gore botshelo jwa gagwe bo bolokiwe fa Jehofa a senya Sodoma. Mme gape moragonyana, Lote o ne a ikutlwa a patelesegile go tlogela motse wa Soara mme a ya go nna mo legageng lengwe. (Gen. 19:1-26, 30-38) Lemororo a bidiwa “mosiami Lote,” go bonala a ‘thantse lomapo lo le tsebeng’ kaga boeleele jwa gore batho ba ba boifang Modimo ba tlhokomele thata seo eketeng ke melemo ya dilo tse di bonalang. (2 Pet. 2:7, 8) Abo go botoka segolo thata jang go rapelela kaelo e e tlhamaletseng mme ka metlha go bewa dikgatlhego tsa semoya kwa pele mo botshelong!

13. Ke ka ntlhayang fa Bakeresete ba sa tshwanela go etsaetsega ka ditlhokafalo tsa botshelo?

¹³ Fa re dira dikgang tsa semoya e le tsa botlhokwa jo bogolo go gaisa mo matshelong a rona, seno se tla oketsa kagiso ya rona ya pelo le mogopolo. Eleruri, re ka ikanya gore Ene yo gauta le selefera tsotlhe e leng tsa gagwe o nonofile ka botlalo go neela batlhanka ba gagwe ditlhokafalo tsa botshelo. (Hag. 2:8) Legale, go tshwanetse gore re rapele gore Modimo o “re neè gompiyeno seyō sa rona sa letsatsi,” ebile ke matshwanedi gore re dire ka botlhaga gore re tle re rarabolole ditlhokafalo tsa sebele. (Dia. 6:6-11; 31:10, 13-24; Math. 6:11) Mme ereka ‘re sa ka ra tla le sepe mo lefatsheng, le gona re se kake ra tswa le sepe, re tshwanetse go ritibadiwa ke dijo le diaparo.’ (1 Tim. 6:6-12) O etsaetsega ka ntlha ya eng? Mopesalema o ne a bolelela-ruri fa a ne a re: “Nkile ka ne ke le lekau, me yana ke cohetse; leha go nntse yalo, ga ke e se nke ke bone mosiami a latlhilwe, leha e le bana ba gagwè ba lègalègèla diyō.”​—Pes. 37:25.

Tsela ya Katlego ya Sebele

14. Ke ka ntlhayang fa go sa re tshwanele, rona jaaka basupi ba Bakeresete, gore re amege thata ka diphitlhelelo tsa batho le seo eketeng ke katlego e e tsamaelanang le tsone?

¹⁴ Go tlwaelegile thata ka batho ba lefatshe gore ba itlhobaetse ka go amega thata ka diphitlhelelo tsa botho. Legale, Bibela tota e kgothaletsa botlhaga le go godisa botswerere mo tirong ya motho. (Dia. 22:29) Mme go rata tumo mo go foufatsang le tlhobaelo e ntsi kaga eo eketeng ke katlego ga di nyalane le “kagishō ea Modimo.” Tota-tota, keletso ya go rena mo go ba bangwe e ka dira gore motho yo o ratang botumo a dirise mekgwa e e sa tshwanelang, ka gongwe a nyatsa maiteko a badiri-mmogo le ene le go tswelela ka tsela e e bosula eo e felelang ka go sa amogelwe ke Modimo. (Dia. 3:32; 2 Bakor. 4:1, 2) Ee, motho yo o lwelang go tuma a ka bakwa ke batho, fela jaaka baeteledipele ba bodumedi ba boitimokanyi ba makgolo a dingwaga a le 19 a a fetileng ba ne ba aba dimpho, ba rapela le go ikitsa go ya gore ba tle ba bakwe. Mme Jesu Keresete o nyaditse ditiro tsa bone a bo a re baitimokanyi bao “tuèlō ea bōnè ba setse ba e amogetse.” (Math. 6:1-18) Abo ope wa Basupi ba ga Jehofa o tla bo a le seeleele jang fa a itlhorontsha ka tlhobaelo eo a e itiretseng ka go leka go nna “thwadi,” mme labofelo a bo a latlhegelwa ke masego a bosakhutleng!​—Bapisa Yeremia 45:5.

