‘Dirisang Mefuta Yotlhe ya Thapelo le Mokokotlelo’
“Lo nntse lo rapèla ka metlha eotlhe mo Moeeñ, ka thapèlō eotlhe le kokotlèlō, . . . lo nntse lo kokotlèlèla baitshepi botlhe.”—Baef. 6:18.
1. (a) Re tshwanetse go akanya kaga Jehofa Modimo ka ditsela dife fa re mo atamela ka thapelo? (b) Go na le mefuta efe ya motheo e mene ya thapelo?
MMOPI, eleng Jehofa Modimo, ga se Moitiri le Modiri wa tsotlhe fela yo o seng motho mme ke motho wa sebele yo o nang le maikutlo. O kgona go bona le go utlwa. Ka gale re tshwanetse go mo akanya ka tsela eno fa re mo atamela ka thapelo. Lefoko la Modimo le re gakolola go dira jalo ‘ka mefuta yotlhe ya thapelo le mokokotlelo.’ (Baef. 6:18) Seno se akaretsa eng? Go na le mefuta e le mene ya motheo ya thapelo—pako, malebogo, topo le mokokotlelo.
GO BAKA MODIMO MO THAPELONG
2, 3. Mofuta o tlotlegang le o o tsholetsegileng wa thapelo ke ofe, mme mangwe a mabaka a mantsi a gobo o tshwanetse Jehofa Modimo ke afe?
2 Tota pako ke mofuta o o tlotlegang le o o kwa godimo wa thapelo. E tshwanetse Mmopi ka ntlha ya dinonofo le diphitlhelelo tsa gagwe. Jaaka ‘Molaodi Morena Jehofa,’ gaa na yo o lekanang nae ka bolaodi. (2 Sam. 7:28) Ereka a sena tshimologo kana bokhutlo, Jehofa Modimo ke ‘Kgosi ya bosenabokhutlo’ e e senang molekane. (1 Tim. 1:17) Ke motho yo o galalelang tota mo eleng gore ga go motho ope yo o ka mmonang mme a bo a tshela. (Ekes. 33:20) Mogodimodimo ga a na yo o lekanang nae, o na le nonofo le botlhale tse di senang selekanyo, o siame gotlhelele ebile ke mothofatso ya lorato lo lo seng bohula. (Dute. 32:4; Yobe 37:23; Bar. 11:33; 1 Yoh. 4:8) O dirile dilo tsotlhe mme ka jalo ke mung wa lobopo lotlhe. (Gen. 1:1, 31; Pes. 50:10) Ga go na yo o ka gaisanang le ene ka leina le ka tumo. Ke ene fela yo ka tshwanelo a ka reng: “KE NNTSE EO KE NNTSEÑ.” Ke ene fela yo o nang le leina Jehofa, leo le tlhaloganngwang gore le kaya “O dira gore go diragale.” (Ekes. 3:14; 6:3) Ke ene fela yo ka tshwanelo a ka bolelang: “Ana loa bo lo tla nchwantsha le mañ, lo ntekanya naè, lo mpapisa le èna, gore re tlè re chwanè?” “Ke nna Modimo, me ga go na opè o pele; ke nna Modimo, me ga go na opè o o chwanañ le nna.”—Isa. 46:5, 9.
3 Godimo ga botlhe ba bangwe, Modimo yo o ntseng jalo yo o sa bapisiweng, yo o sa tshwantshwanngweng, yo o sa lekanngweng, yo o sa gaisiweng o tshwanetse pako. Ka mo go tshwanetseng, ka makgetlo a mantsi thata, go tloga go Ekesodo 15:11 go ya go Tshenolo 19:6, kgothatso ya go baka Jehofa e a neelwa. Mo tumalanong le se, a re se nneng re neela fela Mogodimodimo pako mo dithapelong tsa rona mme gape, a motlotlo wa rona wa tsatsi le letsatsi o kaele tlhokomelo go ene bogolo go rona. Mme kana, ga go na sepe se re iseng re se amogele ebile, kwantle ga gagwe, tota ga re ne re fitlhelela sepe.—Pes. 127:1; 1 Bakor. 4:7.
GO NEELA JEHOFA MALEBOGO
4, 5. Bakwadi ba ba farologaneng ba Bibela ba reng kaga go neela malebogo a rona go Jehofa, mme mangwe a mabaka a mantsi a gore re dire jalo ke afe?
4 Mo go amanang gaufi-ufi le go baka Jehofa ke go mo neela malebogo. Go a tshwanela tota go bontsha kanaanelo ya tsotlhe tseo Jehofa Modimo a re di diretseng, a re di direlang le tseo a santseng a tla re di direla. Bakwadi ba Dipesalema ba bonala ekete ba ne ba tlhagafaletse segolo-bogolo tshwanelo ya go bontsha ga rona malebogo go Jehofa. Gangwe le gape re bala dipolelo tse di etsang “A bo batho ba ka ka ba baka Jehofa ka ntlha ea molemō oa gagwè, le ka ntlha ya ditihō tsa gagwè tse di gakgamatsañ mo baneñ ba batho!” (Pes. 107:8, 15, 21, 31) Ka mo go tshwanang, Paulo o re gakolola go dira “thapèlō le kokotlèlō, di na le tebogō.” Ee, re tshwanetse ra bo re “leboga Modimo, eboñ Rara, ka metlha eotlhe, kaga dilō cotlhe.”—Bafil. 4:6; Baef. 5:20.
5 Abo di dintsi jang dilo tseo re ka bontshang Rraarona wa selegodimo tebogo ka tsone tsatsi le letsatsi! Re mo kolota malebogo a dilo tsotlhe tse di bopilweng le tse di bonalang tseo re di amogelang, tseo di sa direng gore botshelo bo kgonege fela mme di bo dira gore bo itumedise. (Yak. 1:17) A re anaanela masego otlhe a semoya ao Jehofa a a tshololelang batlhanka ba gagwe—melemo ya setlhabelo sa ga Keresete, Lefoko la Modimo le moya wa gagwe, phuthego ya Bokeresete le mpho ya thapelo? A re anaanela tshegofatso ya bokopano jwa badumedi-ka-rona, tshiamelo ya go direla ditlhokafalo tsa ba bangwe, le tsholofelo e ntle ya Bogosi? Fa go ntse jalo, a re bontsheng tebogo mo dithapelong tsa rona. Ke boammaaruri, ka metlha ga re ne re kgona go gakologelwa kana go umaka tsotlhe tseo Modimo o re di diretseng. Mme re tshwanetse go ikutlwa fela jaaka mopesalema: “Baka Yehofa, mōea oa me, me u se ka ua lebala dithushō tsa gagwè cotlhe.”—Pes. 103:2.
GO DIRA DITOPO GO JEHOFA
6. Ditopo tsa rona di akaretsa dikarolo dife di le tharo, mme Jesu santlha-ntlha, o ile a re laela go rapela kaga eng?
6 Eleruri ke kgomotso e kgolo ya gore re ka tla go Jehofa ka “botlhōkapoihō” fa re dira ditopo. (Baheb. 4:16; 1 Yoh. 3:21) Jaaka Jesu a bontshitse mo Thapelong ya gagwe ya Sekao, ditopo tsa rona gantsi di ama dikarolo tse tharo tsa kakaretso—go fenya ga tshiamo, ditlhokafalo tsa rona tsa semoya le ditlhokafalo tsa rona tsa senama. Ka mo go tshwanetseng, Jesu o re boleletse gore re rapelele, santlha, go itshepisiwa ga leina la ga Jehofa, go tla ga bogosi jwa gagwe le go dirwa ga thato ya gagwe mo lefatsheng. Jesu ka boene o rapetse jaana: “Rara, galaletsa leina ya gago.” (Math. 6:9, 10; Yoh. 12:28) Mo ditopong tse di ntseng jalo go tla akarediwa gape gore Jehofa a atlanegise tiro ya batlhanka ba gagwe mo lefatsheng le gore a tlamele bao ba leng mo mathateng le mo ditekong ka ntlha ya leina la gagwe. (Pes. 118:25) Lefa e le go tlodisa kgakololo ya ga Paulo matlho ya go rapelela botlhe bao ba leng mo maemong a a kwa godimo “gore re kè re tshelè mo boiketloñ le mo tidimaloñ, ka poihōmodimo eotlhe le ka tshisimogō.”—1 Tim. 2:2.
7, 8. Mme sa bobedi re ka lopa Jehofa kaga mofuta ofe wa dikgang tsa botho?