15. Faele kaga eo eketeng ke katlego, motho yo o boifang Modimo a ka ithuta eng go Moreri 9:11 le 10:5-7?

¹⁵ Go motho yo tota a ipelelang “kagishō ea Modimo,” tsela ya katlego ya sebele ga e bake mekgwa e e sa tshwanelang gammogo le dikgang tse di sa utlwaleng. Mo Dikwalong o ithutile gore mo mokgatlhong ono wa segompieno, oo o tletseng ka batho ba ba sa itekanelang le ba ba leofang, “go siana ga go heñwe ke ba ba lobelō, leha e le ntwa ke ba ba thata, leha e le diyō ke ba ba botlhale, leha e le khumō ke batho ba ba nañ le tlhaloganyō.” (Mor. 9:11) Eleruri, “boeleele bo beèwa mo tlotloñ e kgolo,” ebile motho a ka bona “batlhanka ba palame dipitse, le dikgosana di tsamaea ha hatshe yaka batlhanka.” (Mor. 10:5-7) Ee, batho seka-dikgosana kana ba ba tlotlegang ba ka nna ba seka ba newa tlotlo eo e ba tshwanetseng, lemororo batlhanka​—batho ba ba sa tshwanelegeng gotlhelele​—ba ka nna ba ‘palama dipitse’ fela jaaka ba ba tlotlegang.

16. Katlego le phitlhelelo tsa bomodimo di ikaegile ka eng?

¹⁶ A ekete o ‘bolokilwe kafa sefalaneng,’ o sa ipelele maemo ao o kileng wa a eletsa? O tlhobaelelang ka seo? A “kagishō ea Modimo” e buse mo pelong ya gago, mme o utlwe thethebalo e e gomotsang eo e tlisiwang ke seno. Tswelapele o dira thato ya bomodimo mme o lope Rraago wa selegodimo gore a segofatse maiteko a gago mo tirelong ya gagwe. Seno ke sone kgang-kgolo mo botshelong. Katlego le phitlhelelo tsa bomodimo di ikaegile ka maitlhomo le dipono tsa semoya. Mopesalema o buile sentle fa a re: “Go sego monna eo o sa tsamaeeñ mo kgakololoñ ea baikepi, . . . Me go itumèla ga gagwè go mo molaoñ oa ga Yehofa: me o akanya mo molaoñ oa gagwè motshegare le bosigo. Me o tla nna yaka setlhare se se tlhomilweñ mo dinokaneñ tsa metse, se se uñwañ louñō loa shōna mo motlheñ oa shōna, se lekakaba ya shōna, le yeōna, le se keñ le shwaba: me leha e le eñ se o se dihañ se tla segōhala.”​—Pes. 1:1-3.

17. (a) Gore re ipelele katlego e kgolo go gaisa, re tshwanetse go dira eng? (b) O ka dira eng go thusa ba bangwe gore ba ipelele “kagishō ea Modimo e e hetañ tlhaloganyō eotlhe”?

¹⁷ Re ne re se kitla re ipelela katlego e kgolo mo botshelong go gaisa ya go simolola le go boloka botsalano jo bo gaufi-ufi le Jehofa Modimo. Fa tota re eletsa go mo itumedisa go tla re tlhotlheletsa gore re mo tlisetse tlotlo ka mafoko le ditiro tsa rona tsa poifomodimo, re direla ba ga rona molemo le go abalana le bone ‘mafoko a a molemo a a galalelang a Modimo o o itumetseng.’ (1 Tim. 1:11) Eleruri boipelo jwa rona bo tla nna bogolo fa, ka tshegofatso ya Rraarona wa selegodimo, re ka thusa ba bangwe gore ba ithute kaga maikaelelo a gagwe a a molemo ba bo ba simolola kamano e e botlhokwa ya boineelo go ona. Mme ka jalo ba tla kgona go dirisana le ditlhobaelo tsa botshelo fela jaaka rona. Le bone gape ba tla nna le “kagishō ea Modimo e e hetañ tlhaloganyō eotlhe.”

[Setshwantsho mo go tsebe 9]

Tota le eleng mo maemong a a thata go gaisa otlhe Mokeresete a ka nna le “kagishō ea Modimo”