7 Dithapelo tsa rona gape di tshwanetse go bontsha kamego e e masisi ya boemo jwa rona jwa semoya. Moo go ne go tla akaretsa go lopa Rraarona wa selegodimo boitshwarelo jwa dibe tsa rona. “Ha motho moñwe a leoha re na le Mueledi kwa go Rara, eboñ mosiami Yesu Keresete.” (1 Yoh. 1:8–2:1) Gape re tshwanetse go rapelela moya wa Modimo o o oketsegileng le gore re seka ra o hutsafatsa. (Luke 11:13; Baef. 4:30) Fa re dirisana le maemo a a lekang, mo Dikwalong re kgothalediwa go rapelela botlhale. (Yak. 1:5-8) Go feta moo, re ka, ebile re tshwanetse go rapelela tshegofatso ya ga Jehofa mo tirelong ya rona e e boitshepo, go akareletsa le go rera le go ruta ga rona mo tshimong. Dithapelo tse di ntseng jalo di dumela molao-motheo wa gore, lefa lemororo re ka jala le go nosetsa, ke Modimo yo o dirang gore dilo di tlhoge, yo o atlanegisang dilo.—1 Bakor. 3:7.
8 Gape, mo go lopeng Modimo ga rona, a re se tlodiseng matlho kana go tlhokomologa diphapaano dipe tse re ka neng re na le tsone le mokaulengwe wa rona wa Mokeresete, le molekane wa rona wa lenyalo kana le tokololo epe fela ya lelapa la rona. Mo dinakong tse di ntseng jalo go ka nna le tshekamelo ya go kgaotsa go buisana—tsela e motlhofo mme lefa go ntse jalo e le e eseng botlhale ebile e le bohula go e tsaya. Bogolo, re tshwanetse go rapelela kgogo le nonofo tsa go rarabolola bothata jo re nang le jone le motho mongwe. A re kopeng gape thuso mo go itshwareleng le go lebaleng ditlolo, gore re seka ra nna bogalaka le go boloka melato.—Math. 6:12.
9, 10. Re na le motheo ofe wa Dikwalo wa go lopa Jehofa kaga dilo tse di bonalang?
9 Kwantle ga dikgang tsa semoya, Jesu o bontshitse gore go re siametse go lopa Jehofa Modimo ka sejo sa tsatsi le letsatsi, eleng ditlhokafalo tsa rona tsa dilo tse di bonalang. (Math. 6:11) Ee, re ka kopa Jehofa Modimo ka ditlhokafalo tsotlhe le dipe fela tsa rona, mme re dira jalo tsatsi lengwe le lengwe. Seno se dumalana le seo Jesu a se buileng gape mo Therong ya gagwe ya mo Thabeng: “Ke gōna, se tlhobaeleleñ ka moshō: gonne ka moshō go tla itlhobaèlèla ka gosi. Letsatsi leñwe le leñwe le lekanwe ke boshula yoa yeōna.”—Math. 6:34.
10 A re tlhoka tiro, re sa thapiwa? He re ka lopa Jehofa Modimo go segofatsa le go kaela maiteko a rona a go bona tiro. A rea lwala? Re ka rapelela botlhale, nonofo le bopelotelele tsa go dirisana le tlhokofatso ya rona ka tsela e e molemo segolo. Eleruri ke kgomotso gore re ka tshololela dikamego tsotlhe tsa rona fa pele ga Jehofa, fela jaaka re bala: “Lo se ke loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō.” (Bafil. 4:6) Legale, maloka le dikgang tsotlhe tse di ntseng jalo re rapela ka boemo jo—‘Fa e ka nna thato ya Modimo,’ fela jaaka Jesu a ne a rapela mo tshimong ya Gethesemane.—Math. 26:39; 1 Bakor. 4:19; Yak. 4:15.
KA MOKOKOTLELO
11-13. (a) Go kokotlela Jehofa go kaya eng, mme mo go tshwanetse dikgang dife segolo? (b) Boitemogelo jwa mosimanyana bo bontsha seno jang?
11 Re bolelelwa go rapela ka ‘mefuta yotlhe ya thapelo le mokokotlelo.’ (Baef. 6:18) Ke ka ntlhayang fa re tsenya mokokotlelo mo ditopong tsa rona? Ka gobo mokokotlelo o ya kgakajana go na le ditopo. One ke thapelo e e tlhoafetseng, e e masisi, topo e e tswang pelong. Mokokotlelo o tlhalosiwa jaaka “topo e e boikokobetso le e e tlhoafetseng.” Mo Dikwalong tsa Bakeresete tsa Segerika, lefoko la puo ya ntlha ka gale le dirisetswa Modimo. Ka gone go gatelela ntlha ya gore, godimo ga go nnela ruri mo thapelong, eleruri go na le tlhokafalo ya go nna masisi. Go a utlwala gore ga se ditopo tsotlhe tsa rona tse eleng mekokotlelo. Mme dithapelo tsa rona di tshwanetse go e akaretsa. Re bala le eleng gore Jesu Keresete o isitse “mekokotlèlō e e nañ le selelō se se tona le dikeledi . . . , [mme a] utlwiwa ka ntlha ea go boiha Modimo ga gagwè.” (Baheb. 5:7) Ka mo go tshwanang, fa re utlwa ka go bogisiwa mo go setlhogo ga bakaulengwe ba rona, go ka tshwanela gore re se lope Modimo kaga bone fela mme gape go kokotlela Jehofa go ba neela nonofo ya go itshoka le go fenya boikaelelo jwa pogiso.—Bapisa 2 Bakorintha 1:8-11.
12 Fa re ikuela go Jehofa go bona thuso mo ntweng ya rona ya go kgoba mebele ya rona, ka tshwanelo re tla fa pele ga gagwe jaaka bakokotledi. (Bar. 7:15-24; 1 Bakor. 9:27) A go na le bothata mo go laoleng megopolo kana bogale jwa gago? He, kwantle ga go siamisa kutlwiso-botlhoko epe fela eo a ka neng a e bakile, motho o tshwanetse go lopa kana go kokotlela Jehofa Modimo ka boikokobetso go bona thuso. Go tweng fa bothata bo akaretsa go ja le go nwa? Gape, go tla bo go siame go kokotlelela Jehofa thuso gammogo le go dirisa thuso ya ditokololo tsa lelapa le/kana ya bagolwane ba phuthego.
13 Le eleng bana ba ka direla Jehofa mokokotlelo ba bo ba utlwiwa, fa ba rutilwe sentle. Ka sekai, mosimanyana wa dingwaga di le 10 o ne a kwalela Mokgatlho wa Watchtower mo go latelang: “Ka November a le 20 ka 3 p.m. ke ile ka kgatlhantshwa ke basimane ba babedi mo segotlong sa sekolo, mme mongwe wa bone a baya thipa mo mometsong wa me mme a re o tla mpolaya. Ke ile ka rapela Jehofa, mme ka yone nako eo koloi ya mapodise e ile ya kgabola mme basimanyana ba sia.”
RE TSHWANETSE GO DIRA KAFA DITOPONG TSA RONA
14, 15. Tlhomamo e tlhoka eng mo go bao ba rapelang, mme go na le dikao dife tsa Dikwalo tseo di bontshang molao-motheo o?
14 Legale, fa re rapela Jehofa Modimo, gape re tshwanetse go ikitlieleletsa go dira karolo ya rona. Kgosi Dafide gaa ka a kokotlela Modimo fela mo nakong ya khuduego e kgolo mme gape o ne a tsaya dikgato tse di tshwanetseng. (2 Sam. 15:31–17:14) Batlhanka ba bangwe ba ba ikanyegang ba ga Jehofa, ba ba etsang Jakoba, ba ne ba dira jalo. (Gen. 32:9-21) Ee, dikgato tsa rona di tshwanetse go dumalana le ditopo tsa rona.
15 A re rapelela sejo sa rona sa tsatsi le letsatsi? He re tshwanetse go ikitlieleletsa go se direla, ka gobo “ha moñwe a gana go diha, le gōna a se ke a ya.” (Math. 6:11; 2 Bathes. 3:10) A re rapelela gore re seke ra tsenngwa mo thaelong? He re tshwanetse go tila go itsenya ka boomo mo maemong a a dirang gore re ineele. (Math. 6:13) A re rapelela kagiso gare ga rona? He re tshwanetse go nna badira-kagiso. (Pes. 122:6-9; 1 Pet. 3:11) Mo go kaya gore re tshwanetse go tlhokomela gore re seka ra kgopisa ba bangwe ka mo go sa tlhokegeng kana go tsosa dikgaruru tse di sa tlhokegeng. Re tshwanetse go tila go nna ba ba ama-amegang fela. A re rapelela gore ekete tiro ya Modimo e ka oketsega? He re tshwanetse ra bo re ntse re “totahetse mo tihoñ ea Morèna.” (1 Bakor. 15:58) A re rapelela botlhale? He gape re tshwanetse go dirisa dilo tsotlhe tse Modimo o di baakanyeditseng go bona botlhale.—Yak. 1:5-8; Pes. 119:105; 2 Tim. 3:16; Baheb. 10:23-25.
A RE KA TOKAFATSA BOLENG JWA DITHAPELO TSA RONA?
16, 17. Re ka tokafatsa boleng jwa dithapelo tsa rona jang, re di boloka di le bothito ebile di na le bokao?
16 Dithapelo tsa rona eleruri di senola gore re sekametse go le kana-kang dilong tsa semoya. A re ka tokafatsa boleng jwa dithapelo tsa rona mme, fa go ntse jalo, jang? Santlha, re tshwanetse go tsaya dithapelo tsa rona di le masisi le go bua go tswa pelong. Ka go tlhatlhanya thata ka molemo wa Modimo le ka bopelonomi jwa gagwe jo bo lorato, ka go akanya ka ene jaaka Rre yo o lorato yo gape a nitameng mo go se se siameng, re ka tsenya bothito le boikutlo tse di oketsegileng mo dithapelong tsa rona. Eleruri, re batla go bua le Modimo go tswa pelong, ka boingotlo. Ka jalo, re tshwanetse go disa kgatlhanong le go itlhaganela fela mo dithapelong tsa rona. Lefa dilo tse dingwe di ka tlhokomologwa, go seka ga nna jalo ka dithapelo tsa rona le ka motlha ope.
17 Gape re ka tokafatsa boleng jwa dithapelo tsa rona ka go dira maiteko a go sa dirise mafoko le dipolelwana tse di tshwanang gangwe le gape. (Math. 6:7) Go boaboeletsa mo go ntseng jalo go ka dira gore dithapelo tsa rona di tlhaele boikutlo le bokao jwa sebele. Mafoko a a ithutilweng ka tlhogo, kwantle ga pelaelo, a tla tswa kwa tlhogong go na le mo pelong. Bakeresete bao ba etelelang pele mo dithapelong tsa lelapa segolo-bogolo ba tshwanetse go tlhokomela ntlha e. Go dirisa mafoko a le mangwe tsatsi le letsatsi go ka dira gore megopolo ya bao ba reeditseng e akga-akgege. Go tlhatlhanya ka megopolo ya Dikwalo tsatsi le letsatsi le go tlhagolela kanaanelo e kgolwane ya bopelonomi jo bo sa tshwanelang jwa ga Jehofa go rona go ka re thusa go boloka dithapelo tsa rona di le bothito ebile di na le bokao.
DITUELO TSE DI TLHAMALETSENG LE TSE DI SA TLHAMALALANG
18. Ke ka ntlhayang fa bangwe ba bao ba sa fitlheleleng dipatlafalo tsa Modimo tsa dithapelo tse di amogelesegang ba ka konela ka gore ditopo tsa bone di arabilwe?
18 Thapelo ke mofuta wa kobamelo oo o dirwang lefatshe ka bophara. Batho ba bantsi ba dumela gore Modimo o araba dithapelo tsa bone, lefa lemororo ditopo tsa bone di sa fitlhelele dipatlafalo tsa bomodimo tsa thapelo. Mo go bonalang ekete ke kganetso mo go ka tlhalosiwa jang? Ke ka ntlha ya selo se le sengwe fela, e ka nna fela ka ntlha ya molao wa maemo. Ka sekai, ga twe masole otlhe a a mo ntweng a a rapela. Ereka gantsi bontsi jwa one bo falola, bao ba falolang ba ka konela ka gore Modimo o arabile dithapelo tsa bone. Kana, ekane e ne e le kgang ya go rakana ga dipaka. Mme gape, go ka diragala ka ntlha ya phelelo ya mogopolo mo mmeleng.
19. Go na le bosupi bofe jwa gore Jehofa Modimo eleruri o araba dithapelo tsa bao tota eleng batho ba gagwe ebile ba fitlhelela dipatlafalo tsa thapelo?
19 Lefa go ntse jalo, bao ba fitlhelelang dipatlafalo tsa bomodimo tsa thapelo ba na le bosupi jo bo tletseng jwa gore Jehofa Modimo eleruri o araba dithapelo tsa bone. Ba bone tshegofatso ya ga Jehofa mo maitekong a bone ba le mmogo le a motho-ka-mongwe. Ka ntlha ya moo, ‘yo monnye o nnile sekete, le yo mmotlana o nnile morafe o o thata.’ (Isa. 60:22) Fa Jehofa a ne a araba dithapelo tsa bone, o tsamaisitse dikgang mo eleng gore ‘go ne go se sebolao sepe se se thudilweng kaga bone se se segofetseng.’—Isa. 54:17.
20. Jehofa o araba ditopo tsa pelo yotlhe tse di lebisitsweng go ene ka ditsela dife tse di farologaneng?
20 Jehofa o dirisa bobedi batlhanka ba gagwe ba selegodimo le ba selefatshe mo go arabeng ditopo tsa pelo yotlhe tse a di lopiwang. Ka dinako dingwe, ke moengele yo o tsamaisang dikgang gore mongwe yo ka thapelo a senkang Modimo a etelwe ke mongwe wa batlhanka ba ga Jehofa kwa legaeng la gagwe. (Bapisa Ditiho 10:30-33; 17:26, 27.) Mme gape, Jehofa o arabela dithapelo tse dintsi ka didirisiwa tsa gagwe tsa selefatshe. A ka tsenya go bontsha lorato kana kgato ya bopelonomi mo mogopolong wa mongwe wa batho ba gagwe go motho yo o tshwanelegang yo o tlhokang tota. Kana, karabo ya thapelo ya mongwe e ka tla ka go ithuta lefoko la Modimo, ka go bala kgatiso e e thailweng mo Bibeleng, kana ka seo a se tlhokomedisiwang ke bagolwane mo phuthegong. Go ntse jalo ka ntlha ya gore dithapelo tsa batlhanka ba ga Jehofa gantsi ke tsa tshedimosetso ya semoya kana tsa botlhale mo go dirisaneng le boemo jo bo rileng.
21. Mengwe ya melemo e e sa tlhamalalang ya thapelo ke efe?
21 Gape re ka bona melemo e e sa tlhamalalang mo go rapeleng. Tota ntlha ya gore re latlhetse mekgweleo ya rona go Jehofa, eleng Rraarona wa selegodimo, go re dira gore re ikutlwe re atamalane nae thata. Ka go bontsha go mo anaanela mo pakong le malebogong, re thusiwa go kgotsofalela tseo re nang le tsone segolo. Ka go kokotlela Jehofa ka tlhoafalo, re thusiwa go nna ba ba ikokobeditseng le ba ba ikaegang ka ene bogolo go go ikaega ka tlhaloganyo le nonofo tse eleng tsa rona. (Dia. 3:5, 6; Bafil. 4:13) Mme, legale, fa re rapela, megopolo ya rona e mo dilong tse di agelelang. (Bafil. 4:4-8) Ka sekai, fa re tlhobaela bosigo, eleruri go ka nna botoka thata fa re ka rapelela dikgatlhego tsa Bogosi le dikgang tsa semoya go na le go fuduega, go akanya ka matshwenyego, go ijesa dijo tsa ditoro kana go letlelela megopolo ya rona go sekamela mo dilong tsa nama. Ee, re batla go ‘latlhela tlhobaelo yotlhe ya rona mo go Jehofa, ka wa re babalela.’ Fa re sa lobele Rraarona wa selegodimo sepe, seno se tla re thusa go itlhatlhoba ebile se tla okeletsa mo go mo atameleng thata-thata le mo go nneng ditsala tse di gaufi-ufi tsa gagwe.—1 Pet. 5:7; 2 Bakor. 13:5.
22. Go tsaya dithapelo tsa rona di le masisi go kaya eng, mme go felela ka ikanyo efe?
22 Eleruri, thapelo, go akaretsa pako, malebogo le mokokotlelo, ke tshiamelo e e botlhokwa tota, ebile re tla bapala mo gontsi thata ka go tsaya dithapelo tsa rona di le masisi. Go rapela go bontsha gore eleruri re na le tumelo. Kwantle ga pelaelo, re batla go dira kafa dithapelong tsa rona, re sa itlhaganele fela, ka metlha re batla go tokafatsa boleng jwa tsone, le gore le ka motlha ope re se di letlelele gore e nne tlwaelo fela ya go boeletsa mafoko. Ka go dira jalo, re tla roba ka mo go sa tlhamalalang, ebile re ka nna le ikanyo ya gore Jehofa Modimo o tla re duela ka go araba dithapelo tsa rona tseo di dumalanang le thato ya gagwe.
[Setshwantsho mo go tsebe 11]
Re kolota Modimo malebogo a Lefoko la gagwe, ditlhokafalo tsa botshelo, phuthego ya Bokeresete le ditshiamelo tsa thapelo le tsa tirelo